ʻAlamā 17–22

Vakai Fakalūkufuá

Naʻe fili e ngaahi foha ʻo Mōsaiá ke nau ō ki he kakai Leimaná ke malanga ʻaki ʻa e ongoongoleleí. Naʻe ngāue ʻa ʻĀmoni ʻi he lotolotonga ʻo e kakai ʻo e Tuʻi ko Lamōnaí ʻi he fonua ko ʻIsimelí pea naʻá ne maluʻi ʻi ha founga fakaofo ʻa e tākanga monumanu ʻa e tuʻí. Naʻe ongo moʻoni kia Lamōnai ʻa e ngāue faivelenga ʻa ʻĀmoni kiate iá. Pea koeʻuhí ko e meʻa naʻe ongoʻi ʻe Lamōnaí, naʻá ne loto-fiemālie ke tui ki he ngaahi lea kotoa pē ʻa ʻĀmoní. Naʻe ʻi ai ha taimi naʻe faiangahala ai e tamai ʻa Lamōnaí, ka ʻi he hili ʻene ʻilo ʻa e ngaahi moʻoni mahuʻinga fekauʻaki mo hotau Fakamoʻuí pea mo e palani ʻo e fakamoʻuí, naʻe kamata ke liliu lahi ʻa e ngaahi holi hono lotó. Naʻe faifai pea ului kotoa e fale ʻo e tuʻí ki he ʻEikí.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

ʻAlamā 17

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ʻiloʻi ʻe he kau akó ʻa e tokoni mo e mālohi ʻoku foaki ʻe he ʻEikí kiate kinautolu ʻi he ngaahi tūkunga faingataʻa ʻoku nau fehangahangai mo iá.

• Teuteu ʻa e tokotaha akó: Fakakaukau ke fakaafeʻi e kau akó ke omi mateuteu ke vahevahe mo aleaʻi ha ngaahi palopalema angamaheni pe ngaahi faingataʻa ʻoku fehangahangai mo e toʻu tupú pea mo e ʻuhinga te nau fiemaʻu ai e tokoni mo e mālohi ʻo e ʻOtuá ʻi heʻenau moʻuí. ʻE lava foki ke nau fakakaukau ki ha ngaahi taimi ne nau maʻu ai e tokoni ʻa e ʻOtuá ʻi heʻenau moʻuí.

• Ngaahi Vitioó: “ʻOku Hoko ʻa ʻĀmoni ko ha Tamaioʻeiki ʻa e Tuʻi ko Lamōnaí” (3:47); “ʻOku Maluʻi ʻe ʻĀmoni e Tākanga Monumanu ʻa e Tuʻi ko Lamōnaí” (5:24; mamata mei he taimi 0:00 ki he 3:10)

• Fokotuʻu ki hono akoʻi ʻi he konifelenisi vitioó: Fakakaukau ke vahevahe ʻa e kau akó ki ha ngaahi loki fakataha ke nau ako ai ha taha ʻo e ngaahi veesi ʻe fā ʻoku hiki ofi ki he kamataʻanga ʻo e lēsoní. Hili iá, ʻe lava ke fakamatalaʻi fakanounou ʻe ha mēmipa ʻo e kulupu takitaha ʻa e meʻa naʻe ako ʻe heʻenau kulupú.

ʻAlamā 18

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau kumi ha ngaahi founga ke tokoniʻi ai e niʻihi kehé ke nau ofi ange ki he ʻOtuá ʻo fakafou ʻi heʻenau ʻofa mo e tokoni faka-Kalaisí.

• Teuteu ʻa e tokotaha akó: Fakaafeʻi e kau akó ke kole ki ha kaungāmeʻa pe ha mēmipa ʻo e fāmilí ke feinga ke ʻiloʻi ha kakai ʻokú ne ʻiloʻi kuo nau tokoniʻi e niʻihi kehé ke ofi ange ki he ʻOtuá ʻo fakafou ʻi heʻenau ʻofa faka-Kalaisí pe ngāue tokoní.

• Ngaahi Vitiō: “ʻOku Maluʻi ʻe ʻĀmoni e Tākanga Monumanu ʻa e Tuʻi ko Lamōnaí” (5:24; mamata mei he taimi 2:57 ki he 5:24); “ʻOku Akoʻi ʻe ʻĀmoni ʻa e Tuʻi ko Lamōnaí fekauʻaki mo e Ongoongolelei ʻo Sīsū Kalaisí” (5:41; mamata mei he taimi 0:23 ki he 1:56 pea mei he taimi 1:56 ki he 5:41)

• Meʻa ke fakaʻaliʻalí: Ko e fakahinohino mo e ngaahi fehuʻi ʻi he fakaʻosinga ʻo e lēsoní ke tokoni ki he kau akó ke faʻu ha palani

ʻAlamā 19

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ongoʻi ʻe he kau akó ʻoku ʻofa ʻa e ʻEikí ki he kakai kotoa pē pea ʻokú Ne finangalo ke nau haʻu kiate Ia.

• Teuteu ʻa e tokotaha akó: Fakaafeʻi e kau akó ke nau ako ʻa e ʻAlamā 19 pea kumi ʻa e liliu naʻe fakahoko ʻe he ongoongolelei ʻa e Fakamoʻuí ki he kakai Leimana naʻe akoʻi ʻe ʻĀmoní.

• Meʻa ke fakaʻaliʻalí: Ko e savea ʻi he kamataʻanga ʻo e lēsoní

• Vitiō: “ʻOku Ngāue ʻa ʻĀmoni mo Akoʻi ʻa e Tuʻi ko Lamōnaí” (23:04; mamata mei he taimi 15:18 ki he 20:06 pea mei he taimi 20:07 ki he 23:04)

ʻAlamā 20–22

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau holi ki he ngaahi meʻa ʻa e ʻOtuá ʻo lahi ange ia ʻi ha toe meʻa kehe ʻoku foaki ʻe he māmaní.

• Teuteu ʻa e tokotaha akó: Fakaafeʻi e kau akó ke lau ʻa e ʻAlamā 20 mo e 22, ʻo kumi e founga naʻe liliu ai e tamai ʻa e Tuʻi ko Lamōnaí ʻi he ongo vahe ko ʻení. ʻAi ke nau fakakaukau ki ha ngaahi ʻuhinga ki he liliu ko iá.

• Fokotuʻu ki hono akoʻi ʻi he konifelenisi vitioó: ʻI he kamataʻanga ʻo e lēsoní, ʻi he taimi ʻoku fehuʻi ai ki he kau akó fekauʻaki mo e ngaahi tūkunga te ne uesia ʻenau loto-vilitaki ke fakahoko ha meʻá, fakakaukau ke fakaafeʻi kinautolu ke taipeʻi ʻenau ngaahi talí ʻi he polokalama fetalanoaʻakí. Te nau lava ʻo vahevahe ha ngaahi tali kehekehe ki he tūkunga takitaha.

Ko Hono Maʻu ʻo e ʻIlo Fakalaumālié, Konga 4

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau toe vakaiʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumalié.

• Teuteu ʻa e tokotaha akó: ʻE lava ke fakaafeʻi e kau akó ke fakakaukau ki he ngaahi fehuʻi fakalaumālie kuo nau maʻu pe lolotonga maʻu pea mo e meʻa kuo nau fakahoko ke maʻu ha tali ki heʻenau ngaahi fehuʻí.

•  

• Fokotuʻu ki hono akoʻi ʻi he konifelenisi vitioó: ʻOku ʻi he lēsoni ko ʻení ha tūkunga ʻe ua pea hoko atu ai ha konga ʻe tolu ʻoku fekauʻaki mo e ngaahi tefitoʻi moʻoni ʻo hono maʻu ʻo e ʻilo fakalaumālié. ʻOku ʻi ai ha ngaahi fehuʻi ʻi he ngaahi konga takitaha ko ʻeni ʻe tolú. ʻI he konga takitaha, hili e ngāue ʻa e kau akó ʻi he tūkunga naʻá ke filí, fakakaukau ke vahevahe kinautolu ki he fanga kiʻi loki fakatahá ke aleaʻi e ngaahi fehuʻí. Te ke lava ʻo fefiohi ʻa e ngaahi kulupú ʻi he taimi kotoa pē.