3 Nifae 25

Galuega o le Malumalu ma Talafaasolopito o Aiga

aiga fiafia o loo faia talafaasolopito o aiga

Pe na e faamatala atu ea i se tasi le mafuaaga e ala ai ona i ai a tatou malumalu pe faia galuega o talafaasolopito o aiga? O le a se taua o galuega o talafaasolopito o aiga ma le malumalu ia te oe? A o aoao atu ia sa Nifaē, sa sii mai e Iesu se savali sa Ia muai faasoa atu ia Malaki lea na aofia ai le toe foi mai o Elia ma lana matafaioi taua i le galuega o malumalu ma talafaasolopito o aiga. O lenei lesona ua faamoemoe e fesoasoani ia te oe e auai i galuega o talafaasolopito o aiga ma malumalu.

Ou tuaa

Kopi le siata lenei o talafaasolopito o aiga i lau api faamaumau mo suesuega, faatumu le tele o faamatalaga e te mafaia.

pepa o le faasologa o gafa o le fa augatupulaga

Mafaufau i mea ua e iloa ma lagonaina e uiga i olaga o e pele ia te oe, o a ni mea e te fia iloa, ma pe na faapefea ona aafia ai lou olaga.

• Aisea e taua ai lo tatou saili ia iloa atili e uiga i o tatou tuaa?

• I luga o se fua o le 1–10 (1 = e le fiafia i ai, 10 = matuai fiafia lava), o le a lou naunau i le iloaina o ou tuaa? I le auai i galuega o malumalu ma talafaasolopito o aiga? Aisea?

A o e suesue, vaavaai mo ni malamalamaaga e ono fesoasoani e faaosofia ai oe e auai atili i lenei galuega.

“Ae lei oo mai le aso tele ma le matautia o le Alii”

I le faaaogaina o ata ma upu faafaatusa na tusia e le perofeta o le Feagaiga Tuai o Malaki, sa aoao atu ai e Iesu tagata i le atu Amerika e uiga i Lona Afio Mai Faalua i le lalolagi ma valoia ai le galuega o malumalu ma talafaasolopito o aiga.

Faitau le 3 Nifae 25:1–2, ma vaavaai mo mea na aoao mai e le Faaola o le a tupu pe a toe afio mai o Ia i le lalolagi. O uiga ma faauigaga nei o faatusa e ono aoga.

• Tagutugutu o saito: O tagutugutu o laau toto e totoe i se fanua pe a uma le seleselega o le a susunuina e se faifaatoaga

• Aa: Tuaa

• Lala: Fanau

• Faamalologa i Ona apaau: Mana faamalolo ma le puipuiga o le Alii ma Lana Togiola

• Tamai povi i le lotoa: O le a taulimaina lelei Isaraelu ma saunia mea e pei o ni manu i totonu o se lotoa

• E faapefea ona e faamatalaina le mea o le a tupu i Lona Afio Mai Faalua e tusa ai ma nei fuaiupu? O le a le mea o le a tupu i e amioleaga?

• O a ni mea e te aoao mai i nei faailoga e uiga i le Faaola ma Ana faamanuiaga mo i latou o e mulimuli ia te Ia?

Faitau le 3 Nifae 25:5–6 ma mafaufau e faailoga mea o le a faia e le Faaola e fesoasoani ai i aiga o le lalolagi a o lei oo i Lona Afio Mai Faalua. O se tasi o uiga o le upu “liliu” o le fusia, po o le faamaufaailoga (tagai i le Aoaoga a Peresitene o le Ekalesia: Iosefa Samita [2007], 472). O vaefaamatalaga i au tusitusiga paia e mafai foi ona fesoasoani e te malamalama atili ai i nei fuaiupu.

Afai e te manao ai, mafaufau e maka po o fea o ta’u faafia ai lenei folafolaga i tusitusiga faavae taitasi (tagai i le Malaki 4:5–6; Luka 1:17; Mataupu Faavae ma Feagaiga 110:15–16; Iosefa Samita—Talafaasolopito 1:38–39).

O Elia, o se perofeta anamua, na umia ki o le mana o faamauga. O le mana o faamauga e faia ia taulia ai i le lagi sauniga na faia i le pule o le perisitua i luga o le fogaeleele (Taiala i Tusitusiga Paia, “Faamau, Faamaufaailogaina,” scriptures.ChurchofJesusChrist.org).

O Elia ua faaali mai i le malumalu o Katelani

Faitau le Mataupu Faavae ma Feagaiga 110:13–16 e vaai ai po o le a le mea na tupu i le Malumalu o Katelani i le 1836 e aofia ai Elia, Iosefa Samita, ma Oliva Kaotui.

Ona o le mana o faamauga ua toefuataiina mai, ua mafai ai ona tatou faia galuega faalemalumalu mo i tatou lava ma o tatou tuaa ua maliliu.

aikona, faamaumau

1. Tali le fesili lenei:

   • O le a se mea ua e aoaoina mai le 3 Nifae 25 ma le Mataupu Faavae ma Feagaiga 110?

E taua le iloa e le gata na toefuatai mai e le Faaola ki o faamauga, ae ua na o Lana Togiola lava e mafai ai e i tatou ma i latou i o tatou aiga ona togiolaina, faamamaina, ma maua sauniga ma faamanuiaga e faavavau e aofia ai le sauniga o le faamauga.

Mafaufau loloto pe aisea e taua ai galuega o malumalu ma talafaasolopito o aiga i lou olaga. A o e mafaufau loloto, atonu e te manao e matamata le vitio “O Faamanuiaga Folafolaina o le Talafaasolopito o Aiga 2” (4:04), o loo maua i le ChurchofJesusChrist.org.

aikona, faamaumau

2. Tali fesili nei:

   • O a ni aafiaga na outou maua i galuega o malumalu ma talafaasolopito o aiga?

   • O a faamanuiaga ua e matauina i lou olaga o se taunuuga (o na galuega)?

Auai i galuega o le malumalu ma talafaasolopito o aiga

Ina ia fesoasoani ia te oe e auai i galuega o malumalu ma talafaasolopito o aiga, fai se tasi pe lua o mea nei. E mafai foi ona e mafaufau e fai se isi mea e faatatau i galuega o malumalu ma talafaasolopito o aiga e te lagona le taialaina o oe e fai e le Agaga.

• I le faaaogaina o lau faitotoa o le ChurchofJesusChrist.org saini e alu i totonu i le FamilySearch.org. Saili punaoa e aoao ai e uiga i se tasi o ou tuaa. Mafaufau e amata i le “E faapefea ona e manao e amata?”

• Tesi, valaau, pe faatulaga se taimi e talanoa ai i matua, matua matutua, po o isi tagata o le aiga e aoao atili ai e uiga i o latou olaga, talaaga, po o taimi na liua ai i le talalelei. Mafaufau e fai se faamaumauga o mea ua e aoaoina.

• Auai i le faatinoga o le faavasegaga o igoa. Mo se fesoasoani ia malamalama po o le a lenei mea ma le auala e amata ai, mafaufau e matamata muamua le vitio “FamilySearch Indexing—How it Works” (1:48), o loo maua i le FamilySearch.org.

• Saili igoa o tuaa ua maliliu e manaomia ona faia galuega o sauniga i le malumalu i luga o le polokalama o le FamilySearch po o le FamilySearch.org. Mafaufau e amata i le “E faapefea ona e manao e amata?”

aikona, faamaumau

3. Faamalamalama atu le mea na e faia e amata ai ona auai i le galuega o le malumalu ma talafaasolopito o aiga i le taimi o au suesuega i le asō. Ona tali lea o fesili nei:

   • O le a se mea e te lagona e finagalo le Alii e te faia e faaauau ai ona auai i galuega o malumalu ma talafaasolopito o aiga? O le a le eseesega e mafai e lenei mea ona faia i lou olaga?

A o e saili e faaauau pea ona auai i talafaasolopito o aiga ma galuega o le malumalu, ia manatua le saunoaga lenei mai ia Peresitene Russell M. Nelson:

Peresitene Russell M. Nelson

Soo se taimi e te faia ai soo se mea e fesoasoani ai i soo se tasi—i soo se itu o le veli—ia laa agai i luma i le osia o feagaiga ma le Atua ma maua o latou sauniga e tatau ai o le papatisoga ma le malumalu, ua e fesoasoani lea e faapotopoto Isaraelu. (Russell M. Nelson ma Wendy W. Nelson, “Faamoemoe o Isaraelu” [faigalotu a le autalavou i le lalolagi atoa, 3 Iuni, 2018], ChurchofJesusChrist.org)

Tuu i le faitalia: O e Manao e Aoao Atili?

O a nisi o faamanuiaga o le auai i galuega o malumalu ma talafaasolopito o aiga?

Na aoao mai Sister Wendy W. Nelson:

Sister Wendy W. Nelson

O lea, afai e te manao i sina olioli teisi atu i lou olaga, se faauigaga sili teisi atu, fesootaiga o le loto-i-le-loto, taulai atili atu, malosi, uunaiga, tele atu o le tele o mea matagofie, faaavanoa se taimi e fesoasoani ai ia i latou i le isi itu ia osia feagaiga ma le Atua. O le a tafe mai le mana o le Atua i lou olaga ao e faia. (Wendy W. Nelson, “… My Soul Delighteth in the Covenants of the Lord” [saunoaga na tuuina atu i le Brigham Young University Women’s Conference, Ape. 30, 2015])

Na faasoa mai Elder Dale G. Renlund o le Korama a Aposetolo e Toasefululua:

Elder Dale G. Renlund

O le a e maua e le gata i le puipuiga mai faaosoosoga ma maagao o le lalolagi, ae o le a e maua foi le mana patino—le mana e suia ai, mana e salamo ai, mana e aoao ai, mana e faapaiaina ai, ma le mana e liliu atu ai loto o tagata o lou aiga i le tasi ma le isi, ma faamalolo ai mea e manaomia le faamalologa. (Dale G. Renlund, “Family History and Temple Blessings,” Ensign, Fep. 2017, 31)