“2 Nīfai 11: Kau Fakamoʻoni ʻo Kalaisí,” Tohi ʻa Molomoná – Tohi Lēsoni ʻa e Faiakó (2024)
“2 Nīfai 11,” Tohi ʻa Molomoná – Tohi Lēsoni ʻa e Faiakó
2 Nīfai 11
Kau Fakamoʻoni ʻo Kalaisi
Ko hai ʻokú ke manatuʻí ʻi he taimi ʻokú ke fakakaukau ai ki he kau fakamoʻoni ʻo Sīsū Kalaisí? Naʻe saiʻia lahi ʻa Nīfai ʻi he ngaahi fakamoʻoni ʻo hono tokoua ko Sēkopé pea mo e palōfita ko ʻĪsaiá ʻo ne lekooti fakataha ai ʻena ngaahi fakamoʻoní mo ʻene fakamoʻoni kia Sīsū Kalaisí. ʻE lava ke tokoni e lēsoni ko ʻení ke fakamālohia hoʻo fakamoʻoni ki hono moʻoni ʻo Sīsū Kalaisí.
Fakaafeʻi e kau akó ke fakamoʻoni kia Sīsū Kalaisi. ʻI he fakaʻau ke ʻilo mo ʻofa e kau akó ʻia Sīsū Kalaisí, fakaafeʻi kinautolu ke vahevahe ʻenau ngaahi ongo fekauʻaki mo Iá. ʻI heʻenau fai iá, ʻoku nau fakaafeʻi ai e Laumālié ke fakamoʻoniʻi ʻoku moʻoni e meʻa kuo nau lea ʻakí. Naʻe fakamamafaʻi ʻe Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá “he ʻikai lava ke taʻofi ʻa e Laumālié ʻi he taimi ʻoku fakahoko ai ha fakamoʻoni haohaoa kia Kalaisí” (“Pure Testimony,” Liahona, Nov. 2004, 41).
Teuteu ʻa e tokotaha akó: Fakaafeʻi e kau akó ke kole ki ha kaungāmeʻa pe ʻofaʻanga ke vahevahe e founga ne nau maʻu ai ʻenau fakamoʻoni kia Sīsū Kalaisí.
Ngaahi ʻEkitivitī Ako ʻOku Ala Fakahokó
Ko e mahuʻinga ʻo e fakamoʻoní
Fakakaukau ke fakaʻaongaʻi ʻa e tūkunga faingofua ko ʻení ke tokoniʻi e kau akó ke ʻiloʻi e mahuʻinga ʻo ha kau fakamoʻoni. Ke tokoni ke fakatupulaki ʻenau tokangá, te ke lava ʻo tānaki atu ha ngaahi fakaikiiki ki he tūkungá. Hangē ko ʻení, ʻe lava ke ʻilo ʻe ha kaungāmeʻa e feituʻu naʻe ʻi ai e kau akó. Pe naʻe mei fakahoko ha hia ʻi he taimi ko iá, pea mahalo naʻa fiemaʻu ke ʻomi ʻe he kau akó ha fakamoʻoni.
Ko ha founga ʻe taha ko hono ʻeke ki he kau akó pe kuo ʻi ai nai ha taimi kuo fiemaʻu ai ke nau fakafalala ki he kau fakamoʻoní ke fakapapauʻi ʻoku moʻoni ʻa e meʻa naʻa nau lea ʻakí.
Fakakaukauloto naʻe fiemaʻu ke ke fakamatala ʻa e feituʻu naʻá ke ʻi ai ʻanepoó mei he 6:00 ki he 7:00 p.m.
-
Te ke fakapapauʻi fēfē ʻa e meʻa naʻá ke fai ʻi he taimi ko iá?
-
ʻOku ʻi ai nai ha kau fakamoʻoni te nau lava ʻo fakapapauʻi e feituʻu naʻá ke ʻi aí?
-
Ko e hā ʻoku mahuʻinga ai ʻa e kau fakamoʻoní ʻi he taimi ʻoku tau fekumi ai ki he moʻoní?
Lau ʻa e 2 Nīfai 11:2–3, ʻo kumi ki he ngaahi fakamoʻoni naʻe lea ki ai ʻa Nīfaí pea mo e meʻa ne nau aʻusiá.
Fakaafeʻi e kau akó ke vahevahe e meʻa ne nau maʻú mo ʻenau ngaahi fakakaukau fekauʻaki mo iá. Kapau ʻe ʻaonga, fakakaukau ke ʻeke e ngaahi fehuʻi ko ʻení:
-
Ko e hā ka hoko ai ʻa e toko tolu ko ʻení ko ha kau fakamoʻoni mālohí?
-
Ko e hā ha meʻa te ke fie ako meiate kinautolu?
-
Ko e hā ha ngaahi moʻoni ʻokú ke ako fekauʻaki mo e ʻOtuá ʻi he veesi 3?
ʻI he tali ʻa e kau akó, fakakaukau ke hiki e kongaʻi sētesi ko ʻení ʻi he palakipoé: ʻOku fekauʻi mai ʻe he Tamai Hēvaní ha kau fakamoʻoni ke … ʻE lava ke ke fakakakato e sētesí ʻaki e meʻa ʻoku lea ʻaki ʻe he kau akó.
Lau ʻa e 2 Nīfai 11:4, 6, ʻo kumi e meʻa naʻe fiemaʻu ʻe Nīfai ke ʻilo ʻe hono kakaí.
Kapau naʻe teʻeki fakakakato ʻe he kau akó ʻa e fakamatala ʻi he palakipoé ʻaki ha meʻa tatau mo e tefitoʻi moʻoni ʻi laló, fakakaukau ke tānaki atu ia.
Ko e taha e ngaahi moʻoni ʻoku lava ke tau ako mei he 2 Nīfai 11 ko hono ʻomi ʻe he Tamai Hēvaní ha kau fakamoʻoni ke fakamoʻoni ki he moʻoni ʻo Hono ʻAló.
-
ʻOkú ke pehē ko e hā ʻoku fakaʻaongaʻi ai ʻe he Tamai Hēvaní ha kau fakamoʻoni ke fakamoʻoniʻi Hono ʻAló?
Fakaʻaongaʻi ha kiʻi taimi ke fakalaulauloto ai ki he ngaahi meʻa ʻokú ke tui ki aí mo hoʻo ngaahi ongo fekauʻaki mo e Fakamoʻui ko Sīsū Kalaisí. Fakakaukau ki he kau fakamoʻoni ʻo e Fakamoʻuí mo e founga kuo nau liliu ai koe mo hoʻo tui kiate Iá. ʻI hoʻo hoko atu e lēsoni ko ʻení, kumi ha ngaahi founga ʻe ala tokoni mo fakamālohia ai koe ʻe he kau fakamoʻoní ʻi hoʻo moʻuí.
Kimuʻa ʻi he 2 Nīfai 11, naʻe fakakau ʻe Nīfai ʻa e ngaahi akonaki mo e fakamoʻoni ʻa hono tehina ko Sēkopé. Hili e 2 Nīfai 11, naʻe fakakau ʻe Nīfai e ngaahi akonaki mo e fakamoʻoni ʻa e palōfita ko ʻĪsaiá. Mahalo te ke fiemaʻu ke tohi ʻa e “2 Nīfai 9–10 ko e fakamoʻoni ʻa Sēkopé” ʻi he tafaʻaki ʻo e hingoa ʻo Sēkopé ʻi he veesi 3 mo e “2 Nīfai 12–24 ko e fakamoʻoni ʻa ʻĪsaiá” ʻi he tafaʻaki ʻo e hingoa ʻo ʻĪsaiá ʻi he veesi 2.
Kau Fakamoʻoni ʻo Sīsū Kalaisí
ʻE lava ke tokoniʻi koe ʻe he lēsoni ko ʻení ke fakaloloto hoʻo fakamoʻoni fakataautaha kia Sīsū Kalaisí. Neongo pe kuó ke ʻosi ʻiloʻi ʻiate koe pē ʻokú Ne moʻui pe ʻokú ke kei fifili pe ʻokú Ne moʻoni koā, ka ʻe lava ke tokoniʻi koe ʻe he Laumālie Māʻoniʻoní ke ʻiloʻi lelei ange Ia ʻo fakafou ʻi he kau fakamoʻoni kuo fili ʻe he ʻOtuá. ʻOku ʻikai mahuʻinga tatau ʻa e mālohi hoʻo fakamoʻoni kiate Ia he taimi ní mo hoʻo holi ke ʻiloʻi lelei ange Ia ʻi he kahaʻú.
ʻI he fokotuʻu ko ʻeni ki he akó, fakakaukau ke vahevahe ʻa e kau akó ki ha ngaahi kulupu tautau toko tolu pea ako ʻe he tokotaha ako takitaha ha fakamoʻoni kehekehe. Hili ha taimi feʻunga, fakaafeʻi e kau akó ke vahevahe e meʻa ne nau ako mo ʻenau kulupú.
-
Sēkope—Kumi ha akonaki pe fakamoʻoni kia Kalaisi ʻoku ʻuhingamālie kiate koe ʻa ia naʻe vahevahe ʻe Sēkope ʻi he 2 Nīfai 9–10. (ʻE lava ke kau ʻi he ngaahi veesi ko ʻení ʻa e 2 Nīfai 9:10–12, 20–23, 41; 10:25.)
-
ʻĪsaia—Kumi ha akonaki pe fakamoʻoni kia Kalaisi ʻoku mahuʻingamālie kiate koe ʻa ia naʻe vahevahe ʻe ʻĪsaia ʻi he 2 Nīfai 12–24. (ʻE lava ke kau ʻi he ngaahi veesi ko ʻení ʻa e 2 Nīfai 16:1–3; 17:14; 19:6–7; 22:2; 24:3.)
-
Nīfai—Kumi ha akonaki pe fakamoʻoni kia Kalaisi ʻoku ʻuhingamālie kiate koe mei he ngaahi tohi fakataautaha ʻa Nīfaí. (ʻE lava ke kau ʻi he ngaahi veesi ko ʻení ʻa e 1 Nīfai 11:31–33; 19:8–10; 2 Nīfai 4:18–21; 25:26, 29.)
Kau fakamoʻoni ʻo Kalaisi ʻi onopōní
Manatuʻi naʻe fakamoʻoni ʻa Nīfai “ʻoku fekau atu ʻe he ʻOtuá mo [ha] kau fakamoʻoni tokolahi ange” (2 Nīfai 11:3). Ko e niʻihi ʻo e kau fakamoʻoni ko ʻení ko ʻEne kau ʻAposetolo ʻi he ngaahi ʻaho kimui ní. Mamata ʻi he fakamoʻoni ʻa ha toko ua ʻo e kau fakamoʻoni fakaeonopooni ko ʻeni ʻo Sīsū Kalaisí. Tokanga ki he ngaahi fakakaukau mo e ngaahi ongo ʻe lava ke ke maʻu mei he Laumālie Māʻoniʻoní ʻi hoʻo mamata he ngaahi fakamoʻoní. ʻOku maʻu e ngaahi vitioó ʻi he ChurchofJesusChrist.org.
Fakakaukau ke tuku ki he kau akó ke nau fili ʻa e vitiō te nau fie mamata aí kapau ʻoku ʻikai ha taimi feʻunga ki he ngaahi vitiō kotoa ʻe nimá. Te ke lava ʻo ʻoange ha taimi ʻi he vahaʻa ʻo e foʻi vitiō takitaha ke hiki e meʻa ne nau ako pe ongoʻi fekauʻaki mo Sīsū Kalaisí ʻi heʻenau tohinoa akó.
“Kau Fakamoʻoni Makehe ʻo Kalaisí—Palesiteni Russell M. Nelson” (mamata mei he taimi 4:32 ki he 5:47)
“Kau Fakamoʻoni Makehe ʻo Kalaisí—Palesiteni M. Russell Ballard” (mamata mei he taimi 2:22 ki he 3:45)
“Kau Fakamoʻoni Makehe ʻo Kalaisí—ʻEletā Quentin L. Cook” (mamata mei he taimi 3:53 ki he 4:57)
“Kau Fakamoʻoni Makehe ʻo Kalaisí—ʻEletā Neil L. Andersen” (mamata mei he taimi 4:20 ki he 5:24)
“Kau Fakamoʻoni Makehe ʻo Kalaisí—ʻEletā D. Todd Christofferson” (mamata mei he taimi 4:30 ki he 5:51)
Ko hoʻo fakamoʻoni kia Sīsū Kalaisí
Fakatokangaʻi ange naʻe fili ʻe Nīfai ha palōfita naʻá ne tanganeʻia ai (ʻĪsaia), ko ha taha naʻá ne ʻiloʻi fakataautaha (ko hono tokoua ko Sēkopé), pea mo e fakamoʻoni pē ʻaʻaná ko e fakamoʻoni ʻe tolu ke fakamoʻoni ki he moʻoni ʻo Sīsū Kalaisí.
Fakakaukau ke fakaafeʻi e kau akó ke lekooti ʻenau fakakaukau fekauʻaki mo e ngāue ko ʻení ʻi heʻenau tohinoa akó. ʻE ala tokoni ke fakaʻaliʻali ʻa e ngaahi meʻa mahuʻinga ko ʻeni ʻoku fakaʻilongaʻí lolotonga e tohi ʻa e kau akó. Kimuʻa pea kamatá, fakakaukau ke fakamanatu ange kiate kinautolu ʻa e meʻa ne nau ako lolotonga e teuteu ʻa e tokotaha akó.
-
Hiki ha akonaki fekauʻaki mo e Fakamoʻuí ʻa ia ʻoku ʻuhingamālie kiate koe meia Nīfai, Sēkope, ʻĪsaia, pe ko ha palōfita ʻi onopooni.
-
Lekooti e hingoa ʻo ha taha ʻokú ke ʻiloʻi fakataautaha ʻa ia ʻokú ke pehē ko ha fakamoʻoni ʻo Sīsū Kalaisi. Fakakau e meʻa kuó ke ako mei heʻenau fakamoʻoní. (Mahalo te ke fie talanoa pe ʻave ha pōpoaki telefoni ki he tokotaha ko iá ke fehuʻi pe naʻe founga fēfē ʻene maʻu ha fakamoʻoni kia Kalaisí.)
-
Lekooti e ongo ʻokú ke maʻu fekauʻaki mo hoʻo fakamoʻoni pē ʻaʻau kia Sīsū Kalaisí. ʻE lava ke kau heni ha ngaahi aʻusia kuó ke maʻu pe ko ha ngaahi meʻa kuó ke ako fekauʻaki mo Ia. Pe ko hoʻo fili ke lekooti hoʻo holi ke maʻu ha fakamoʻoni kia Sīsū Kalaisi mo e meʻa ʻokú ke loto-fiemālie ke fai ke tokoni ke tupulaki ʻa e fakamoʻoni ko iá.
Fakaafeʻi ha kau ako ʻe niʻihi ke vahevahe ha konga ʻo e meʻa ne nau hikí.
Fakakaukau ke hivaʻi pe fanongo ki ha himi fekauʻaki mo Sīsū Kalaisi ke fakaʻosi ʻaki e lēsoní.