Seminare
Alema 39: “Faafiti Oe Lava i Nei Mea”

“Alema 39: ‘Faafiti Oe Lava i Nei Mea,’” Tusi Lesona a Tagata o le Vasega o le Tusi a Mamona (2024)

“Alema 39,” Tusi Lesona a Tagata o le Vasega o le Tusi a Mamona

Alema 39

“Faafiti Oe Lava i Nei Mea”

Ata
Alema o loo talanoa ia Korianetona

I le gasologa o taimi, ua taitai ai e Satani le toatele o tagata ia talitonu o sootaga feusuai i fafo atu o le faaipoipoga e taliaina. Ua tuuina mai e le Tama Faalelagi ma Iesu Keriso ia i tatou le tulafono o le legavia mo lo tatou puipuiga, filemu, ma le fiafia. Sa fautuaina ma le alofa e le perofeta o Alema lona atalii o Korianetona e lafoai ma salamo i ana agasala, e aofia ai le solia o le tulafono o le legavia. O lenei lesona e mafai ona fesoasoani ia te oe e malamalama ai i le matuia o le agasala o feusuaiga ma le ala e tetee atu ai i le faaosoosoga o le solia o le tulafono o le legavia.

O le tulafono o le legavia

Faitau faamatalaga nei ma fuafua po o fea o mea nei e sili ona faaalia ai ou lagona:

  • Ou te le ioeina

  • E tele lava ina ou le ioeina

  • E tele lava ina ou ioeina

  • Ou te ioeina

  1. Ua malamalama lelei le autalavou O Le Ekalesia a Iesu Keriso o le Au Paia o Aso e Gata Ai i le tulafono o le legavia, po o le tulafono a le Alii o le mama mai feusuaiga.

  2. Latou te malamalama i le mafuaaga e taua ai ma pe aisea e finagalo ai le Alii ia tatou ola ai.

  3. E mafai ona faigata ona tausia le tulafono o le legavia i le lalolagi i aso nei.

  4. Ua iloa e le autalavou i le Ekalesia le auala e tetee atu ai i faaosoosoga ma tausia i latou lava ia mama mai feusuaiga.

O le tulafono o le legavia o le tulafono a le Alii o le mama a’ia’i i feusuaiga. O le usitaia o le tulafono o le legavia o lona uiga o le tausia o oe lava ia mama i mafaufauga, upu, ma faatinoga, e aofia ai le aloese mai soo se mea faaponokalafi. O lona uiga foi o le aloese ai mai so o se sootaga feusuai a o lei faaipoipo ma faamaoni atoatoa i lau avā po o le tane i le taimi o mafutaga faale-ulugalii. “E faapei o isi soliga o le tulafono o le legaviā, o amioga faatauatane po o le faatauafafine o se agasala matuia. E faafeagai ma faamoemoega o feusuaiga faaletagata” (Autu o le Talalelei, “Ola Mama,” ).

Faaalu sina taimi e mafaufau loloto ai i ou malamalamaaga ma lagona e uiga i le tulafono o le legavia. O a ni au fesili o i ai? Aisea e taua ai ia te oe? O a faaosoosoga e faatatau i le ola mama o feagai ma oe? A o e suesue i lenei lesona, saili mo tali i au fesili ma mo se fesoasoani e faatoilalo ai ou faaosoosoga.

Ua fautuaina e Alema lona atalii o Korianetona

O le Alema 39 o le mataupu muamua lea o mataupu e fa o loo i ai fautuaga, poloaiga, ma aoaoga mai ia Alema i lona atalii o Korianetona. Na malaga faatasi Korianetona ma lona tama ma lona uso o Sepulona e talai atu le talalelei i totonu o sa Sorama. Peitai, i le taimi o lenei misiona, sa faia ai e Korianetona ni agasala matuia.

Faitau le Alema 39:1–5, vaavaai mo mea sese na faia e Korianetona ma lagona o Alema ma le Alii e uiga ia i latou. (O le upu fafine talitane i le fuaiupu 3 e faasino i se fafine le mama po o se fafine faitaaga.)

Ina ia fesoasoani ia te oe e mafaufau loloto pe aisea e “mamafa” ai le solia o le tulafono o le legavia i se tama ma se perofeta (Alema 39:3) ma se “mea inosia i le silafaga a le Alii” (Alema 39:5), e mafai ona fesoasoani le malamalama ai i faamanuiaga o le tausiaina. Faitau e uiga i faamanuiaga ma le mana i le “Ola i le tulafono o le legavia” i le itulau 26 i le Mo le Malosi o le Autalavou: O Se Taiala mo le Faia o Filifiliga (tamaitusi, 2022).

  • E faapefea e le tausia o le tulafono o le legavia ona saunia i tatou ia maua faamanuiaga silisili mai le Alii i lenei olaga ma le olaga a sau?

Mo se malamalamaaga faaopoopo, faitau fesili nei ma sue o latou tali i mau o loo lisi atu i totonu o puipui:

  • O le a le mea o le a tupu pe afai e le salamo se tagata mai agasala o feusuaiga? (Alema 39:7–9)

  • O le a se taunuuga e masani ona le amanaiaina o le solia o le tulafono o le legavia? (Alema 39:11–13)

Ata
aikona, faamaumau

  1. Tali fesili nei:

    • E faavae i mea ua e aoaoina, aisea e ono i ai i se matua, perofeta, ma le Alii ni lagona malolosi e uiga i le legavia?

    • E faapefea ona faaalia i le tulafono o le legavia le alofa o le Atua mo Ana fanau?

“Aua e te toe alu e tusa ma tuinanau o ou mata.”

I le faaopoopo atu i le aoaoina o lona atalii e uiga i le matuia o le agasala o feusuaiga, sa aoao foi e Alema ia Korianetona i le ala e aloese ai mai le faia o ia lava mea sese i le lumanai.

Toe iloilo le Alema 39:9 ma le Alema 39:13, vaavaai mo upu po o fasifuaitau e mafai ona fesoasoani ia te oe e tetee atu ai i faaosoosoga ma tausia le tulafono o le legavia. (O le fasifuaitau “faafiti oe lava” i le fuaiupu 9 o lona uiga o le faaaoga o le loto pulea po o le pulea o oe lava.)

O le Alema 39:9 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se auala iloga ina ia mafai ai ona e mauaina gofie. O le a e maua se avanoa i le lesona e sosoo ai e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga.

  • O le a le mataupu faavae na aoao atu e Alema ia Korianetona i nei fuaiupu?

O se tasi o mataupu faavae e mafai ona i ai mai nei fuaiupu e faapea, a o tatou faaaogaina le loto pulea ma liliu atu i le Alii, e mafai ona tatou faatoilaloina le faaosoosoga e solia le tulafono a le Atua o le legavia.

O le faatinoina o le loto pulea ma le liliu atu i le Alii e faatoilalo ai faaosoosoga e mafai i nisi taimi ona faafaigata. E mafai ona fesoasoani le mafaufau i ni auala eseese e faia ai lenei mea ona mulimuli lea i uunaiga mai le Agaga e uiga i mea o le a sili ona aoga mo oe.

Ata
aikona, faamaumau

  1. Fai mea nei e lua e fesoasoani ia te oe e faailoa ai auala e mafai ai e le autalavou i aso nei ona faaaoga le loto pulea ma “liliu atu i le Alii ma [o tatou] manatu atoa, mafaufau atoa, ma lou malosi atoa” (Alema 39:13) e faatoilalo ai faaosoosoga e solia le tulafono o le legavia. Fai se lisi o mea e te maua. E mafai foi ona e faaopopoina ni ou lava manatu.

    1. Faitau le vaega o totoe o le fautuaga e uiga i le mama a’ia’i i feusuaiga i le Mo le Malosi o le Autalavou: O Se Taiala mo le Faia o Filifiliga (tagai “mama a’ia’i i feusuaiga” i le vaega o le “Ae faapefea … ?”). Mo se fautuaga faaopoopo mai uso o le Korama a Aposetolo e Toasefululua, mafaufau e faitau le “Mama Faaletagata Lava Ia” (Jeffrey R. Holland, Ensign, Nov. 1998, 75–78) po o le “Matou Te Talitonu i le Nofomama” (David A Bednar, Ensign po o le Liahona, Me 2013, 41–44).

    2. Sue mau e te lagona e mafai ona faamalosia ai oe faasaga i faaosoosoga e solia le tulafono o le legavia. E mafai foi ona e lisiina viiga, po o pese Peraimeri e te manao e liliu atu i ai mo le malosi pe a faaosoosoina.

    3. Lisi ni auala e mafai ona e taumafai ai e “liliu atu i le Alii“ ma lou “manatu atoa, mafaufau atoa, ma le malosi atoa” (Alema 39:13). Ia aofia ai mea na e faia i le taimi ua tuanai e te lagona ua faamalosia ai oe.

    4. Tusi i lalo fautuaga na e mauaina mai matua ma taitai o le Ekalesia e mafai ona fesoasoani ia te oe e tetee atu ai i faaosoosoga.

    5. Matamata le vitio “Legavia: O a Tapulaa?” (3:59), o loo maua i le ChurchofJesusChrist.org.

Manatunatuga patino

Faaalu sina taimi e mafaufau loloto ai pe aisea e te manao ai e tumau i le mama mai feusuaiga. Ona tusifaamaumau lea o laasaga o le a e faia e usitai ai pea i le tulafono a le Alii o le legavia. Mafaufau po o le a se mea atonu na musuia ai oe e le Agaga Paia e fai, ma tusifaamaumau nisi manatu faaopoopo i lau api talaaga mo suesuega. Afai ua solia e oe po o se tasi e te iloa le tulafono o le legavia, ia manatua o Iesu Keriso na “afio mai e aveese agasala a le lalolagi” (Alema 39:15) ma o le a faamagaloina tagata uma o e salamo faamaoni ma lafoai a latou agasala (tagai Mosaea 26:30, Alema 39:9).

Lolomi