“ʻAlamā 32: ʻFakatupulekina Hoʻomou Tuí,’” Tohi ʻa Molomoná – Tohi Lēsoni ʻa e Faiakó (2024)
“ʻAlamā 32,” Tohi ʻa Molomoná – Tohi Lēsoni ʻa e Faiakó
ʻAlamā 32
“Fakatupulekina Hoʻomou Tuí”
ʻE lava ke fakaʻaongaʻi ha ngaahi meʻa kehekehe ke tokoni ke mahino kiate kitautolu ʻa e ongoongolelei ʻo Sīsū Kalaisí. ʻI hono akoʻi ʻe ʻAlamā ʻa e kakai Sōlamí, naʻá ne fakafehoanaki e folofola ʻa e ʻOtuá ki ha tengaʻi ʻakau te tau lava ʻo tō ʻi hotau lotó ʻa ia ʻe iku ʻo hoko “ko ha fuʻu ʻakau ʻoku tupu hake ki he moʻui taʻengatá” (ʻAlamā 32:41). ʻOku fakataumuʻa ʻa e lēsoni ko ʻení ke tokoniʻi koe ke tō ʻa e folofola ʻa e ʻOtuá ʻi ho lotó pea tanumaki hoʻo fakamoʻoni ki aí.
Akoʻi ʻa e natula toputapu ʻo e ngaahi aʻusia fakalaumālié. Fakamanatu ki he kau akó ʻa e natula toputapu ʻo e ngaahi aʻusia fakalaumālié. ʻOku ʻikai totonu ke teitei ongoʻi ʻe he kau akó ʻoku fakamālohiʻi kinautolu ke vahevahe ʻenau ngaahi ongó pe ngaahi aʻusiá. Poupouʻi ke nau vahevahe lelei ʻenau ngaahi aʻusia fakatāutahá ʻi he taimi ʻoku ueʻi ai kinautolu ʻe he Laumālié.
Teuteu ʻa e tokotaha akó: Fakaafeʻi e kau akó ke kole ki ha taha ʻoku nau ʻofa ai ʻoku ʻi ai haʻane fakamoʻoni ki he ongoongolelei ʻo Sīsū Kalaisí, ʻa e meʻa kuó ne tokoniʻi ia ke ne maʻu pe fakamālohia iá.
Ngaahi ʻEkitivitī Ako ʻOku Ala Fakahokó
Ngaahi Fakafehoanakí
Fakaʻaliʻali e ngaahi sētesi taʻekakato ko ʻení. Te ke lava ʻo fili ha ngaahi sētesi kehekehe ʻe mahuʻingaʻia ai hoʻo kau akó, ka ke fakakaukau ke fakaʻaongaʻi ʻa e fakafehoanaki fakaʻosí ke tokoni ke ke hoko atu ki he kakano ʻo e lēsoní.
ʻE lava ke hoko ʻa e fakafehoanakí ko ha founga lelei ki hono akoʻi mo ako ʻa e ongoongolelei ʻo Sīsū Kalaisí. Fakafonu e ngaahi feituʻu ʻatā ko ʻení. Mohu founga pea vakai pe ʻoku ʻi ai ha founga ʻe taha te ke lava ʻo fakakakato ai e ngaahi sētesí.
-
ʻOku hangē ʻa e moʻuí ko e koeʻuhí .
-
ʻOku hangē ʻa e telefoni toʻotoʻó ko e koeʻuhí .
-
ʻOku hangē hono maʻu ha fakamoʻoní ko e koeʻuhí .
Lolotonga e ngāue ʻa ʻAlamā mo ʻAmuleki ʻi he lotolotonga ʻo e kakai Sōlamí, naʻe fakahaaʻi ʻe ha falukunga kakai ʻenau hohaʻa ʻi he ʻikai ke nau lava ʻo hū ki he ʻOtuá koeʻuhí kuo kapusi kinautolu mei honau ngaahi feituʻu faiʻanga lotú koeʻuhí ko ʻenau masivá (vakai, ʻAlamā 32:5). Neongo ʻoku tau ʻiloʻi kuo akoʻi mahino mai ʻe he ʻEikí ʻa e mahuʻinga ʻo e ʻalu ki Hono Siasí ʻi he Sāpaté, ka naʻe tali ia ʻe ʻAlamā ʻaki ʻene akoʻi ʻa kinautolu naʻe ʻikai fakangofua ke nau ʻalu ki he Lotú, ki ha ngaahi moʻoni mahuʻinga fekauʻaki mo e moihuú ʻe lava ke hoko ʻi hotau lotó, ʻo tatau ai pē pe ʻoku tau ʻi fē.
Lau ʻa e sētesi ʻuluaki ʻo e ʻAlamā 32:28, hili iá pea lau ʻa e veesi 41 pea kumi ki ha fakafehoanaki naʻe fakaʻaongaʻi ʻe ʻAlamā ʻe lava ke ʻaonga foki kiate koe.
-
Ko e hā ha ngaahi faitatau ʻokú ke vakai ki ai ʻi he tupu ha fuʻu ʻakau fua mei ha tengaʻi ʻakaú pea mo hono fakatupulaki hoʻo fakamoʻoni kia Sīsū Kalaisi mo ʻEne ngaahi akonakí?
Kapau ʻoku ʻikai fakapapauʻi ʻe he kau akó pe ko e hā ʻa e fakamoʻoni, tokoni ke mahino kiate kinautolu ko ha “ʻilo mo ha fakamoʻoni fakalaumālie ia ʻoku fai mai ʻe he Laumālie Māʻoniʻoní” (Fakahinohino ki he Ngaahi Folofolá, “Fakamoʻoní,” scriptures.ChurchofJesusChrist.org).
ʻE lava ke fakaʻaongaʻi ʻa e fakafehoanaki ʻe ʻAlamā ʻa e folofola ʻa e ʻOtuá ki ha tengaʻi ʻakaú ki hono maʻu ha fakamoʻoni ki ha faʻahinga tafaʻaki pē ʻo e ongoongoleleí. Ka naʻe toki fakamatalaʻi ʻe ʻAlamā kimui ange ko ha fakamoʻoni ia kia Sīsū Kalaisi naʻá ne ʻamanaki ʻe tō ʻe he kakai Sōlami ko iá ʻi honau lotó (vakai, ʻAlamā 33:22–23).
-
Ko e hā ʻoku hoko ai ʻa e tui ki he Fakamoʻuí ko ha “tengaʻi ʻakau” mahuʻinga ke tō ʻi ho lotó?
Tuku ha kiʻi taimi ke ke fakakaukau ai ki he mālohi lolotonga ʻo hoʻo fakamoʻoni fakalūkufua kia Sīsū Kalaisi mo ʻEne ngaahi akonakí. ʻIkai ngata aí, fakalaulauloto foki pe ʻoku ʻi ai ha ngaahi tafaʻaki pau ʻo hoʻo fakamoʻoní ʻokú ke loto ke fakamālohia ʻo hangē ko e ʻofa ʻa e Tamai Hēvaní kiate koé pe ko hono moʻoni ʻo e ʻUluaki Mata Meʻa-Hā-Mai ʻa Siosefa Sāmitá. ʻI hoʻo hokohoko atu hoʻo ako he ʻaho ní, kumi ki he ngaahi moʻoni ʻe lava ʻo tokoni ke mahino lelei ange kiate koe ʻa e founga ke maʻu pe fakamālohia ai hoʻo fakamoʻoní.
Fakakaukau ke vahevahe ʻa e kau akó ki ha fanga kiʻi kulupu iiki pea ʻoange ki he tokotaha ako takitaha ha tatau ʻo e laʻipepa tufa ko ʻení. Fakaafeʻi e kau akó ke nau lau mo aleaʻi fakataha pe fakakulupu ʻa e fakamatala ʻi he ʻuluʻi tohi “Ko hono tō ʻo e tengaʻi ʻakaú.” ʻE ala ʻaonga ke vahe ki ha tokotaha ako mei he kulupu takitaha ke hoko ko e taki ʻo e fealēleaʻakí.
Te ke lava leva ʻo tuifio e ngaahi kulupú pea ʻai ke aleaʻi ʻe he kau akó mo ʻenau kulupu foʻoú ʻa e fakamatala ʻi he ʻuluʻi tohi “Ko hono tauhi ʻo e tengaʻi ʻakaú.”
Ko Hono Tō mo Tauhi e Folofola ʻa e ʻOtuá ʻi Hotau Lotó
Tohi ʻa Molomoná – Tohi Lēsoni ʻa e Faiakó (2024)—“ʻAlamā 32: ‘Fakatupulekina Hoʻomou Tuí’”
Ko hono tō ʻo e tengaʻi ʻakaú
Lau ʻa e ʻAlamā 32:21–23, 26–30, pea fakaʻilongaʻi e ngaahi lea mo e kupuʻi lea ʻoku tokoni ke mahino kiate koe ʻa e founga ke kamata fakatupulaki ai ha fakamoʻoní.
Vahevahe mo hoʻo kulupú e ngaahi lea mo e kupuʻi lea naʻe makehe kiate koé pea mo hono ʻuhingá. Hili iá pea aleaʻi leva e ngaahi fehuʻi ko ʻení:
-
ʻOkú ke pehē ʻoku ʻuhinga ki he hā ʻa e “fakaʻatā ha potu” ʻi ho lotó maʻá e Fakamoʻuí mo ʻEne ngaahi akonakí?
-
Ko e hā te ne lava ʻo ʻai ke faingataʻa ki he kakaí hono fakahoko ʻení?
-
Fakatatau ki he veesi 28–30, ko e hā ʻe lava ke hoko ʻi he taimi ʻoku tau fakaʻatā ai ha potu ʻi hotau lotó maʻa Sīsū Kalaisi mo ʻEne ngaahi akonakí?
Hiki ha fakamatala fakanounou sētesi ʻe taha ʻo e meʻa naʻá ke ako mei he ngaahi veesi ko ʻení fekauʻaki mo hono tokoniʻi hoʻo fakamoʻoní ʻi hono kamata fakatupulakí.
Ko hono tauhi ʻo e tengaʻi ʻakaú
Naʻe akoʻi ʻe ʻAlamā ko hono tō ʻo e tengaʻi ʻakaú mo ʻiloʻi ʻoku leleí ko e konga ʻuluaki pē ia ʻo hono fakatupulaki ha fakamoʻoní. Lau ʻa e ʻAlamā 32:37–43, ʻo kumi ʻa e ngaahi akonaki ʻoku tokoni ke mahino kiate koe ʻa e founga ke tokoniʻi ai ha fakamoʻoni ke hokohoko atu ʻene tupulakí.
Vahevahe mo hoʻo kulupú e ngaahi lea mo e kupuʻi lea naʻe makehe kiate koé pea mo hono ʻuhingá. Hili iá pea aleaʻi leva e ngaahi fehuʻi ko ʻení:
-
Ko e hā naʻá ke ako mei he veesi 38–40 fekauʻaki mo e meʻa ʻe hoko kapau te tau taʻetokanga ki he folofola ʻa e ʻOtuá ʻa ia kuo tupulaki ʻi hotau lotó?
-
Ko e hā ha ngaahi sīpinga ʻo e founga ʻe lava ke taʻe-tokanga ai ha taha ki heʻene fakamoʻoni kia Sīsū Kalaisi mo ʻEne ngaahi akonakí?
-
Ko e hā ha ngaahi founga te ke lava ai ʻo tanumaki hoʻo fakamoʻoni kia Sīsū Kalaisi mo ʻEne ongoongoleleí ke tokoni ke tupulaki ʻo mālohi angé?
Hiki ha fakamatala fakanounou sētesi ʻe taha ʻo e meʻa naʻá ke ako mei he ngaahi veesi ko ʻení fekauʻaki mo hono fakamālohia ha fakamoʻoni kuo ʻosi tupulaki ʻiate koé.
© 2023 by Intellectual Reserve, Inc. All rights reserved.
Hili hono ako mo aleaʻi ʻe he kau akó e ngaahi veesi kimuʻá mo ʻenau kulupú, aleaʻi fakakalasi ʻa e meʻa ne nau akó. ʻE lava ke ke fili ha niʻihi ʻo e ngaahi fehuʻi mei he laʻipepa tufá ke aleaʻi fakakalasi ke fakapapauʻi ʻoku mahino ki he kau akó ʻa e ngaahi fakakaukau naʻe akoʻi ʻi he ngaahi veesi ko ʻení. Fakaafeʻi ha kau ako ʻe niʻihi ke vahevahe ʻenau ngaahi fakamatala nounou sētesi ʻe taha mei he konga takitaha ʻo e laʻipepa tufá.
Fakapapauʻi ʻoku kau ʻi he fealēleaʻaki ko ʻení ha ngaahi moʻoni ʻoku faitatau mo ʻení: Kapau te tau fakaʻatā ha potu ʻi hotau lotó maʻa Sīsū Kalaisi mo ʻEne ngaahi akonakí, ʻe kamata leva ke tupulaki ʻetau fakamoʻoní (vakai, ʻAlamā 32:28–30); ʻI heʻetau tanumaki faivelenga e folofola ʻa e ʻOtuá ʻi hotau lotó, ʻe hokohoko atu e tupulaki ʻetau fakamoʻoni kia Sīsū Kalaisí mo ʻEne ongoongoleleí (vakai, ʻAlamā 32:37, 40–42).
Ko hoʻo fakamoʻoní
Ke tokoni ke ke vakai ki he founga ʻoku fekauʻaki ai e fakafehoanaki naʻe fakahoko ʻe ʻAlamaá mo hoʻo fakamoʻoni kia Sīsū Kalaisi mo ʻEne ongoongoleleí, tā ha fakatātā hangē ko ʻení ʻi hoʻo tohinoa akó. Fakavahavaha hoʻo fakatātaá ʻi he pēsí koeʻuhí ke ʻi ai ha feituʻu ke hiki ai ʻi lalo ʻa e tuʻunga tupulaki takitaha.
Fakaʻaliʻali pe tā ʻa e ʻū fakatātā ko ʻení ʻi he palakipoé ke tā ʻe he kau akó ki heʻenau tohinoa akó.
Fakaʻaongaʻi ha kiʻi taimi ke fakafehoanaki ai hoʻo fakamoʻoni ki he Fakamoʻuí mo ʻEne ngaahi akonakí ki he tupu ʻa ha fuʻu ʻakau fua. Fili ha ngaahi tafaʻaki ʻo e ongoongolelei ʻo Sīsū Kalaisí, pea tohiʻi ʻa e tafaʻaki takitaha ʻi lalo ʻi he ngaahi tuʻunga ʻokú ke ongoʻi ʻokú ne fakafofongaʻi lelei taha hoʻo fakamoʻoni lolotonga ʻi he ngaahi tafaʻaki ko iá.
Hangē ko ʻení, ʻe lava ke tohi ʻe ha taha ʻa e “ʻOku moʻui ʻa Sīsū Kalaisi” ʻi lalo ʻi he fuʻu ʻakaú, mo e “mālohi ʻo e lakanga fakataulaʻeikí” ʻi lalo ʻi he tengaʻi ʻakaú. ʻE lava leva ke hiki ʻe he tokotaha ko iá ha ngaahi tafaʻaki kehe ʻo e ongoongolelei ʻa e Fakamoʻuí, hangē ko e “palōfita moʻui,” “ngāue fakatemipale,” “ko e Tohi ʻa Molomoná,” mo e “lotú,” ʻi he ngaahi tuʻunga tupulaki ʻokú ne fakafofongaʻi ʻene fakamoʻoní ʻi he ngaahi tafaʻaki takitaha ko iá.
Fakakaukau ke fakaʻaongaʻi e fakatātā ʻi he palakipoé ke vahevahe ʻa e konga tupulaki hoʻo fakamoʻoní mei ha tengaʻi ʻakau ki ha fuʻu ʻakaú. Tokanga ke ʻoua naʻá ke fakaʻaongaʻi ha ngaahi sīpinga hāhāmolofia ʻe ala faingataʻa ke mahino ki he kau akó. Tokoniʻi ke nau ʻiloʻi ʻoku iku ʻa e tupulaki maʻu pē ʻi he ngaahi aʻusia mo e Laumālié ki ha tupulaki ʻa e tuí mo ha fakamoʻoni mālohi ange ʻi he fakalau ʻa e taimí. Te ke lava foki ʻo fakaafeʻi e kau akó ke vahevahe ha founga tatau fekauʻaki mo ha konga ʻo ʻenau fakamoʻoní.
Faʻu ha palani ki he founga te ke feinga ai ke fakaʻaongaʻi e ngaahi akonaki ʻa ʻAlamaá ʻi hoʻo moʻuí. ʻE lava ke ke fakakaukau ki he meʻa te ke lava ʻo fai ke “fakaʻatā [ai] ha potu” ʻi ho lotó mo hoʻo moʻuí ki ha tafaʻaki ʻo hoʻo fakamoʻoní ke tupulaki. Te ke lava foki ʻo fakakaukau ki he founga te ke lava ai ʻo “tauhi” ʻa e ngaahi konga ʻo hoʻo fakamoʻoní ʻa ia kuo ʻosi kamata tupulakí. Lekooti hoʻo ngaahi fakakaukaú, ongó mo e taumuʻá ʻi hoʻo tohinoa akó.