“Alema 43, 48–50: Aoaoina mai Mataupu o Taua,” Tusi Lesona a Tagata o le Vasega o le Tusi a Mamona (2024)
“Alema 43, 48–50,” Tusi Lesona a Tagata o le Vasega o le Tusi a Mamona
Alema 43, 48–50
Aoaoina mai Mataupu o Taua
O le vaega mulimuli o le tusi a Alema o loo faamatala ai se taimi o finauga ma taua. O fuafuaga faatino na faaaoga e sa Nifaē i nei taua e mafai ona fesoasoani ia i tatou e atiina a’e ai fuafuaga faatino e mafai ona tatou faaaogaina i a tatou taua i aso taitasi e faasaga ia Satani. O lenei lesona e mafai ona fesoasoani ia te oe e faatatau ai tusitusiga paia ia te oe lava ia ina ia maua ai le puipuiga a le Alii mai osofaiga faifai pea ma faateteleina a le fili.
Iloaina o le fili
Sa lapatai mai Peresitene Boyd K.Packer (1924–2015) o le Korama a Aposetolo e Toasefululua:
O loo outou ola a’e i laufanua o le fili. … [O le fili] ua i ai o ia i totonu o fale, o faafiafiaga, o ala o faasalalauga, gagana—o mea uma o siomia ai outou. O le tele o taimi, e lē mafai ona iloa lona i ai. (Boyd K. Packer, “Pe Faapefea ona Ola i le Teritori a le Fili,” Liahona, Oke. 2012, 2)
-
O a ni ou manatu po o ni lagona e uiga i lenei saunoaga?
-
O a ni faataitaiga e mafai ona e mafaufau i ai e faapupula mai ai le mea na saunoa mai ai Peresitene Packer?
Manatunatu mo sina taimi i le auala e faatatau ai le saunoaga a Peresitene Packer ia te oe. O a nisi o auala e te maitauina ai faaosoosoga a Satani o faatosinaina oe po o tagata e pele ia te oe? O a ni taumafaiga o loo e faia e puipuia ai oe lava mai ana osofaiga?
O taua i le va o sa Nifaē ma sa Lamanā
O le faaiuga o le tusi a Alema o loo faamatala ai nisi o taua na tutupu i le va o sa Nifaē ma sa Lamanā. A o e suesue i nei tala, e mafai ona e aoaoina ai ni lesona taua ia e mafai ona fesoasoani ia te oe i lau taua e faasaga ia Satani. Mo se faataitaiga, o faamoemoega ma togafiti a sa Lamanā e mafai ona faatusatusa i faamoemoega ma togafiti a Satani e faasaga ia i tatou.
Faitau le Alema 43:5–8; 46:3–5, 10, ma vaavaai mo mea na faia e taitai amioleaga o sa Lamanā ia e foliga tutusa ma faamoemoega ma togafiti a Satani.
-
Na faapefea ona pei faamoemoega ma togafiti a nei taitai e faapei o faamoemoega ma togafiti a Satani?
O autau a sa Nifaē sa taitaia e se tagata amiotonu e igoa ia Moronae.
Faitau le Alema 48:11–13, 17, ma vaavaai mo uiga faa-Keriso po o uiga o Moronae.
-
O le a se mea sa e mauaina?
Faatatauina o tusitusiga paia ia te oe lava ia
O faatusatusaga ua e faia i tusitusiga paia e oo mai i le taimi nei e mafai ona saunia ai oe e faatatau, pe faafesootai, isi auiliiliga mai nei tala i lou lava olaga.
O le faagasologa lenei e mafai ona fesoasoani ia te oe e faatatau ai tusitusiga paia i lou olaga. Tusifaamaumau nei laasaga i lau api talaaga o suesuega.
-
Saili mo auiliiliga taua.
-
Fai ni faatusatusaga i lou olaga.
-
Saili lesona aoga.
-
Fuafua le faaaogaina ai mo oe lava ia.
Faataitai le tomai o le suesueina o tusitusiga paia o le faatatauina e ala i le faaaogaina o lenei faagasologa a o e aoao e uiga i se tasi o taua i le va o sa Nifaē ma sa Lamanā.
Laasaga 1: Saili auiliiliga taua
Faitau le Alema 43:17–21, 37–39, 51–54, ma vaavaai mo auiliiliga taua. E mafai ona aofia i nei auiliiliga ia tagata, nofoaga, meafaitino, po o faatinoga o loo faamamafaina ai.
O nisi o auiliiliga atonu na e maitauina e aofia ai Moronae o loo puipuia ana autau i ofutau ma ofu mafiafia, o sa Lamanā e leai ni ofutau puipui, ma sa Nifaē o loo faatoilaloina ia sa Lamanā e ui ina matuā sili atu lo latou toatele .
Laasaga 2: Fai ni faatusatusaga i lou olaga
Mafaufau pe mafai faapefea ona faatusatusa ia auiliiliga na e faailoaina i le laasaga na uma atu i se mea faaleagaga po o tulaga i lou olaga.
-
O a faatusatusaga e mafai ona e faia i auiliiliga na e faailoaina i le laasaga na mavae atu nei? (Afai e manaomia, tagai i le Mataupu Faavae ma Feagaiga 27:1, 15–18 po o le Efeso 6:11–16. E mafai ona e fefaasinoa’iina nei fuaiupu ma fuaiupu o i le Alema 43.)
Atonu na e faatusatusaina le ofutau o sa Nifaē i le ofutau o le Atua. Atonu foi na e faatusatusaina le manumalo o sa Nifaē i le faatoilaloina o Satani ma ana faaosoosoga.
Laasaga 3: Saili lesona e aoga
Mafaufau e uiga i mea ua e aoaoina mai lenei tala lea e mafai ona faatatau ia te oe. E mafai foi ona e mafaufau e uiga i mea ua e aoaoina e uiga i le Faaola.
-
O a nisi o lesona ua e aoaoina mai lenei taua i le va o sa Nifaē ma sa Lamanā lea e mafai ona fesoasoani ia te oe i au taua e faasaga ia Satani?
-
O le a se mea o aoao mai e lenei tala ia te oe e uiga ia Iesu Keriso?
O se tasi o mataupu faavae e mafai ona tatou aoaoina e faapea, ua ofoina mai e Iesu Keriso ia i tatou le puipuiga tatou te manaomia i la tatou taua e faasaga ia Satani.
Laasaga 4: Fuafua le faaaogaina patino
Manatunatu pe mafai faapefea ona e faaaogaina lesona na e faailoaina i le laasaga na sei mavae atu.
-
O le a se mea e mafai ona e faia ia maua ai le puipuiga a Iesu Keriso e faasaga ia Satani?
I totonu o le tele o auala e faaaoga ai lenei upumoni, atonu na e mafaufau pe o faapefea ona maua le puipuiga a le Faaola e ala i faatinoga faamaoni e pei o le tatalo (tagai Mataupu Faavae ma Feagaiga 10:5), suesueina o tusitusiga paia (tagai 1 Nifae 15:24), po o le tausia o poloaiga a le Alii (tagai Mosaea 2:41).
Toe faataitai le faatatauina o tusitusiga paia
Filifili ia lē itiiti ifo ma le lua o seti nei o fuaiupu, ma, a o e suesue, faataitai ona faaaoga le faagasologa laasaga-fa mo le faatatauina o tusitusiga paia.
-
Tali fesili nei:
-
O a ni auiliiliga taua na e faailoaina mai se tala na e suesueina?
-
O a nisi o faatusatusaga na e faia i le va o na auiliiliga ma tulaga o lou olaga?
-
O le a se lesona se tasi pe sili atu na e aoaoina mai lenei tala?
-
E faapefea ona e faaaogaina nei lesona i lou olaga?
-