Molonai 1

ʻE ʻIkai Te U Fakaʻikaiʻi ʻa e Kalaisí

Kuo teʻeki faingofua ʻa e hoko ko ha tokotaha muimui ʻo Sīsū Kalaisí. ʻI he ofi ki he fakaʻosinga ʻo e Tohi ʻa Molomoná, naʻe fakahā ʻe he palōfita ko Molonaí naʻe fakapoongi ʻa e kau muimui ʻo Kalaisí tukukehe kapau ne nau fakaʻikaiʻi ʻa e Fakamoʻuí (vakai, Molonai 1:2). Koeʻuhí ko e ʻikai loto ʻa Molonai ke fakaʻikaiʻi ʻa Sīsū Kalaisí, naʻe pau ai ke ne ʻalu fano pē ʻo kumi ha feituʻu ʻe malu aí pea toitoi mei he kau Leimaná. Mahalo kuó ke ongoʻi tuenoa ʻi hoʻo feinga ke moʻui ʻaki hoʻo tuí mo tauhi totonu ki he Fakamoʻuí mo Hono Siasí. ʻE lava ke tokoni ʻa e lēsoni ko ʻení ke fakaʻaiʻai koe ke ke muimui maʻu pē kia Sīsū Kalaisi pea ʻoua ʻe fakaʻikaiʻi Ia.

Fehangahangai mo e fakafepakí

Fakaʻaongaʻi ha kiʻi taimi ke ke fakakaukau ki he founga ʻokú ke faʻa fakafeangai ai ʻi he taimi ʻoku ʻākilotoa ai koe ʻe he niʻihi ʻoku ʻikai ke tatau hoʻomou tuʻunga moʻuí pe tui ki he ʻOtuá.

ʻE lava ke tokoni ʻa e ngaahi lanu ʻi he fakatātā ko ʻení ke ke fakakaukauloto ki ha ngaahi tuʻunga kehekehe ʻo e fakafepakí ʻe ala fehangahangai mo ha ākonga ʻa Sīsū Kalaisi. ʻE lava ke fakafofongaʻi ʻe he lanu matá ʻa e ʻikai ha fakafepakí. ʻE lava ke fakahaaʻi ʻe he lanu engeengá mo e molí ʻa e fakautuutu ange ʻa e fakafepakí, pea fakataipe ʻe he lanu kulokulá ʻa e fakafepaki faingataʻa tahá.

Naʻe ngāue fakakautau ʻa Palesiteni Tōmasi S. Monisoni (1927–2018) ʻi heʻene kei talavoú pea naʻá ne mātā tonu ha ngaahi ngāue lahi ʻo e loto-toʻá. Naʻá ne vahevahe ʻa e sīpinga ko ʻení.

Fakakaukau ki he lanu te ke fili ke fakafofongaʻi ʻa e tuʻunga ʻo e fakafepaki naʻe aʻusia ʻe he talavoú ni. ʻOkú ke pehē te ke fakafōtunga fēfē ʻi ha tūkunga tatau?

Ko e taha he ʻikai toe ngalo ʻiate aú ko e lototoʻa fakalongolongo ʻa ha kauvaka kei taʻu 18—naʻe ʻikai ke tau siasi—naʻe ʻikai fuʻu fiefia ke lotu. ʻI he kau tangata ʻe toko 250 ʻi he konga kaú, ko ia tokotaha pē naʻe tūʻulutui ʻi hono veʻe mohengá he pō kotoa pē, ko e ngaahi taimi ʻe niʻihi naʻe fai ia ʻi he fakamatalili ʻa e kau fakamamahí mo e kau taʻetuí. Naʻe punou hono ʻulú ʻo lotu ki he ʻOtuá. Naʻe ʻikai teitei tuka. Naʻe ʻikai teitei momou. Naʻe lototoʻa. (Thomas S. Monson, “Ke ke Mālohi Peá ke Lototoʻa,” Liahona, Mē 2014, 67)

• Ko e hā ha meʻa ʻoku makehe kiate koe ʻi he sīpinga ko ʻení?

• ʻOkú ke pehē ko e hā ha meʻa ʻoku faingataʻa fekauʻaki mo e muimui maʻu pē kia Sīsū Kalaisí? Ko e hā e meʻa ʻokú ne tokoniʻi koé?

Hiki ha ngaahi tūkunga kehe ʻe ala faingataʻa ai ʻa e muimui kia Sīsū Kalaisí. Feinga ke ke fakakaukauloto ki ha ngaahi fakaikiiki pau pea fakakaukau pe ko e lanu hā ʻi he fakatātaá ʻe feʻunga taha mo e tūkunga takitaha.

Ko e moʻoni, ʻoku faingofua ange ke talanoa fekauʻaki mo ʻetau tukupā kia Sīsū Kalaisí ʻi haʻatau fakahoko pau ia ʻi he momeniti ʻoku ʻahiʻahiʻi ai kitautolú. ʻI hoʻo akó, feinga ke ke ʻiloʻi ʻa e fakaʻaiʻai ʻokú ke fiemaʻu ke ke tuʻu maʻu ai ʻi hoʻo tui kia Sīsū Kalaisí pea mo e ngaahi tuʻunga moʻui ʻo Hono Siasi kuo fakafoki maí.

ʻOku kumi ʻe he kau Leimaná ʻa Molonai

ʻI he taimi naʻe ʻoange ai kia Molonai ʻa e fatongia ke ne tauhi mo maluʻi ʻa e ʻū lekooti ʻo e kakai Nīfaí, naʻá ne fehangahangai foki mo e fakafepakí.

Lau ʻa e Molonai 1:1–4, ʻo fakakaukau pe te ke fakafuofuaʻi fēfē ʻa e fakafepaki naʻá ne fehangahangai mo iá.

Ke tokoni ke ke maʻu ha fakafuofua lelei ange ki he tuʻunga ʻo e moʻuí kia Molonaí, te ke lava foki ʻo mamata ʻi he “ʻOku Fakaafeʻi ʻe Molonai ʻa e Tokotaha Kotoa ke Haʻu kia Kalaisi” mei he taimi 0:00 ki he 3:59, ʻoku maʻu ʻi he ChurchofJesusChrist.org.

• ʻE lahi fēfē ʻa hono fakafepakiʻi ʻo Molonaí ʻi hoʻo fakafuofuá?

• Ko e hā te tau lava ʻo ako mei he sīpinga ʻa Molonaí?

Ko e moʻoni ʻe taha te tau lava ʻo akó, te tau lava ʻo tauhi moʻoni kia Sīsū Kalaisi ʻi ha faʻahinga tūkunga pē pea ʻikai fakaʻikaiʻi Ia.

• Ko e hā ʻoku mahuʻinga ai ke tau tauhi moʻoni, pe līʻoa kia Sīsū Kalaisí?

• ʻOkú ke pehē ko e hā ha ngaahi aʻusia naʻe maʻu ʻe Molonai naʻe tokoni kiate ia ke ne līʻoa kia Sīsū Kalaisi?

• Ko e hā ʻokú ke ʻilo fekauʻaki mo Sīsū Kalaisi te ne fakalotolahiʻi koe ke ʻoua naʻá ke fakafīsingaʻi Iá?

Fakakaukau ke fakaʻilongaʻi ʻa e ngaahi lea ʻa Molonai ʻi he veesi 3. Te ke lava foki ʻo lekooti ho hingoá ʻi he tafaʻaki ʻo e hingoa ʻo Molonaí ke tokoni ke fakaʻaiʻai koe ke ke muimui maʻu pē kia Sīsū Kalaisi.

Kumi ha niʻihi ʻo e ngaahi sīpinga ko ʻeni ʻo ha niʻihi fakafoʻituitui naʻa nau tuʻu maʻu ʻi he ʻOtuá lolotonga ha ngaahi tūkunga faingataʻa.

• Kuini ʻĒseta (vakai, ʻĒseta 4:16)

• Ko Setaleki, Mēsake, mo ʻApitenikō (vakai, Taniela 3:17–18)

• ʻApinetai (vakai, Mōsaia 17:20)

• Siosefa Sāmita (vakai, Tokāteline mo e Ngaahi Fuakava 135:4–5)

• Ko e ngaahi ʻofefine ʻo ʻOnaitá (vakai, Ēpalahame 1:11)

Ko hono fakahaaʻi ʻo ʻetau tukupaá

• Ko e fē ha taimi kuó ke fakahaaʻi ai pe ko ha taha ʻokú ke ʻiloʻi ha tukupā kia Kalaisi ʻi ha ngaahi tūkunga faingataʻa?

• ʻOku ʻi ai nai ha ngaahi tūkunga ʻokú ke fehangahangai ai mo ha fakafepaki ʻi hoʻo muimui kia Sīsū Kalaisí?

• Ko e hā te ke lava ʻo fai ke ke tauhi moʻoni ai kia Sīsū Kalaisi ʻi he ngaahi tūkunga ko iá?

1.  Fakakakato ʻeni:

   Ke tokoni ke ke fakamatalaʻi fakanounou ʻa e meʻa kuó ke ako mei he lēsoni ko ʻení, faʻu ha pousitā pe tohi ʻi he ʻinitanetí te ne lava ʻo fakaʻaiʻai koe mo e niʻihi kehé ke mou tauhi moʻoni kia Kalaisi ʻi ha faʻahinga tūkunga pē. Fakakau ai ha pōpoaki mei he folofolá te ne lava ʻo fakalotolahiʻi koe ke ke tauhi moʻoni kia Sīsū Kalaisi pea ʻoua ʻe fakaʻikaiʻi Ia. Te ke lava ʻo faʻifaʻitaki hoʻo pousitaá pe tohí ki he sīpinga ʻi he makasini Ki Hono Fakamālohia ʻo e Toʻu Tupú. Ko ha sīpinga ʻeni:

Te ke lava ʻo kamata ʻaki haʻo kumi ha fakatātā ʻi he konga “Tānakiʻanga ʻo e Ngaahi ʻĪmisí” ʻi he www.ChurchofJesusChrist.org/media pe faʻu haʻo fakatātā pē ʻaʻau ke tokoni ki hono fakahoko hoʻo pōpoakí. Hili iá pea kumi ha potufolofola ke fakakau fakataha mo hoʻo fakatātaá. Te ke lava ʻo fakaʻaongaʻi ha veesi mei he Molonai 1, ko ha potufolofola naʻá ke maʻu ʻe koe pē, pe ko ha veesi mei he lisi ko ʻení.

• Sōsiua 1:9

• Loma 1:16

• Mōsaia 18:8–9

• 3 Nīfai 12:10–12

• “Faivelengá” ʻi he Fakahinohino ki he Ngaahi Folofolá

Fili Pē: Fie Ako Lahi Ange?

Te u lava fēfē ʻo tauhi moʻoni kia Sīsū Kalaisi mo taukaveʻi ʻeku tuí?

ʻOku ʻomi ʻe he ngaahi fakamatala mo e ngaahi vitiō ko ʻení ha ngaahi sīpinga ʻe lava ʻo tokoni ke tali ʻa e fehuʻi ko ʻení.

•  

•    

•  

• “Preparation of Joseph F. Smith: True Blue, Through and Through” (1:31)

• “Haʻu Kiate Au, ʻa Kimoutolu ʻo e Fale ʻo ʻIsileli” (mei he taimi 0:00 ki he 3:05)

Te u lava fēfē ʻo tauhi moʻoni kia Sīsū Kalaisi ʻi he lotolotonga ʻo kinautolu ʻoku ʻikai tuí?

Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Neongo ʻoku liʻaki ʻe ha niʻihi ʻenau tuí, ka ʻoku fekumi ha niʻihi ki he moʻoní. Kuo tau toʻo kiate kitautolu ʻa e huafa ʻo e Fakamoʻuí. Ko e hā mo ha toe meʻa te tau fai? …

ʻOku tau talanoa ʻo kau kia Sīsū Kalaisi, kae mahalo te tau lava pē ʻo toe lelei ange ai. Ka siʻisiʻi ʻa e talanoa ʻa e māmaní fekauʻaki mo Iá, ko hai leva ʻe lahi haʻane talanoa fekauʻaki mo Iá? Ko kitautolu! Fakataha mo e kau Kalisitiane mateaki kehé! …

ʻI he siʻisiʻi ange ʻa e talanoa ʻa e māmaní ʻo kau kia Sīsū Kalaisí, tuku muʻa ke lahi ange ʻetau talanoa fekauʻaki mo Iá. ʻI he taimi ʻe fakahaaʻi ai hotau tufakanga totonu ko ʻEne kau ākongá, ʻe tokolahi hatau niʻihi ʻe mateuteu ke fanongo. ʻI heʻetau vahevahe ʻa e maama kuo tau maʻu meiate Iá, ʻe ulo atu ʻa ʻEne māmá pea mo Hono mālohi faifakamoʻui fisifisimuʻá ki he niʻihi ʻoku nau loto-fiemālie ke fakaava honau lotó. Naʻe folofola ʻa Sīsū, “Kuó u haʻu …ko [ha] maama ki māmani” [Sione 12:46]. (Neil L. Andersen, “ʻOku Mau Lea ʻia Kalaisi,” Liahona, Nōvema 2020, 88–90)

Naʻe pehē ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá:

Ke vilitaki ʻo tuʻu maʻu mo tuʻu ʻaliʻaliaki ʻi he tui ʻa Kalaisí, ʻoku fiemaʻu ke fakatōloloto e ongoongolelei ʻo Sīsū Kalaisí ki he loto mo e laumālie ʻo ha taha, ʻo ʻuhinga ke ʻikai hoko e ongoongoleleí ko ha taha pē ʻo e ngaahi tākiekina ʻi ha moʻui ʻa ha taha, ka ko e tefitoʻi meʻa ia ʻoku nofo taha ai ʻene moʻuí mo e ʻulungāngá. …

Ko e tokolahi ʻo kitautolu ʻi he momeniti ko ʻení ʻoku tau ʻi he vahaʻa ʻo e kau atu ko ha ʻuhinga fakasōsiale ki he ngaahi tuʻutuʻuni ʻo e ongoongoleleí ʻi he tafaʻaki ʻe taha, pea mo e tukupā faka-Kalaisi kakato ki he finangalo ʻo e ʻOtuá ʻi he tafaʻaki ʻe taha. ʻOku ʻi he vahaʻa ʻo e ongo tafaʻaki ko ʻení, ʻa e hū mai e ongoongolelei ʻo Sīsū Kalaisí ki hotau lotó pea maʻu hotau laumālié. Mahalo he ʻikai hoko he taimi pē ko iá, ka ʻoku totonu ke tau laka ki muʻa ʻi he tuʻunga mohu tāpuekina ko iá. (D. Todd Christofferson, “Tuʻu Maʻu mo Tuʻu ʻAliʻaliaki ʻi he Tui ʻa Kalaisí,” Liahona, Nōvema 2018, 31–32)