Mōsaia 5:6–15

“Toʻo Kiate Kimoutolu ʻa e Huafa ʻo Kalaisí”

ʻE lava ke ʻuhingamālie ʻaupito ʻa e ngaahi hingoá. ʻOku ʻuhinga ki he hā ke toʻo kiate koe ʻa e huafa ʻo Kalaisí? ʻOku ʻi he Mōsaia 5 ʻa e fakaʻosinga ʻo e malanga ʻa e Tuʻi ko Penisimaní ki hono kakaí ʻi he taimi naʻá ne tānaki fakataha ai ʻa e kakaí ke foaki kiate kinautolu ha hingoá (vakai, Mōsaia 1:11). ʻE lava ke tokoni atu e lēsoni ko ʻení ke mahino kiate koe ʻa e mahuʻinga hono toʻo kiate koe ʻa e huafa ʻo Sīsū Kalaisí.

Ko ha hingoa foʻou

Fakakaukauloto ki ha kiʻi leka paea ʻoku ʻikai ha taha ke tokoniʻi pe tokangaʻi ia kae faifai kuó ne feohi mo ha fāmili ʻofa mo pau ʻoku nau loto ke ohi ia.

• Ko e hā ha ngaahi ʻuhinga ʻe niʻihi ʻe ala fiemaʻu ai ʻe he leka paeá ke ohi mo ʻai kiate ia e hingoa hono fāmili foʻoú?

• Ko e hā ha ngaahi tāpuaki ʻe lava ke foaki ange ʻe heʻene faʻē mo e tamai foʻoú he ʻikai lava ke ne maʻu ʻiate ia peé?

• Ko e hā nai ha ongo ʻe ala maʻu ʻe he paeá fekauʻaki mo hono fāmili foʻoú?

ʻI he lea maʻongoʻonga ʻa e Tuʻi ko Penisimaní ki hono kakaí, naʻá ne pehē, “ʻOku ou fakaʻamu ke mou toʻo kiate kimoutolu ʻa e huafa ʻo Kalaisí” (Mōsaia 5:8) pea ui kimoutolu “ko e fānau ʻa Kalaisí” (Mōsaia 5:7). Ko ha niʻihi ʻo e kakai ʻo e Tuʻi ko Penisimaní ko ha kau Nīfai, pea niʻihi ko ha hako ʻo Mūleki. Naʻe fiemaʻu ʻe he Tuʻi ko Penisimaní ke fakatahaʻi ʻa e kakai kotoa pē ʻi ha hingoa pē ʻe taha ʻo hangē ha fāmilí.

ʻI hoʻo ako e folofolá he ʻaho ní, fakalaulauloto ki ha ngaahi founga ʻokú ke hangē ai ko e tokotaha paea ʻi he tūkunga ʻi ʻolungá pea mo e ʻEikí ʻo hangē ko e mātuʻa foʻoú.

Ke tokoni ke mahino kiate koe ʻa e meʻa naʻe akoʻi ʻe he Tuʻi ko Penisimaní, hiki e saati ko ʻení ʻi hoʻo tohinoa akó.

Ko e ngaahi tāpuaki ʻo hono toʻo kiate kitautolu ʻa e huafa ʻo e Fakamoʻuí	Founga ʻoku ou toʻo ai kiate au ʻa e huafa ʻo e Fakamoʻuí

Manatuʻi naʻe fakamoʻoniʻi ʻe he kakaí ʻi he Mōsaia 5:1–5, kuo fakahoko ʻe he Laumālie ʻo e ʻEikí “ha fuʻu liliu lahi” ʻiate kinautolu pea naʻa nau “loto fiemālie ke fai ha fuakava mo [e] … ʻOtuá ke fai ʻa hono finangaló” (Mōsaia 5:2, 5).

Lau ʻa e Mōsaia 5:6–10, ʻo kumi e ngaahi foʻi lea mo e ngaahi kupuʻi lea te ke lava ʻo hiki ʻi lalo ʻi he kōlomu ʻe ua ʻo hoʻo sātí. Mahalo ʻe tokoni ke ʻiloʻi ʻoku fokotuʻu mai ʻe he toʻukupu toʻomataʻu ʻo e ʻOtuá ha fakataipe lelei pea ʻoku fakataipe ʻe he toʻukupu toʻohemá ʻa e taʻe-fiemālié.

1. Tali e ngaahi fehuʻi ko ‘ení:

   • Ko e hā ha ngaahi tāpuaki ʻokú ke fiemaʻu ʻi hoʻo moʻuí ʻa ia ko e Fakamoʻuí pē te Ne lava ʻo ʻoatú? (Fakakaukau ke fakaʻaongaʻi e ngaahi kupuʻi lea naʻá ke maʻu mei he lea ʻa e Tuʻi ko Penisimaní ke tali ʻa e fehuʻi ko ʻení.) Ko e hā ʻokú ke fiemaʻu ai e ngaahi tāpuakí ni?

   • ʻE lava fēfē ke hangē ʻa e Fakamoʻuí ko ha mātuʻa ʻofa kiate kitautolú?

   • Fakatatau ki he Tuʻi ko Penisimaní, naʻe hoko fēfē ʻa e kakaí ko e fānau ʻa Kalaisi, pe toʻo kiate kinautolu ʻa e huafa ʻo Sīsū Kalaisí?

Founga ʻoku tau toʻo ai e huafa ʻo Kalaisí

Ko e moʻoni ʻe taha te tau lava ʻo ako mei he Tuʻi ko Penisimaní, ʻi he taimi ʻoku tau fakahoko mo tauhi ai e ngaahi fuakava toputapú, ʻoku tau hoko ko e fānau ʻa Kalaisi pea toʻo kiate kitautolu Hono huafá.

Lau e lea ko ʻeni ʻa Palesiteni Tāleni H. ʻOakesi ʻo e Kau Palesitenisī ʻUluakí ke fakamahinoʻi ʻa e founga ʻoku tau toʻo ai kiate kitautolu ʻa e huafa ʻo e Fakamoʻuí.

Fakatatau ki he sīpinga fakafolofolá, ko e kakai ʻoku papitaisó ʻoku nau fakamoʻoni ʻi he ʻao ʻo e Siasí “kuo nau fakatomala moʻoni mei heʻenau ngaahi angahala kotoa pē, pea ʻoku nau loto fiemālie ke toʻo kiate kinautolu ʻa e huafa ʻo Sīsū Kalaisí, mo fakapapau honau lotó ke tauhi kiate ia ʻo aʻu ki he ngataʻangá.” (T&F 20:37; vakai foki, 2 Nīfai 31:13; Molonai 6:3.) ʻI heʻetau maʻu e sākalamēnití, ʻoku tau fakafoʻou ai e fuakava ko ʻení mo e ngaahi fuakava kehe kotoa pē ne tau fai ʻi he vai ʻo e papitaisó. (Dallin H. Oaks, “Taking upon Us the Name of Jesus Christ,” Ensign, May 1985, 80)

• Kuo hoko fēfē nai ʻa hono fakahoko mo tauhi ʻo e ngaahi fuakavá ke ke ofi ange ai ki he Fakamoʻuí?

Ke tokoni ke hokohoko atu hono fakaloloto hoʻo mahino fekauʻaki mo hono toʻo kiate koe e huafa ʻo Sīsū Kalaisí, lau ʻa e Mōsaia 5:11–13, 15, ʻo kumi ha faleʻi lahi ange mei he Tuʻi ko Penisimaní fekauʻaki mo hono toʻo kiate koe ʻa e huafa ʻo Sīsū Kalaisí.

  ChurchofJesusChrist.org 

Fakakaukau ki ha ngaahi sīpinga kuó ke mamata ai ʻi hoʻo moʻuí ki ha kakai kuo nau toʻo kiate kinautolu ʻa e huafa ʻo Kalaisí.

• Ko e hā ʻoku nau fai ʻoku fakahaaʻi ai kuo nau toʻo kiate kinautolu Hono huafá?

• Ko e hā ha fatongia ʻo e sākalamēnití ʻi hono tokoniʻi kitautolu ke toe lelei ange ʻetau fai ʻení?

Ko e huafa ʻo Sīsū Kalaisí

2. Ke tokoni ke ke vakaiʻi e tuʻunga kuó ke toʻo ai ki ho lotó e huafa ʻo e ʻEikí, tali ha taha ʻo e ongo fehuʻi ko ʻení:

   • Ko e hā ha ngaahi founga te ke lava ʻo fakahaaʻi ai kuó ke toʻo kiate koe ʻa e huafa ʻo Kalaisí?

   • Ko e hā ha ngaahi tāpuaki kuo maʻu ʻi hono toʻo kiate koe ʻa e huafa ʻo Kalaisí?

Fakakaukau ki he ngaahi fakakaukau mo e ngaahi ongo kuó ke maʻu mei he Laumālie Māʻoniʻoní ʻi hoʻo ako he ʻaho ní. Fakakaukau ki ha meʻa te ke lava ʻo fai ke ke toʻo kakato ange ai kiate koe ʻa e huafa ʻo Kalaisí.

Fili Pē: Fie Ako Lahi Ange?

ʻOku ʻuhinga ki he hā ke toʻo kiate kitautolu ʻa e huafa ʻo Kalaisí?

ʻI he lea ʻa Palesiteni Tāleni H. ʻOakesi ʻo e Kau Palesitenisī ʻUluakí ko e “Taking upon Us the Name of Jesus Christ (Toʻo Kiate Kitautolu ʻa e Huafa ʻo Sīsū Kalaisí)” (Ensign, May 1985, 80–83), naʻá ne fakamatalaʻi e ngaahi ʻuhinga kehekehe ʻo hono toʻo kiate kitautolu e huafa ʻo Kalaisí.

ʻOku totonu nai ke liliu fēfē kitautolu ʻe he toʻo Hono huafá?

Naʻe vahevahe ʻe Palesiteni Henelī B. ʻAealingi ʻo e Kau Palesitenisī ʻUluakí ha ngaahi meʻa te tau lava ʻo fai ke fakahaaʻi ai kuo tau toʻo kiate kitautolu ʻa e huafa ʻo e Fakamoʻuí.

ʻOku tau palōmesi ke toʻo kiate kitautolu ʻa Hono huafá. ʻOku ʻuhinga iá kuo pau ke tau vakai kiate kitautolu ʻo hangē pē ko Iá. Te tau fakamuʻomuʻa Ia ʻi heʻetau moʻuí. Te tau fiemaʻu ʻa e meʻa ʻokú Ne Finangalo ki aí, ka ʻoku ʻikai ko e meʻa ʻoku tau fiemaʻú pe ko e meʻa ʻoku akoʻi mai ʻe he māmaní ke tau fiemaʻú. (Henry B. Eyring, “That We May Be One,” Ensign, May 1998, 67)

ʻOku ʻuhinga ki he hā ʻa e pehē ke tau loto-fiemālie ke toʻo kiate kitautolu ʻa e huafa ʻo Sīsū Kalaisí?

Naʻe akoʻi ʻe Palesiteni Henelī B. ʻAealingi ʻo e Kau Palesitenisī ʻUluakí ʻo pehē:

Kuó u fifili ki he ʻuhinga ʻo hono toʻo kiate kitautolu e huafa ʻo Sīsū Kalaisí.

ʻOku fakamatalaʻi ʻe Palesiteni Tāleni H. ʻOakesi: “ʻOku mahuʻinga ʻi heʻetau maʻu e sākalamēnití ʻoku ʻikai ke tau fakamoʻoni ʻoku tau toʻo kiate kitautolu e huafa ʻo Sīsū Kalaisí. ʻOku tau fakamoʻoni ʻoku tau loto-fiemālie ke fai ia. (Vakai, T&F 20:77.) ʻOku fokotuʻu mai ʻe he foʻi moʻoni ko ia ʻoku tau fakamoʻoni pē ki heʻetau loto-fiemālié, kuo pau ke hoko ha meʻa kehe kimuʻa pea tau toki toʻo moʻoni kiate kitautolu e huafa toputapu ko iá ʻi he ʻuhinga mahuʻinga tahá” [Dallin H. Oaks, “Taking upon Us the Name of Jesus Christ,” Ensign, May 1985, 81].

Ko e kupuʻi sētesi ko ia ʻoku tau “loto fiemālie ke toʻo kiate [kitautolu]” e huafa ‘o e Fakamoʻuí ʻokú ne talamai neongo ʻoku tau ʻuluaki toʻo Hono huafá ʻi heʻetau papitaisó, ka ʻoku ʻikai ngata ʻa e toʻo Hono huafá ʻi he papitaisó pē. Kuo pau ke tau ngāue taʻe-tuku ke toʻo Hono huafá ʻi heʻetau moʻuí kotoa, kau ai e taimi ʻoku tau fakafoʻou ai ʻetau ngaahi fuakavá ʻi he tēpile ʻo e sākalamēnití mo fai e ngaahi fuakava ʻi he ngaahi temipale māʻoniʻoni ʻo e ʻEikí. (Henry B. Eyring, “Feinga, Feinga, Feinga,” Liahona, Nōvema 2018, 91)