“Mōsaia 2:1–18: ʻʻI he Tauhi ʻo Homou Kāingá,’” Tohi ʻa Molomoná – Tohi Lēsoni ʻa e Faiakó (2024)
“Mōsaia 2:1–18,” Tohi ʻa Molomoná – Tohi Lēsoni ʻa e Faiakó
Mōsaia 2:1–18
“ʻI he Tauhi ʻo Homou Kāingá”
Ko e hā e meʻa ʻokú ne ngaohi ha taki ke maʻongoʻongá? ʻI he lea ʻa e Tuʻi ko Penisimaní, ʻoku tau vakai ai ki he faʻahinga taki mo e sīpinga naʻá ne fakahā ki hono kakaí. Ko e Tuʻi ko Penisimaní ko ha tangata ia naʻe tauhi ki he ʻOtuá ʻaki ʻene tokoni ki hono kakaí mo akoʻi kinautolu ke nau fetokoniʻaki. ʻOku fakataumuʻa ʻa e lēsoni ko ʻení ke tokoniʻi koe ke lelei ange hoʻo tauhi ki he ʻOtuá ʻaki haʻo tokoni lahi ange ki he niʻihi kehé.
Fakaaʻu e aʻusia fakaakó. ʻI hoʻo fakaafeʻi e kau akó ke ngāueʻi e tokāteline moʻoní, ʻokú ke tokoni ai ke fakaaʻu e aʻusia fakaakó ki honau ngaahi ʻapí mo ʻenau moʻui fakaʻahó. ʻI heʻenau fai ʻení, ʻe lava ke nau loto-vēkeveke ange ai ke ako mo moʻui ʻaki e ngaahi akonaki ʻo e ongoongoleleí.
Teuteu ʻa e tokotaha akó: Fakaafeʻi e kau akó ke kumi ha kiʻi founga faingofua ke tokoniʻi ai ha taha kehe kimuʻa he lēsoni hokó.
Ngaahi ʻEkitivitī Ako ʻOku Ala Fakahokó
ʻOku fēfē hoʻo vakai ki he ngāue tokoni?
ʻE lava ke fakahoko fakafoʻituitui, fakakulupu, pe fakakalasi ʻe he kau akó ʻa e ʻekitivitī ko ʻení. ʻE ala tokoni ke hiki ha lisi fakalūkufua ʻi he palakipoé.
Fakaʻaongaʻi ha sekoni ʻe 60 ke hiki ki he lahi taha te ke lavá ha ngaahi founga kehekehe te ke lava ʻo fakakaukau ki ai ʻa ia te ke lava ai ʻo tokoniʻi ha taha he uiké ni.
-
Ko e hā ha meʻa te ne ala fakaʻaiʻai ha taha ke fai e ngaahi meʻa ko ʻení?
-
Ko e hā nai ka momou ai ha taha ke fai e ngaahi meʻá ni?
ʻE lava ke tokoni ʻa e siviʻi fakataautaha ko ʻení ke ʻiloʻi ʻe he kau akó ʻa e ongo ʻoku nau maʻu fekauʻaki mo e ngāue tokoní pea fakaafeʻi ʻa e Laumālie Māʻoniʻoní ke ne akoʻi kinautolu. Fakakaukau ke fakaʻaliʻali e siví pea fakaafeʻi e kau akó ke nau fakakaukau ki heʻenau ngaahi talí. Pe, te ke lava ʻo ʻoange ki he tokotaha ako takitaha ha tatau ʻo e lisí pea fakaafeʻi ke nau fakafuofuaʻi kinautolu ʻi ha meʻafua mei he 1 ki he 5 ʻi he meʻa takitaha.
Ko e fē ʻi he ngaahi meʻá ni te ne fakamatalaʻi lelei taha hoʻo ngaahi ongo lolotongá fekauʻaki mo e ngaahi faingamālie ke tokoní?
-
ʻOku ou kumi ha ngaahi faingamālie ke u tokoni ai.
-
ʻOku ou loto-fiemālie ʻi he taimi ʻoku kole mai ai ke u tokoní.
-
ʻOku ou fie tokoni ka ʻoku faingataʻa ke fakamuʻomuʻa e ngāue tokoní ʻi heʻeku moʻuí.
-
ʻOku ou faʻa fakahehema ke fakakaukau ʻe fai ʻe ha taha kehe ʻa e ngāue tokoní.
-
ʻOku ou saiʻia ʻi he ngāue tokoní ka ʻoku ou hohaʻa ki he fakakaukau mai ʻa e niʻihi kehé kiate aú.
-
ʻOku ou saiʻia ʻi he ngāue tokoní ka ʻoku ou fefaʻuhi mo e holi ke ʻiloʻi pe fakatokangaʻi au ʻe he niʻihi kehé.
-
Meʻa Kehé:
Kapau ʻokú ke ongoʻi ʻe ʻaonga mo feʻunga, fakakaukau ke fakaafeʻi e kau akó ke vahevahe e meʻa ne nau fakakaukau pe ongoʻi ʻi heʻenau fai e siví ni.
ʻI hoʻo ako e lēsoni ko ʻení, fakakaukau ki he founga mo e ʻuhinga ʻe lelei ange ai hoʻo tokoni kiate kinautolu ʻoku mou feohí, ʻo kamata he ʻahó ni.
Ko e sīpinga ʻo e ngāue tokoni ʻa e Tuʻi ko Penisimaní
ʻI he ofi ke ngata e moʻui ʻa e Tuʻi ko Penisimaní, naʻá ne kole ki hono foha ko Mōsaiá ke ui e kakai Nīfaí ke nau fakataha mai ke lea kiate kinautolu. Naʻa nau fakataha mai ʻi ha ngaahi fāmili ki he temipalé ke fanongo ki he Tuʻi ko Penisimaní (vakai, Mōsaia 2:1–9).
Lau ʻa e Mōsaia 2:10–14, ʻo kumi e founga naʻe tokoniʻi ai ʻe he Tuʻi ko Penisimaní hono kakaí.
-
Ko e hā ha meʻa ʻoku makehe kiate koe fekauʻaki mo e Tuʻi ko Penisimaní?
Fakakaukau ke ʻai ha lisi ʻo e ngaahi tali ʻa e kau akó ʻi he palakipoé.
-
Naʻe mei kehe fēfē nai ho fāmilí, ʻapiakó, pe koló kapau naʻe moʻui ʻaki ʻe he kakaí ʻa e founga naʻe moʻui ʻaki ʻe he Tuʻi ko Penisimaní?
ʻUhinga ʻoku tau ngāue tokoni aí
Lau ʻa e Mōsaia 2:15–18, ʻo kumi e meʻa naʻe akoʻi ʻe he Tuʻi ko Penisimaní fekauʻaki mo e ngāue tokoní.
-
Ko e hā ha ngaahi moʻoni te ke lava ʻo ʻiloʻi?
Ko ha potufolofola fakataukei fakatokāteline ʻa e Mōsaia 2:17. Fakakaukau ke fakaʻilongaʻi e ngaahi potufolofola fakataukei fakatokāteliné ʻi ha founga makehe koeʻuhí ke faingofua ange hoʻo maʻu kinautolú. Te ke maʻu ha faingamālie ʻi he lēsoni hokó ke akoako fakaʻaongaʻi ʻa e tokāteline ʻoku akoʻi ʻi he potufolofola ko ʻení ki ha fehuʻi pe tūkunga.
Ko e foʻi moʻoni ʻe taha ʻoku lava ke tau ako mei he Tuʻi ko Penisimaní ʻoku pehē, “koeʻuhí ke mou ʻiloʻi ʻo ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá.”
ʻOku fakataumuʻa ʻa e konga ko ʻeni ʻo e lēsoní ke tokoniʻi e kau akó ke fakatefito ʻenau tokangá ʻi heʻenau ngāue tokoní ʻi he Tamai Hēvaní mo Sīsū Kalaisi. Fakakaukau ki he ngaahi fiemaʻu hoʻo kau akó pea fakaʻaongaʻi e ʻū naunau ko ʻení pe ngaahi meʻa kehe ʻokú ke ongoʻi ʻoku ueʻi koe ke ke vahevahé.
Ko ha fili ʻe taha ke tokoni ki he kau akó ke nau fakakaukau ai ki he Fakamoʻuí, ko hano fakaafeʻi kinautolu ke nau kumi ʻa e fehokotaki ʻi he Mōsaia 2:18 mo e Mātiu 20:27–28.
-
ʻOku founga fēfē ʻa ʻetau tokoni ki he ʻEikí ʻi he taimi ʻoku tau tokoni ai ki he niʻihi kehé?
-
Ko e hā ʻokú ke mamata ki ai ʻi he ngaahi veesi ko ʻení ʻokú ne fakamanatu atu kiate koe ʻa Sīsū Kalaisi?
Lau e lea ko ʻeni ʻa Palesiteni Tōmasi S. Monisoní (1927–2018), pea kumi e meʻa ʻokú ne akoʻi fekauʻaki mo e felāveʻi ʻo ʻetau tokoni ki he niʻihi kehé pea mo hotau vā fetuʻutaki mo e ʻOtuá:
ʻI heʻetau hanga hake ki he langí, ʻoku mahino leva ʻetau ako ki hotau fatongia ke ala atu ʻo tokoní. Ke maʻu ʻa e fiefia moʻoní, kuo pau ke tau fekumi ki ai ʻi he tokanga ki he niʻihi kehé. Kuo teʻeki ʻilo ʻe ha taha ʻa e ʻuhinga ʻo e moʻuí kae ʻoua kuó ne tukulolo hono loto-hīkisiá ke tokoniʻi ʻa hono kāingá. … ʻOku akoʻi ʻe he Fuakava Foʻoú ʻoku taʻemalava ke tau maʻu ha tōʻonga fakakaukau totonu kia Kalaisi taʻe te tau ʻulungaanga taʻesiokita ki he tangatá. …
ʻOku tau vakai ki he Fakamoʻuí ko hotau faʻifaʻitakiʻanga ʻi he ngāue tokoní. Neongo naʻá Ne hāʻele mai ki he māmaní ko e ʻAlo ʻo e ʻOtuá, ka naʻá Ne ngāue tokoni loto-fakatōkilalo kiate kinautolu naʻa nau feohí. Naʻá Ne hāʻele mai mei he langí ke nofo ʻi māmani ko ha tangata matelie pea mo fokotuʻu ʻa e puleʻanga ʻo e ʻOtuá. Naʻe hanga ʻe Heʻene ongoongolelei nāunauʻiá ʻo liliu e fakakaukau ʻa e māmaní. Naʻá Ne tāpuekina ʻa e mahakí; naʻá Ne fakaʻeveʻeva ʻa e pipikí, fakaʻā ʻa e kuí, mo fakaongo ʻa e tulí. Naʻá Ne fokotuʻu foki mo e maté. (Thomas S. Monson, “The Joy of Service,” New Era, Oct. 2009, 4, 6)
Te ke lava ʻo fakaafeʻi e kau akó ke nau fakakaukau fakalongolongo pea tali ʻa e fehuʻi ko ʻení ʻi heʻenau tohinoá.
-
ʻOku fakaʻaiʻai fēfē koe ʻe hoʻo fakakaukau ki he sīpinga ʻa e Fakamoʻuí ke ke tokoniʻi e niʻihi kehé?
ʻE lava ke hoko ʻeni ko ha faingamālie lelei ke fai ai ha fealēleaʻaki pea fakaafeʻi e kau akó ke nau vahevahe ha ngaahi aʻusia fakataautaha fekauʻaki mo e ngāue tokoní pe ko hano tokoniʻi kita. Fakakaukau ke vahevahe ha aʻusia fakataautaha.
ʻE lava ke maʻu ha ngaahi sīpinga lahi ange ʻi he ʻuluʻi tohi “Ko e hā ha ngaahi sīpinga ʻo e ngāue tokoni faka-Kalaisí?” ʻi he konga “Fakamatala Fakamahinó mo e Puipuituʻá”.
-
Kuo tāpuekina fēfē koe ʻi hoʻo tokoniʻi ha niʻihi kehe?
-
Kuo founga fēfē hano tāpuekina koe ʻe he tokoni ʻa e niʻihi kehé?
Faʻu ha palani
Ne tānaki mai ʻe Sisitā Seuloni ʻIupengi, ko e Tokoni ʻUluaki ʻi he Kau Palesitenisī Lahi ʻo e Fineʻofá ʻa e fakakaukau mahuʻinga ko ʻení fekauʻaki mo e ngāue tokoní. Fakakaukau ki he meʻa ʻokú ne akoʻí ʻi hoʻo teuteu ke faʻu ha palani ke tokoniʻi e niʻihi kehé. ChurchofJesusChrist.orgLau e fakamatala ko ʻení.
Kapau te tau liliu ʻetau fakakaukaú koeʻuhí ke siʻisiʻi ange hono tufa ha meʻa ʻi hono tokangaʻi ʻo e masivá mo e faingataʻaʻiá kae lahi ange ki he fetalanoaʻaki ʻoku mahuʻingamālié, mo faʻu ha ngaahi vā fetuʻutaki ʻoku leleí, ʻe lava leva ʻe he ʻEikí ʻo fekauʻi kitautolu ki ha feituʻu. …
… Manatuʻi, ʻi he founga tatau pē hangē ko e Fakamoʻuí, ʻokú ke hoko ko e taha ʻo e ngaahi meʻaʻofa lelei taha te ke lava ʻo foaki ki he kakai kehe ʻoku faingataʻaʻiá. (Sharon Eubank, “Turning Enemies into Friends” [Brigham Young University forum, Jan. 23, 2018], 6–7, speeches.byu.edu)
-
Ko e hā ʻoku makehe kiate koe mei he meʻa naʻe akoʻi ʻe Sisitā ʻIupengi fekauʻaki mo e ngāue tokoní?
Ko e hā ha ngaahi founga te ke lava ai ʻo fai e meʻa naʻá ne akoʻí? Fakakaukau ki ho fāmilí, kaungāmeʻá, pe koló. Lotu ʻo kole ki he Tamai Hēvaní ke Ne ueʻi koe fekauʻaki mo e ngaahi founga te ke ala tokoni aí. Hiki ʻi hoʻo tohinoa akó e hingoa ʻo e kakai ʻoku haʻu ki ho ʻatamaí mo e ngaahi fakakaukau ki he founga te ke lava ʻo tokoniʻi ai kinautolú. Fili ʻa e taimi te ke ngāueʻi ai hoʻo ngaahi ongó. Mahalo ʻoku ʻi ai ha meʻa te ke lava ʻo fai he taimí ni.