Alema 1:19–33

Mauaina o le Filemu ia Keriso e ala i le Tumau Faamaoni i taimi o Sauaga

Matou te talitonu ua i ai i tagata uma le aia tatau e tapuai ai i le Atua e tusa ai ma o latou lava lotofuatiaifo (tagai Mataupu Faavae o le Faatuatua 1:11). Ae o le a le mea e tupu pe afai e sauaina oe e isi ona o ou talitonuga? E mafai faapefea ona e tali atu ma maua le filemu pe afai e faitioina oe e isi ona o lou talitonuga? I ona po o Alema, o tagata “sa amata ona latou sauaina i latou o e sa auai i le ekalesia a le Atua” (tagai Alema 1:19). O lenei lesona e mafai ona fesoasoani ia te oe e tali atu ai ma le faamaoni ma lagona le filemu e tusa lava pe e te feagai ma sauaga ona o le avea ai ma se tasi O Le Ekalesia a Iesu Keriso o le Au Paia o Aso e Gata Ai.

O le sauaina ona o ou talitonuga

Na fautuaina e Elder Jeffrey R. Holland o le Korama a Aposetolo e Toasefululua talavou o le Ekalesia. Maimoa le vitio “O le Tau—ma Faamanuiaga—o le Avea ma Soo” mai le taimi faailo 0:25 i le 2:05, o loo maua i le ChurchofJesusChrist.org, pe faitau le faamatalaga o loo i lalo:

Faatasi ai ma se faamemelo ma le faamalosiauga mo tagata uma o e o le a manaomia ona tutumau mausali i nei aso e gata ai, ou te fai atu i tagata uma aemaise lava i le autalavou o le Ekalesia pe afai tou te lei faia, o le a oo lava i se aso o le a valaauina ai oe e puipuia lou faatuatua pe atonu foi o le onosaia o nisi o sauaga faaletagata ona o oe o se tasi o Le Ekalesia a Iesu Keriso o le Au Paia o Aso e Gata Ai. O ia taimi faapea o le a manaomia uma ai le lototele ma le amio solia mai ia te outou.

Mo se faataitaiga, sa tusi mai ia te au talu ai nei se tamaitai faifeautalai: “Sa ma vaaia ma la’u soa se alii o saofai i luga o se nofoa umi i totonu o le taulaga ma tausami lana ‘aiga o le aoauli. A o ma latalata atu, sa ia tilotilo mai i luga ma iloa mai ma pine faifeautalai. Faatasi ai ma se foliga pāū, sa ia oso i luga ma sii lona lima e po a’u. Sa fetaui lelei lava ma la’u ‘alo, o lea sa ia luai mai ai ana meaai i luga ia te a’u ma amata ona palauvale i upu sili ona mataga. Sa ma savavali ese e aunoa ma se upu. Sa ou taumafai e soloese meaai mai o’u foliga, ae ou lagonaina ai le tau o le potoi pateta i tua o lo’u ulu. O nisi taimi e faigata le avea ai ma se faifeautalai aua sa ou manao e toe foi i ai i lena lava taimi, uu lena alii, ma fai i ai, ‘O LE A LAU TALA!’ Ae ou te lei faia.” (Jeffrey R. Holland, “O Le Tau—ma Faamanuiaga—o le Avea ma Soo,” Liahona, Me 2014, 6)

• Mata na faapefea ona e tali atu pe ana faapea o oe o le faifeautalai i lenei tulaga?

• Aisea e ono faigata ai ona tali atu i se ala faaKeriso?

• O anafea na soona fai ai oe pe sauaina ona o ou talitonuga?

• O a nisi o tulaga i le lumanai e ono sauaina ai oe ona o ou talitonuga?

A o e suesue i faataitaiga a tagata o le Ekalesia a Keriso i le Tusi a Mamona, vaavaai mo auala e mafai ona e tumau mausali ai ma maua le filemu ia Iesu Keriso i le taimi o sauaga.

Sauaga i le Tusi a Mamona

Sa tele luitau o Alema i lona taimi a o avea ma faamasino sili. Ina ua mavae le fasiotia o Neoa ona o le fasiotia o Kitiona, sa faaauau pea ona talitonu nisi o tagata i aoaoga a Neoa. Faitau le Alema 1:19–24, ma vaavaai mo luitau na feagai ma sa Nifae.

• O a ni mea talitutusa o loo e vaaia i le va o mea na feagai ma sa Nifae ma ou aafiaga?

• O a faatinoga mai tagata o le Ekalesia na saofaga i nei luitau (tagai fuaiupu 22)?

Faitau le Alema 1:25–28, ma vaavaai mo mea na faia e tagata amiotonu o le Ekalesia. Ina ia fesoasoani ia te oe e faatulaga mea sa e suesueina, fai se lisi o mea na faia e tagata. E mafai ona e faia lenei mea i lau api talaaga mo suesuega, pe faailoga mea e te maua i au tusitusiga paia.

• O a nisi o auala eseese na tali atu ai tagata o le Ekalesia i sauaga?

Faauma le fasifuaitau lenei i se mea na e aoaoina mai le faataitaiga a sa Nifae.

• … e mafai ona fesoasoani tatou te lagona ai le filemu faifaipea o le Faaola e tusa lava pe sauaina i tatou ona o le talitonu ia te Ia.

1. Tali fesili nei:

   • O le a sou manatu e mafai faapefea e le tali atu i nei auala ona fesoasoani i se tasi ia lagonaina le filemu o le Faaola?

   • O le a se mea mai nei fuaiupu po o lau lisi e sili ona e manao e manatua pe afai e te feagai ma sauaga ona o ou talitonuga? Aisea?

   • O a ni aafiaga i lou olaga ua e lagona ai le manaomia o le filemu ua ofoina mai e Iesu Keriso?

E sili atu nai lo na o le filemu

E faaopoopo atu i le mauaina o le filemu, sa faamanuiaina e le Tama Faalelagi sa Nifae faamaoni i isi auala. Faitau le Alema 1:29–32, ma vaavaai mo faamanuiaga a le Tama Faalelagi ia sa Nifae a o latou tumau mausali i taimi faigata.

2. Tali le fesili lenei ma faamaea le gaoioiga:

   • Na faapefea ona e vaaia faamanuiaga a le Tama Faalelagi a o tumau faamaoni pea oe po o isi e te iloa i taimi o sauaga?

   Filifili ia le itiiti ifo ma le lua ni faatinoga na faia e sa Nifae faamaoni e faaalia ai le alofa ma le agaalofa mo tagata uma e ui lava i sauaga (tagai Alema 1:25–30). Faamatala pe mafai faapefea e se tasi i o tatou aso ona faia lea lava mea e tasi.

Tuu i le faitalia: O e Manao e Aoao Atili?

E faapefea ona ou tumau mausali i taimi o tofotofoga o le faatuatua?

Ua aoao mai Elder Neil L. Andersen o le Korama a Aposetolo e Toasefululua:

E faapefea ona e tumau ma le “tutumau ma lē masiʼiʼese” i se taimi o le tofotofoga o le faatuatua? E te faatofu oe lava ia i mea moni o loo fesoasoani e fausia le fatu o lou faatuatua: e te faatinoina le faatuatua ia Keriso, e te tatalo, e te mafaufau loloto i tusitusiga paia, e te salamo, e te tausi i poloaiga, ma e auauna atu i isi. (Neil L. Andersen, “Tofotofoina o Lo Outou Faatuatua,” Liahona, Nov. 2012, 40)

E faapefea ona ou tali atu i sauaga?

Na ta’ua e Peresitene Harold B. Lee (1899–1973):

O le faatama’iga tele e ono oo mai i sauaga, e lē mai le sauaga lava ia ae e mai le aafiaga e ono oo i ai ē na faasauaina ma atonu o le a taotaomia ai i lo latou naunau mo le amiotonu o la latou anavatau. O le tele lava o na sauaga e mafua mai i le lē lava o le malamalama, auā e ‘augofie tagata e tetee i mea latou te lē malamalama ai. O se isi vaega e mafua mai i tagata e faamoemoe i mea leaga. Ae pe o le a lava le mafuaaga, e foliga mai ua matuā faasoloatoa sauaga e faasaga ia i latou o loo punoua’i i se mafuaaga amiotonu ma o lea ua lapata’ia ai i tatou e le Matai e faapea, “Oi talofa ia te outou pe a tautala lelei tagata uma ia te outou! auā sa faapea lava ona fai e o latou tamā i perofeta pepelo.” (Luka 6:26).

… Ia manatua lena lapataiga pe a tauemuina ma amusia oe ona o lou musu e sui ou tulaga faatonuina, o lou faamaoni, ma le ola mama, ina ia viia ai e tagata. Afai e te tu mausali mo le mea sa’o tusa lava pe tauemu mai tagata, pe sauaina foi oe i la le tino, o le a faapaleina lava oe i faamanuiaga o le olioli e faavavau. (Aoaoga a Peresitene o le Ekalesia: Harold B. Lee [2000], 204)

Na ta’ua e Peresitene Dallin H. Oaks:

E le tatau lava ia i tatou ona sauaina i latou o e e le tutusa o tatou talitonuga ma tautinoga. (Dallin H. Oaks, “O Poloaiga Sili e Lua,” Liahona, Nov. 2019, 75)

O le a se mea e mafai ona ou faia ia maua ai le filemu o le Faaola i lo’u olaga?

Sa faailoa mai e Elder Quentin L. Cook o le Korama a Aposetolo e Toasefululua le tele o auala e maua ai le filemu. Mafaufau e faitau lana lauga “O le Filemu o le Tagata Lava Ia i Taimi Faigata” (Liahona, Nov. 2021, 89–92) e iloa ai auala e lima e saili ai le filemu faaletagata lava ia mai le Tama Faalelagi ma le Faaola.

E faapefea e le finau ma isi ona taumamao ai i tatou mai le Faaola?

Na aoao mai Elder Dale G. Renlund o le Korama a Aposetolo e Toasefululua:

O Finauga e lē maloloina faaleagaga mo i tatou taitoatasi. Ua faoa mai ia i tatou le filemu, olioli, ma le mapusaga, ma ua feto’i ai foi lo tatou gafatia e lagonaina ai le Agaga. (Dale G. Renlund, “O Le Filemu o Keriso e Faaumatia ai le Feitaga’i,” LiahonaNov. 2021, 84)