Atamai i Aoaoga Faavae: Alema 7:11–13

“Ma O le a Afio Atu o Ia, Ma Mafatia i Tiga ma Puapuaga ma Faaosoosoga o Ituaiga Eseese Uma”

o le Faaola o loo puapuagatia i Ketesemane

I lau suesuega o le Alema 7:1–13, sa e aoao ai e uiga i nisi o mea na puapuagatia ai le Faaola o se vaega o Lana Togiola ina ia “mafai ona ia silafia e tusa ai ma la le tino, le ala e fesoasoani ai i ona tagata” (Alema 7:12). O lenei lesona e mafai ona fesoasoani ia te oe e tauloto mau faasino ma le fasifuaitau autu o le mau mo le Alema 7:11–13, faamatala le aoaoga faavae o loo aoao mai i lenei fuaitau, ma faaaoga mataupu faavae o le mauaina o le malamalama faaleagaga i tulaga moni o le soifuaga.

Tauloto ma faamatala

O le fasifuaitau autu o le mau mo le Alema 7:11–13 o le “Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma.” Mafaufau e faailoga le fuaitau lenei i au tusitusiga paia pe afai e te lei faia.

O le gaoioiga lenei e mafai ona fesoasoani ia te oe e tauloto ai le mau faasino ma le fasifuaitau autu o le mau. Tusi le tele o mau faasino ma fasifuaitau autu o mau e te mafaia mai lou mafaufau. Afai e le mafai ona e faia i le taumafaiga muamua, toe faitau le mau faasino ma le fasifuaitau, ona taumafai lea e tusi. Toe faitau ma tusitusi seia oo ina mafai ona e tusia le mau atoa mai lou mafaufau.

O se lesona talu ai, na e aoaoina ai mai le Alema 7:11–13 e faapea na puapuagatia Iesu Keriso ina ia laveai outou mai le agasala ma le oti ma fesoasoani ia te outou i luitau o le olaga faaletino.

Manatu faapea na tesi atu se uo ia te oe e uiga i se mea faigata o loo feagai ma i latou. E te manatu o le savali i le Alema 7:11–13 o le a fesoasoani mo lau uo ae popole o le a latou le faitauina pe afai e te auina atu ia i latou na o le mau faasino.

aikona, faamaumau

1. Tali le fesili lenei:

   • E faapefea ona e aoteleina le Alema 7:11–13 i se auala e ono fesoasoani ai i lau uo i o latou faigata?

Faataitai le faaaogaina

Sue mataupu faavae o le mauaina o le malamalama faaleagaga i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022). Tusi nei mataupu faavae o ni ulutala i lau api talaaga mo suesuega, ma tuu se avanoa i le va o mataupu taitasi ina ia mafai ona e taliina fesili e uiga i ai i se taimi mulimuli ane o le lesona.

Mafaufau pe faapefea e mataupu faavae o le mauaina o le malamalama faaleagaga ma le aoaoga faavae o loo aoao i le Alema 7:11–13 ona fesoasoani i le tulaga faataitai lenei.

Talu lava ona tatala le faaipoipoga a matua o Peteru i ni nai tausaga ua mavae, sa ia lagona ua atili faigata lava lona olaga. Sa tauivi o ia i le aoga, ma o nisi o ana uo e foliga mai ua latou le faaleamanaia o ia e pei ona sa latou masani ai. E tele foi ina le toe alu Peteru i le lotu, faitau ana tusitusiga paia, ma tatalo i le Atua. I se tasi aso, na talanoa atu ai Peteru i se tasi o ana uo e uiga i ona tauiviga. Sa ia fai mai, “Ou te manao i mea ia lelei atili, ae ou te le iloa po o fea e liliu atu i ai. Ua ou lagona le tuuatoatasi ma le taotaomia ai i loʻu tulaga o loo o’u iai nei.”

Manatu faapea o oe o le uo lea sa talanoa atu i ai Peteru ma sa ia fesili atu foi ia te oe mo se fautuaga e uiga i le auala e foia ai lona tulaga faigata. Faaaoga aoaoga o i le Alema 7:11–13 ma mataupu faavae o le mauaina o le malamalama faaleagaga e fesoasoani ai ia Peteru i lona luitau.

Faatino i le faatuatua

Faitau parakalafa 5–7 o le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae. Mafaufau e faailoga mea e te iloa e aoga.

aikona, faamaumau

2. Tali ia le itiiti ifo ma le tasi o fesili nei:

   • O le a se mea e mafai ona e aoao atu ia Peteru e uiga ia Iesu Keriso ma Lana Togiola e ono mafai ona fesoasoani ia Peteru e faatino ai i le faatuatua?

   • O le a se mea e mafai ona fai e Peteru e maua ai le fesoasoani lea e mafai ona tuuina mai e Iesu Keriso?

Iloilo manatu faavae po o fesili faatasi ma se vaaiga e faavavau

Faitau le palakalafa 8 o le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae. Mafaufau e faailoga mea e te iloa e aoga

aikona, faamaumau

3. Tali ia le itiiti ifo ma le tasi o fesili nei:

   • O le a sou manatu e faapefea ona finagalo le Tama Faalelagi ia Peteru e mafaufau ai i lona tulaga?

   • Aisea e te manatu ai o le a aoga ia Peteru le vaai atu i lona tulaga ma se vaaiga e faavavau?

Saili le malamalama atili e ala i punaoa mamana ua filifilia

Faitau ia palakalafa 11–12 o le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae, ma vaavaai mo aoaoga e mafai ona fesoasoani ia Peteru.

aikona, faamaumau

4. Tali ia le itiiti ifo ma le lua o fesili i lenei vaega:

   • O a ituaiga o punaoa mamana ua filifilia e mafai ona e faasino i ai Peteru lea e mafai ona maua ai le fesoasoani na te manaomia?

   O se tasi o punavai mamana ua filifilia lea e mafai ona fesoasoani i lenei tulaga o le Alema 7:11–13. Toe faitau fuaiupu nei, ma vaavaai mo aoaoga e mafai ona fesoasoani ia Peteru.

   • O le a se mea e te manao ia malamalama ma lagonaina e Peteru mai nei fuaiupu?

   • E mafai ona e mafaufau i nisi fuaitau o mau o loo aoao mai ai mea atonu e finagalo le Tama Faalelagi ia iloa e Peteru?