“Hilamani 13, Konga 2: ‘Fakatomala pea Moʻui,’” Tohi ʻa Molomoná - Tohi Lēsoni ʻa e Tokotaha Akó (2024)
“Hilamani 13, Konga 2,” Tohi ʻa Molomoná - Tohi Lēsoni ʻa e Tokotaha Akó
Hilamani 13, Konga 2
“Fakatomala pea Moʻui”
ʻOkú ke pehē ʻoku lau nai ʻe he tokolahi taha ʻo e kakaí ʻa e fakatomalá ko ha meʻaʻofa mei he ʻOtuá pe ko ha tautea? Ko e hā hono ʻuhingá? Naʻe ʻofa lahi ʻa Samuela ko e tangata Leimaná ʻo aʻu pē ki he kau Nīfai faiangahalá ʻo ne fokotuʻu ʻene moʻuí ʻi ha tuʻunga laveangofua, ke akoʻi kiate kinautolu ko e fakatomalá ko ha meʻaʻofa ia meia Sīsū Kalaisi ʻoku fakatau ki he fiefiá mo e fakamoʻuí. ʻOku fakataumuʻa ʻa e lēsoni ko ʻení ke tokoniʻi koe ke ke ikunaʻi ha faʻahinga fakafeʻātungia pē ʻo e fakatomalá.
Ko e hala totonú
Fakakaukauloto ʻoku feinga ha ngaahi kaungāmeʻa ʻe niʻihi ke kumi ha anovai ʻi ha moʻunga māʻolunga kuo nau fanongo ai kae teʻeki ke nau ʻaʻahi ki ai. ʻI heʻenau fononga ʻi he feituʻu maomaonganoá, ʻoku nau fetaulaki ai mo ha tangata ʻokú ne pehē kuo taʻu lahi ʻene nofo ʻi he feituʻu ko iá. ʻOkú ne fakatokanga kiate kinautolu ʻoku ʻikai fakaiku ʻa e hala ʻoku nau lolotonga ʻi aí ki he anovaí pea ʻoku fakatuʻutāmaki ʻi he ngaahi feituʻu ʻe niʻihi. ʻOkú ne faleʻi kinautolu ke nau tafoki ʻo foki ʻi he hala tatau ki ha hala kehe te ne tataki lelei kinautolu ki aí.
-
Ko e hā ha ngaahi ʻuhinga he ʻikai fanongo ai ʻa e ngaahi kaungāmeʻá ki he tangatá?
Hangē ko e tangata ʻi he talanoá, ʻe ʻi ai e taimi ʻe niʻihi ʻe lava ke fakatokanga mai ʻa e kau palōfitá ʻo kau ki ha ngaahi fili he ʻikai fakaiku ki he fiefiá, fakalakalaká, mo ha foki ki he Tamai Hēvaní. Mahalo te nau poupouʻi kitautolu ke tau fakatomala mo liliu ʻetau moʻuí.
-
Ko e hā ha ngaahi ʻuhinga mahalo he ʻikai ke tau fakatomala ai?
ʻI he lēsoni kuo ʻosí, tuʻunga ʻi he ngaahi akonaki ʻa Samuela ko e tangata Leimaná ki he kau Nīfaí, mahalo naʻá ke ako ai ʻoku fakatokanga ʻaloʻofa ʻa e ʻEikí ki he kakaí fekauʻaki mo e ngaahi nunuʻa ʻo e angahalá pea fakamolemoleʻi ʻa kinautolu ʻoku fakatomalá. Neongo ʻene mahino kiate kitautolu ʻa e moʻoni ko ʻení, ka ʻoku ʻikai ke tau fakatomala maʻu pē. ʻI hoʻo ako ʻa e lēsoni ko ʻení, fekumi ki he tokoni ʻa e ʻEikí ke ke ʻiloʻi ʻa e founga ke ikunaʻi ai ha faʻahinga fakafeʻātungia pē ki hoʻo fakatomalá.
Ngaahi nunuʻa ʻo e angahalá
Lau ʻa e Hilamani 13:21–23, ʻo kumi ha niʻihi ʻo e ngaahi tōʻonga mo e ngaahi angafai naʻe pehē ʻe Samuela naʻe fiemaʻu ke fakatomala mei ai ʻa e kakaí. Mahalo ʻe ʻaonga ke ʻiloʻi ʻoku ʻomi ʻe he fakamalaʻiá “ha ngaahi tautea mo hono ngaahi nunuʻá ki ha meʻa, tangata pe fefine, pe ha kakai koeʻuhí ko haʻanau taʻe-māʻoniʻoni” (Fakahinohino ki he Ngaahi Folofolá, “Fakamalaʻiá, Fakamalaʻiaʻí, Ngaahi Fakamalaʻiá,” scriptures.ChurchofJesusChrist.org).
-
Makehe mei he koloá, ko e hā mo ha ngaahi meʻa kehe ʻe lava ke ʻahiʻahiʻi ai kitautolu ke “tuku ai [hotau] lotó” mo “manatu maʻu pē ki ai” ʻo lahi ange ʻi he ʻEikí?
ʻI he veesi 24–30, naʻe fakatokanga foki ai ʻa Samuela ki he kakaí fekauʻaki mo ʻenau fakafisingaʻi ʻa e kau palōfitá.
Lau ʻa e Hilamani 13:31–38, pea fakaʻosi ʻa e tefitoʻi moʻoni ko ʻení ʻi he lea pē ʻaʻau: Kapau te tau fakafisingaʻi maʻu pē ʻa e fakaafe ʻa e kau palōfitá ke fakatomalá …
Fakalaulauloto ki he meʻa ʻoku mahino kiate koe fekauʻaki mo e tefitoʻi moʻoni mo e ngaahi aʻusia kuó ke maʻu pe mamata ai ʻokú ne fakapapauʻi ʻoku moʻoni iá.
Ko ha meʻaʻofa mei he ʻOtuá
Hangē ko e fakamoʻoni ʻa Samuela ki he kau Nīfaí, “ʻoku ʻikai ha meʻa te ne faʻa fakahaofi [kitautolu] … ka ko e fakatomalá mo e tui ki he ʻEiki ko Sīsū Kalaisí” (Hilamani 13:6). Koeʻuhí ko e Fakalelei ʻa e Fakamoʻuí maʻatautolú, “kapau te [tau] fakatomala pea foki ki he ʻEiki ko [hotau] ʻOtuá, te [Ne] taʻofi ʻa [ʻEne] ʻitá” (Hilamani 13:11).
ʻI hoʻo lau ʻa e lea ko ʻeni ʻa Palesiteni Lāsolo M. Nalesoní, kumi ha ngaahi moʻoni naʻá ne akoʻi ʻe lava ʻo tokoni ke tau ikunaʻi ʻa e ngaahi fakafeʻātungia ke fakatomalá.
ʻOku tokolahi fau ha kakai ʻoku nau lau e fakatomalá ko e tautea—ko ha meʻa ke fakaʻehiʻehi mei ai tukukehe pē ngaahi tūkunga mafatukitukí. Ka ʻoku fakatupu e ongoʻi tauteaʻi ko ʻení ʻe Sētane. ʻOkú ne feinga ke taʻofi kitautolu mei heʻetau hanga kia Kalaisí, ʻoku tuʻu ʻo mafao mai Hono toʻukupú, ʻo ʻamanaki mo fie fakamoʻui, fakamolemoleʻi, fakamaʻa, fakaivia, fakahaohaoaʻi, pea mo fakamāʻoniʻoniʻi kitautolu. …
ʻOku hala ha meʻa ʻe toe fakatauʻatāina ange, fakaʻeiʻeiki ange, pe toe mahuʻinga ange ki heʻetau fakalakalaka fakafoʻituituí ka ko e tokanga fakaʻaho maʻu pē ki he fakatomalá. Ko e fakatomalá ʻoku ʻikai ko ha meʻa pē ʻoku hoko; ka ko ha ngāue. Ko e kī ia ki he fiefia mo e nonga ʻo e ʻatamaí. Ko e taimi ʻoku fakatahaʻi ai mo e tuí, malava leva ʻe he fakatomalá ʻo ʻai ke tau maʻu ʻa e mālohi ʻo e Fakalelei ʻa Sīsū Kalaisí. …
Ko e taimi ʻoku tau fili ai ke fakatomalá, ʻoku tau fili ke liliu! ʻOku tau fakaʻatā ke liliu kitautolu ʻe he Fakamoʻuí ki hotau tuʻunga lelei tahá. ʻOku tau fili ke tupulaki fakalaumālie mo fiefia—ʻa e fiefia ʻo e huhuʻi ʻiate Iá. Ko e taimi ʻoku tau fili ai ke fakatomalá, ʻoku tau fili ai ke tatau ange mo Sīsū Kalaisi! (Russell M. Nelson, “Te Tau Lava ‘o Fai Lelei Ange pea Toe Lelei Ange,” Liahona, Mē 2019, 67)
-
Tali ʻa e ngaahi fehuʻi ko ‘ení:
-
ʻE tokoni fēfē nai ʻa e fakamatala ʻa Palesiteni Nalesoní ki ha taha ke ne ikunaʻi ʻa e ngaahi fakafeʻātungia ʻo e fakatomalá?
-
Ko e fē ʻa e ola ʻo e fakatomala naʻe fakamatala ki ai ʻa Palesiteni Nalesoní ʻokú ke fakaʻamua lahi tahá? Ko e hā hono ʻuhingá?
-
Ko e hā naʻe akoʻi ʻe Palesiteni Nalesoni fekauʻaki mo e Fakamoʻuí ʻe lava ʻo tokoni ki ha taha ʻoku momou ke fakatomala?
-
Fakatomalá
Mahalo ʻe ʻi ai ha ngaahi fakafeʻātungia lahi ange ki he fakatomalá naʻe ʻikai lea ki ai ʻa Palesiteni Nalesoni, pe te tau fiemaʻu ha toe tokoni pe ngaahi tali ki ai. Fakaʻaongaʻi ha ngaahi miniti siʻi ke ako ʻa e meʻaʻofa ʻo e fakatomalá, ʻo kumi ha tali ki he ngaahi fehuʻi te ke ala maʻu pe ko ha ngaahi moʻoni ʻe lava ke tokoni atu ke ke ikunaʻi ʻa e ngaahi fakafeʻātungia ʻokú ke fehangahangai mo ia ke fakatomalá. ʻOku kau ʻi he ngaahi maʻuʻanga tokoni ʻe ala tokoni atú ʻa e “Fakatomalá, Fakatomalaʻí” ʻi he Fakahinohino ki he Ngaahi Folofolá, mo e “ʻE Tokoniʻi Koe ʻe Sīsū Kalaisi” ʻi he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí (tohitufa, 2022).
-
Tali ʻa e ongo fehuʻi ko ‘ení:
-
Ko e hā ʻa e meʻa naʻá ke ako naʻe ʻaonga kiate koé?
-
ʻE lava fēfē nai ke tokoniʻi kitautolu ʻe he Fakamoʻuí ʻi he hala ʻo e fakatomalá?
-
Lau ʻa e fakaafe ko ʻeni meia Palesiteni Nalesoní:
Feinga ʻi he faʻa lotu ke mahino e meʻa ʻokú ne vaetuʻua hotau hala ki he fakatomalá. ʻAi ke ʻilo e meʻa ʻokú ne taʻofi koe mei he fakatomalá. Peá ke liliu leva! Fakatomala! Te tau lava kotoa ʻo toe lelei ange, pea lelei ange ʻi ha toe taimi kimuʻa. (Russell M. Nelson, “Te Tau Lava ʻo Fai Lelei Ange pea Toe Lelei Ange,” Liahona, Mē 2019, 68)
Fakaʻaongaʻi ha kiʻi taimi ke fakalaulauloto mo lotu ai pea hiki ʻa e meʻa ʻokú ke ongoʻi ʻoku finangalo ʻa e Tamai Hēvaní ke ke fakahoko ke fakatomala aí.