ʻAlamā 13–16

Vakai Fakalūkufuá

Naʻe fakamatalaʻi ʻe ʻAlamā naʻe fakanofo ʻe he ʻEikí ha kau taulaʻeiki lahi ke akoʻi e ngaahi fekaú mo fakahoko e ngaahi ouaú koeʻuhí kae lava ʻa e kakaí ʻo hū ki he mālōlōʻanga ʻo e ʻEikí. ʻI heʻena akoʻi mo ʻAmuleki ʻa e ongoongolelei ʻo Sīsū Kalaisí ʻi he kolo ko ʻAmonaihaá, naʻe fakamamahiʻi ʻe he kakai faiangahalá ʻa e kakai tuí pea tāmateʻi kinautolu ʻi he afí. Naʻe tuku pōpula leva pea mo fakatangaʻi lahi ʻa ʻAlamā mo ʻAmuleki. Hili hono fakahaofi fakaofo kinaua mei he pilīsoné, naʻá na ō ki Saitome, ʻo na ʻilo ai ʻoku puke ʻa Sisolome ʻi ha mofi lahi koeʻuhí ko ʻene ongoʻi halaiá. Naʻe fakamoʻui mo papitaiso ʻe ʻAlamā ʻa Sisolome.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

ʻAlamā 13

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino ki he kau akó ʻa e ʻuhinga ʻo e hū ki he mālōlōʻanga ʻo e ʻEikí mo e founga te nau lava ʻo fakahoko ai iá.

• Teuteu ʻa e tokotaha akó: Fakakaukau ke fakaafeʻi e kau akó ke nau fakakaukau ki he founga kuo tāpuekina ai kinautolu ʻo fakafou ʻi ha taki ʻo e Siasí pe ko haʻanau kau ʻi ha ouau ʻo e ongoongoleleí.

• Fokotuʻu ki hono akoʻi ʻi he konifelenisi vitioó: Fakakaukau ke vahevahe ʻa e kau akó ki ha ngaahi kulupu ke ako ha taha ʻo e ongo fakamatala ʻo e tokāteliné mo e tefitoʻi moʻoni ʻi he lēsoní pea teuteu ke vahevahe ʻa e meʻa ʻoku nau ʻiló mo e kalasí. ʻE lava ke vahe ʻa e kau akó ki ha ngaahi loki fakataha ke nau ako fakataha, pe te nau ako fakafoʻituitui.

ʻAlamā 14

Taumuʻa ʻo e lēsoní: Ko e taumuʻa ʻo e lēsoni ko ʻení ke tokoniʻi e kau akó ke nau falala ki he ʻEikí ʻi he taimi ʻoku nau fehangahangai ai mo e faingataʻá, mamahí, mo e taʻetotonú.

• Teuteu ʻa e tokotaha akó: Fakaafeʻi e kau akó ke nau fakakaukau ki ha faʻahinga faingataʻa pē kuo nau kātekina. Poupouʻi kinautolu ke fakakaukau ki he founga naʻe hoko ai ʻenau falala ki he Fakamoʻuí ke tokoniʻi kinautolu pe naʻe mei tokoniʻi kinautolu ke kātakiʻi honau faingataʻá.

• Ongo Vitiō: “ʻOku Tui ʻa Sisolome, pea ʻOku Fakatangaʻi ʻa e Kau Angatonú” (3:51); “ʻOku Fakahaofi ʻa ʻAlamā mo ʻAmuleki mei he Fale Fakapōpulá ʻi ha Founga Fakaofo” (2:45)

ʻAlamā 15

Taumuʻa ʻo e lēsoní: ʻE lava ke tokoni ʻa e lēsoni ko ʻení ke maʻu ʻe he kau akó ʻa e mālohi faifakamoʻui ʻoku maʻu ʻo fakafou ʻia Sīsū Kalaisí.

• Teuteu ʻa e tokotaha akó: Fakaafeʻi e kau akó ke lau ʻa e fakakaukau ki hono ako fakafāmili ʻo e folofolá ʻi he ʻAlamā 15:1–12 ʻi he lēsoni ako ʻo e “24–30 Sune. ʻAlamā 13–16: ‘Hū ki he Mālōlōʻanga ʻo e ʻEikí’” ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Tohi ʻa Molomoná 2024.

• Vitiō: “ʻOku Fakamoʻui ʻa Sisolome pea Papitaiso” (2:42)

• Laʻipepa tufa: “Mahamahaki Fakalaumālié”

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaongaʻi ʻa e polokalama palakipoé ke fakaʻaliʻali ʻa e laʻipepa tufa ko e “Mahamahaki Fakalaumālié” koeʻuhí ke lava ʻe he kau akó ʻo hiki ai ʻa e ngaahi meʻa naʻa nau maʻú mo ʻenau ngaahi talí.

Siviʻi Hono 5 Hoʻo Akó

Taumuʻa ʻo e Lēsoni: ʻOku fakataumuʻa ʻa e lēsoni ko ʻení ke tokoniʻi koe ke ke vakaiʻi e ngaahi taumuʻa kuó ke fokotuʻú, pea mo e tupulaki ko ʻeni kuó ke aʻusia ʻi hoʻo ako e Tohi ʻa Molomoná.

• Teuteu ʻa e tokotaha akó: ʻE lava ke fakaafeʻi ʻa e kau akó ke nau kumi ha potufolofola ʻi he Mōsaia 18–ʻAlamā 16 fekauʻaki mo e Fakalelei ʻa Sīsū Kalaisí ʻa ia ʻoku ʻuhingamālie kiate kinautolú.

• Meʻa ke fakaʻaliʻalí: Ko ha fakatātā ʻo ha moʻunga pe ko ha taha ʻoku kaka ʻi ha moʻunga; ko ha fakatātā ʻo ha taha ʻi lotomālie ʻi ha hala, ʻa ia ʻoku tā he palakipoé kimuʻa pea fai e kalasí

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaongaʻi ʻa e polokalama palakipoé ke lava ʻa e kau akó ʻo vahevahe ʻa e meʻa kuo nau ako pe ongoʻi lolotonga ʻenau ako ʻa e konga ʻuluaki ʻo e Tohi ʻa Molomoná. Kapau te ke fili ke fakaʻaongaʻi ʻa e ngāue ʻokú ne tokoniʻi e kau akó ke fakamatalaʻi ʻa e Fakalelei ʻa Sīsū Kalaisí, fakakaukau ke vahe ʻa e kau akó ki ha fanga kiʻi loki fakataha.

Toe Vakaiʻi Hono 12 ʻo e Fakataukei Fakatokāteliné

Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke nau toe vakaiʻi mo akoako feinga ke mahino mo nau fakaʻaongaʻi e ngaahi potufolofola fakataukei fakatokāteline kuo nau akó.

• Teuteu ʻa e tokotaha akó: Fakakaukau ke fakaafeʻi e kau akó ke fili ha potufolofola fakataukei fakatokāteline ʻe ua ʻi he vahaʻa ʻo e 1 Nīfaí mo Mōsaiá pea fakalaulauloto ki he meʻa te nau lava ʻo fai ke mahino mo nau fakaʻaongaʻi ai e ongo potufolofolá.

• Laʻipepa Tufa: “ʻUluaki Potufolofola Fakataukei Fakatokāteline ʻe 12 mo e Ngaahi Kupuʻi Lea Mahuʻingá”

• Fokotuʻu ki hono akoʻi ʻi he konifelenisi vitioó: ʻI he kamataʻanga ʻo e lēsoní, ʻi hono vahevahe ʻe he kau akó ʻenau faleʻi fekauʻaki mo e founga ke mahino ai ʻa e folofolá, fakatahatahaʻi ha lisi ʻo e faleʻi ko ʻení ʻa ia ʻe lava ke mamata ki ai ʻa e kau akó. ʻE lava ke fakahoko ʻeni ʻo fakaʻaongaʻi ʻa e polokalama palakipoé pe fetalanoaʻakí. Tānaki atu ha faʻahinga fakakaukau pē ʻokú ke ongoʻi ʻe ʻaonga. Mahalo ʻe ʻaonga ki he kau akó ʻenau vakai ki he ngaahi fakakaukau ko ʻení ʻi heʻenau feinga ke mahino e ngaahi potufolofola fakataukei fakatokāteline ne nau filí.