Mōsaia 1–3

Vakai Fakalūkufuá

Ko e Tuʻi ko Penisimaní ko ha taki naʻá ne tauhi ki he ʻOtuá ʻaki ʻene tokoni ki hono kakaí mo akoʻi kinautolu ke nau fetokoniʻaki. Naʻá ne akonaki ʻo pehē, “ʻO ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá” (Mōsaia 2:17). Naʻá ne fakaafeʻi hono kakaí ke nau fekumi ki he fiefiá ʻo fakafou ʻi he moʻui angatonu mo e līʻoa ki he ʻOtuá. Naʻe ʻaʻahi kiate ia ha ʻāngelo, pea naʻá ne vahevahe mo hono kakaí ʻa e fakamoʻoni ʻa e ʻāngeló kia Sīsū Kalaisí, ko e ngaahi meʻa ʻe aʻusia ʻe he Fakamoʻuí, pea mo e moʻoni ʻoku toki maʻu pē ʻa e fakamoʻuí ʻi he huafa ʻo Kalaisí.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

Mōsaia 2:1–18

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke lelei ange ʻenau tauhi ki he ʻOtuá ʻaki ʻenau tokoniʻi lelei ange ʻa e niʻihi kehé.

• Teuteu ʻa e tokotaha akó: Fakaafeʻi e kau akó ke kumi ha kiʻi founga faingofua ke tokoniʻi ai ha taha kehe kimuʻa he lēsoni hokó.

• Meʻa ke fakaʻaliʻalí: Ko e siviʻi pē kita mei he kamataʻanga ʻo e lēsoní ʻi he palakipoé

•  

• Fokotuʻu ki hono akoʻi ʻi he konifelenisi vitioó: Ko e siviʻi fakataautaha ʻa ia ʻoku fakamatalaʻi ai ʻe he kau akó ʻenau ngaahi ongo fekauʻaki mo e ngaahi faingamālie ke tokoní, te ke lava ʻo fakaʻaliʻali ʻa e ngaahi fakakaukaú pea kole ki he kau akó ke nau fakafuofuaʻi ʻa kinautolu pē ʻi ha laʻipepa.

Fakataukei Fakatokāteliné: Mōsaia 2:17

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ako maʻuloto ʻe he kau akó e potufolofola fakataukei fakatokāteliné mo e kupuʻi lea folofola mahuʻinga ki he Mōsaia 2:17, fakamatalaʻi e tokāteliné, pea akoako fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ki ha tūkunga moʻoni ʻo e moʻuí.

• Teuteu ʻa e tokotaha akó: Fakaafeʻi e kau akó ke nau omi ki he kalasí kuo nau fakakaukau ki ha taimi naʻa nau aʻusia ai ha ngāue tokoni faingataʻa pe ko ha faingamālie ke tokoni ka naʻe ʻikai ke nau fie fai ia.

• Fokotuʻu ki hono akoʻi ʻi he konifelenisi vitioó: Ki he konga ʻo e lēsoní ʻa ia ʻoku hiki ai ʻe he kau akó ʻenau tūkungá, fakakaukau ke fakaafeʻi kinautolu ke vahevahe ʻenau ngaahi tūkungá ʻi he polokalama fetalanoaʻakí. Kapau ʻe ʻaonga ki he kau akó haʻanau ngāue mo haʻanau hoa, vahe kinautolu ki ha ngaahi loki fetalanoaʻaki.

Mōsaia 2:19–41

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau fekumi ki he “tuʻunga monūʻia mo fakafiefia ʻo kinautolu ʻoku tauhi ʻa e ngaahi fekau ʻa e ʻOtuá” (Mōsaia 2:41).

• Teuteu ʻa e tokotaha akó: ʻE lava ke fakaafeʻi e kau akó ke fakaʻosi e fakamatala ko ʻení pea mateuteu ke aleaʻi ʻenau talí: “ʻOku maʻu ʻa e fiefia moʻoni mo tuʻuloá ʻi he …”

• Vitiō: “Tānaki Ho Ngaahi Tāpuakí” (4:59)

• Laʻipepa Tufa: “Ko e Tuʻunga Monūʻia mo Fakafiefia ʻo Kinautolu ʻOku Tauhi ʻa e Ngaahi Fekaú”

• Fokotuʻu ki hono akoʻi ʻi he konifelenisi vitioó: ʻI he kamataʻanga ʻo e lēsoní, ʻe lava ke fakapipiki ʻe he kau akó ʻi he polokalama fetalanoaʻakí ʻa e ngaahi tāpuaki kehekehe kuo foaki ʻe he ʻOtuá maʻanautolú. ʻE lava ke tokoni ʻeni ki he kau akó ke nau fakatokangaʻi ʻa e ngaahi tāpuaki naʻe ʻikai ke nau fakakaukau ki ai ʻi he kamataʻangá.

Fakataukei Fakatokāteliné: Mōsaia 2:41

Taumuʻa ʻo e lēsoní: ʻE tokoni ʻa e lēsoni ko ʻení ke ako maʻuloto ʻe he kau akó ʻa e potufolofola ʻo e fakataukei fakatokāteliné mo e kupuʻi folofola mahuʻinga ki he Mōsaia 2:41, fakamatalaʻi ʻa e tokāteline ʻoku akoʻi atu ʻi he potufolofolá, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha ngaahi tūkunga moʻoni ʻo e moʻuí.

• Teuteu ʻa e tokotaha akó: ʻE lava ke kole ki he kau akó ke fili ha fekau ʻoku nau feinga ke talangofua ki ai, pea mateuteu leva ke vahevahe ʻa e founga kuo tāpuekina ai kinautolu ʻi hono tauhi ʻo e fekaú.

• Meʻa ke fakaʻaliʻalí: Ko e potufolofola mo e kupuʻi lea folofola mahuʻinga ki he Mōsaia 2:41 ʻi he palakipoé; ʻa e tūkunga mei he konga ko e “Akoako fakahoko”

• Naunau maʻá e kau akó: Pepa mo ha meʻa ke tā fakatātā ʻaki (Pe ko hono fakakakato ʻe he kau akó ʻa e ʻekitivitií ʻi heʻenau tohinoa akó.)

• Fokotuʻu ki hono akoʻi ʻi he konifelenisi vitioó: Ki he tūkunga ʻi he konga “Akoako fakahokó”, fakakaukau ke fakakulupu e kau akó ʻi ha loki fetalanoaʻaki ʻe tolu, ʻo nau taki taha ʻi he tefitoʻi moʻoni ki hono maʻu ʻo e ʻilo fakalaumālié. ʻE lava ke fakamatalaʻi ʻe ha tokotaha lea mei he kulupu takitaha ʻa e konga mei he Fakamatala ki he ʻElito ʻo e Fakataukei Fakatokāteliné (2022) te nau vahevahe mo e tokotaha ʻi he tūkungá.

Mōsaia 3:1–17

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino ki he kau akó ʻa e mahuʻinga ʻo e meʻa naʻe fai ʻe Sīsū Kalaisi kae lava ke fakamoʻui kinautolú.

• Teuteu ʻa e tokotaha akó: Te ke lava ʻo fakaafeʻi e kau akó ke nau aleaʻi mo ha mēmipa ʻo e fāmilí, kaungāmeʻa, pe taki ʻo e Siasí ha ngaahi tāpuaki ʻoku malava koeʻuhí pē ko Sīsū Kalaisi.

• Vitiō: “ʻIlo ʻe he Kau Tauhisipí Hono ʻAloʻi ʻo Kalaisí” (2:50; mamata mei he taimi 0:00 ki he 1:47)

• Fokotuʻu ki hono akoʻi ʻi he konifelenisi vitioó: Hili hono ako mo fakalaulauloto e kau akó ki he Mōsaia 3:5–10, fakakaukau ke fakaafeʻi kinautolu ke nau tohi ʻi he polokalama fetalanoaʻakí ha ngaahi potufolofola ʻoku nau saiʻia ai pe ko haʻanau ngaahi fehuʻi fekauʻaki mo e ngaahi vēsí. Te ke lava foki ʻo fakaafeʻi e kau akó ke nau toe vakaiʻi e fakamatala ʻi he polokalama fetalanoaʻakí pea fili ha ngaahi kupuʻi lea pe fehuʻi ke aleaʻi fakakalasi.