Eteru 8

‟E Lē Galue le Alii e Ala i Faapotopotoga Faalilolilo”

Iesu Keriso

O faapotopotoga faalilolilo na malaia ai le tele o vaega o tagata i le Tusi a Mamona atoa. O lenei mamanu na tulai mai i totonu o Sa Iaretō ma oo ai lava ina oo atu ai i lo latou faatafunaga. A o ia tusia e uiga i Sa Iaretō, sa faaopoopo mai e le perofeta o Moronae upumoni taua e mafai ona tatou aoaoina mai nei mea faataumaoi. E mafai ona fesoasoani lenei lesona e te malamalama ai i le manaomia ona teena faapotopotoga faalilolilo e ala i le mulimuli ia Iesu Keriso.

Galuega faalilolilo

• O a nisi o auala e faaaoga ai e Satani le faalilolilo e faataunuu ai ona faamoemoega leaga?

• E faapefea e lena faalilolilo ona aafia ai le sootaga a se tagata ma Iesu Keriso? Aisea?

• O le a se mea e te manao ia iloa e se tasi e lagona e mafai ona latou alo ese mai mea leaga e fai ona latou te tausia faalilolilo?

O le asō o le a e aoao ai e uiga i se vaega o tagata o e sa auai i faatinoga faalilolilo o le amioleaga ua ta‘ua o se faapotopotoga faalilolilo. A o e suesue, vaavaai mo aoaoga e fesoasoani e te malamalama ai i le matautia o faapotopotoga faalilolilo.

O le amioleaga sa i ai i Sa Iaretō

Atonu e te manatua ina ua taunuu Sa Iaretō i le laueleele na folafolaina, sa latou tofia se tupu e pule ia i latou e ui lava i lapataiga a le uso o Iareto o le faia o lena mea o le a taitai atu ai i le faatagataotauaina (tagai Eteru 6:22–23). I augatupulaga na sosoo ai, o tupu amioleaga na afua ai fevaevaeaiga ma puapuaga i tagata.

Faitau le Eteru 8:1–10, ma vaavaai mo le mea na tupu ina ua avea se tagata e igoa ia Omera ma tupu.

Mafaufau e tusi se aotelega puupuu o le mea na tupu i nei fuaiupu i lau api faamaumau mo suesuega.

Sa ioe Iareto i le fuafuaga amioleaga a lona afafine. Ina ua talosagaina e Akiso le afafine o Iareto e faaipoipo i ai, sa ulu atu Akiso, Iareto, lona afafine, ma isi tagata o le aiga i se faapotopotoga faalilolilo e fasiotia Omera (tagai Eteru 8:11–15).

Matautia o faapotopotoga faalilolilo

O se pulega faalilolilo o se “faalapotopotoga a tagata ua fusia faatasi i ni tautoga e faataunuuina ni faamoemoega leaga a le faalapotopotoga” (“Pulega Faalilolilo,” Taiala i Tusitusiga Paiga, scriptures.ChurchofJesusChrist.org). O Satani o le uluai pule o faapotopotoga faalilolilo (tagai i le Helamana 6:25–30).

I le avea ai ma faamatalaupu o lenei tala, sa faasoa mai ai e le perofeta o Moronae ni aoaoga taua ma lapataiga e uiga i faapotopotoga faalilolilo. Faitau le Eteru 8:18–25, ma vaavaai pe o a lagona o le Alii e uiga i faapotopotoga faalilolilo.

aikona, faamaumau

1. Tali le fesili lenei:

   • O a ni mea na e aoaoina e uiga i faapotopotoga faalilolilo mai nei fuaiupu?

O se upumoni e tasi e mafai ona tatou aoao mai nei fuaiupu o le, o faapotopotoga faalilolilo e inosia i le silafaga a le Atua (Eteru 8:18).

Ina ia fesoasoani ia e malamalama atili pe aisea e inosia ai faapotopotoga faalilolilo i le Alii, faitau mau nei, ma vaavaai mo mea ua e aoaoina e uiga ia Iesu Keriso:

• 2 Nifae 26:22–24

• Alema 39:8

• O le a se mea na e aoaoina mai nei fuaiupu atonu sa ono mafai ona fesoasoani i tagata sa e suesueina i le Eteru 8?

• O le a se mea ua aoaoina ai oe e nei fuaiupu e uiga i le Alii?

• E mafai faapefea e nei aoaoga ona fesoasoani i tupulaga talavou i aso nei?

Na faaiuina e Moronae ana aoaoga e uiga i faapotopotoga faalilolilo e ala i le faamatalaina pe aisea na ia faaaofia ai nei lapataiga. Faitau le Eteru 8:26, ma vaavaai mo mea na manao Moronae ia tatou iloa.

aikona, faamaumau

2. Tali fesili nei:

   • O le a se mea na e aoaoina e uiga i le mafuaaga na faaaofia ai e Moronae nei aoaoga i le Tusi a Mamona?

   • O le a se mea ua e aoaoina i le asō e mafai ona faatauanauina ai oe e mulimuli atoatoa ia Iesu Keriso?

Tuu i le faitalia: O e Manao e Aoao Atili?

O a ni auala tatou te vaai ai i faapotopotoga faalilolilo i aso nei?

Na saunoa mai Peresitene M. Russell Ballard o le Korama a Aposetolo e Toasefululua:

Peresitene M. Russell Ballard

O loo aoao mai le Tusi a Mamona e faapea o faapotopotoga faalilolilo e faia soligatulafono ua tuuina mai ai se luitau ogaoga, e le gata i tagata taitoatasi ma aiga ae i le lalolagi atoa o tagata. Ua aofia ai i faapotopotoga faalilolilo o aso nei ia kegi, au faipisini o fualaau faasaina, ma aiga solitulafono ua faatulagaina. O faapotopotoga faalilolilo i o tatou vaitaimi, e faagaoioia e pei lava o le au faomea a Katianetona i le taimi o le Tusi a Mamona. E i ai a latou faailoga faalilolilo ma upu faalilolilo. Latou te auai i sauniga faalilolilo ma sauniga amata. O o latou faamoemoega e aofia ai le “fasioti tagata, o le vete, ma le gaoi, ma le faitaaga, ma fai amioleaga eseese uma ua le tusa ai ma tulafono a lo latou atunuu, atoa ma tulafono a lo latou Atua” (Helamana 6:23).

Afai tatou te le faaeteete, o faapotopotoga faalilolilo o ona po nei, e mafai ona vave mauaina le mana ma le faatosinaga e pei lava o le vave ma le mae’ae’a na latou faia i le taimi o le Tusi a Mamona. (M. Russell Ballard, ‟Standing for Truth and Right,” Ensign, Nov. 1997, 38)

Aisea e manaomia ai ona tatou faamaoni ia i tatou lava ma faatasi ma le Alii e uiga ia tatou agasala?

Na faasoa mai Elder Neil L. Andersen o le Korama a Aposetolo e Toasefululua:

Elder Neil L. Andersen

I lo tatou manao e salamo, o le faamaoni e avea ma mea taua tele. Muamua ma le sili, e tatau ona tatou faamaoni i lo tatou Tama Faalelagi ma i tatou lava. O le lē faamaoni ma le taufaasese o loo i le faavae ma le pogai o le toetoe lava o agasala uma. O nisi taimi pe a amata ona salamo se tasi, e amata o ia i le faailoa atu na o se vaega o se faafitauli e tele atu. O nisi taimi tatou te faavalea ai i tatou lava i le mafaufau e le manaomia ona faailoa atu le ata atoa, pe o lena vaega o le mea na tupu o se mea sese lea a se isi tagata. E mafai e tagata lelei ona faasese i latou lava ma faaseseina. Soo se taufaasese e faatuai ai le faagasologa o le salamo. (Neil L. Andersen, The Divine Gift of Forgiveness [2019], 194)

I le vitiō lenei, “Being Honest in Our Repentance” (4:05), o loo talanoaina ai e Elder Neil L. Andersen o le Korama a Aposetolo e Toasefululua mafaufauga e faatatau i lana tusi The Divine Gift of Forgiveness (2019). Ua ia faasoa mai e uiga i ni tagata se toalua e tutusa le agasala na la taulimaina: o le tasi ma le faamaoni ma le isi ma le lē faamaoni.