Mōsaia 4–6

Vakai Fakalūkufuá

Fakatokangaʻi ange: ʻE kau ʻi he uike ko ʻeni ʻo e seminelí ʻa e ngaahi naunau mei he Mōsaia 3–4. Ko e ngaahi lēsoni ki he ngaahi akonaki ʻa e Tuʻi ko Penisimaní ʻi he Mōsaia 5–6 ʻoku maʻu ia ʻi he naunau ʻo e uike ka hokó.

Naʻe ui ʻe he Tuʻi ko Penisimaní hotau natula taʻehaohaoá ko e “tangata fakakakanó” (Mōsaia 3:19). Naʻá ne akoʻi te tau lava ʻo ikunaʻi ʻeni ʻo fakafou ʻi he Fakalelei ʻa Sīsū Kalaisí. ʻI hono ueʻi ʻe he ngaahi akonaki ʻa e Tuʻi ko Penisimaní ʻa e kau Nīfaí, naʻa nau “fonu ʻi he fiefia” pea nau ongoʻi ha “fiemālie ʻo e konisēnisí” ʻi heʻenau fakatomala mo maʻu ha fakamolemole ʻo ʻenau ngaahi angahalá (Mōsaia 4:3). Naʻe akoʻi leva kinautolu ʻe he Tuʻi ko Penisimaní ʻi he founga ke tauhi maʻu ai e ngaahi ongo ko ʻení, pea naʻá ne fakamamafaʻi ʻa e mahuʻinga ʻo e tui ki he ʻOtuá.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

Mōsaia 3:19

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau fekumi ki he tokoni ʻa e Fakamoʻuí ʻi hono ikunaʻi honau natula hingá.

• Teuteu ʻa e tokotaha akó: Fakaafeʻi e kau akó ke nau lau ʻa e Mōsaia 3:19 pea fakalaulauloto ki hono ʻuhingá. Te ke lava foki ʻo fakaafeʻi kinautolu ke kumi ha potufolofola pe fakamatala mei ha taki ʻo e Siasí ʻokú ne fakatupulaki ʻenau mahino ki ha konga ʻo e veesi ko ʻení.

• ʻĪmisí: Ko ha ulofi

• Meʻa ke fakaʻaliʻalí: Lisi ʻo e ngaahi potufolofola fakafekauʻakí

• Fokotuʻu ki hono akoʻi ʻi he konifelenisi vitioó: Fakakaukau ke fakaafeʻi e kau akó ke nau ngāue ʻi ha fanga kiʻi kulupu iiki ʻi he ngaahi loki fetalanoaʻakí ke kumi ha potufolofola ʻe taha pe lahi ange te ne fakatupulaki ʻenau mahino ki he Mōsaia 3:19. ʻE lava leva ʻe ha mēmipa ʻo e kulupu takitaha ʻo vahevahe ha potufolofola naʻe maʻu ʻe heʻenau kulupú. Fakakaukau ke fakaafeʻi e kau akó ke fakaʻaongaʻi e polokalama fetalanoaʻakí ke vahevahe e ngaahi potufolofola ne nau maʻú ke lava ʻe honau kaungā akó ʻo hiki ia.

Fakataukei Fakatokāteliné: Mōsaia 3:19

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ako maʻuloto ʻe he kau akó ʻa e potufolofola fakataukei fakatokāteliné mo e kupuʻi lea fakafolofola mahuʻinga ki he Mōsaia 3:19. ʻE toe lava foki ʻo tokoni ke nau fakamatalaʻi ʻa e tokāteline ʻoku akoʻi ʻi he potufolofola ko ʻení pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi he ngaahi tūkunga moʻoni ʻo e moʻuí.

• Teuteu ʻa e tokotaha akó: Fakaafeʻi e kau akó ke nau kamata feinga ke ako maʻuloto ʻa e Mōsaia 3:19. Fakamatalaʻi ange te ke ʻoange ha taimi ʻi he kalasí ke ako maʻuloto ai ʻa e kupuʻi lea mahuʻinga ʻo e folofolá, ka ʻe toe ʻaonga foki kiate kinautolu ke nau akoako ako maʻuloto e vēsí kakato.

• Fokotuʻu ki hono akoʻi ʻi he konifelenisi vitioó: Fakakaukau ke fakaafeʻi e kau akó ke fakaʻaongaʻi e polokalama fetalanoaʻakí ke takitaha tuku hake ai e ngaahi ʻulungaanga kehekehe ʻo e tangata fakakakanó. Tuku leva ki he kau akó ke nau fili pe ko e fē ʻa e ʻulungaanga ke fakaʻaongaʻi ki he tūkunga “Akoako hono fakaʻaongaʻí.”

Mōsaia 4

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino ki he kau akó ʻa e meʻa te nau lava ʻo fai ke maʻu mo tauhi maʻu ai pē ha fakamolemole ʻo ʻenau ngaahi angahalá.

• Teuteu ʻa e tokotaha akó: Fakaafeʻi ʻa e kau akó ke lau ʻa e Mōsaia 4, ʻo kumi e founga naʻe liliu ai ʻe Sīsū Kalaisi ʻa e kakaí pea mo e meʻa naʻe fakaafeʻi ʻe he Tuʻi ko Penisimaní hono kakaí ke nau fai hili ʻenau maʻu ha fakamolemole ʻo ʻenau ngaahi angahalá.

• ʻĪmisí: Ko ha taha ʻokú ne toʻotoʻo ha ʻū kato

• Fokotuʻu ki hono akoʻi ʻi he konifelenisi vitioó: Ke kamata e lēsoní, fakakaukau ke fakaʻaongaʻi e polokalama palakipoé ke fakaʻaliʻali ʻa e fakatātā ʻo e tokotaha ʻokú ne toʻotoʻo ha ʻū kató. ʻE lava ke tohi ʻe he kau akó ʻo ofi ki he ʻū kató ha niʻihi ʻo e ngaahi meʻa ʻoku toʻotoʻo ʻe he kakaí te nau loto ke tauhí pea mo e ngaahi meʻa ʻe niʻihi ʻoku toʻo ʻe he kakaí mahalo he ʻikai ke nau loto ke tauhí.

Mōsaia 4:9–10

Taumuʻa ʻo e lēsoní: ʻE lava ke tokoni e lēsoni ko ʻení ki he kau akó ke fakamālohia ʻenau tui mo e ʻofa ki he ʻOtuá.

• Teuteu ʻa e tokotaha akó: Fakaafeʻi e kau akó ke omi ki he kalasí mo ha lisi ʻo e ngaahi meʻa ʻe tolu ki he nima ʻoku nau tui ki ai fekauʻaki mo e ʻOtuá.

• Vitio “Haʻu, ʻo Muimui ʻIate Au” (17:50; mamata mei he taimi 14:17 ki he 14:56)

• ʻŪ Naunaú: Ngaahi tatau lolotonga ʻo e Liahona ʻo e konifelenisi lahí; ʻū laʻipepa ke lava ʻa e kau akó ʻo hiki pea fakaʻaliʻali ʻenau tui fekauʻaki mo e ʻOtuá

• Fokotuʻu ki hono akoʻi ʻi he konifelenisi vitioó: Makatuʻunga ʻi he tokolahi ʻo e kalasí, fakakaukau ke fakahoko ʻa e ʻekitivitī siakale ʻi he Mōsaia 4:9–10 fakataha mo e kalasí, ʻo fakaʻaongaʻi e polokalama palakipoé. Pe, ʻe lava ke fakaʻaongaʻi ʻe he kau akó ha founga tatau pea ngāue tautau toko ua pe fakakulupu iiki ʻi he fanga kiʻi loki fetalanoaʻakí ke fakakakato ʻa e ʻekitivitī ko ʻení. Mahalo ʻe fiemaʻu ʻe he kau akó ke ʻai ha ngaahi screenshots ke seivi ʻenau ngāue fakakulupú ke toki vakai ki ai ʻamui ange ʻi he lēsoní.

Fakataukei Fakatokāteliné: Mōsaia 4:9

Taumuʻa ʻo e lēsoní: ʻE lava ke tokoni e lēsoni ko ʻení ke ako maʻuloto ʻe he kau akó ʻa e potufolofola fakataukei fakatokāteline mo e kupuʻi lea fakafolofola mahuʻinga ki he Mōsaia 4:9, fakamatalaʻi ʻa e tokāteliné, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha ngaahi tūkunga moʻoni ʻo e moʻuí.

• Teuteu ʻa e tokotaha akó: Fakaafeʻi e kau akó ke fehuʻi ki honau fāmilí pe kaungāmeʻá pe ko e hā ʻoku nau fili ai ke tui ki he ʻOtuá.

• Vitiō: “Ko ʻEne ʻAloʻofá: Fili ke Tui ki he ʻOtua” (4:07)

• Fokotuʻu ki hono akoʻi ʻi he konifelenisi vitioó: Ke toe fakamanatu ʻa e ngaahi akonaki ʻa e Tuʻi ko Penisimaní ʻi he Mōsaia 4:9 ʻi he kamataʻanga ʻo e lēsoní, ʻe lava ke taipeʻi ʻe he kau akó ʻi he polokalama fetalanoaʻakí ʻa e ngaahi meʻa lahi taha te nau lava ʻo manatuʻi naʻe akoʻi ʻe he Tuʻi ko Penisimaní ki hono kakaí ke nau tui ki he ʻOtuá ʻi he Mōsaia 4:9–10.