Seminare
Mosaea 1: “A Na Leai Nei Papatusi”

“Mosaea 1: ‘Ana Leai Nei Papatusi,’” Tusi Lesona a Tagata o le Vasega o le Tusi a Mamona (2024)

“Mosaea 1,” Tusi Lesona a Tagata o le Vasega o le Tusi a Mamona

Mosaea 1

“A Na Leai Nei Papatusi”

Ata
se alii talavou o loo faitauina tusitusiga paia

O le a se aafiaga e mafai ona i ai i le avea ai o tusitusiga paia e faatumauina le faatuatua ia Iesu Keriso i lou olaga atoa? Na aoao atu e le Tupu o Peniamina ona atalii i le taua o le matafaioi o tusitusiga paia i lo latou faatuatua. O lenei lesona e mafai ona fesoasoani ia te oe e faateleina ai lou naunautaiga e suesue i tusitusiga paia.

O le a le mea e taua i lo tatou faatuatua ia Iesu Keriso?

  • O le a faapei o tatou olaga e aunoa ma le Tusi a Mamona po o isi tusitusiga paia?

Ina ia fesoasoani ia te oe e mafaufau i lenei fesili, atonu e te manao e matamata le vitio “Talatuu o Tusitusiga Paia,” o loo maua i ChurchofJesusChrist.org, mai le faailotaimi 0:00 i le 5:36.

Mafaufau loloto i fesili nei pe tusi tali i lau api talaaga mo suesuega:

  • O le a sou lagona e uiga i tusitusiga paia? Aisea?

  • Afai e te faaauauina au mausa o le suesueina o tusitusiga paia i le taimi nei mo nai tausaga e sosoo ai, o le a sou manatu o le a faapefea ona aafia ai oe?

  • Afai e le o ia te oe se mausa o le suesueina o tusitusiga paia i le taimi nei, o le a se mea e tatau ona e malamalama pe lagona e amata ona suesue i ai?

Faaauau pea ona mafaufau e uiga i nei fesili a o e suesue i lenei lesona. O le a e faitauina le fautuaga mai le Tupu o Peniamina i ona atalii e uiga i tusitusiga paia. Saili e aoao e ala i le Agaga Paia i le auala e mafai ai e tusitusiga paia ona faamanuiaina lou olaga.

Fautuaga mai le Tupu o Peniamina

O le tamā o le Tupu o Peniamina, o Mosaea, na lapataia e le Alii e tatau ona tuua e lona nuu lo latou nuu moni. Ina ua latou usiusitai, sa latou mauaina le nuu o Saraemila (tagai Ominae 1:12–19). O nei vaega e lua o tagata na o mai faatasi i lalo o le taitaiga a Mosaea, o le sa tofia e avea ma tupu, ma mulimuli ane avea Peniamina ma tupu i le mavae ai o lona tamā. E mafai ona fesoasoani le iloa atili e uiga i le Tupu o Peniamina ae e te lei suesue i mea sa ia aoao atu i ona atalii.

Faitau Upu a Mamona 1:12–18 ma le Mosaea 1:1, ma vaavaai mo faigata na feagai ma le Tupu o Peniamina ma auala na ia faagaeetia ai oe.

  • O le a se mea sa e mauaina?

  • Aisea atonu e te manao ai e faalogo i fautuaga mai le Tupu o Peniamina?

Faitau le Mosaea 1:2–7, ma vaavaai mo mea na aoao atu e le Tupu o Peniamina i ona atalii e uiga i tusitusiga paia. Atonu e fesoasoani le iloa e faapea, “o mealilo a le Atua o upumoni faaleagaga ia e naʼo faaaliga e mafai ai ona malamalama i ai (Taiala i Tusitusig Paia, “Mealilo a le Atua,” scriptures.ChurchofJesusChrist.org). Afai e te manao e vaai i se vitio o loo faaalia ai nisi o upu a le Tupu o Peniamina, matamata i le “Talatuu o Tusitusiga Paia,” o loo maua i le ChurchofJesusChrist.org, mai le faailotaimi 5:40 i le 6:20.

Ata
aikona, faamaumau

  1. Tali le fesili lenei:

    • O le a se mea na e aoao mai le Tupu o Peniamina e uiga i tusitusiga paia?

O nisi nei o mataupu faavae e mafai ona tatou aoao mai i le Tupu o Peniamina:

  • Afai tatou te le suesueina pea lava pea ma le filiga ia tusitusiga paia, e mafai ona mou malie atu lo tatou faatuatua.

  • O le a tatou manuia e ala i le suesueina ma le filiga o tusitusiga paia.

  • Aisea e te manatu ai e mafai ona mou malie atu lo tatou faatuatua pe afai tatou te le suesue i tusitusiga paia?

Ua folafola mai e le Alii e faamanuia i tatou i le tele o auala a o tatou faitau i tusitusiga paia. Suesue ni nai fuaitau nei ma sue nisi o faamanuiaga nei:

Ata
aikona, faamaumau

  1. Tali fesili nei:

    • O le fea o nei faamanuiaga e sili ona e manao i ai i lou olaga?

    • O le a faapefea ona faateleina lo tatou faatuatua i le Alii ma Lana talalelei ona o nei faamanuiaga?

Tusitusiga paia ma lo tatou faatuatua

Na aoao mai Elder D. Todd Christoffferson o le Korama a Aposetolo e Toasefululua:

Ata
Elder D. Todd Christofferson

O le faamoemoega tutotonu o tusitusiga paia uma o le faatumuina lea o o tatou agaga i le faatuatua i le Atua le Tama, ma Lona Alo o Iesu Keriso—faatuatua o loo soifua i La’ua; faatuatua i le fuafuaga a le Tama mo lo tatou tino ola pea ma le ola e faavavau, faatuatua i le Togiola ma le Toetu o Iesu Keriso lea e galueaiina lenei fuafuaga o le fiafia, faatuatua e avea le talalelei a Iesu Keriso ma o tatou olaga, ma le faatuatua e oo ina iloa “le Atua moni e toatasi, atoa ma Le ua [Ia] auina mai, o Iesu Keriso lea” (Ioane 17:3). (D. Todd Christofferson, “O Le Faamanuiaga o Tusitusiga Paia,” Liahona, Me 2010, 34)

Ata
aikona, faamaumau

  1. Ina ia fesoasoani ia te oe e mafaufau loloto pe mafai faapefea e tusitusiga paia ona faateleina lou faatuatua i le Tama Faalelagi ma Iesu Keriso, fai ia le itiiti ifo ma le lua o mea nei:

    1. Tusi mau faasino i ni fuaiupu se lua pe tolu na i ai se aafiaga malosi ia te oe ma lau molimau, aemaise lava ia Iesu Keriso po o le Tama Faalelagi. Na faapefea ona fesoasoani nei mau ia te oe? Mata e faapefea ona ese lou olaga pe ana faapea e te lei faitauina lava na fuaiupu?

    2. Suesue au tusitusiga paia mo le lima minute. Vaavaai mo soo se upumoni e mafai ona fesoasoani ia te oe e tumau faamaoni ai i le Alii ma Lana talalelei. Ia gauai atu i soo se lagona e mafai foi ona fesoasoani. Tusi e uiga i lou aafiaga.

    3. Tesi pe talanoa i se tasi e te manatu e matuai faamaoni lava i le Alii o Iesu Keriso. Fesili atu i lena tagata po o le a le matafaioi o loo faia e tusitusiga paia e fesoasoani ai ia te ia e tumau faamaoni ai.

    4. Matamata i se tasi o vitio nei, ma vaavaai mo faataitaiga o auala e mafai ai e le suesueina o tusitusiga paia ona faamanuiaina o tatou olaga ma faateleina lo tatou faatuatua i le Tama Faalelagi ma Iesu Keriso. O loo maua vitio uma i le ChurchofJesusChrist.org.

O au suesuega faaletagata lava ia o tusitusiga paia

Mafaufau loloto i au suesuega o tusitusiga paia. O a ni auala e tuputupu ae ai lou faatuatua i le Tama Faalelagi ma Iesu Keriso a o e suesue ma le filiga i le afioga a le Atua? E i ai se mea e te lagona e finagalo le Alii e te faia e faaleleia ai lau suesuega? Mafaufau e tusi soo se sini atonu o i ai i lau api talaaga mo suesuega.

Lolomi