ʻAlamā 19

“ʻOku Hōifua ʻa e ʻEikí ke Tali ʻa e Kakai Fulipē ʻa ia ʻe Fakatomala mo Tui ki Hono Huafá”

ʻI hoʻo fakakaukau ke vahevahe ʻa e ongoongoleleí mo e niʻihi kehé, ʻokú ke faʻa ongoʻi nai ʻoku ʻi ai ha kakai ʻe niʻihi he ʻikai ke nau teitei tali ʻe kinautolu ʻa e ngaahi akonaki ʻa e Fakamoʻuí? ʻOkú ke pehē ‘oku ʻafio fēfē mai ʻa e Tamai Hēvaní ki he kakai ko ʻení? ʻI he ngaahi aʻusia fakafaifekau ʻa ʻĀmoni mo e kakai Leimaná, ʻoku tau vakai ai ki hono teuteuʻi ʻe he ʻEikí ʻa e loto ʻo e kakaí mei he ngaahi puipuituʻa kehekehe kotoa pē ʻo e moʻuí ke tali ʻEne ongoongoleleí. ʻE lava ke tokoni ʻa e lēsoni ko ʻení ke mahino kiate koe ʻoku ʻofa ʻa e ʻEikí ʻi he kakai kotoa pē pea mo finangalo ke nau haʻu kiate Ia.

Saveaʻi pē koe

Fakafuofuaʻi koe ʻi ha meʻafua 1–5 ʻi he tuʻunga ʻokú ke pehē te ke fakaafeʻi ai ʻa e kakai ko ʻení ke nau ako lahi ange fekauʻaki mo e ongoongolelei ʻo Sīsū Kalaisí.

1. Ko ha taha ʻokú ke ʻilo kuó ne fakahaaʻi ʻene fie ʻilo ki he Siasí

2. Ko ha kaungāmeʻa pe mēmipa ʻo e fāmilí kuó ne ʻosi muimui ki he ngaahi tuʻunga moʻui ʻo e ongoongoleleí ka ʻoku teʻeki ai ke ne hoko ko ha mēmipa

3. Ko ha kaungāmeʻa pe mēmipa ʻo e fāmilí ʻoku ʻikai muimui he ngaahi tuʻunga moʻui ʻo e ongoongoleleí

4. Ko ha taha ʻokú ke ʻilo kuó ne taʻe tali e ngaahi fakaafe kimuʻa mei he niʻihi kehé ke ako lahi ange ki he ongoongoleleí

Fakalaulauloto ki he ngaahi ʻuhinga naʻá ke tali ai ʻi he founga naʻá ke fakahokó.

• ʻE uesia fēfē nai ʻe heʻetau ngaahi fakakaukau fakataautaha fekauʻaki mo e niʻihi kehé ʻa ʻetau feinga ke vahevahe ʻa e ongoongoleleí?

ʻI he taimi naʻe kamata ngāue fakafaifekau ai ʻa e ngaahi foha ʻo Mōsaiá ki he kakai Leimaná, naʻe kataʻi kinautolu ʻe ha kakai tokolahi mo nau veiveiua pe te nau lavameʻa nai ʻi he lotolotonga ʻo ha kakai faiangahala pehē (vakai, ʻAlamā 26:23–25). Ka neongo ia, naʻe lavameʻa ʻa ʻĀmoni mo hono ngaahi tokouá. Mahalo te ke manatuʻi ʻi he hili hono akoʻi ʻe ʻĀmoni ʻa e ongoongoleleí ki he Tuʻi ko Lamōnaí, naʻe tui ʻa e tuʻí ki he ngaahi lea ʻa ʻĀmoní, naʻá ne lotua ha ʻaloʻofa, pea naʻá ne tō ki he kelekelé ʻi hono toʻoa ia ʻe he Laumālié (vakai, ʻAlamā 18:40–43).

Te ke ako he ʻahó ni fekauʻaki mo e ngaahi meʻa naʻe hoko ʻi he fale ʻo Lamōnaí hili hono akoʻi ʻe ʻĀmoni ʻa e tuʻí. ʻI hoʻo akó, fekumi ki he ngaahi moʻoni ʻe lava ʻo tokoni ke mahino lelei ange kiate koe ʻa e founga ʻoku ʻafio mai ai ʻa e Tamai Hēvaní ki Heʻene fānaú, kau ai ʻa kinautolu ʻoku ngalingali he ʻikai ke nau tali ʻa e ongoongoleleí.

Naʻe hokohoko atu hono akoʻi ʻe ʻĀmoni ʻa e fāmili ʻo Lamōnaí

ʻI he taimi naʻe ʻilo ai ʻe he kuini ʻo e kau Leimaná ʻa e pekia hono husepānití, naʻá ne fekau ke ʻomi ʻa ʻĀmoni ke ne lea kiate ia (vakai, ʻAlamā 19:1–3).

Lau ʻa e ʻAlamā 19:4–17, ʻo kumi e meʻa naʻe aʻusia ʻe he kuiní mo e niʻihi kehé hili ʻenau talanoa mo ʻĀmoní. Mahalo te mou fie mamata foki ʻi he “ʻOku Ngāue ʻa ʻĀmoni mo Akoʻi ʻa e Tuʻi ko Lamōnaí” mei he taimi 15:18 ki he 20:06. ʻOku maʻu ʻa e foʻi vitioó ni ʻi he ChurchofJesusChrist.org.

• Ko e hā ha meʻa ʻokú ke ako fekauʻaki mo e kuiní mei he ngaahi veesi ko ʻení?

• Ko e hā nai ha meʻa kuo ʻilo ʻe Lamōnai fekauʻaki mo Sīsū Kalaisi ʻi he ʻaho ʻe tolu kimuʻá?

• ʻOkú ke pehē ko e hā naʻe ʻomi ai ʻe he ʻilo ko ʻení ha fiefia pehē kia Lamōnaí?

Hili hono tānaki fakataha ʻo e niʻihi kehé ki he fale ʻo e tuʻí, naʻe ʻohovale mo loto-mamahi ʻa e sevāniti ʻa e kuiní ko ʻĀpisí, ʻi he kamata ke fakakikihi ʻa e kakaí ʻiate kinautolu fekauʻaki mo e ʻuhinga naʻe tākoto ai ʻa e tuʻí mo e niʻihi kehé ʻi he kelekelé ʻo hangē kuo nau maté (vakai, ʻAlamā 19:18–28).

Lau ʻa e ʻAlamā 19:29–36, ʻo kumi e meʻa naʻe fai ʻe ʻĀpisi ʻi he mōmeniti fakakikihi ko ʻení pea mo e meʻa naʻe hoko ʻi he lotolotonga ʻo e kau Leimaná ʻi he hili iá. Mahalo te mou fie mamata foki ʻi he “ʻOku Ngāue ʻa ʻĀmoni mo Akoʻi ʻa e Tuʻi ko Lamōnaí” mei he taimi 20:07 ki he 23:04. ʻOku maʻu ʻa e foʻi vitioó ni ʻi he ChurchofJesusChrist.org.

• Ko e hā ʻa e lelei ʻo e ongoongolelei ʻo Sīsū Kalaisí naʻe maʻu ʻe he kau Leimana tokolahi naʻe fili ke tuí?

• Ko e hā ha foʻi moʻoni fekauʻaki mo e ʻEikí naʻe akoʻi ʻe Molomona ʻi he veesi 36 hili ʻene vahevahe ʻa e fakamatala ko ʻení?

Ko e finangalo ʻa e ʻEikí ke haʻu ʻa e kakai kotoa pē kiate Ia

ʻOku tau ako mei he ngaahi lea ʻa Molomona ʻi he veesi 36, ʻoku hōifua ʻa e ʻEikí ke tali ʻa e kakai fulipē ʻe fakatomala mo tui ki Hono huafá. Fakakaukau ke fakaʻilongaʻi e foʻi moʻoni ko ʻení ʻi hoʻo folofolá.

ʻI he tūkunga ko ʻení, ʻoku kau ʻi he hōifua ʻa e ʻEikí ʻa ʻEne ʻaloʻofa mo e finangalo lelei ke fakamolemoleʻí.

• Ko e hā ha ngaahi aʻusia kuó ne tokoniʻi koe ke ke vakai ai ki he moʻoni ʻo e tefitoʻi moʻoni ko ʻení ʻi hoʻo moʻuí pe ʻi he moʻui ʻa e niʻihi kehé?

Ko e taimi ʻe niʻihi mahalo ʻe hala ʻetau fakakaukau he ʻikai fie ʻilo ha taha ki he ongoongoleleí koeʻuhí ko e fōtunga ʻo e tokotaha ko iá pe ko e meʻa kuó ne fai ʻi he kuohilí. Fakaʻaongaʻi ha kiʻi taimi ke ke fakakaukauloto ai ki ha taha ʻoku ʻi he tuʻunga ko ʻení. ʻE lava pē ko ha tokotaha pau ʻeni ʻokú ke ʻilo, pe ko haʻo fakakaukau pē ki ha kakai ʻoku nau feʻunga mo e fakamatala ko ʻení.

1. Tali e ongo fehuʻi ko ʻení ʻi ha palakalafi ʻoku sētesi ʻe tolu ki he nima:

   • ʻOku fēfē nai e ongo ʻoku maʻu ʻe he ʻOtuá ki he tokotaha ko ʻení?

   • ʻE tākiekina fēfē ʻe he mahino ʻokú ke maʻu ki he ongo ʻa e ʻOtuá fekauʻaki mo e tokotaha ko ʻení ʻa hoʻo ngaahi ongo kiate iá?

Fili Pē: Fie Ako Lahi Ange?

ʻE lava nai ke u ului ki he ʻEikí mei ha aʻusia mālohi ʻe taha?

Naʻe aʻusia ʻe he kakai Leimana naʻe akoʻi ʻe ʻĀmoní ʻa e uluí ʻi ha founga fakaofo ʻo fakavaivaiʻi ai kinautolu ʻe he Laumālié pea nau tō ai ki he kelekelé. ʻOku ʻikai ko e founga angamaheni ʻeni ʻoku aʻusia ai ʻe he tokolahi taha ʻo e fānau ʻa e Tamai Hēvaní ʻa e uluí.

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ki he tokolahi ʻo kitautolu, ko e uluí ko ha founga ngāue ʻoku hokohoko kae ʻikai ko ha meʻa ʻoku toki hoko tā tuʻo taha tupu mei ha faʻahinga meʻa mālohi pe fakaholomamata ʻoku tau aʻusia. ʻOku hoko māmālie pē pea ʻikai faʻa fakatokangaʻi ʻetau ngaahi taumuʻá, ngaahi fakakaukaú, mo ʻetau ngaahi ngāué ʻi he ʻotu lea ki he ʻotu lea pea ʻi he akonaki ki he akonaki, ʻo tatau mo e finangalo ʻo e ʻOtuá. ʻOku fakatou fiemaʻu ʻa e vilitakí mo e faʻa kātakí kae hoko ʻa e ului ki he ʻEikí. (David A. Bednar, “Ului ki he ʻEikí,” Liahona, Nōvema 2012, 107–8)

Ko e hā e ongo ʻoku maʻu ʻe Sīsū Kalaisi kiate kinautolu ʻoku ʻikai tali ʻe he niʻihi kehé?

Naʻe akonaki ʻa Sisitā Seiloni ʻIupengi, Tokoni ʻUluaki mālōlō ʻi he Kau Palesitenisī Lahi ʻo e Fineʻofá ʻo pehē:

ʻOku fakahā mai ʻe he Fuakava Foʻoú e ngāue lahi ne fai ʻe Sīsū ke aʻu ki he faʻahinga kakai kotoa pē: ʻa e kau kilia, tānaki tukuhau, fānau, kau Kālelí, kau paʻumutú, houʻeiki fafiné, kau uitoú, kau Samēliá, kau Fālesí, kau senituli Lomá, kau tonó, mo kinautolu ʻoku faiangahalá mo e kau taʻemaʻá. ʻI he meimei talanoa kotoa pē, ʻokú Ne tokoniʻi ha taha ne ʻikai ke tali lelei ʻe he sosaietí koeʻuhi ko e tukufakaholó. (Sharon Eubank, “Ko Kalaisi ʻa e Maama ʻOku Ulo ʻi he Fakapoʻulí,” Liahona, Mē 2019, 74)

ʻE liliu fēfē nai au ʻi heʻeku feinga ke vakai ki he niʻihi kehé ʻo hangē ko ia ʻoku fakahoko ʻe he ʻOtuá?

Naʻe akoʻi ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e founga lelei taha ke tau tokoniʻi ai e niʻihi kehé, ko e pau ko ia ke tau vakai kiate kinautolu ʻi he fofonga ʻenau mātuʻá pe ko e Tamai Hēvaní. Ko e toki taimi ia te tau lava ai ʻo maʻu e ʻilo ki he mahuʻinga moʻoni ʻo e laumālié. Ko e toki taimi ia te tau lava ai ʻo ongoʻi ʻa e ʻofa ʻoku maʻu ʻe he Tamai Hēvaní ki Heʻene fānaú kotoa. Ko e toki taimi ia te tau lava ai ʻo ongoʻi e tokanga ʻa e Fakamoʻuí kiate kinautolú. (Dale G. Renlund, “ʻI he Fofonga ʻo e ʻOtuá,” Liahona, Nōvema 2015, 94)