“Siviʻi Hono 6 Hoʻo Akó: ʻAlamā 17–ʻAlamā 52,” Tohi ʻa Molomoná - Tohi Lēsoni ʻa e Tokotaha Akó (2024)

“Siviʻi Hono 6 Hoʻo Akó,” Tohi ʻa Molomoná - Tohi Lēsoni ʻa e Tokotaha Akó

Siviʻi Hono 6 Hoʻo Akó

ʻOku fakataumuʻa ʻa e lēsoni ko ʻení ke tokoniʻi koe ke ke vakaiʻi e ngaahi taumuʻa kuó ke fokotuʻú, pea mo e tupulaki kuó ke aʻusia lolotonga hoʻo ako kimuí ni ʻa e Tohi ʻa Molomoná.

Vakaiʻi ʻo e Tupulakí

Ko e hā ʻoku fakaʻaongaʻi ki ai e ngaahi meʻangāue ko ʻení?

ʻOku mahuʻinga fēfē nai e ngaahi meʻangāue takitaha ko ʻení?

Hangē pē ko e mahuʻinga ke sivi ʻa e tuʻunga moʻui lelei fakaesinó mo e tupulakí, ʻoku mahuʻinga pehē pē foki mo hono fakafuofuaʻi hoʻo tuʻunga moʻui fakalaumālié mo e fakalakalaká. ʻE ʻoatu ʻe he lēsoni ko ʻení ha faingamālie ke ke fakahoko ai ʻeni.

Ko e hā kuó ke ako kimuí ni ʻokú ke houngaʻia ai?
Ko e hā ha ngaahi liliu kuó ke fakatokangaʻi kimuí ni mai ʻi hoʻo ngaahi ongó mo e ngaahi tōʻongá?
Ko e hā ha ngaahi founga ʻe niʻihi kuó ke fakaʻaongaʻi ai ʻa e meʻa kuó ke akó?

Fakakakato e ngaahi ʻekitivitī ko ʻení ke fakafuofuaʻi hoʻo ako mo e tupulaki fakalaumālié. Fakakaukau ke kole ki he Tamai Hēvaní ke tokoni atu ke ʻiloʻi ʻa e fakalakalaka kuó ke aʻusiá mo e ngaahi tafaʻaki ʻe ala fiemaʻu ke ke fakaleleiʻí.

Fakamatalaʻi ha ngaahi moʻoni mahuʻinga fekauʻaki mo e palani ʻo e fakamoʻuí mo e fatongia ʻo Sīsū Kalaisí

ʻI hoʻo ako ʻa e ʻAlamaá, mahalo kuó ke ako ai ha ngaahi meʻa ʻe niʻihi ʻe lava ʻo tokoni ke ke fakamatalaʻi lelei ange ai e ngaahi moʻoni fekauʻaki mo e palani ʻo e fakamoʻuí pea mo e fatongia mahuʻinga ʻo Sīsū Kalaisí.

Fili ha taha ʻo e ongo ʻekitivitī ko ʻení ke fakakakato.

‘Ekitivitī 1: Ko e palani ʻo e fakamoʻuí

Fakakaukauloto naʻe mālōlō kimuí ni ha taha ʻo e ngaahi ʻofaʻanga ʻo ha taha ho ngaahi kaungāmeʻá.

ʻI hoʻo fakakaukau ki ha niʻihi ʻo e ngaahi moʻoni mei hoʻo ako kimuí ní, ko e hā te ke lava ʻo vahevahe mo ho kaungāmeʻá fekauʻaki mo e palani ʻo e fakamoʻuí? ʻE tokoni fēfē nai ʻeni kiate iá? (Vakai, ʻAlamā 11; 12; 40.)

ʻEkitivitī 2: Ko e fatongia ʻo Sīsū Kalaisí

Fakakaukauloto ʻokú ke talanoa ki ha taha ʻoku taʻe-tui fekauʻaki mo hoʻo tui kia Sīsū Kalaisí.

ʻI hoʻo fakakaukau ki ha niʻihi ʻo e ngaahi moʻoni mei hoʻo ako kimuí ni maí, ko e hā te ke lava ʻo vahevahe mo e tokotahá ni fekauʻaki mo e fatongia mahuʻinga ʻo Sīsū Kalaisí? (Vakai, ʻAlamā 26; 34; 36.)

Ongoʻi ha holi lahi ange ke liliu koeʻuhí ko Sīsū Kalaisi

ʻI hoʻo ako kimuí ni maí, kuó ke ako ai fekauʻaki mo ha kakai tokolahi naʻe liliu koeʻuhí naʻa nau ako fekauʻaki mo Sīsū Kalaisi.

Ako e ngaahi potufolofola ko ʻení ke tokoni ke ke manatuʻi ʻa e liliu naʻe aʻusia ʻe he kakai ko ʻení. Fakakaukau ki he meʻa naʻá ke ongoʻi lolotonga hoʻo ako fekauʻaki mo e kakai ko ʻení.

Kau Leimana naʻe akoʻi ʻe ʻĀmoní: ʻAlamā 17:13–16 (kimuʻá); ʻAlamā 19:33, 36 (kimuí)
Tamai ʻa e Tuʻi ko Lamōnaí: ʻAlamā 20:8–14 (kimuʻá); ʻAlamā 22:15–18 (kimuí)
ʻAlamā ko e Siʻí: ʻAlamā 36:6 (kimuʻá); ʻAlamā 36:18, 24–26 (kimuí)

Ko e hā naʻá ke fakatokangaʻi fekauʻaki mo ʻenau loto-vilitaki ke liliú?

Fakakaukau ki hoʻo loto-holi ke liliu koeʻuhí ko Sīsū Kalaisí. ʻE ala tokoni atu e ngaahi fehuʻí ni ke fakahoko ʻeni. Mahalo te ke fakakaukau ke tali ʻeni ʻi hoʻo tohinoa akó.

Kuó ke ongoʻi nai ha niʻihi ʻo e ngaahi holi tatau naʻe maʻu ʻe he kakai ko ʻeni ʻi he Tohi ʻa Molomoná? Ko e hā naʻá ke ongoʻi pehē aí?
ʻOkú ke pehē ko e hā te ne tākiekina pe kuó ne ʻosi tākiekina koe ke ke ongoʻi e ngaahi loto-holi tatau ko ʻení?

Maʻu fakahā mei he Laumālie Māʻoniʻoní

Ko ha taumuʻa mahuʻinga ʻi he seminelí ke tokoniʻi koe ke fakatupulaki hoʻo malava ke maʻu ha fakahā fakataautaha mei he Laumālie Māʻoniʻoní.

Fakakaukau ki ha ngaahi aʻusia kimuí ni mai kuó ke maʻu ai ha fakahā fakataautaha mei he Laumālie Māʻoniʻoní. Te ke lava ʻo toe vakaiʻi ha niʻihi ʻo e ngaahi fakamatala naʻá ke hiki ʻi hoʻo folofolá pe tohinoa akó ʻi hoʻo ako ʻi he kalasí pe ʻi ʻapí.

2:3