Fakataukei Fakatokāteliné: Molonai 7:45–48

“Ko e Manavaʻofá ʻa e ʻOfa Haohaoa ʻa Kalaisí”

ʻI hoʻo ako ʻa e Molonai 7:44–48, naʻá ke ako ai ʻa e founga ke feinga ke fakatupulaki ʻa e manavaʻofá, ʻa e ʻofa haohaoa ʻa Sīsū Kalaisí. ʻE lava ke tokoni ʻa e lēsoni ko ʻení ke ke ako maʻuloto ʻa e potufolofola fakataukei fakatokāteline mo e kupuʻi lea folofola mahuʻinga ki he Molonai 7:45–48, fakamatalaʻi ʻa e tokāteline naʻe akoʻi ʻi he potufolofola ko ʻení, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha ngaahi tūkunga moʻoni ʻo e moʻuí.

Fakamatalaʻí mo e ako maʻulotó

Fakakaukau ki he tūkunga ko ʻení ke tokoni ke ke akoako hono fakamatalaʻi ʻa e ʻulungaanga fakalangi ʻo e manavaʻofá.

Fakakaukauloto lolotonga ha fealeaʻaki Haʻu, ʻo Muimui ʻIate Au mo ho fāmilí, lolotonga hoʻomou talanoa ki he ʻuhinga ʻo e manavaʻofá, ʻoku pehē ʻe hoʻo tehiná, “ʻIkai ʻoku ʻuhinga ʻa e manavaʻofá ki hono fakahoko pē ha ngaahi meʻa lelei maʻá e kakaí?” ʻOkú ke talaange ki ho tokouá ko e angaleleí ko ha konga ia ʻo e manavaʻofá ka naʻá ke ako lahi ange ki ai ʻi he seminelí.

• Ko e hā mo ha toe fakaikiiki kehe fekauʻaki mo e manavaʻofá te ke talaange ki ho tokouá?

1. Fakamatalaʻi ʻa e ʻuhinga ʻo e manavaʻofá ʻi ha sētesi ʻe ua pe tolu, ʻo fakaʻaongaʻi hoʻo lea pē ʻaʻau mo e ngaahi akonaki ʻi he Molonai 7:45–48.

Fakaʻaongaʻi ʻa e fakakaukau ko ʻení ke tokoni ke ke ako maʻuloto ʻa e potufolofolá mo e kupuʻi lea mahuʻinga ʻi he folofolá. Pe fili ha founga kehe ʻe tokoni lelei taha ke ke ako maʻuloto aí.

Tā ha foʻi haati fōlahi ʻi ho tohinoa akó. Vakai ki he fakatātā ko ʻení, pea hiki ʻi loto ʻi hoʻo foʻi hātí ʻa e fakamoʻoni fakafolofolá mo e kupuʻi lea mahuʻinga ʻo e folofolá ʻi hono hokohoko totonú.

Toutou lau maʻuloto ʻa e fakamoʻoni folofolá mo e kupuʻi lea mahuʻinga ʻi he folofolá kae ʻoua kuó ke maʻuloto ia. Fakakaukau ke kosi ʻo toʻo ʻa e fakatātaá pea fakapipiki ia ʻi ha feituʻu te ke toutou sio ki ai.

Akoako hono fakaʻaongaʻí

Ke tokoni ke ke toe vakaiʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié, fakatonutonu ʻa e kupuʻi lea ko ʻeni ʻe tolú pea fakamatalaʻi honau ʻuhingá. ʻO ka ke ka fiemaʻu tokoni, ako ʻa e palakalafi 5–12 ʻi he konga “Ko Hono Maʻu ʻo e ʻIlo Fakalaumālié” ʻo e Fakamatala ki he ʻElito ʻo e Fakataukei Fakatokāteliné (2023).

1. Vakavakaiʻi ʻi he tui.

2. Fekumi ki ha mahino lahi ange ʻo fakafou ʻi ha fakakaukau kuo fokotuʻu fakalangi.

3. Ngāueʻi ʻa e ngaahi fakakaukaú mo e ngaahi fehuʻí ʻaki ha ngaahi maʻuʻanga tokoni ʻoku taʻengata.

Lau e ngaahi tūkunga ko ʻení:

• ʻOku fakaʻitaʻi ngofua ʻa ʻOsikā ʻe hono ngaahi tokoua mo e tuofāfine īkí. ʻOku nau faʻa kole kia ʻOsikā ke vaʻinga mo kinautolu pe tokoniʻi kinautolu ʻi heʻenau ngāue fakaako mei ʻapí. ʻOku loto ʻa ʻOsikā ke nau tukunoaʻi ia kae lava ke ne fai ʻene meʻa pē ʻaʻana.

• Naʻe ʻilo ʻe Hei-Uani naʻe fakamafola ʻe ha kiʻi taʻahine ʻe taha ʻi heʻene kalasi Finemuí ha ngaahi talanoa fekauʻaki mo ia. ʻOku ongoʻi puputuʻu mo loto-mamahi ʻa Hei-Uani ʻi he meʻá ni pea ʻoku ʻikai ke ne fakapapauʻi ʻa e meʻa ke ne faí.

• ʻOku loto ʻa Kapo ke manakoa ʻi he akó pea mo hā ngali taʻemanavahē ʻi he sio ʻa hono ngaahi kaungāmeʻá. ʻOkú ne faʻa tukuhifoʻi ʻa e toenga ʻo e kalasí pea toʻo taʻepoaki ʻenau ʻū meʻá.

2.  Fili ha tūkunga ʻe taha pe lahi ange mei he ngaahi tūkunga kimuʻá. Fakakaukauloto ʻokú ke feinga ke tokoniʻi ʻa e tokotaha ʻi he tūkunga ko iá. Tali ha fehuʻi ʻe taha pe lahi ange mei he ngaahi ʻuluʻi fakamatala takitaha ko ʻení:

Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí

• Ko e hā te ke vahevahe mei he Molonai 7:45–48 te ne lava ʻo fakaʻaiʻai ʻa e tokotaha ko ʻení ke ne tali ʻi ha founga manavaʻofa lahi ange hono tūkungá?

• Ko e hā ha ngaahi potufolofola pe ngaahi fakamatala kehe mei he kau taki ʻo e Siasí ʻe ala tokoni?

Ngāue ʻi he tuí

• Ko e hā ha ngaahi faingataʻa ʻe ala fehangahangai mo e tokotahá ni ʻi heʻene feinga ke fakaʻaongaʻi ʻa e meʻa ʻokú ke vahevahe mo iá?

• Te ne ngāue fēfē ʻi he tuí neongo e ngaahi faingataʻa ko ʻení?

Vakavakaiʻi ʻa e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá

• ʻE tokoniʻi fēfē ia ʻe heʻene vakai ki he tūkungá ʻaki ha fakakaukau ʻoku taʻengatá ke ne ongoʻi manavaʻofa ange ki he niʻihi kehé?

• ʻE tokoni fēfē ʻa hono vakaiʻi ʻa e founga naʻe fakafeangai ai ʻa Sīsū Kalaisi ki he niʻihi kehé ke angaʻofa ange ai ʻa e tokotaha ko ʻení?