“ʻAlamā 39: ‘Fakafisi Koe mei he Ngaahi Meʻa Ko Iá,’” Tohi ʻa Molomoná – Tohi Lēsoni ʻa e Faiakó (2024)
“ʻAlamā 39,” Tohi ʻa Molomoná – Tohi Lēsoni ʻa e Faiakó
ʻAlamā 39
“Fakafisi Koe mei he Ngaahi Meʻa Ko Iá”
ʻI he kuonga kotoa pē, kuo tataki ʻe Sētane ha kakai tokolahi ke nau tui ʻoku lelei pē ʻa e feohi fafale fakasekisuale ʻi tuʻa ʻi he nofo-malí. Kuo ʻosi foaki mai ʻe he Tamai Hēvaní mo Sīsū Kalaisi kiate kitautolu ʻa e fono ʻo e angamaʻá ko hotau maluʻi, fakanonga, mo e fiefiaʻanga. Naʻe faleʻi lelei ʻe he palōfita ko ʻAlamaá hono foha ko Kolianitoní ke siʻaki mo fakatomala mei heʻene ngaahi angahalá, kau ai hono maumauʻi ʻa e fono ʻo e angamaʻá. ʻE lava ke tokoni ʻa e lēsoni ko ʻení ke mahino kiate koe ʻa e mamafa ʻo e angahala fakasekisualé mo e founga ke tekeʻi ʻaki ʻa e ʻahiʻahi ke maumauʻi ʻa e fono ʻo e angamaʻá.
Tokoni ke mahino ki he kau akó mo nau fekumi ki he uluí. Ko e uluí ko ha founga ngāue hokohoko ia ʻo e liliú mo e fakalakalaka fakalaumālié ʻa ia ʻoku tau fakahaaʻi ai ʻi he ngaahi ngāue māʻoniʻoni ʻi he kotoa ʻo ʻetau moʻuí. Kumi ha ngaahi faingamālie ke ʻoange ha ngaahi aʻusia ʻe lava ke ʻiloʻi, ʻofa, mo muimui ai ʻa e kau akó kia Sīsū Kalaisi mo ʻEne ongoongolelei kuo fakafoki maí.
Teuteu ʻa e tokotaha akó: Fakaafeʻi e kau akó ke nau fakakaukau ki he meʻa ʻoku nau ʻilo fekauʻaki mo e fono ʻo e angamaʻá, ongo ʻoku nau maʻu felāveʻi mo iá, mo ha faʻahinga fehuʻi pē ʻoku nau maʻu.
Ngaahi ʻEkitivitī Ako ʻOku Ala Fakahokó
Ko e fono ‘o e angamaʻá
Fakakaukau ke hiki e ngaahi fakamatala ko ʻení ʻi he palakipoé. Liliu pe tānaki ha ngaahi fakamatala te ne ala teuteuʻi lelei ange hoʻo kau akó ke nau ako fekauʻaki mo e fono ʻo e angamaʻá.
Lau ʻa e ngaahi fakamatala ko ʻení pea fakapapauʻi pe ko e fē ʻi he ngaahi fakamatala ko ʻení ʻokú ne fakafofongaʻi lelei taha hoʻo ngaahi ongó:
-
ʻOku ʻikai ke u tui ki ai
-
ʻoku lahilahi ange ʻeku taʻetui ki aí
-
ʻoku ou tui lahi ki ai
-
ʻoku ou tui ki ai
-
ʻOku mahino lelei ki he toʻu tupu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e fono ʻo e angamaʻá, pe fono ʻa e ʻEikí ki he haohaoa fakasekisualé.
-
ʻOku mahino kiate kinautolu ʻa e ʻuhinga ʻoku mahuʻinga aí mo e ʻuhinga ʻoku finangalo ai ʻa e ʻEikí ke tau moʻui ʻaki iá.
-
ʻE lava ke faingataʻa hono tauhi ʻa e fono ʻo e angamaʻá ʻi he māmaní he ʻahó ni.
-
ʻOku ʻiloʻi ʻe he toʻu tupu ʻi he Siasí ʻa e founga ke tekeʻi ai ʻa e ʻahiʻahí pea tauhi kinautolu ke nau maʻa fakasekisualé.
Fakaafeʻi e kau akó ke nau vahevahe pe naʻa nau tui pe taʻetui ki he ngaahi fakamatala ʻi ʻolungá pea mo hono ʻuhingá.
Ko e fono ʻo e angamaʻá ko e fono ia ʻa e ʻEikí ki he haohaoa fakasekisualé. ʻOku ʻuhinga ʻa e talangofua ki he fono ʻo e angamaʻá ke tauhi koe ke ke maʻa ʻi he fakakaukau, lea, mo e ngāue, ʻo kau ai ʻa e fakamamaʻo mei ha faʻahinga meʻa ʻoku ponokalafí. ʻOku toe ʻuhinga foki ia ke fakaʻehiʻehi mei ha faʻahinga fetuʻutaki fakasekisuale kimuʻa ʻi he malí pea anganofo kakato ki hoʻo uaifí pe husepānití lolotonga ʻa e nofomalí. “Pea hangē ko hono ngaahi maumauʻi kehe ʻo e fono ʻo e angamaʻá, ʻoku hoko ʻa e nonofo kovi fakatangata pe fakafefiné (homosexual) ko ha angahala mamafa moʻoni. ʻOku fehangahangai ia mo e ngaahi taumuʻa ʻo e tuʻunga fakasekisuale ʻo e faʻahinga ʻo e tangatá” (Ngaahi Tefito ʻo e Ongoongoleleí, “Angamaʻá,” topics.ChurchofJesusChrist.org).
Fakaʻaongaʻi ha kiʻi taimi ke fakalaulauloto ai ki hoʻo mahino mo e ngaahi ongo fekauʻaki mo e fono ʻo e angamaʻa. Ko e hā ha ngaahi fehuʻi ‘okú ke maʻu? Ko e hā ʻoku mahuʻinga ai kiate koé? Ko e hā ha ngaahi ʻahiʻahi fekauʻaki mo e angamaʻá ʻokú ke fehangahangai mo ia? ʻI hoʻo ako ʻa e lēsoni ko ʻení, fekumi ki ha tali ki hoʻo ngaahi fehuʻí pea mo ha tokoni ke ikunaʻi hoʻo ngaahi ʻahiʻahí.
Ko e faleʻi ʻe ʻAlamā hono foha ko Kolianitoní
Ko e ʻAlamā 39 ʻa e ʻuluaki vahe ʻo ha ngaahi vahe ʻe fā ʻoku ʻi ai ʻa e faleʻi, ngaahi fekau, mo e ngaahi akonaki meia ʻAlamā ki hono foha ko Kolianitoní. Naʻe ʻalu fakataha ʻa Kolianitoni mo ʻene tamaí mo hono taʻokete ko Sipiloní ke malanga ʻaki e ongoongoleleí ki he kau Sōlamí. Ka neongo iá, naʻe lolotonga e ngāue fakafaifekau ko ʻení, naʻe fakahoko ʻe Kolianitoni ha ngaahi angahala mamafa.
Lau ʻa e ʻAlamā 39:1–5, ʻo kumi ʻa e ngaahi fehalaaki naʻe fai ʻe Kolianitoní mo e ongo naʻe maʻu ʻe ʻAlamā pea mo e ʻEikí ki he ngaahi angahala ko iá. (ʻOku uhinga e foʻi lea fai feʻauaki ʻi he veesi 3 ki ha fefine angaʻuli pe paʻumutu.)
Fakaafeʻi e kau akó ke nau vahevahe ha ngaahi lea pe kupuʻi lea fakafolofola ʻoku nau fakahaaʻi ʻa e meʻa naʻe fai ʻe Kolianitoní mo e ongo naʻe maʻu ʻe ʻAlamā mo e ʻEikí fekauʻaki mo iá.
Ke tokoni atu ke ke fakalaulauloto ki he ʻuhinga ʻoku “fakamamahi” ai hono maumauʻi e fono ʻo e angamaʻá ki ha tamai mo ha palōfita (ʻAlamā 39:3) pea ko ha “meʻa fakalielia [ia] ʻi he ʻao ʻo e ʻEikí” (ʻAlamā 39:5), ʻe ala tokoni ke mahino e ngaahi tāpuaki ʻo hono tauhi iá. Laukonga fekauʻaki mo e ngaahi tāpuaki mo e mālohi ʻi he “ʻOku ʻomi ʻe hono moʻui ʻaki e fono ʻo e angamaʻá” ʻi he peesi 26 ʻo e Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí (tohitufa, 2022).
Fakaʻatā ʻa e kau akó ke vahevahe ʻa e meʻa naʻa nau maʻú.
-
ʻOku teuteuʻi fēfē kitautolu ʻe hono tauhi e fono ʻo e angamaʻá ke tau maʻu ha ngaahi tāpuaki maʻongoʻonga mei he ʻEikí ʻi he moʻuí ni mo e moʻui ka hokó?
Fakakaukau ke hiki e ongo fehuʻi ko ʻení ʻi he palakipoé pea fakaafeʻi e kau akó ke nau ngāue tautau toko ua pe fakakulupu iiki ke kumi e talí ʻi he folofolá. Aleaʻi leva mo e kalasí ʻa e ongo fehuʻi ʻe ua ka hoko maí.
-
Ko e hā ʻe hoko kapau he ʻikai fakatomala ha taha mei he angahala fakasekisualé? (ʻAlamā 39:7–9)
-
Ko e hā ha nunuʻa ʻo e maumauʻi e fono ʻo e angamaʻá ʻoku faʻa taʻe-fakatokangaʻi? (ʻAlamā 39:11–13)
-
Makatuʻunga ʻi he meʻa naʻá ke akó, ko e hā ka maʻu ai ʻe ha mātuʻa, palōfita, mo e ʻEikí ha faʻahinga ongo mālohi pehē fekauʻaki mo e angamaʻá?
-
ʻOku fakahaaʻi fēfē ʻe he fono ʻo e angamaʻá ʻa e ʻofa ʻa e ʻOtuá ki Heʻene fānaú?
“ʻIkai toe muimui ʻi he ngaahi holi ʻa ho matá.”
ʻIkai ngata ʻi hono akoʻi ʻe ʻAlamā ʻa Kolianitoni fekauʻaki mo e mamafa ʻo e angahala fakasekisualé, ka naʻá ne toe akoʻi foki hono fohá ʻi he founga ke fakaʻehiʻehi ai mei hono fakahoko ʻo e ngaahi fehalaaki tatau ʻi he kahaʻú.
Toe vakaiʻi ʻa e ʻAlamā 39:9 mo e ʻAlamā 39:13, ʻo kumi ʻa e ngaahi foʻi lea pe kupuʻi lea ʻe lava ʻo tokoni atu ke ke tekeʻi ʻa e ʻahiʻahí mo tauhi e fono ʻo e angamaʻá. (ʻOku ʻuhinga ʻa e kupuʻi lea “fakafisi koe” ʻi he veesi 9 ke ngāue ʻaki ʻa e mapuleʻi kitá pe tokangaʻi kitá.)
Ko ha potufolofola fakataukei fakatokāteline ʻa e ʻAlamā 39:9. Fakakaukau ke fakaʻilongaʻi e ngaahi potufolofola fakataukei fakatokāteliné ʻi ha founga makehe koeʻuhí ke faingofua ange hoʻo maʻu kinautolú. Te ke maʻu ha faingamālie ʻi he lēsoni hokó ke akoako fakaʻaongaʻi ʻa e tokāteline ʻoku akoʻi ʻi he potufolofola ko ʻení ki ha fehuʻi pe tūkunga.
Fakaafeʻi e kau akó ke vahevahe ʻa e meʻa naʻa nau maʻú.
-
Ko e hā ʻa e tefitoʻi moʻoni naʻe akoʻi ʻe ʻAlamā kia Kolianitoni ʻi he ongo veesi ko ʻení?
Ko ha tefitoʻi moʻoni ʻe taha mei he ongo veesi ko ʻení ko e taimi ʻoku tau mapuleʻi ai kitautolu mo tafoki ki he ʻEikí, te tau lava ʻo ikunaʻi ʻa e ʻahiʻahi ke maumauʻi e fono ʻa e ʻOtuá ki he angamaʻá.
ʻOku faʻa faingataʻa he taimi ʻe niʻihi ke tau ngāue ʻaki ʻa e mapuleʻi kitá mo tafoki ki he ʻEikí ke ikunaʻi ʻa e ʻahiʻahí. ʻE ala tokoni ke fakakaukauʻi ha ngaahi founga kehekehe ke fakahoko ai ʻeni pea muimui ki he ngaahi ueʻi ʻa e Laumālié fekauʻaki mo e meʻa ʻe ʻaonga taha kiate koé.
Kimuʻa pea fai ʻa e ʻekitivitī ko ʻení, fakakaukau ke fakaafeʻi e toʻu tupú ke nau fakakaukauʻi ha ngaahi founga te nau lava ai ʻo tafoki ki he ʻEikí mo ikunaʻi e ngaahi ʻahiʻahi ke maumauʻi e fono ʻo e angamaʻá. Te nau lava leva ʻo fai ha meʻa ʻe ua mei he ngaahi meʻá ni ke fakapapauʻi pe tānaki atu ki heʻenau ngaahi fakakaukaú.
Fakakaukau ke lisi e ngaahi meʻa ko ʻení ʻi he palakipoé. Fakakaukau ke toʻo e vitioó mei he lisí pea fehuʻi ki he kalasí hili ʻenau akó pe te nau fie sio ai.
-
Lau e toenga ʻo e faleʻi fekauʻaki mo e haohaoa fakasekisualé ʻi he Ki Hono Fakamālohia ʻo e Toʻu Tupú: Ko ha Fakahinohino ki hono Fakahoko ha Ngaahi Filí (vakai ki he “haohaoa fakasekisualé” ʻi he konga “Fēfē nai ʻa e … ?”). Ki ha faleʻi lahi ange mei he kau mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá, fakakaukau ke lau ʻa e “Personal Purity” (Jeffrey R. Holland, Ensign, Nov. 1998, 75–78) pe “ʻOku Mau Tui ki he Angamaʻá” (David A Bednar, Ensign pe Liahona, Mē 2013, 41–44).
-
Kumi ha ngaahi potufolofola ʻokú ke ongoʻi te ne lava ʻo fakamālohia koe ke ke tekeʻi ʻa e ngaahi ʻahiʻahi ke maumauʻi e fono ʻo e angamaʻá. Te ke lava foki ʻo lisi ha ngaahi himi, pe ngaahi hiva ʻa e Palaimelí te ke fiemaʻu ke fanongo ki ai ke maʻu ha mālohi ʻi he taimi ʻe ʻahiʻahiʻi ai koé.
-
Hiki ha ngaahi founga te ke lava ai ʻo feinga ke “tafoki ki he ʻEikí ʻaki ho ʻatamaí, iví, mo e mālohí kotoa” (ʻAlamā 39:13). Fakakau ʻa e meʻa kuó ke ʻosi fakahoko ʻi he kuohilí ʻa ia ʻokú ke ongoʻi kuó ne fakamālohia koé.
-
Hiki ʻa e faleʻi kuó ke maʻu mei he mātuʻá mo e kau taki ʻo e Siasí ʻe lava ʻo tokoni atu ke ke matuʻuaki ʻa e ʻahiʻahí.
-
Mamataʻi ʻa e foʻi vitiō “Angamaʻá: Ko e Hā Hono Ngaahi Fakangatangatá?” (3:59), lava ke maʻu atu ʻi he ChurchofJesusChrist.org.
2:3Chastity: What Are the Limits?
‘Oku faleʻi e toʻu tupu ‘o e Siasí ke nau maʻa fakasekisuale, ka ko e hā e ngaahi fakangatangata ʻoku totonú? ʻI hono fakaʻaongaʻi e ngaahi akonaki ʻa e kau palōfita ʻo onopōní, ʻoku ʻoatu ʻe he fakamatala ko ʻení e founga te tau lava ai ʻo maʻu ʻa
Hili ha ngaahi miniti siʻi, fakakaukau ke fakaafeʻi ha kau ako ke vahevahe ʻenau ngaahi fakakaukaú mo e founga ʻe ala tokoniʻi ai kinautolu ʻe he ngaahi fakakaukau ko ʻení ke ikunaʻi ʻa e ʻahiʻahí. Kapau ʻokú ke ongoʻi ʻe faingataʻaʻia hoʻo kalasí ke aleaʻi tauʻatāina e kaveinga ko ʻení, fakaafeʻi e kau akó ke vahevahe ʻenau ngaahi fakakaukaú ʻi ha laʻipepa kae ʻoua ʻe tohi ai honau hingoá. Tānaki fakataha ʻa e ʻū laʻipepá pea lau ia ki he kalasí.
Fakakaukau fakatāutahá
Fakaʻaongaʻi ha kiʻi taimi ke fakalaulauloto ai ki he ʻuhinga ʻoku fiemaʻu ai ke ke maʻa fakasekisualé. Hiki leva e ngaahi sitepu te ke fakahoko ke hokohoko atu ai hoʻo talangofua ki he fono ʻa e ʻEikí ki he angamaʻá. Fakakaukau ki he meʻa naʻe ueʻi koe ʻe he Laumālie Māʻoniʻoní ke ke faí, pea lekooti ha ngaahi fakakaukau kehe pē ʻi hoʻo tohinoa akó. Kapau kuó ke maumauʻi pe ko ha taha ʻokú ke ʻiloʻi ʻa e fono ʻo e angamaʻá, manatuʻi kuo “hāʻele mai [ʻa Sīsū] ke toʻo ʻa e ngaahi angahala ʻa e māmaní” (ʻAlamā 39:15) pea te Ne fakamolemoleʻi ʻa kinautolu kotoa pē ʻoku fakatomala fakamātoato mo siʻaki ʻenau ngaahi angahalá (vakai ki he Mōsaia 26:30, ʻAlamā 39:9).
Fakakaukau ke vahevahe hoʻo fakamoʻoní.