Mōsaia 1

“Kapau Naʻe ʻIkai ʻa e Ngaahi Peletí [Ni]”

Ko e hā ha lelei ʻe maʻu mei he folofolá ʻi hono tauhi maʻu e tui kia Sīsū Kalaisí ʻi he kotoa hoʻo moʻuí? Naʻe akoʻi ʻe he Tuʻi ko Penisimaní ki hono ngaahi fohá ʻa e fatongia mahuʻinga ʻo e folofolá ki heʻenau tuí. ʻE lava ke tokoni e lēsoni ko ʻení ke fakatupulaki hoʻo holi ke ako e folofolá.

Poupouʻi ha ʻulungaanga pau ki hono ako fakaʻaho e folofolá. ʻOku siʻi ha ngaahi meʻa te nau maʻu ha ivi tākiekina mālohi mo tuʻuloa ange ki he leleí ʻi he moʻui ʻa e kau akó ka ko hono tokoniʻi kinautolu ke ako mo saiʻia ʻi he ngaahi folofolá pea ke ako fakaʻaho kinautolu. Ko e founga ʻe taha ke fai ai ʻení ko hono fakaafeʻi e kau akó ke fokotuʻu ha taumuʻa laukonga pea faʻu ha palani fakataautaha ke ako ʻi he ʻaho takitaha.

Teuteu ʻa e tokotaha akó: Fakaafeʻi e kau akó ke fai ʻenau ako folofola fakatāutahá mo fakalaulauloto ki he founga ʻoku tokoni ai kiate kinautolú, tautautefito ki heʻenau ngaahi ongó mo e falala kia Sīsū Kalaisí.

Ngaahi ʻEkitivitī Ako ʻOku Ala Fakahokó

Ko e hā ʻoku mahuʻinga ki heʻetau tui kia Sīsū Kalaisí?

Fakakaukau ke puke hake ha tatau ʻo e Tohi ʻa Molomoná mo e ngaahi folofola kehé pea toki toʻo kinautolu ʻi hoʻo fehuʻi ange:

• Naʻe mei fēfē nai ʻetau moʻuí ka ne taʻeʻoua ʻa e Tohi ʻa Molomoná pe ngaahi folofola kehé?

  ChurchofJesusChrist.org 

Fakaafeʻi e kau akó ke vahevahe ʻenau ngaahi fakakaukaú.  

Fakalaulauloto ki he ngaahi fehuʻi ko ʻení pe tali kinautolu ʻi hoʻo tohinoa akó:

Kapau ʻe hiki ʻe he kau akó ʻenau ngaahi talí ʻi heʻenau tohinoa akó, mahalo ʻe tokoni ke nau toe vakai ki heʻenau talí ʻamui ange ʻi he lēsoní pe ʻamui ange ʻi he taʻú.

• Ko e hā hoʻo ongo kau ki he ngaahi folofolá? Ko e hā hono ʻuhingá?

• Kapau ʻe hokohoko atu hoʻo ako folofola ʻi he tuʻunga lolotongá ʻi he ngaahi taʻu ka hoko maí, ʻokú ke pehē te ne liliu fēfē koe?

• Kapau ʻoku ʻikai ke ke anga ʻaki hono ako e folofolá, ko e hā te ke fiemaʻu ke mahino pe ongoʻi ka ke kamata hono ako iá?

Hokohoko atu hoʻo fakakaukau ki he ngaahi fehuʻi ko ʻení ʻi hoʻo ako e lēsoni ko ʻení. Te ke lau ʻa e faleʻi mei he Tuʻi ko Penisimaní ki hono ngaahi fohá fekauʻaki mo e folofolá. Feinga ke ako ʻo fakafou ʻi he Laumālie Māʻoniʻoní ʻa e founga ʻe lava ke faitāpuekina ai ʻe he folofolá hoʻo moʻuí.

Faleʻi mei he Tuʻi ko Penisimaní

Naʻe fakatokanga e ʻEikí ki he tamai ʻa e Tuʻi ko Penisimaní, ʻa Mōsaia, ʻoku totonu ke mavahe hono kakaí mei honau fonua tupuʻangá. ʻI he taimi ne nau talangofua aí, naʻa nau ʻilo ʻa e kakai ʻo Seilahemalá (vakai, ʻAmenai 1:12–19). Naʻe fakatahaʻi e ongo falukunga kakai ko ʻení ʻi he malumalu ʻo Mōsaiá, ʻa ia naʻe fili ko e tuʻi, pea faifai pea hoko ʻa Penisimani ko e tuʻi hili ʻene tamaí. ʻE ala tokoni ke ke ʻilo lahi ange ki he Tuʻi ko Penisimaní kimuʻa peá ke ako ʻa e meʻa naʻá ne akoʻi ki hono ngaahi fohá.

Lau e Ngaahi Lea ʻa Molomona 1:12–18 mo e Mōsaia 1:1, ʻo kumi e ngaahi faingataʻa naʻe fehangahangai mo e Tuʻi ko Penisimaní mo e ngaahi founga ʻokú ke tanganeʻia ai ʻiate iá.

• Ko e hā e meʻa naʻá ke maʻú?

  Fakaafeʻi e kau akó ke vahevahe ʻenau ngaahi fakakaukaú mo e ngaahi ongó.

• Ko e hā ka ke ka fie fanongo ai ki ha faleʻi mei he Tuʻi ko Penisimaní?

Lau ʻa e Mōsaia 1:2–7, ʻo kumi e meʻa naʻe akoʻi ʻe he Tuʻi ko Penisimaní ki hono ngaahi fohá fekauʻaki mo e folofolá. ʻE ala ʻaonga ke ʻiloʻi “ko e ngaahi meʻa lilo ʻa e ʻOtuá ʻa e ngaahi moʻoni fakalaumālie ʻoku toki ʻiloʻi pē ʻi he fakahā” (Fakahinohino ki he Ngaahi Folofolá, “Meʻa Lilo ʻa e ʻOtuá, Ngaahi,” scriptures.ChurchofJesusChrist.org).   ChurchofJesusChrist.org 

• Ko e hā naʻá ke ako mei he Tuʻi ko Penisimaní fekauʻaki mo e folofolá?

Hiki ʻi he palakipoé ʻa e meʻa ʻoku vahevahe ʻe he kau akó. Kapau he ʻikai ke nau vahevahe ha ngaahi tefitoʻi moʻoni hangē ko ʻení, fakakaukau ke tānaki atu kinautolu.

Ko ha niʻihi ʻeni ʻo e ngaahi tefitoʻi moʻoni te tau lava ʻo ako mei he Tuʻi ko Penisimaní:

• Kapau he ʻikai ke tau ako maʻu pē mo faivelenga ʻa e folofolá, ʻe lava ke mole māmālie ʻetau tuí.

• ʻE ʻaonga kiate kitautolu ʻetau fekumi faivelenga ʻi he folofolá.

• ʻOkú ke pehē ko e hā ʻe lava ke mole māmālie ai ʻetau tuí kapau he ʻikai ke tau ako e folofolá?

Kuo talaʻofa ʻe he ʻEikí ke tāpuakiʻi kitautolu ʻi ha ngaahi founga lahi ʻi heʻetau lau e folofolá. Ako ha niʻihi ʻo e ngaahi potufolofola ko ʻení pea kumi ha niʻihi ʻo e ngaahi tāpuaki ko ʻení:

• Sōsiua 1:8

• Saame 119:105

• Luke 24:27–32

• 1 Nīfai 1:12

• 1 Nīfai 15:24

• 2 Nīfai 32:3

• Sēkope 2:8

• ʻAlamā 17:2

• Hilamani 15:7–8

• Tokāteline mo e Ngaahi Fuakava 11:21–22

Fakaafeʻi e kau akó ke vahevahe e meʻa naʻa nau maʻú.

• Ko e fē ʻi he ngaahi tāpuaki ko ʻení ʻokú ke fiemaʻu taha ʻi hoʻo moʻuí?

• ʻE fakatupulaki fēfē nai ʻe he ngaahi tāpuaki ko ʻení ʻetau tui ki he ʻEikí mo ʻEne ongoongoleleí?

Folofolá mo ʻetau tuí

Naʻe akonaki ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e taumuʻa mahuʻinga taha ʻo e folofola kotoa pē ko hono fakafonu ʻaki hotau laumālié ʻa e tui ki he ʻOtua ko e Tamaí mo Hono ʻAlo ko Sīsū Kalaisí—tui ʻokú Na moʻui; tui ki he palani ʻo ʻetau Tamaí ki heʻetau moʻui taʻe-faʻa-maté mo e moʻui taʻengatá; tui ki he Fakalelei mo e Toetuʻu ʻa Sīsū Kalaisí ʻa ia ʻoku lava ai ke fakahoko ʻa e palani ko ʻeni ʻo e fiefiá; tui ki hono moʻui ʻaki ʻo e ongoongolelei ʻo Sīsū Kalaisí; pea mo e tui ke ʻiloʻi “ko e ʻOtua moʻoni pē tahá, mo Sīsū Kalaisi, ʻa ia [naʻá Ne] fekaú (Sione 17:3).” (D. Todd Christofferson, “Ko e Tāpuaki ʻo e Folofolá,” Liahona, Mē 2010, 34)

1. Hiki e fakamoʻoni fakafolofola ʻe ua pe tolu kuó ne liliu lahi koe mo hoʻo fakamoʻoní, tautautefito ho fakamoʻoni kia Sīsū Kalaisi pe Tamai Hēvaní. Naʻe tokoniʻi fēfē koe ʻe he ngaahi potufolofola ko ʻení? Naʻe mei kehe fēfē nai hoʻo moʻuí kapau naʻe ʻikai ke ke lau e ngaahi veesi ko iá?

2. Ako ho‘o folofolá ʻi ha miniti ʻe nima. Kumi ha faʻahinga moʻoni pē te ne ala tokoniʻi koe ke ke tauhi faivelenga ai ki he ʻEikí mo ʻEne ongoongoleleí. Tokanga ki ha faʻahinga ongo pē ʻe ala tokoni. Tohi fekauʻaki mo hoʻo aʻusiá.

3. ʻAve ha pōpoaki telefoni pe talanoa ki ha taha ʻokú ke pehē ʻoku matuʻaki tui faivelenga ʻaupito ki he ʻEiki ko Sīsū Kalaisí. Fehuʻi ki he tokotaha ko iá pe ko e hā ʻa e fatongia ʻo e folofolá ʻi hono tokoniʻi ia ke faivelenga maʻu ai peé.

4. Mamata ʻi he vitiō ko ʻení, pea fekumi ki ha sīpinga ʻo e founga ʻe lava ke tāpuekina ai ʻe he ako folofolá ʻa ʻetau moʻuí pea fakatupulaki ʻetau tui ki he Tamai Hēvaní mo Sīsū Kalaisí. ʻOku maʻu ʻa e vitioó ʻi he ChurchofJesusChrist.org.

   • “Ko e Ngaahi Tāpuaki ʻo e Folofolá” (3:03)

   •  

   •  

Fakaafeʻi ha niʻihi ʻo e kau akó ke vahevahe ʻenau ngaahi fakakaukaú pe aʻusiá. ʻE lava ke hoko e fanongo ki he ngaahi fakakaukau mo e fakamoʻoni mei ho toʻu akó ko ha aʻusia mālohi. Fakakaukau ke vahevahe foki hoʻo ngaahi fakakaukaú mo e fakamoʻoní.

Ko hoʻo ako folofola fakatāutahá

Fakalaulauloto ki hoʻo ako folofolá. Ko e hā ha ngaahi founga ʻoku tupulaki ai hoʻo tui ki he Tamai Hēvaní mo Sīsū Kalaisí ʻi hoʻo ako faivelenga e folofola ʻa e ʻOtuá? ʻOku ʻi ai nai ha meʻa ʻokú ke ongoʻi ʻe finangalo e ʻEikí ke ke fai ke fakalakalaka ai hoʻo akó? Fakakaukau ke hiki ha faʻahinga taumuʻa te ke ala maʻu ʻi hoʻo tohinoa akó.

Mahalo ʻe lelei ke fehuʻi pe ʻoku ʻi ai ha kau ako ʻoku loto-fiemālie ke vahevahe ʻenau ngaahi taumuʻa akó.

Fakamatala Fakamahinó mo e Puipuituʻá

ʻE fakamālohia mo poupouʻi fēfē ʻe he folofolá ʻetau tuí?

Naʻe akonaki ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku maʻu ʻa e tuí ʻi he hanga ʻe he Laumālie Māʻoniʻoní ʻo fakamoʻoniʻi ia ʻi hotau ngaahi lotó, Laumālie ki he laumālie, ʻi he taimi ʻoku tau fanongo pe lau ai e folofola ʻa e ʻOtuá. Pea ʻoku tupulaki ʻa e tuí ʻi he hokohoko ʻo ʻetau keinanga ʻi he folofolá.

ʻOku hanga ʻe he ngaahi fakamatala fakafolofola ki he tui ʻa ha niʻihi kehe ʻo tokoniʻi kitautolu ke toe mālohi ange ʻetau tuí. …

Koeʻuhí ko ʻena fakamatalaʻi ʻa e tokāteline ʻo Kalaisí, ʻoku ʻalu fakataha ai ʻa e ngaahi folofolá mo e Laumālie Māʻoniʻoní ʻa ia ko hono fatongiá ke fakamoʻoni ki he Tamaí mo e ʻAlo (vakai, 3 Nīfai 11:32). ʻI heʻene peheé, ʻoku tau maʻu ʻa e Laumālie Māʻoniʻoní ʻi heʻetau lau ʻa e folofolá. Ko hono moʻoní, ʻoku maʻu ʻa e folofolá ʻi he Laumālie Māʻoniʻoní (vakai, 2 Pita 1:21; T&F 20:26–27; 68:4), pea ko e Laumālie pē ko iá ʻokú Ne fakamoʻoni ki he moʻoni ʻa e folofolá kiate koe mo aú. Ako fakaʻāuliliki mo fakamātoato e folofolá. Fakalaulauloto mo lotu ki ai. ʻOku hoko ʻa e ngaahi folofolá ko e fakahā pea te nau ʻomi ha toe ngaahi fakahā. (D. Todd Christofferson, “Ko e Tāpuaki ʻo e Folofolá,” Liahona, Mē 2010, 35)

Fēfē kapau ʻoku ou faingataʻaʻia ke ako ʻa e folofolá?

Naʻe tohi ʻe ha toʻu tupu ʻi ha makasini ʻa e Siasí ʻo pehē, “ʻOku ou fāifeinga ke ako ʻa e folofolá. Ko e hā ʻoku fuʻu mahuʻinga ai ke ako kinautolú?” Lau ʻa e konga ʻo e “Questions and Answers” ʻi he New Era, Tīsema 2016, peesi 42–43, ke vakai ki he ngaahi lea fakaepalōfita mo e ngaahi tali mei he toʻu tupu kehé ʻe ala tokoní.

Ngaahi ʻEkitivitī Fakalahi ki he Akó

Fulifulihi e kamataʻanga ʻo e lēsoní

Fakakaukau ke fakaafeʻi e kau akó ke fakakaukauloto ʻoku nau fononga lōloa ʻi he maomaonganoá. Tuku ke nau tala atu ha meʻa ʻe tolu ʻoku nau ongoʻi ʻe fiemaʻu ke nau moʻui ai pea mo hono ʻuhingá. Hili iá pea fakafehoanaki ʻetau moʻuí ki ha fononga ʻo e moʻui fakalaumālié pea fakaafeʻi e kau akó ke vahevahe ha meʻa ʻe tolu ʻoku nau ongoʻi ʻoku tokoni ke tau maʻu mo pukepuke ai ʻetau tui kia Sīsū Kalaisí pea mo hono ʻuhingá. Fakamatalaʻi ange ko e taha ʻo e ngaahi meʻangāue maʻongoʻonga kuo foaki mai ʻe he ʻEikí ke tau moʻui fakalaumālie aí ko e folofolá, pea fakaafeʻi e kau akó ke nau fakalaulauloto ki he ngaahi fehuʻi vakaiʻi fakataautaha ʻi he kamataʻanga ʻo e lēsoni ʻi ʻolungá.

Ko e sīpinga ʻo e kakai ʻo Seilahemalá

Ke fakatātaaʻi e ngaahi akonaki ʻa e Tuʻi ko Penisimaní, fakaafeʻi e kau akó ke nau fakakaukau ki he sīpinga ʻo e kakai ʻo Seilahemalá. Naʻe muimui ʻa e Tuʻi ko Mōsaiá (tamai ʻa e Tuʻi ko Penisimaní) ki he tataki fakalaumālie ʻa e ʻEikí mo tataki hono kakaí mei honau fonua tupuʻangá ʻo aʻu ki heʻenau toki ʻilo ʻa e kakai ʻo Seilahemalá. Naʻe faitatau e ongo kulupú fakatouʻosi: naʻa nau tukuʻau mai mei he kakai naʻa nau mavahe mei Selusalema ʻi he taimi tatau pea fononga ki he ongo ʻAmeliká. Neongo ia, ka naʻe mavahe ʻa Līhai mo hono fāmilí mo ha ngaahi folofola, ka naʻe ʻikai mavahe e ngaahi kui ʻa e kakai ʻo Seilahemalá mo ha folofola. Fakaafeʻi e kau akó ke lau ʻa e ʻAmenai 1:14–17 ke ʻiloʻi pe naʻe uesia fēfē e kakai ʻo Seilahemalá ʻi he ʻikai haʻanau folofolá.

Ko ha lisi fakakalasi ʻo ha ngaahi potufolofola mālohi

Hili hono ʻiloʻi ʻe he kau akó e ngaahi tefitoʻi moʻoni ʻi he lēsoni ʻi ʻolungá, ʻe lava ke hiki ʻe he kau akó ha lisi ʻo e ngaahi potufolofola ʻe tokoni ke fakamālohia ʻenau tuí. ʻE lava ke hiki ʻe he tokotaha ako takitaha ha veesi ʻe taha pe ua ʻi ha laʻipepa, ʻa ia ʻe lava ke fakapipiki ki ha holisi pe ko e palakipoé. Pe ʻe lava ʻe he faiakó ʻo fakatahaʻi kotoa e ngaahi tali ʻa e kau akó ʻi ha lisi lōloa. ʻE lava leva ke kumi ʻe he kau akó ha ngaahi veesi manako ʻo honau kaungā akó pea lau kinautolu.

Fanga kiʻi tohi fakaʻaiʻaí

ʻI he fakaʻosinga ʻo e lēsoní, ʻe lava ke tohi ʻe he tokotaha ako takitaha ha kiʻi tohi ke fakalotolahiʻi e kau ako kehé ke lau ʻenau folofolá. ʻE lava ke kau ʻi he ngaahi fakamatalá ʻa e ngaahi tefitoʻi moʻoni naʻe ako ʻe he kau akó mei he lēsoni ko ʻení mo e ngaahi tāpuaki kuo nau aʻusia ʻi heʻenau moʻuí.