Molomona 3–6

Ko e Hinga ʻa e Puleʻanga ʻo e Kau Nīfaí

Kuó ke hohaʻa nai ki ha taha ʻokú ke ʻofa ai? Naʻe lea ʻa Molomona fekauʻaki mo e kakai naʻa nau feohí ʻo pehē, “Kuó u taki ʻa kinautolu … peá u ʻofa kiate kinautolu … ʻaki hoku lotó kotoa” (Molomona 3:12). Ka naʻe tokanga mo tengihia ʻe Molomona hono kakaí ʻi he fakaʻau ke fakaʻauha kinautolú koeʻuhí he naʻe ʻikai ke nau fie tafoki ki he ʻOtuá ke maʻu ha tokoni. ʻE lava ke tokoni ʻa e lēsoni ko ʻení ke ke ongoʻi ʻa hono mahuʻinga ʻo e tafoki ki he Tamai Hēvaní mo e Fakamoʻuí ʻi hoʻo moʻuí.

Ko e hā ʻa e meʻa te ke faí?

Naʻe fai ʻe ʻEletā Sipenisā J. Konitī ʻo e Kau Fitungofulú ha talanoa fekauʻaki mo ha tangata ko Maile Lingi, ʻa ia naʻe fakaʻuli atu ʻi ha hala fakakavakava he poʻulí ʻo ne sio ki ha puli fakafokifā pē ʻa e kā naʻe ʻi muʻa ʻiate iá. Naʻe holo ha konga lahi ʻo e hala fakakavakava ʻi muʻa ʻiate iá. Naʻe malaki ʻe Maile ʻa e taʻofí ʻo tuʻu ʻene kaá ʻi he taimi tonu pē.

• Kapau naʻá ke ʻi he tuʻunga ʻo Mailé, ko e hā ha niʻihi ʻo e ngaahi ʻuluaki meʻa te ke fai ʻi he hili hoʻo taʻofi hoʻo kaá?

Lau ʻa e fakamatala ko ʻení ʻo e meʻa naʻe fili ʻe Maile ke faí. Mahalo te ke fie mamata ʻi he foʻi vitiō “Fakatokanga ʻa e Kau Palōfitá,” ʻoku maʻu ʻi he ChurchofJesusChrist.org, mei he taimi 0:00 ki he 0:58.

Naʻe kamata ʻe Maile … ke fakatokanga ki he ngaahi meʻalele naʻe lele maí fekauʻaki mo e fakatuʻutāmaki naʻe hanganaki maí. ʻI heʻene taʻataʻalo fakavave hono ongo nimá naʻá ne manavahē ʻi he lele mai ha kā “ʻo ofeʻi takai ʻiate ia kae tō ʻa e kaá ki he fakatuʻutāmakí” (Stephen Johnson, “Over the Edge!” Reader’s Digest, Nov. 1977, p. 128). Ko e kā hono uá naʻe mālō pē ʻene taʻofi ʻi he taimi totonú, ka ko e kā hono tolú naʻe ʻikai pē haʻane teitei māmālie hifo ʻo ne tuiʻi ai ʻa e kā ʻa Lingí ʻi he ngataʻanga ʻo e hala fakakavakavá.

Fakafokifā pē kuo ʻasi mai ha pasi ne ʻi ai ha kau pāsese, naʻe fononga fakahangatonu mai ia kia Maile, ʻo ne tukunoaʻi pē ʻa e taʻataʻalo [ʻa Mailé]. (Spencer J. Condie, “A Mighty Change of Heart,” Ensign, Nov. 1993, 17)

• Kapau naʻá ke ʻi he tuʻunga ʻo Mailé, te ke ongoʻi fēfē nai kapau naʻe ʻikai tokanga atu ʻa e kakaí? Te ke foʻi nai ʻi he feinga ke fakahaofi kinautolú? Ko e hā hono ʻuhingá?

Hangē tofu pē ko Maile Lingí, naʻe mamata ʻa Molomona naʻe fononga atu hono kakaí ki he fakaʻauhá. ʻI he hoko ʻa Molomona ko e taki ʻo e kau tau Nīfaí, pea mo ha palōfita ʻa e ʻOtuá, naʻá ne fai ʻa e meʻa kotoa naʻá ne lavá ke fakatokanga kiate kinautolu, maluʻi kinautolu, mo akoʻi kinautolu fekauʻaki mo honau Fakamoʻuí. Ko e meʻapangó, naʻe ʻikai tokanga pe naʻe fakasītuʻaʻi ʻe he konga lahi ʻo hono kakaí ʻa e ngaahi ngāue ʻa Molomoná.

Fakatuʻutāmaki ʻoku hanganaki mai ki he kakai ʻo Molomoná

ʻI he tokaimaʻanga ʻa e ʻOtuá, naʻá Ne ʻosi fakatokanga ki he kakai Nīfaí ʻi ha ngaahi taʻu ʻe laungeau fekauʻaki mo e meʻa ʻe hoko kapau ʻe hokohoko atu ʻenau angatuʻu kiate Iá.

Ke vakai ki ha sīpinga ʻe taha, lau ʻa e Hilamani 13:8–10, ʻo kumi ha kikite naʻe fakahoko ʻe he ʻOtuá ʻo fakafou ʻia Samuela ko e tangata Leimaná ʻi he taʻu ʻe 300 tupu kimuʻa pea toki fāʻeleʻi ʻa Molomoná. ʻI hoʻo laukongá, fakatokangaʻi ange ʻa e taimi ʻe fakahoko ai ʻa e kikité. (Vakai, 1 Nīfai 12:6, 11–19 mo e 3 Nīfai 27:30–32 ki ha ngaahi sīpinga lahi ange ʻo e tokaimaʻananga mo e tomuʻa fakatokanga ʻa e ʻOtuá ʻe fakahoko ʻi he kuonga ʻo Molomoná.)

• ʻOkú ke pehē ko e hā ka tomuʻa fakahā ai ʻeni ʻe he ʻOtuá ʻi ha taimi lahi kimuʻa?

Lau ʻa e ngaahi fakamatala ko ʻeni ʻo e ngaahi feinga ʻa Molomona ke tokoniʻi hono kakaí mo ʻenau fakafōtunga ki heʻene ngaahi feingá.

• Molomona 3:1–3, 12

• Molonai 9:3–5, 18–22 (Naʻe vahevahe ʻe Molonai ha tohi naʻe fai ʻe heʻene tamai ko Molomoná.)

• ʻOkú ke pehē ko e hā naʻe feinga mālohi ai ʻa Molomona ke tokoniʻi kinautolú neongo naʻá ne ʻiloʻi ʻa e ngaahi kikité?

• Ko e hā ha ngaahi faitatau ʻokú ke vakai ki ai ʻi he ngaahi feinga mo e ngaahi holi ʻa Molomoná pea mo ia ʻo e Fakamoʻuí?

Ko e Ui ki he ʻOtuá

Fakakaukau ki ha ngaahi founga ʻe lava ke ke fakaʻosi ʻaki ʻa e sētesi ko ʻení:

• “ʻOku fefaʻuhi ha toʻu tupu tokolahi he ʻahó ni mo e .”

Naʻe vahevahe ʻe Molomona ʻa e taha ʻo e ngaahi ʻuhinga naʻe faingataʻaʻia ai ʻa e kakai Nīfaí ʻi he ngaahi meʻa ne nau fefaʻuhi mo iá. Lau ʻa e Molomona 5:2, ʻo kumi ʻa e meʻa naʻe ʻIKAI fai ʻe he kakai Nīfaí lolotonga ʻenau faingataʻaʻiá.

• ʻE ʻaonga fēfē ʻa e meʻa naʻe vahevahe ʻe Molomona ʻi he veesi 2 ki ha kakai tokolahi he ʻaho ní?

Lau ʻa e fakamatala ko ʻení ʻo fakahū ai ʻa e ngaahi fefaʻuhi naʻá ke fakakaukau ki ai kimuʻá. Fakalaulauloto pe ʻokú ke tui ʻoku moʻoni nai ʻa e fakamatalá ʻi hotau māmaní he ʻahó ni. ʻOku moʻoni nai ia kiate koe ʻi ha taha pē ʻo e ngaahi faingataʻa ʻi hoʻo moʻuí? Kapau ko ia, ko e hā ha meʻa te ke lava ʻo fai ke liliu ai iá?

• “ʻOku fefaʻuhi ha toʻu tupu tokolahi he ʻahó ni mo e ʻo ʻikai ke nau ui tokoni ki he ʻOtuá.”

Ko e fakaʻauha ʻo e kakai Nīfaí

Hili hano ʻofa, akoʻi, mo taki ʻe Molomona ʻa e kau tau Nīfaí ʻi ha ngaahi taʻu lahi, naʻá ne kafo lahi ʻi he tau fakaʻosi mo e kau Leimaná. Naʻá ne vakai hifo mei he tumutumu ʻo ha tafungofunga ki he meʻa naʻe toe ʻi he puleʻanga ʻo e kau Nīfaí. Ko e kau tau Nīfai pē ʻe toko 24 naʻa nau hao mei he fakaʻauhá, kau ai ʻa Molomona mo hono foha ko Molonaí (vakai, Molomona 6:9–15).

ʻOku lekooti ʻe Molomona ʻi he Molomona 6, ko e “tau fakaʻosi ʻeni ʻa [hono] kakaí” (Molomona 6:6). Lau ʻa e Molomona 6:7, 10–15, ʻo kumi ʻa e meʻa naʻe hoko ki he kakai Nīfaí ʻi he tau fakaʻosi ko ʻení.

Fakakaukauloto ʻokú ke ʻi he tuʻunga ʻo Molomoná, ʻo tengihia ʻa e mole ʻa e kakai ʻokú ke ʻofa aí ka ʻokú ke ʻilo te ke kei lava pē ʻo tuku ha kiʻi pōpoaki nounou ki he ngaahi toʻu tangata he kahaʻú. Ko e hā ha meʻa te ke fakaʻamu ke ʻiloʻi ʻe he kakai ʻi he ngaahi ʻaho kimui ní?

Lau ʻa e Molomona 5:10–11, 16–18; 6:16–20 ke sio ki ha niʻihi ʻo e ngaahi pōpoaki naʻe ueʻi fakalaumālie ʻa Molomona ke ne tohitongi maʻatautolú. Mahalo te ke fie fakaʻilongaʻi ʻa e ngaahi kupuʻi lea ʻokú ke pehē ʻoku fiemaʻu lahi taha ke fanongo ki ai ʻa e kakai ʻi hotau kuonga ní.

Ko ha foʻi moʻoni ʻe taha naʻe akoʻi ʻe Molomona ko e tuʻu ʻa Sīsū Kalaisi mo e ongo toʻukupu ʻoku mafao mai ke tali ʻa kinautolu ʻoku fili ke fakatomala pea haʻu kiate Iá (vakai, Molomona 6:17).

Fakakaukau ke kuikui taimi siʻi peá ke fakakaukauloto ʻoku tuʻu ʻa Sīsū ʻo sio atu kiate koe mo ha ongo toʻukupu ʻoku mafao mai. Hiki ʻi hoʻo tohinoá hoʻo ngaahi fakakaukaú, ongó, mo e ngaahi ueʻi ʻokú ke maʻu fekauʻaki mo e ʻuhinga ki hoʻo moʻuí ʻa e tuʻu ʻa Sīsū mo e ongo toʻukupu ʻoku mafao mai ke tali koé.

1. Tali ha fehuʻi ʻe ua mei he ngaahi fehuʻi ko ʻení:

   • Ko e fē ʻi he ngaahi akonaki ʻa Molomoná ʻokú ke fiemaʻu taha ʻi hoʻo moʻuí? Ko e hā hono ʻuhingá?

   • Ko e hā ʻa e meʻa naʻe fakaʻamu ʻa Molomona ke mahino kiate koe fekauʻaki mo e Tamai Hēvaní mo Sīsū Kalaisí?

   • ʻOkú ke pehē naʻe mei kehe fēfē hotau māmaní kapau naʻe tokolahi ange ʻa e kakai naʻe tui ki he meʻa naʻe tohi ʻe Molomoná?

Fili Pē: Fie Ako Lahi Ange?

ʻOku ʻuhinga ki he hā ke “hapai [ʻo puke maʻu] ʻi he ongo toʻukupu ʻo Sīsuú” (Molomona 5:11)?

Naʻe pehē ʻe ʻEletā Keni F. Lisiate ʻo e Kau Fitungofulú:

Ko kinautolu kotoa pē ʻe haʻú ʻe lava ke “hapai kinautolu ʻe he ongo toʻukupu ʻo Sīsuú” [Molomona 5:11]. ʻE lava ke fakamoʻui ʻa e laumālie kotoa pē ʻe Hono mālohí. ʻE lava ke fakanonga ʻa e mamahi kotoa. ʻE lava ke tau “ʻilo ai ʻa e fiemālié ki hotau laumālié” [Mātiu 11:29]. He ʻikai liliu hake leva e ngaahi tūkunga ʻoku tau ʻi ai he māmaní, ka ʻe lava ke folo hifo ʻetau mamahí, loto hohaʻá, faingataʻaʻiá mo e manavaheé ʻi Heʻene melinó mo e lolo faitoʻó. (Kent F. Richards, “ʻOku Faitoʻo ʻe he Fakaleleí ʻa e Mamahi Kotoa Pē,” Liahona, Mē 2011, 16)

Molomona 6:17. Ko e hā ha meʻa te ke lava ʻo ako mei he fakatātā ʻo Sīsū ʻoku tuʻu “mo e ongo toʻukupu ʻoku mafao mai ke tali ʻa kimoutolú”?

Naʻe vahevahe ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo pehē:

Siʻoku kāinga, ko ʻeku palōmesi kiate kimoutolú, ʻe hanga ʻe hoʻomou fakatupulekina hoʻomou tui ki he ʻEiki ko Sīsū Kalaisí ʻo ʻoatu ha mālohi mo ha ʻamanaki lelei lahi ange. Kiate kimoutolu, ko e kau māʻoniʻoní, ʻe fakamoʻui ʻe he Fai-fakamoʻui ʻo hotau laumālié, ʻi Hono taimi mo ʻEne founga pē ʻAʻana ʻa ho ngaahi kafó kotoa. ʻE ʻikai ha fakamaau taʻe-totonu, ʻikai ha fakatanga, ʻikai ha faingataʻa, ʻikai ha mamahi, ʻikai ha loto-mamahi, ʻikai ha ongosia, ʻikai ha kafo—neongo pe ko e hā hano loloto, laulahi, fakamamahi—ʻe toʻo mavahe mei he fakafiemālie, nonga, mo e ʻamanaki lelei tuʻuloa kiate Ia ʻe talitali ʻe Hono ongo toʻukupu kuo fakamafao ke talitali lelei kitautolu ki Hono ʻaó. (Neil L. Andersen, “Kuo Kafo,” Liahona, Nōvema 2018, 86)

Naʻe fakamatalaʻi ʻe ʻEletā Niila A. Mekisuele (1926–2004) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē ko Sīsū tonu pē ʻa e tauhi matapaá pea “ʻoku ʻikai te ne nō ha taha kehe ke ne tauhi ia” (2 Nīfai 9:41). … Te u tala atu—ʻi heʻeku tui moʻoni—ʻa ʻeku fakakaukau ki he tefitoʻi ʻuhingá, ʻoku hā ʻi ha potufolofola ʻe taha ʻi he Tohi ʻa Molomoná ʻa ia ʻoku pehē ʻokú ne tatali mai kiate koe mo e “ongo toʻukupu ʻoku mafao mai” (Molomona 6:17). Ko e ʻuhinga ia ʻokú [Ne] ʻi ai aí! … ʻOku mālohi fau ʻa e fakatātā ko iá ke tukunoaʻi. … ʻOkú Ne tatali mai kiate kitautolu mo e ongo toʻukupu ʻoku mafao mai, koeʻuhí ʻoku haohaoa ʻEne ʻofa ʻiate kitautolú (Neal A. Maxwell, “But a Few Days,” [lea ki he kau faiako fakalotu ʻa e Potungāue Ako ʻa e Siasí, Sept. 10, 1982; fakatonutonu ʻa e fakaʻilonga leá], 9–10).