“Toe Vakaiʻi Hono 24 ʻo e Fakataukei Fakatokāteliné: Mahino pea Fakamatalaʻi,” Tohi ʻa Molomoná - Tohi Lēsoni ʻa e Tokotaha Akó (2024)

“Toe Vakaiʻi Hono 24 ʻo e Fakataukei Fakatokāteliné,” Tohi ʻa Molomoná - Tohi Lēsoni ʻa e Tokotaha Akó

Toe Vakaiʻi Hono 24 ʻo e Fakataukei Fakatokāteliné

Mahino pea Fakamatalaʻi

ʻE lava ke tokoni ʻa e fakataukei fakatokāteliné ke mahino peá ke fakamatalaʻi ʻa e tokāteline ʻa e Fakamoʻuí ʻi hoʻo lea pē ʻaʻau. ʻE ʻoatu ʻe he lēsoni ko ʻení ha faingamālie ke fakaloloto ai hoʻo mahinó mo fakamatalaʻi ʻa e ngaahi moʻoni ʻoku maʻu ʻi he ngaahi potufolofola fakataukei fakatokāteline kehekehe mei he Tohi ʻa Molomoná.

Ko e ʻeke ha ngaahi fehuʻí

Fakakaukau ki ha taha ʻokú ke maheni lelei mo ia.

Naʻe anga fēfē hoʻo maheni mo iá?
Ko e hā ʻa e ʻaonga ʻo e ʻeke fehuʻí naʻá ke lava ai ʻo maheni mo iá?
Naʻe mei kehe fēfē nai hoʻomo feohí kapau naʻe ʻikai ke ke teitei ʻeke ha ngaahi fehuʻi?

Hangē pē ko e mahuʻinga ke ʻeke ha ngaahi fehuʻi ke maheni ai mo ha tahá, ʻoku pehē pē ʻa hono mahuʻinga ke ʻeke ha ngaahi fehuʻi lolotonga hoʻo ako ʻa e folofolá ke ke ʻiloʻi lelei ange ai mo maʻu ha mahino kia Sīsū Kalaisi ʻo fakafou [ʻi he folofolá].

Naʻe akonaki ʻa Palesiteni Lāsolo M. Nalesoni ʻo pehē, “ʻOku tokoni ʻa hono ʻeke ʻa e ngaahi fehuʻi ʻoku kaungatonú ki hono maʻu ʻa e fakahinohino fakafolofolá” (“Living by Scriptural Guidance,” Ensign, Nov. 2000, 18).

ʻE lava ke tokoni hono ʻeke ha ngaahi fehuʻi fekauʻaki mo e ngaahi potufolofola fakataukei fakatokāteliné ke mahino lelei ange kiate kitautolu pea fakaafeʻi kakato ange ʻa e tataki ʻa e ʻEikí ki heʻetau moʻuí.

Toe vakaiʻi nounou ʻa e ngaahi fakamoʻoni fakafolofola ki he fakataukei fakatokāteliné mo e kupuʻi lea mahuʻinga ʻo e folofolá ʻi he saati ko ʻení.

Fakataukei Fakatokāteline ʻo e Tohi ʻa Molomoná: ʻAlamā–Molonai

Tohi ʻa Molomoná – Tohi Lēsoni ʻa e Faiakó (2024)

Fakamoʻoni Fakafolofolá	Kupuʻi Lea Mahuʻinga he Folofolá
Fakamoʻoni Fakafolofolá ʻAlamā 7:11–13	Kupuʻi Lea Mahuʻinga he Folofolá “Pea te ne hāʻele atu, ʻo kātakiʻi ʻa e ngaahi mamahi mo e ngaahi faingataʻá pea mo e ngaahi ʻahiʻahi kehekehe kotoa pē.”
Fakamoʻoni Fakafolofolá ʻAlamā 34:9–10	Kupuʻi Lea Mahuʻinga he Folofolá “Kuo pau ke fai ha fakalelei, … ko ha feilaulau taʻe-fakangatangata mo taʻengata.”
Fakamoʻoni Fakafolofolá ʻAlamā 39:9	Kupuʻi Lea Mahuʻinga he Folofolá “[ʻIkai] toe muimui ʻi he ngaahi holi ʻa ho matá.”
Fakamoʻoni Fakafolofolá ʻAlamā 41:10	Kupuʻi Lea Mahuʻinga he Folofolá “Kuo teʻeki ai hoko ʻa e faiangahalá ko e fiefia.”
Fakamoʻoni Fakafolofolá Hilamani 5:12	Kupuʻi Lea Mahuʻinga he Folofolá “ʻOku makatuʻunga ʻi he maka ʻo hotau Huhuʻí … kuo pau ke mo langa ai homo makatuʻungá.”
Fakamoʻoni Fakafolofolá 3 Nīfai 11:10–11	Kupuʻi Lea Mahuʻinga he Folofolá “Kuó u fai ai ʻa e meʻa kotoa pē kuo finangalo ʻa e Tamaí ke u fai talu mei he kamataʻangá.”
Fakamoʻoni Fakafolofolá 3 Nīfai 12:48	Kupuʻi Lea Mahuʻinga he Folofolá “Ke mou haohaoa ʻo hangē pē ko aú, pe hangē ko e haohaoa hoʻomou Tamai ʻa ia ʻoku ʻi he langí.”
Fakamoʻoni Fakafolofolá 3 Nīfai 27:20	Kupuʻi Lea Mahuʻinga he Folofolá “Haʻu kiate au ʻo papitaiso … koeʻuhi ke fakamāʻoniʻoniʻi ʻa kimoutolu ʻi he maʻu ʻo e Laumālie Māʻoniʻoní.”
Fakamoʻoni Fakafolofolá ʻEta 12:6	Kupuʻi Lea Mahuʻinga he Folofolá “ʻOku ʻikai te mou maʻu ha fakamoʻoni kae ʻoua kuo hili hono ʻahiʻahiʻi ʻo hoʻomou tuí.”
Fakamoʻoni Fakafolofolá ʻEta 12:27	Kupuʻi Lea Mahuʻinga he Folofolá “Kapau ʻe haʻu kiate au ʻa e tangatá … te u liliu ʻa e ngaahi meʻa vaivaí ko e mālohi kiate kinautolu.”
Fakamoʻoni Fakafolofolá Molonai 7:45–48	Kupuʻi Lea Mahuʻinga he Folofolá “Ko e manavaʻofá ʻa e ʻofa haohaoa ʻa Kalaisí.”
Fakamoʻoni Fakafolofolá Molonai 10:4–5	Kupuʻi Lea Mahuʻinga he Folofolá “Mou kole ʻi he loto-fakamātoato, mo e loto-moʻoni, ʻo maʻu ʻa e tui kia Kalaisi … [pea] ʻi he mālohi ʻo e Laumālie Māʻoniʻoní te mou lava ai ke ʻiloʻi hono moʻoni ʻo e ngaahi meʻa kotoa pē.”

Fili ha taha ʻo e ngaahi potufolofola fakataukei fakatokāteline ʻokú ke fakaʻamu ke mahino lelei ange kiate koé pea lau fakalelei ia. Feinga ke ʻiloʻi ha fehuʻi ʻe ua te ke lava ʻo ʻeke fekauʻaki mo e potufolofolá ke mahino lelei ange ia pea hiki ia. Hangē ko ʻení, ʻi hoʻo lau ʻa e 3 Nīfai 27:20 te ke lava ʻo fehuʻi, “ʻOku ʻuhinga ki he hā ke fakamāʻoniʻoniʻí?” Pe ʻi hoʻo lau ʻa e Molonai 10:3–5 te ke lava ʻo fehuʻi, “ʻOku ʻuhinga ki he hā ke kole ‘ʻi he loto-moʻoni’?”

Kumi ʻa e tali ki he ngaahi fehuʻi naʻá ke fakakaukau ki aí; fakaʻaongaʻi ʻa e ʻū naunau ki he ako folofolá hangē ko e Fakahinohino ki he Ngaahi Folofolá, pe ngaahi lea ʻo e konifelenisi lahí. Te ke lava ʻo fakaʻaongaʻi ha ngaahi founga kehe ʻokú ke ʻilo ki he ako folofolá, hangē ko hono ako ʻa e ngaahi veesi ʻoku hoko atu aí ke mahino lelei ange ʻa e puipuituʻa ʻo e potufolofolá.

Manatuʻi, mahalo he ʻikai te ke maʻu ʻa e tali ki hoʻo ngaahi fehuʻí kotoa lolotonga hoʻo akó. Ka ʻi he hokohoko atu hoʻo ngāueʻi ʻa e tui ki he ʻEikí, te Ne tokoniʻi koe ke ke ʻiloʻi ʻa e moʻoni ʻo e meʻa ʻokú ke fekumi ki aí.

Fakakaukau ke fakaafeʻi ha kaungāmeʻa pe mēmipa ʻo e fāmilí ke tokoni atu ʻi hono tali hoʻo ngaahi fehuʻí. Te ke lava foki ʻo fakakaukau ke toe fai ʻa e ʻekitivitī ko ʻení ʻo fakaʻaongaʻi ha ngaahi potufolofola fakataukei fakatokāteline kehe te ke fiemaʻu ke mahino lelei ange kiate koé.