3 Nīfai 12:17–48

“ʻOku Ou Fakaʻamu ke Mou Haohaoa”

Naʻe akoʻi ʻe Sīsū Kalaisi ʻoku totonu ke tau “haohaoa” he ʻokú Ne haohaoa mo ʻetau Tamai Hēvaní (3 Nīfai 12:48). Neongo ʻe ngali fuʻu faingataʻa ʻa e fekaú ni, ka ʻokú ne ʻomi ha ngaahi fakakaukau mahuʻingamālie ki he natula ʻo ʻetau Tamai Hēvaní mo Sīsū Kalaisi. ʻOkú ne akoʻi mai foki te tau lava ʻo hoko ʻo hangē ko Kinauá. ʻOku fakataumuʻa ʻa e lēsoni ko ʻení ke tokoni ke mahino kiate koe hoʻo tuʻunga malava ke hoko ʻo haohaoa hangē ko ʻetau Tamai ʻi Hēvaní mo Sīsū Kalaisí.

Ko hoʻo tuʻunga malavá

• Ko e hā ʻe lava ke hoko ki he ngaahi meʻá ni takitaha ʻi he taimi ʻoku fakatupulaki kakato ai kinautolú?

• Ko e hā ʻoku nau fiemaʻu kae lava ke aʻusia ʻa e meʻa te nau malavá?

• Ko e hā ʻa e tuʻunga malava ʻo e fānau takitaha ʻi he palani ʻa e Tamai Hēvaní?

• ʻOku liliu fēfē nai ʻe he mahino ʻokú ke maʻu ki hoʻo tuʻunga malava fakalangí ʻa hoʻo ngaahi filí? ʻOkú ne liliu fēfē nai hoʻo ongo fekauʻaki mo koé?

ʻI hoʻo ako e lēsoni ʻo e ʻaho ní, fakakaukau ki he lahi hoʻo tupulaki mo e meʻa kuó ke ako ʻi he kotoa hoʻo moʻuí, pea mo e meʻa te ke kei lava ʻo aʻusia ʻi he tokoni ʻa e ʻOtuá.

Ko e fakaafe ʻa e Fakamoʻuí ke tau aʻusia ʻa e tuʻunga malava ʻoku tau maʻú

Naʻe vahevahe ʻe Sīsū ha ngaahi sīpinga ʻi he 3 Nīfai 12:17–47, mei he fono ʻa Mōsesé mo e kakai ʻo e Tohi ʻa Molomoná. Naʻá Ne muimui ʻi he sīpinga takitaha ʻaki ha fakamatala ʻo ha fono māʻolunga ange pe ko ha fakaafe ke moʻui ʻaki ha tuʻunga māʻolunga ange ʻo e māʻoniʻoní ʻa ia ʻe lava ʻo tokoni ke mahino lelei ange kiate kitautolu ʻa e meʻa ʻokú Ne finangalo mo ʻetau Tamai Hēvaní ke tau aʻusiá.

Ke vakai ki he ngaahi sīpinga ʻo e fono māʻolunga angé, lau ʻa e 3 Nīfai 12:21–22, 27–29, 38–42, ʻo kumi e ngaahi founga ʻoku fakaafeʻi ai kitautolu ʻe he Fakamoʻuí ke tau fakatupulaki ke aʻusia ʻa e tūkunga malava ʻoku tau maʻú.

• Ko e hā ha ngaahi founga ʻe lava ke tokoni ai e ngaahi akonaki ko ʻení ke tau hangē ange ko e Tamai Hēvaní mo Sīsū Kalaisí?

Lau ʻa e 3 Nīfai 12:48, ʻo kumi ʻa e tūkunga malava ʻoku ʻafioʻi ʻe Sīsū Kalaisi ʻoku tau maʻú.

Ko e3 Nīfai 12:48 ko ha potufolofola fakataukei fakatokāteline ia. Fakakaukau ke fakaʻilongaʻi e ngaahi potufolofola fakataukei fakatokāteliné ʻi ha founga makehe koeʻuhí ke faingofua ange hoʻo maʻu kinautolú. Te ke maʻu ha faingamālie ʻi he lēsoni hokó ke akoako fakaʻaongaʻi ʻa e tokāteline ʻoku akoʻi ʻi he potufolofola ko ʻení ki ha fehuʻi pe tūkunga.

ʻOku akoʻi ʻe he veesi ko ʻení ʻoku finangalo ʻa Sīsū Kalaisi ke tau hoko ʻo haohaoa hangē ko Ia mo ʻetau Tamai ʻi Hēvaní.

• ʻOkú ke pehē ko e hā ha ngaahi fehuʻi pe hohaʻa ʻe ala maʻu ʻe he kakaí fekauʻaki mo e akonaki ko ʻení? Ko e hā hono ʻuhingá?

• Ko e hā ʻokú ne ʻoatu ha ʻamanaki lelei pe loto-falala kiate koe ʻoku malava ke te hoko ʻo hangē ko e Tamai Hēvaní mo Sīsū Kalaisí?

• ʻE fekauʻaki fēfē nai ʻa e moʻoni ko ʻení mo e ngaahi fakatātā ʻi he kamataʻanga ʻo e lēsoní?

Ko e ʻofa haohaoa ʻa e Tamai Hēvaní mo Sīsū Kalaisí

Ko e hoko ʻo haohaoá ko e hoko ia ʻo hangē ko e Tamai Hēvaní mo Sīsū Kalaisí ʻE lava ke tokoniʻi kitautolu ʻe he fono māʻolunga ange naʻe akoʻi ʻe Sīsū ʻi he vahe ko ʻení ke mahino kiate kitautolu ʻa e ʻulungaanga mo e ngaahi tōʻonga ʻa e Tamai Hēvaní mo Sīsū Kalaisí. ʻI he mahino lelei ange kiate kitautolu ko hai Kinauá, te tau lava leva ʻo feinga ke hangē ko Kinauá pea maʻu ha ʻamanaki lelei te Na tokoniʻi kitautolu ʻi he faʻa kātaki ʻi heʻetau feinga ke tupulakí.

Lau ʻa e 3 Nīfai 12:43–45 pea mo e lea ko ʻeni ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo kumi ʻa e meʻa ʻoku nau akoʻi mai kau ki he ʻofa ʻa e Tamai Hēvaní mo Sīsū Kalaisí.

… ʻOku ou houngaʻia neongo ʻeku ngaahi tōnounoú, ka ʻoku haohaoha ʻa e ʻOtuá—pea koeʻuhí ko ʻEne haohaoá, ʻoku malava ke Ne ʻofa ki Hono ngaahi filí, koeʻuhí he ko e taimi lahi, ʻoku faʻa hoko ʻa e “tangata fakakakanó” mo e fefine ʻiate kitautolú ko ha fakafili. ʻOku ou fakafetaʻi, ʻe lava ke faitāpuekina ʻe he ʻOtuá ʻa kinautolu ʻoku faikovi kiate Iá, he ʻoku ʻi ai pē ʻa e taimi ʻoku tau faʻa faikovi kotoa ai kiate Ia [neongo naʻe ʻikai ha ʻuhinga pe taumuʻa ke fai pehē]. (Jeffrey R. Holland, “Ko Ia ke Haohaoa ʻA Kimoutolu,” Liahona, Nōvema 2017, 41)

1. Lekooti hoʻo tali ki he ongo fehuʻi ko ‘ení:

• Ko e hā ʻoku fakanonga ai ke ʻiloʻi ʻoku ʻofa ʻa e Tamai Hēvaní mo Sīsū Kalaisi ʻi Hona ngaahi filí mo tāpuakiʻi ʻa kinautolu ʻoku fai kovi kiate Kinauá?

• ʻE lava fēfē ʻe Heʻena ʻofá, tokoní, mo e faʻa kātakí ʻo ʻoatu ha ʻamanaki lelei te ke lava ʻi ha ʻaho ʻo aʻusia ʻa e haohaoá?

Ko e haohaoá ko ha founga ngāue ia ʻoku toki malava pē ʻo fakafou ʻia Sīsū Kalaisi

ʻOku fakanatula pē ke tau fifili pe ʻoku malava nai ke hoko ʻo haohaoa. Kapau ʻoku fiemaʻu ke tau aʻusia ʻa e haohaoá ʻiate kitautolu pē, pe lava ke fakahoko ia lolotonga ʻetau moʻui fakamatelié, ʻe taʻemalava ia.

Lau ʻa e Tokāteline mo e Ngaahi Fuakava 76:69–70 mo e Molonai 10:32–33, ʻo kumi ʻa e meʻa ʻokú ne ʻai ke tau malava ʻo hoko ʻo haohaoá. Fakakaukau ke fakafekauʻaki e ongo potufolofola ko ʻení ki he 3 Nīfai 12:48.

• Ko e hā ʻoku malava ai ʻe kinautolu kotoa pē kuo iku ʻo haohaoá ke nau fai iá?

Lau ʻa e Tokāteline mo e Ngaahi Fuakava 93:11–13 pea kumi ʻa e meʻa ʻoku tānaki mai ʻe he ngaahi veesi ko iá ki heʻetau mahino ki he haohaoa ʻa Sīsū Kalaisí.

• Ko e hā ʻoku mahuʻinga ai ke mahino ko e haohaoa ko ia ʻa Sīsū Kalaisí ko ha founga ngāue?

Naʻe akoʻi ʻe Palesiteni Lāsolo M. Nalesoni ʻa e meʻá ni fekauʻaki mo e ʻuhinga mo e founga ngāue ki he haohaoá:

Kātaki ʻo fakatokangaʻi ange ʻoku ʻikai ʻuhinga ʻa e foʻi lea [haohaoá] ki he “hao mei he fehalaākí.” …

ʻOku ʻikai fiemaʻu ke tau lotofoʻi ʻo kapau ʻoku ngali fuʻu lahi [faingataʻa] mo ʻikai toe ʻosi ʻetau feinga mālohi ki he haohaoá. ʻOku kei fakatatali ʻa e haohaoá. ʻE lava ke toki hoko kakato mai pē ia ʻi he hili ʻa e Toetuʻú pea ʻi he ʻEikí pē. ʻOku fakatatali ia kiate kinautolu kotoa pē ʻoku ʻofa kiate Ia mo tauhi ʻEne ngaahi fekaú. (Russell M. Nelson, “Perfection Pending,” Ensign, Nov. 1995, 86, 88)

• Ko e hā ʻoku fakalahi mai ʻe he fakamatala ko ʻení ki heʻetau mahino ki he haohaoá?

2. Fakakakato e ʻekitivitī ko ʻení:

Fakakaukauloto kuo kole atu ke ke fai ha poupou fakalaumālie miniti ʻe ua ki he tolu ʻi hoʻomou ʻekitivitī hoko ʻa e toʻu tupú. ʻOku kole atu ʻe hoʻo kau takí ke ke vahevahe hoʻo ngaahi fakakaukau ki he ʻuhinga ʻoku totonu ke ʻomi ai ʻe he akonaki ʻi he 3 Nīfai 12:48 ha ʻamanaki lelei kiate kitautolu. Hiki hoʻo ngaahi fakakaukaú. Fakakau ki ai ʻa e tali ki he ngaahi fehuʻi ko ʻení:

• ʻOku ʻuhinga ki he hā ʻa e hoko ʻo haohaoá? Ko e hā ʻa e meʻa ʻoku ʻikai ke ʻuhinga ki aí?

• ʻOku ʻoatu fēfē ʻe he meʻa ʻokú ke ʻilo fekauʻaki mo e Tamai Hēvaní mo Sīsū Kalaisí ha ʻamanaki lelei ke ke hoko ʻo hangē ko Kinauá?

Fili Pē: Fie Ako Lahi Ange?

Fēfē kapau te u ongoʻi he ʻikai te u lava ʻo moʻui ʻo fakatatau mo e ngaahi fie maʻu ʻa e Fakamoʻuí?

Naʻe akoʻi ʻe Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí ʻo pehē:

Come, Join with Us

Regardless of your circumstances, your personal history, or the strength of your testimony, there is room for you in this Church.

Mahalo ʻe pehē ʻe ha niʻihi, “ʻOku ʻikai ke u tui te u lava ʻo moʻui tatau mo hoʻomou ngaahi tuʻunga moʻuí.”

Ko ha toe ʻuhinga lahi ia ke haʻu ai! ʻOku fokotuʻutuʻu ʻa e Siasí ke ne fafangaʻi ʻa e taʻe-haohaoá, ʻa e faingataʻaʻiá, pea mo e ongosiá. ʻOku fakafonuʻaki ia ha kakai ʻoku holi ʻaki honau lotó kotoa ke tauhi e ngaahi fekaú, neongo kapau ʻoku teʻeki ai ke nau lavaʻi ia. (Dieter F. Uchtdorf, “Haʻu ʻo Kau mo Kimautolu,” Liahona, Nōvema 2013, 23)

Naʻe enginaki ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku folofola mai kiate kitautolu ha Tamai ʻofa ʻo pehē, “Haʻu ʻi ho tuʻunga lolotongá,” ʻo Ne toe tānaki mai, “Kuo pau pē ke ke liliu.” ʻOku tau mamali mo manatuʻi e finangalo ʻa e ʻOtuá ke tau aʻusia ha meʻa lahi ange he tuʻunga ʻoku tau fakakaukau ki aí. (Jeffrey R. Holland, “Ngaahi Hiva ʻoku Hivaʻi mo ʻIkai Hivaʻí,” Liahona, Mē 2017, 51)

Naʻe akoʻi ʻe he Palōfita ko Siosefa Sāmitá (1805–1844) ʻo pehē:

Kapau te ke kaka ʻi ha tuʻunga, kuo pau ke ke kamata hake mei lalo, ʻo kaka ai ki ʻolunga, kae ʻoua kuó ke aʻu ki he tumuʻakí; pea ʻoku pehē pē mo e ngaahi tefitoʻi [fono] ʻo e ongoongoleleí—kuo pau ke ke kamata mei he ʻuluakí, pea [hokohoko] atu ai kae ʻoua kuó ke ʻilo ʻa e ngaahi tefitoʻi [fono] kotoa ʻo e hākeakiʻí. Ka ʻe fuoloa hili hoʻo [hū atu] ʻi he veilí, peá ke toki ʻilo[ʻi] kotoa kinautolu. ʻE ʻikai lava ke mahino kiate kitautolu ʻa e meʻa kotoa pē ʻi he māmani ko ʻení; ko e ngāue lahi ʻa ʻetau ako [ke ʻilo] hotau fakamoʻuí mo hotau hākeakiʻí ʻi he hili ʻo ʻetau maté. (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 308)

Ko e hā ʻa e haohaoá pea te u tali fēfē ia?

Naʻe akoʻi ʻe ʻEletā Kēleti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e foʻi lea ko e haohaoa … ʻoku faʻa maʻuhala he taimi ʻe niʻihi ‘o ‘uhingaʻi ko e ‘ikai ‘i ai ha fehalaaki. Mahalo ʻokú ke feinga mālohi pe ko ha taha ʻokú ke ʻilo ke haohaoa ʻi he foungá ni. Koeʻuhí ʻoku hangē ʻoku ʻikai faʻa aʻu ki ai ʻa e faʻahinga haohaoa peheé, naʻa mo hotau lelei tahá te ne lava ʻo ʻai ke tau hohaʻa, loto-foʻi, pe ongosia. ʻOku ʻikai ke tau feinga ke mapuleʻi hotau tūkungá mo e kakai ʻoku tau feohí. ʻOku tau hohaʻa ki he ngaahi vaivaí mo e fehalākí. Ko hono moʻoní, ko e lahi ange ʻetau feingá, ko e mamaʻo ange ia ʻetau ongoʻi e haohaoa ʻoku tau fekumi ki aí. …

ʻE lava ke hoko e taʻemahino ki he ʻuhinga ʻo e hoko ʻo haohaoá ʻi ha vilitaki ke haohaoá—ko ha tōʻonga fakakaukau pe ʻulungaanga ʻokú ne ʻave e holi fakaʻofoʻofa ke fai lelei pea hoko [ʻo] liliu ia ko ha fakaʻamu ʻoku ʻikai ke faʻa malava ke hoko ʻo haohaoa pē he taimí ni. ʻOku faʻa hoko e vilitaki ke haohaoá mei he ongoʻi ko kinautolu pē ʻoku haohaoá ʻoku totonu ke ʻofaʻí pe ʻoku ʻikai totonu ke tau fiefia kae ʻoleva pē ke tau toki haohaoa. (Gerrit W. Gong, “Hoko ʻo Haohaoa ʻia Kalaisí,” Liahona, Siulai 2014, 14–15, 17)

Sio he vitiō “Perfectionism: Will I Ever Be Good Enough? (Ko e Haohaoá: ʻE Lava Nai Ke Feʻunga ʻEku Leleí?” (4:33).

Perfectionism: Will I Ever Be Good Enough?

Do you sometimes feel like you’re not good enough for God or anyone else? Chances are you’ve had a bout with perfectionism. Whether you know it or not, God’s Grace reaches everyone—including perfectionists.