Atamai i Aoaoga Faavae: 3 Nifae 11:10–11

“Na Ou Tuu Atu Ai i le Finagalo o le Tamā i Mea Uma mai le Amataga”

O Keriso o loo fetalai atu i a sa Nifaē

I lau suesuega o le 3 Nifae 11, na e aoao ai e uiga i le faaali atu o Iesu Keriso i sa Nifaē. Sa Ia ta’u atu ia i latou ua Ia faataunuuina le finagalo o le Tama Faalelagi e ala i le tauaveina i Ona lava luga o agasala a le lalolagi. O lenei lesona e mafai ona fesoasoani ia te oe e tauloto ai le fuaitau o le atamai i aoaoga faavae ma le fasifuaitau autu o le mau mo le 3 Nifae 11:10–11, faamatala le aoaoga faavae o loo aoao mai i lenei fuaitau, ma faaaoga mataupu faavae o le mauaina o le malamalama faaleagaga i tulaga moni o le olaga.

Tauloto ma faamatala

O le fasifuaitau autu o le mau mo le 3 Nifae 11:10–11 o le “Na ou tuu atu ai i le finagalo o le Tamā i mea uma mai le amataga.” Atonu e te makaina le vaega lenei o le fuaupu 11 i se ala faapitoa ia tulaga ese ai mai le vaega o totoe o le fuaiupu.

Faitau faafia le fasifuaitau autu o le mau e fesoasoani ia te oe e tauloto ai. Taofi mai lea taimi i lea taimi e tilotilo i ata nei o Iesu Keriso ma mafaufau loloto i le taua o mea sa Ia faia.

O Keriso i Ketesemane ma Keriso i luga o le satauro

I se lesona talu ai, sa outou talanoaina ai le upumoni o loo maua i le 3 Nifae 11:11 faapea na faia e Iesu Keriso le finagalo o le Tama i le tauaveina i Ona lava luga o agasala a le lalolagi.

Vaai faalemafaufau e faapea, ua fai atu se tagata e itiiti se mea na ia iloa e uiga ia Iesu Keriso e aoao atu mea ua e iloa e uiga ia te Ia.

aikona, faamaumau

1. Tali le fesili lenei:

• I le faaaogaina o le faamatalaga o le upumoni ma le fasifuaitau autu o le mau, e faapefea ona e faamatalaina le mea na faia e Iesu Keriso mo i tatou ma aisea e taua ai?

Faataitai le faaaogaina

Toe faamanatu mo sina taimi ia mataupu faavae o le mauaina o le malamalama faaleagaga i parakalafa 5–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2023).

I lau api faamaumau mo suesuega, aotele ai mataupu faavae taitasi e tolu o le mauaina o le malamalama faaleagaga e ala i le tusia o se fuaiupu e faamalamalama ai mataupu faavae taitasi.

Mafaufau i le tulaga lenei:

Ua amata ona faaalu e Jessica le tele o le taimi ma se vaega o uo fou. E lē mulimuli nei uo ia Iesu Keriso, ae ua ia matauina e foliga mai latou te maua pe le fiafia e aunoa ma le faailoaina o le Atua i o latou olaga. Ua aoaoina Jessica ia talitonu ma mulimuli ia Iesu Keriso. Sa ia faafesootaia i taimi uma le fiafia ma le usiusitai ia Iesu Keriso, ae ua amata ona ia mafaufau po o le a le taua o le mulimuli ia te Ia.

O mataupu faavae o le mauaina o le malamalama faaleagaga e mafai ona fesoasoani i se tulaga e pei o le tulaga a Jessica.

Iloilo manatu faavae ma fesili faatasi ai ma se vaaiga e faavavau

Ina ia fesoasoani ia te oe ia iloa le ala e mafai ai e Jessica ona iloilo lona popolega ma se vaaiga e faavavau, kopi le siata lea i lau api faamaumau mo suesuega. Ona faatumu lea o le siata i le lisiina o mafuaaga uma ma taunuuga e mafai ona e mafaufau i ai mo koluma uma e lua. Ia mautinoa e aofia ai manatu mai le 3 Nifae 11:10–11 a o e faatumuina le koluma i le itu taumatau.

	Mulimuli i Isi	Mulimuli ia Iesu Keriso
O Mafuaaga:	Mulimuli i Isi	Mulimuli ia Iesu Keriso
O Taunuuga:	Mulimuli i Isi	Mulimuli ia Iesu Keriso

2. Tali fesili nei:

• Na faapefea ona fesoasoani le mafaufau e uiga i filifiliga a Jessica i le ala lenei?

• E faaopoopo atu i le 3 Nifae 11:10–11, o a isi punaoa paia ua filifilia e mafai ona fesoasoani ia Jessica e malamalama ai i le taua o le mulimuli ia Iesu Keriso?

• O le a se mea e mafai ona fai e Jessica e faateleina ai lona faatuatua ia Iesu Keriso ma atili naunau ai e mulimuli ia te Ia?

Mafaufau pe mafai faapefea e mea ua e aoaoina i le asō ona faamanuiaina ai lou olaga po o le olaga o se tasi e te iloa. Faatino uunaiga faaleagaga atonu na e maua i le taimi o le lesona.