ʻAlamā 39

“Fakafisi Koe mei he Ngaahi Meʻa Ko Iá”

ʻI he kuonga kotoa pē, kuo tataki ʻe Sētane ha kakai tokolahi ke nau tui ʻoku lelei pē ʻa e feohi fafale fakasekisuale ʻi tuʻa ʻi he nofo-malí. Kuo ʻosi foaki mai ʻe he Tamai Hēvaní mo Sīsū Kalaisi kiate kitautolu ʻa e fono ʻo e angamaʻá ko hotau maluʻi, fakanonga, mo e fiefiaʻanga. Naʻe faleʻi lelei ʻe he palōfita ko ʻAlamaá hono foha ko Kolianitoní ke siʻaki mo fakatomala mei heʻene ngaahi angahalá, kau ai hono maumauʻi ʻa e fono ʻo e angamaʻá. ʻE lava ke tokoni ʻa e lēsoni ko ʻení ke mahino kiate koe ʻa e mamafa ʻo e angahala fakasekisualé mo e founga ke tekeʻi ʻaki ʻa e ʻahiʻahi ke maumauʻi ʻa e fono ʻo e angamaʻá.

Ko e fono ‘o e angamaʻá

Lau ʻa e ngaahi fakamatala ko ʻení pea fakapapauʻi pe ko e fē ʻi he ngaahi fakamatala ko ʻení ʻokú ne fakafofongaʻi lelei taha hoʻo ngaahi ongó:

• ʻOku ʻikai ke u tui ki ai

• ʻoku lahilahi ange ʻeku taʻetui ki aí

• ʻoku ou tui lahi ki ai

• ʻoku ou tui ki ai

1. ʻOku mahino lelei ki he toʻu tupu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e fono ʻo e angamaʻá, pe fono ʻa e ʻEikí ki he haohaoa fakasekisualé.

2. ʻOku mahino kiate kinautolu ʻa e ʻuhinga ʻoku mahuʻinga aí mo e ʻuhinga ʻoku finangalo ai ʻa e ʻEikí ke tau moʻui ʻaki iá.

3. ʻE lava ke faingataʻa hono tauhi ʻa e fono ʻo e angamaʻá ʻi he māmaní he ʻahó ni.

4. ʻOku ʻiloʻi ʻe he toʻu tupu ʻi he Siasí ʻa e founga ke tekeʻi ai ʻa e ʻahiʻahí pea tauhi kinautolu ke nau maʻa fakasekisualé.

Ko e fono ʻo e angamaʻá ko e fono ia ʻa e ʻEikí ki he haohaoa fakasekisualé. ʻOku ʻuhinga ʻa e talangofua ki he fono ʻo e angamaʻá ke tauhi koe ke ke maʻa ʻi he fakakaukau, lea, mo e ngāue, ʻo kau ai ʻa e fakamamaʻo mei ha faʻahinga meʻa ʻoku ponokalafí. ʻOku toe ʻuhinga foki ia ke fakaʻehiʻehi mei ha faʻahinga fetuʻutaki fakasekisuale kimuʻa ʻi he malí pea anganofo kakato ki hoʻo uaifí pe husepānití lolotonga ʻa e nofomalí. “Pea hangē ko hono ngaahi maumauʻi kehe ʻo e fono ʻo e angamaʻá, ʻoku hoko ʻa e nonofo kovi fakatangata pe fakafefiné (homosexual) ko ha angahala mamafa moʻoni. ʻOku fehangahangai ia mo e ngaahi taumuʻa ʻo e tuʻunga fakasekisuale ʻo e faʻahinga ʻo e tangatá” (Ngaahi Tefito ʻo e Ongoongoleleí, “Angamaʻá,” topics.ChurchofJesusChrist.org).

Fakaʻaongaʻi ha kiʻi taimi ke fakalaulauloto ai ki hoʻo mahino mo e ngaahi ongo fekauʻaki mo e fono ʻo e angamaʻa. Ko e hā ha ngaahi fehuʻi ‘okú ke maʻu? Ko e hā ʻoku mahuʻinga ai kiate koé? Ko e hā ha ngaahi ʻahiʻahi fekauʻaki mo e angamaʻá ʻokú ke fehangahangai mo ia? ʻI hoʻo ako ʻa e lēsoni ko ʻení, fekumi ki ha tali ki hoʻo ngaahi fehuʻí pea mo ha tokoni ke ikunaʻi hoʻo ngaahi ʻahiʻahí.

Ko e faleʻi ʻe ʻAlamā hono foha ko Kolianitoní

Ko e ʻAlamā 39 ʻa e ʻuluaki vahe ʻo ha ngaahi vahe ʻe fā ʻoku ʻi ai ʻa e faleʻi, ngaahi fekau, mo e ngaahi akonaki meia ʻAlamā ki hono foha ko Kolianitoní. Naʻe ʻalu fakataha ʻa Kolianitoni mo ʻene tamaí mo hono taʻokete ko Sipiloní ke malanga ʻaki e ongoongoleleí ki he kau Sōlamí. Ka neongo iá, naʻe lolotonga e ngāue fakafaifekau ko ʻení, naʻe fakahoko ʻe Kolianitoni ha ngaahi angahala mamafa.

Lau ʻa e ʻAlamā 39:1–5, ʻo kumi ʻa e ngaahi fehalaaki naʻe fai ʻe Kolianitoní mo e ongo naʻe maʻu ʻe ʻAlamā pea mo e ʻEikí ki he ngaahi angahala ko iá. (ʻOku uhinga e foʻi lea fai feʻauaki ʻi he veesi 3 ki ha fefine angaʻuli pe paʻumutu.)

Ke tokoni atu ke ke fakalaulauloto ki he ʻuhinga ʻoku “fakamamahi” ai hono maumauʻi e fono ʻo e angamaʻá ki ha tamai mo ha palōfita (ʻAlamā 39:3) pea ko ha “meʻa fakalielia [ia] ʻi he ʻao ʻo e ʻEikí” (ʻAlamā 39:5), ʻe ala tokoni ke mahino e ngaahi tāpuaki ʻo hono tauhi iá. Laukonga fekauʻaki mo e ngaahi tāpuaki mo e mālohi ʻi he “ʻOku ʻomi ʻe hono moʻui ʻaki e fono ʻo e angamaʻá” ʻi he peesi 26 ʻo e Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí (tohitufa, 2022).

• ʻOku teuteuʻi fēfē kitautolu ʻe hono tauhi e fono ʻo e angamaʻá ke tau maʻu ha ngaahi tāpuaki maʻongoʻonga mei he ʻEikí ʻi he moʻuí ni mo e moʻui ka hokó?

Ke maʻu ha ʻilo lahi ange, lau e ongo fehuʻi ko ʻení pea kumi hona talí ʻi he ongo potufolofola ʻoku haʻi atú.

• Ko e hā ʻe hoko kapau he ʻikai fakatomala ha taha mei he angahala fakasekisualé? (ʻAlamā 39:7–9)

• Ko e hā ha nunuʻa ʻo e maumauʻi e fono ʻo e angamaʻá ʻoku faʻa taʻe-fakatokangaʻi? (ʻAlamā 39:11–13)

1. Tali e ngaahi fehuʻi ko ‘ení:

   • Makatuʻunga ʻi he meʻa naʻá ke akó, ko e hā ka maʻu ai ʻe ha mātuʻa, palōfita, mo e ʻEikí ha faʻahinga ongo mālohi pehē fekauʻaki mo e angamaʻá?

   • ʻOku fakahaaʻi fēfē ʻe he fono ʻo e angamaʻá ʻa e ʻofa ʻa e ʻOtuá ki Heʻene fānaú?

“ʻIkai toe muimui ʻi he ngaahi holi ʻa ho matá.”

ʻIkai ngata ʻi hono akoʻi ʻe ʻAlamā ʻa Kolianitoni fekauʻaki mo e mamafa ʻo e angahala fakasekisualé, ka naʻá ne toe akoʻi foki hono fohá ʻi he founga ke fakaʻehiʻehi ai mei hono fakahoko ʻo e ngaahi fehalaaki tatau ʻi he kahaʻú.

Toe vakaiʻi ʻa e ʻAlamā 39:9 mo e ʻAlamā 39:13, ʻo kumi ʻa e ngaahi foʻi lea pe kupuʻi lea ʻe lava ʻo tokoni atu ke ke tekeʻi ʻa e ʻahiʻahí mo tauhi e fono ʻo e angamaʻá. (ʻOku ʻuhinga ʻa e kupuʻi lea “fakafisi koe” ʻi he veesi 9 ke ngāue ʻaki ʻa e mapuleʻi kitá pe tokangaʻi kitá.)

Ko ha potufolofola fakataukei fakatokāteline ʻa e ʻAlamā 39:9. Fakakaukau ke fakaʻilongaʻi e ngaahi potufolofola fakataukei fakatokāteliné ʻi ha founga makehe koeʻuhí ke faingofua ange hoʻo maʻu kinautolú. Te ke maʻu ha faingamālie ʻi he lēsoni hokó ke akoako fakaʻaongaʻi ʻa e tokāteline ʻoku akoʻi ʻi he potufolofola ko ʻení ki ha fehuʻi pe tūkunga.

• Ko e hā ʻa e tefitoʻi moʻoni naʻe akoʻi ʻe ʻAlamā kia Kolianitoni ʻi he ongo veesi ko ʻení?

Ko ha tefitoʻi moʻoni ʻe taha mei he ongo veesi ko ʻení ko e taimi ʻoku tau mapuleʻi ai kitautolu mo tafoki ki he ʻEikí, te tau lava ʻo ikunaʻi ʻa e ʻahiʻahi ke maumauʻi e fono ʻa e ʻOtuá ki he angamaʻá.

ʻOku faʻa faingataʻa he taimi ʻe niʻihi ke tau ngāue ʻaki ʻa e mapuleʻi kitá mo tafoki ki he ʻEikí ke ikunaʻi ʻa e ʻahiʻahí. ʻE ala tokoni ke fakakaukauʻi ha ngaahi founga kehekehe ke fakahoko ai ʻeni pea muimui ki he ngaahi ueʻi ʻa e Laumālié fekauʻaki mo e meʻa ʻe ʻaonga taha kiate koé.

2. Fakahoko ha meʻa ʻe ua mei he ngaahi meʻá ni ke tokoni atu ke ke ʻiloʻi e ngaahi founga ʻe lava ke fakaʻaongaʻi ai ʻe he toʻu tupu ʻo e ʻaho ní ʻa e mapuleʻi kitá mo “tafoki ki he ʻEikí ʻaki [hotau] ʻatamaí, iví mo e mālohí kotoa” (ʻAlamā 39:13) ke ikunaʻi e ʻahiʻahi ke maumauʻi ʻa e fono ʻo e angamaʻá. Faʻu ha lisi ʻo e meʻa ʻokú ke maʻú. Te ke lava foki ʻo tānaki ki ai haʻo fakakaukau pē ʻaʻau.

   1. Lau e toenga ʻo e faleʻi fekauʻaki mo e haohaoa fakasekisualé ʻi he Ki Hono Fakamālohia ʻo e Toʻu Tupú: Ko ha Fakahinohino ki hono Fakahoko ha Ngaahi Filí (vakai ki he “haohaoa fakasekisualé” ʻi he konga “Fēfē nai ʻa e … ?”). Ki ha faleʻi lahi ange mei he kau mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá, fakakaukau ke lau ʻa e “Personal Purity” (Jeffrey R. Holland, Ensign, Nov. 1998, 75–78) pe “ʻOku Mau Tui ki he Angamaʻá” (David A Bednar, Ensign pe Liahona, Mē 2013, 41–44).

   2. Kumi ha ngaahi potufolofola ʻokú ke ongoʻi te ne lava ʻo fakamālohia koe ke ke tekeʻi ʻa e ngaahi ʻahiʻahi ke maumauʻi e fono ʻo e angamaʻá. Te ke lava foki ʻo lisi ha ngaahi himi, pe ngaahi hiva ʻa e Palaimelí te ke fiemaʻu ke fanongo ki ai ke maʻu ha mālohi ʻi he taimi ʻe ʻahiʻahiʻi ai koé.

   3. Hiki ha ngaahi founga te ke lava ai ʻo feinga ke “tafoki ki he ʻEikí ʻaki ho ʻatamaí, iví, mo e mālohí kotoa” (ʻAlamā 39:13). Fakakau ʻa e meʻa kuó ke ʻosi fakahoko ʻi he kuohilí ʻa ia ʻokú ke ongoʻi kuó ne fakamālohia koé.

   4. Hiki ʻa e faleʻi kuó ke maʻu mei he mātuʻá mo e kau taki ʻo e Siasí ʻe lava ʻo tokoni atu ke ke matuʻuaki ʻa e ʻahiʻahí.

   5. Mamataʻi ʻa e foʻi vitiō “Angamaʻá: Ko e Hā Hono Ngaahi Fakangatangatá?” (3:59), lava ke maʻu atu ʻi he ChurchofJesusChrist.org.

      Chastity: What Are the Limits?

      ‘Oku faleʻi e toʻu tupu ‘o e Siasí ke nau maʻa fakasekisuale, ka ko e hā e ngaahi fakangatangata ʻoku totonú? ʻI hono fakaʻaongaʻi e ngaahi akonaki ʻa e kau palōfita ʻo onopōní, ʻoku ʻoatu ʻe he fakamatala ko ʻení e founga te tau lava ai ʻo maʻu ʻa

Fakakaukau fakatāutahá

Fakaʻaongaʻi ha kiʻi taimi ke fakalaulauloto ai ki he ʻuhinga ʻoku fiemaʻu ai ke ke maʻa fakasekisualé. Hiki leva e ngaahi sitepu te ke fakahoko ke hokohoko atu ai hoʻo talangofua ki he fono ʻa e ʻEikí ki he angamaʻá. Fakakaukau ki he meʻa naʻe ueʻi koe ʻe he Laumālie Māʻoniʻoní ke ke faí, pea lekooti ha ngaahi fakakaukau kehe pē ʻi hoʻo tohinoa akó. Kapau kuó ke maumauʻi pe ko ha taha ʻokú ke ʻiloʻi ʻa e fono ʻo e angamaʻá, manatuʻi kuo “hāʻele mai [ʻa Sīsū] ke toʻo ʻa e ngaahi angahala ʻa e māmaní” (ʻAlamā 39:15) pea te Ne fakamolemoleʻi ʻa kinautolu kotoa pē ʻoku fakatomala fakamātoato mo siʻaki ʻenau ngaahi angahalá (vakai ki he Mōsaia 26:30, ʻAlamā 39:9).

Fili Pē: Fie Ako Lahi Ange?

ʻAlamā 39:5. Ko e hā ʻoku vāvāofi ai ʻa e mafatukituki ʻo e ngaahi angahala fakasekisualé mo e fakapoó?

Lolotonga e hoko ʻa ʻEletā Pulusi C. Heifeni ko ha mēmipa ʻo e Kau Fitungofulú, naʻá ne akonaki ʻo pehe:

Mahalo ʻoku ʻi ai ha ʻelemēniti tatau ʻi he ongo meʻa ko iá—anga taʻemaʻá mo e fakapoó. ʻOkú na fekauʻaki fakatouʻosi mo e moʻuí, ʻa ia ʻoku felāveʻi mo e tuʻunga māʻolunga taha ʻo e ngaahi mālohi fakalangí. ʻOku kau ʻi he fakapoó ʻa hono toʻo taʻetotonu ʻo e moʻuí; ʻe lava ke kau ʻi he maumaufono fakasekisualé ʻa hono foaki taʻetotonu ʻo e moʻuí, pe ko hono ngāue taʻetotonu ʻaki ʻo e ngaahi matavai toputapu ʻo e mālohi ke fakatupu ha moʻuí. (Bruce C. Hafen, “The Gospel and Romantic Love,” New Era, Feb. 2002, 10)

ʻAlamā 39:6. ʻOku ʻuhinga ki he hā ʻa e fakafisingaʻi ʻa e Laumālie Māʻoniʻoní?

Naʻe akoʻi ʻe he Palōfita ko Siosefa Sāmitá (1805–44) ʻo pehē:

Ko e hā kuo pau ke fai ʻe ha tangata ke fakahoko ʻa e angahala ʻoku ʻikai fakamolemoleʻí? Kuo pau ke ne maʻu ʻa e Laumālie Māʻoniʻoní, fakaava ʻa e ngaahi langí kiate ia, peá ne ʻilo ʻa e ʻOtuá, peá ne toe faiangahala kiate ia. Hili e faiangahala ʻa ha tangata ki he Laumālie Māʻoniʻoní, ʻoku ʻikai ha fakatomala maʻana. Kuo pau ke ne pehē ne ʻikai ulo e laʻaá lolotonga ʻene sio ki aí; pe kuo pau ke ne fakaʻikaiʻi ʻa Sīsū Kalaisi ʻi hono fakaava ʻo e ngaahi langí kiate iá, pea ke ne fakaʻikaiʻi ʻa e palani ʻo e fakamoʻuí pea mahino lelei kiate ia ʻa hono moʻoní. (Joseph Smith, ʻi he History, 1838–1856 [Manuscript History of the Church], volume E-1, 1976, josephsmithpapers.org, naʻe fakatonutonu e sipelá mo e fakaʻilonga leá; vakai foki, “Accounts of the ‘King Follett Sermon,’” josephsmithpapers.org).

ʻAlamā 39:13. ʻE founga fēfē haʻaku mapuleʻi lelei ange ʻeku ngaahi fakakaukaú mo fakaʻehiʻehi mei he ngaahi holi koví?

Naʻe akonaki ʻa ʻEletā ʻUlise Soalesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku ou fakamoʻoni atu ʻi heʻetau falala ki he maka ʻo e fakamoʻuí, ʻa e Fakamoʻui ʻo hotau ngaahi laumālié, … ʻe fakalahi ʻo lahi ange ʻa ʻetau malava ke mapuleʻi ʻa ʻetau ngaahi fakakaukaú. … ʻE mole māmālie atu e mālohi ʻo e ngaahi ʻahiʻahi ʻa e filí meiate kitautolu, ʻo iku ai ki ha moʻui ʻoku fakafiefia mo fakatāpui ange. (Ulisses Soares, “Fekumi kia Kalaisi ʻi he Fakakaukau Kotoa Pē,” Liahona, Nōvema 2020, 84)