ʻAlamā 41

ʻOku Fakafoki Mai ʻe Sīsū Kalaisi ʻa e Meʻa Kotoa Pē

Hili hono akoʻi ʻe ʻAlamā ʻa Kolianitoni fekauʻaki mo e fakatuʻutāmaki ʻo ʻene ngaahi angahalá, naʻá ne ngāue ke fakatonutonu ʻa e ngaahi akonaki halá. Naʻá ne akoʻi ha ngaahi moʻoni mahuʻinga kia Kolianitoni ke tokoni ke mahino kiate ia ʻa e palani ʻa e Tamai Hēvaní ki hono fakafoki mai ʻo e ongoongoleleí pea ke tokoniʻi ia ke fakatomala. ʻE tokoniʻi koe ʻe he lēsoni ko ʻení ke ke vakai ki he founga he ʻikai lava ke iku ai ʻa e faiangahalá ki he fiefiá.

Akoʻi ʻa e folofolá ʻi ha ngaahi founga te ne langaki e tui kia Sīsū Kalaisí. Ko e taumuʻa ʻe taha ʻo e folofolá ke tokoniʻi kitautolu ke tau ofi ange ki he Tamai Hēvaní mo Sīsū Kalaisi (vakai, 1 Nīfai 6:4). Tuku ha taimi ke tokoniʻi ai e kau akó ke nau vakai ki he founga naʻe tāpuekina ai e niʻihi fakafoʻituitui ʻi he folofolá ʻe he mālohi, ʻaloʻofa, mo e ʻofa ʻa e ʻOtuá. Poupouʻi e kau akó ke nau fakatokangaʻi ha ngaahi tāpuaki tatau ʻi heʻenau moʻuí ʻi heʻenau ngāue ʻaki ʻenau tui kia Sīsū Kalaisí.

Teuteu ʻa e tokotaha akó: Fakaafeʻi e kau akó ke nau fakakaukau ki he founga kuo ʻomi ai ʻe he talangofua ki he ngaahi fekaú ʻa e fiefiá mo tokoniʻi ke nau ongoʻi mateuteu ke feʻiloaki mo e Fakamoʻuí mo e Tamai Hēvaní hili ʻa e moʻui ko ʻení.

Ngaahi ʻEkitivitī Ako ʻOku Ala Fakahokó

Ngaahi tui fekauʻaki mo e moʻui hili ʻa e maté

ʻE lava ke tokoni ʻeni ki he kau akó ke nau fakakaukau ki he ngaahi nunuʻa taʻengata ʻo ʻenau ngaahi filí. Fakakaukau ke kiʻi taʻofi hili e fakamatala takitaha ke fakaʻatā e kau akó ke fakahoko ha tali.

Fakakaukau ki he founga ʻe lava ke liliu ai hoʻo ngaahi tōʻongá kapau naʻá ke tui ki ha taha ʻo e ngaahi fakamatala hala ko ʻení:

‘Oku ‘ikai ke ‘i ai ha moʻui ‘i he hili ‘a e maté.

Hili ʻetau maté, ʻe hākeakiʻi kitautolu ʻo tatau ai pē pe ko e hā ʻetau ngaahi ngāue ʻi he māmaní.

• Ko e hā ʻoku mahuʻinga ai ke maʻu ha mahino totonu ki he meʻa ʻe hoko kiate kitautolu ʻi he hili ʻetau maté?

• Ko e hā ʻokú ke ʻilo fekauʻaki mo e moʻui hili ʻa e maté ʻokú ne tākiekina hoʻo ngaahi tōʻonga ʻi heni mo e taimi ní?

Ko e ʻuhinga ʻo e fakafoki mai e ongoongoleleí

Manatuʻi naʻe akoʻi ʻe ʻAlamā hono foha ko Kolianitoní, ʻa ia naʻá ne fai ha ngaahi angahala mamafá (vakai, ʻAlamā 39), pea ʻi ai haʻane ngaahi fehuʻi fekauʻaki mo e ongoongoleleí. ʻOku tau ako ʻi he ʻAlamā 41 naʻe puputuʻu ʻa Kolianitoni ʻi he ngaahi akonaki ʻa e kakai kuo nau hē mei he ongoongolelei ʻo Sīsū Kalaisí.

Lau ʻa e ʻAlamā 41:1, ʻo kumi ʻa e meʻa naʻe ʻikai mahino kia Kolianitoní. (ʻI he ngaahi akonaki ʻa ʻAlamaá, ʻoku ʻuhinga ʻa e foʻi lea fakafokí ki ha meʻa naʻe toe ʻomai pe toe fokotuʻu ki hono tuʻunga kimuʻá. ʻE ala tokoni foki ke ʻiloʻi ko hono fakaʻuhingaʻi hala ʻo e folofolá ko hono mioʻi, fakakeheʻi, pe liliu ia honau ʻuhingá.)

• Ko e hā naʻe ʻikai mahino kia Kolianitoní?

Naʻe akoʻi ʻe ʻAlamā kia Kolianitoni ʻa e tokāteline moʻoní, ke tokoni ke ne fakatomala. Naʻá ne ʻiloʻi “ko e tokāteline moʻoní, ʻoku mahino ia, mo ne liliu e moʻuí mo e ʻulungāngá” (Boyd K. Packer, “Do Not Fear,” Liahona, May 2004, 79). ʻOku tokoni ʻa e mahino ʻoku tau maʻu ki he tokāteline ʻo e fakafoki maí ke mahino kiate kitautolu ʻa e ʻuhinga ʻoku fuʻu mahuʻinga ai e ngaahi fili ʻoku tau fakahoko ʻi he moʻui ní.

Fakakaukau ke lau fakakalasi e veesi 2–9 pea kiʻi taʻofi he taimi ʻe niʻihi ke tokoni ke mahino ki he kau akó ʻa e meʻa ʻoku nau laú. Hili e laukongá, mahalo ʻe tokoni ke vakaiʻi ʻa e meʻa ʻoku mahino ki he kau akó fekauʻaki mo e fakafoki mai ʻo e ongoongoleleí, naʻe lau ki ai ʻa ʻAlamaá. Fakakaukau ke hiki ʻa e foʻi lea fakafokí ʻi he palakipoé pea fakaafeʻi e kalasí ke nau faʻu mo fokotuʻutuʻu ha fakaʻuhinga lolotonga ʻenau ako e lēsoni ko ʻení.

Lau ʻa e ʻAlamā 41:2–9 ke ʻiloʻi e meʻa naʻe akoʻi ʻe ʻAlamā ke tali ʻaki e loto-hohaʻa naʻe maʻu ʻe Kolianitoní.

• Ko e hā ʻe fakafoki kitautolu ki ai hili ʻetau maté?

• Fakatatau kia ʻAlamaá, ʻoku malava fēfē nai ʻa e fakafoki ko ʻení?

• ʻE poupouʻi fēfē nai ʻe he ʻilo ko ʻeni ʻo e fakafokí ha taha hangē ko Kolianitoní ke foki ki he hala ʻo e fuakavá?

“Kuo teʻeki ai hoko ʻa e faiangahalá ko e fiefia”

Lau ʻa e ʻAlamā 41:10, ʻo kumi e meʻa naʻe akoʻi ʻe ʻAlamā fekauʻaki mo e fakafokí, faiangahalá, mo e fiefiá.

• Ko e hā ha foʻi maʻu hala naʻe fakatonutonu ʻe ʻAlamā maʻa Kolianitoní?

ʻOku tau ako mei he ʻAlamā 41:10, kuo teʻeki ai hoko ʻa e faiangahalá ko e fiefia.

• ʻI hoʻo fakakaukau ki he ngaahi akonaki ʻa ʻAlamā kau ki he fono ʻo e fakafokí, ʻokú ke pehē ko e hā ʻoku moʻoni ai “kuo teʻeki ai hoko ʻa e faiangahalá ko e fiefia”?

Mahalo ʻe tokoni ke fakamahinoʻi ange ʻoku fakakaukau ha kakai ʻe niʻihi te nau lava ʻo foki ʻo nofo mo e ʻOtuá ʻo ʻikai ke nau fatongia ʻaki fakataautaha ʻenau ngaahi ngāué. ʻE lava ke nau pehē ʻoku fakafiefia kiate kinautolu ‘a ‘enau ngaahi fili ‘oku angahalaʻiá. ʻOku ʻi ai e taimi ʻe niʻihi ʻe ngali fiefia pē ʻa kinautolu ʻoku fili ke faiangahalá.

Ko e mahino ki he natula ʻo e ʻOtuá

Ko e palani ʻa e ʻOtuá ki hono fakafoki mai ʻo e ongoongoleleí ʻoku mahulu hake ia ʻi ha palani pē ke tau toe moʻui ai. Ko ha palani ia ke tokoniʻi kitautolu ke tau hoko ʻo hangē ko Iá pea aʻusia ʻEne fiefiá.

Lau ʻa e ʻAlamā 41:11, ʻo kumi ʻa e founga ʻoku ʻikai malava ai ke maʻu ʻa e fiefia moʻoní ʻi he taimi ʻoku fakahoko ai ha ngaahi fili halá. Mahalo ʻe tokoni ke ʻiloʻi ʻoku ʻuhinga ʻa e “ʻahu ʻo e mamahí” (veesi 11) ki hono aʻusia ha mamahi ʻoku fuʻu tōtuʻa pe ko ha faingataʻaʻia fakaeloto lahi ko ha ola ʻo e angahalá.

• Ko e hā ha ngaahi faikehekehe kuó ke mamata ai ʻi he fiefia ʻoku foaki ʻe he ʻOtuá mo e fiefia ʻa e māmaní?

• Ko e hā ha ngaahi fakakaukau hala ʻokú ke sio ʻoku poupouʻi ka ʻoku ʻikai ke ne ʻomi ʻa e fiefiá, neongo kapau ʻoku hā ngali lelei?

Naʻe fakamatalaʻi ʻe ʻEletā Mākisi B. Nesi ʻo e Kau Fitungofulú ʻa e fekauʻaki ʻa e natula ʻo e ʻOtuá mo e fiefiá:

Fakatokangaʻi ange ko e moʻui ʻikai kau ai ʻa e ʻOtuá ʻi he māmaní—ʻi hono fakalea ʻe tahá, ke fakafisi ke moʻui ʻaki ʻEne ongoongoleleí pea ʻikai maʻu ai e takaua ʻo e Laumālié—ʻoku ʻuhinga ia ke ʻi ha tuʻunga ʻoku fehangahangai mo e natula ʻo e fiefiá. Ko hono moʻoní, ko e ongoongolelei ʻo Sīsū Kalaisí, ko e—fakatokangaʻi ʻoku singikulali ʻeni, ʻoku ʻuhinga ia ko ia pē ʻa e—“palani lahi ʻo e fiefiá” (ʻAlamā 42:8). Kapau te ke fili ki ha toe founga kehe ʻo e moʻuí pe feinga ke moʻui ʻaki ʻa e ngaahi konga pē ʻo e ongoongoleleí ʻoku ngali faingamālié, ʻe hanga ʻe he fili peheé ʻo kākaaʻi koe mei he fiefia mo e nēkeneka kakato naʻe fakataumuʻa koe ki ai ʻe heʻetau Tamai Hēvani ʻofá mo Hono ʻAló. (Marcus B. Nash, “The Great Plan of Happiness,” Liahona, Nov. 2006, 49)

Tokoni ke mahino ki he kau akó ko e natula ʻo e Tamai Hēvaní ko e fiefiá pea te tau lava ʻo aʻusia ʻa e fiefia moʻoní ʻi heʻetau feinga ke hoko ʻo hangē ko Iá.

Ko e founga ʻe taha ke akoʻi ai ʻení ko hono hiki ʻa e ongo foʻi lea ko e Fiefiá mo e Mamahí ʻi he palakipoé. Fakaafeʻi e kau akó ke hiki e ngaahi ʻulungaanga ʻo e Tamai Hēvaní ʻi lalo he foʻi lea Fiefiá pea fakamatalaʻi ʻa e ʻuhinga ʻoku fakaiku ai e ngaahi ʻulungaanga ko ʻení ki he fiefiá. Hangē ko ʻení, te mou lava ʻo aleaʻi ʻa e founga ʻoku iku ai ʻa e māʻoniʻoní, faʻa kātakí, pe faivelengá ki ha fiefia ʻoku lahi angé. ʻE lava leva ke hiki ʻe he kau akó ha ngaahi ngāue mo ha ngaahi ʻulungaanga ʻoku fakatau ki he mamahí, pea fakamatalaʻi ʻa e founga ʻoku nau fehangahangai ai mo e ʻulungaanga ʻo e ʻOtuá.

Ke tokoni ke ke ʻiloʻi e founga ʻoku hoko ai e natula ʻo e ʻOtuá ko e fiefiá, hiki ha lisi ʻo Hono ngaahi ʻulungāngá. Hili hoʻo hiki ha lisí, fakakaukau ki he founga ʻoku ʻomi ai ʻe he ngaahi ʻulungaanga ko ʻení ʻa e fiefiá ki he Tamai Hēvaní mo e niʻihi kehé fakatouʻosi. Hangē ko ʻení, ʻoku ʻaloʻofa ʻa e ʻOtuá. Koeʻuhí ʻoku ʻaloʻofa ʻa e ʻOtuá, te Ne lava ʻo maʻu ʻa e fiefiá ʻi he ngaahi laumālie ʻoku fakatomala mo vahevahe ʻa e fiefia ʻo e fakamolemolé ki he niʻihi kehé (vakai, Tokāteline mo e Ngaahi Fuakava 18:13). Fili ha ʻulungaanga pe fekau ʻa e ʻOtuá ʻe taha pe lahi ange pea fakamatalaʻi ʻa e founga ʻe lava ke ʻomi ai ʻa e fiefiá ʻi heʻetau moʻui ʻaki ʻa e ʻulungaanga pe tauhi ʻo e fekau ko iá.

Ko hono fakafoki ki he leleí

Naʻe fakakaukau ʻa Kolianitoni te ne lava ʻo moʻui faiangahala pea kei toetuʻu pē ʻi he nāunau. Fakatatau ki he fono ʻa e ʻOtuá, he ʻikai lava ke hoko ʻeni (vakai, Kalētia 6:7–8). Naʻe fakatonutonu ʻe ʻAlamā ʻa Kolianitoni pea fakaafeʻi ia ke kamata ngāue ke foki ki he ʻOtuá mo e fiefia moʻoní. Lau ʻa e ʻAlamā 41:12–15, ʻo kumi e founga naʻe poupouʻi ʻe ʻAlamā ʻa Kolianitoni ke moʻui aí kae lava ke fakafoki ia ki he leleí mo e fiefiá.

• Mei he meʻa naʻá ke laú, ko e hā ʻe lava ke “ʻoatu” ʻe ha taha kapau ʻokú ne fiemaʻu ha fiefia ʻoku lahi angé ke “toe foki mai kiate [ia]”? (ʻAlamā 41:15).

• Ko e fē ha taimi kuó ke aʻusia ai ʻa e fiefia moʻoní ʻi hono moʻui ʻaki e ongoongolelei ʻo Sīsū Kalaisí?

ʻE lava ke tokoni ʻeni ki he kau akó ke nau ngāueʻi e ngaahi ongo kuo nau maʻú.

Fakakaukau ki he meʻa kuó ke ako ʻi he ʻAlamā 41 pea mo hoʻo holi ke fiefiá. ʻE lava ke tokoni e ngaahi fehuʻi ko ʻení ke ke faʻu ha palani ke maʻu ai ha fiefia ʻoku lahi angé:

• Ko e hā ha meʻa ʻe taha te u lava ʻo kamata hono fakahokó ke tokoniʻi au ke u fiefia pea fakafoki ai au ki he leleí?

• Ko e hā ha meʻa ʻe taha te u lava ʻo taʻofi hono fakahokó, ke tokoniʻi au ke u fiefia pea fakafoki ai au ki he leleí?

Fakaafeʻi ʻa e Laumālie Māʻoniʻoní ke ne tataki hoʻo ngaahi fakakaukaú mo e ngaahi ongó. Fakakaukau ke lekooti hoʻo ngaahi ongó ʻi hoʻo tohinoa fakatāutahá pe folofolá ʻa ia te ke lava ʻo toe vakaiʻi ai kinautolu. Faʻu ha palani ke ngāueʻi, ʻo kau ai ʻa e taimi te ke kamata aí mo e founga te ke vakaiʻi ʻaki hoʻo fakalakalaká.

Fakamatala Fakamahinó mo e Puipuituʻá

Ko e hā ʻe fakafoki mai kiate kitautolu ʻi he moʻui ka hokó?

Naʻe akonaki ʻa Palesiteni Tāleni H. ʻOakesi ʻo e Kau Palesitenisī ʻUluakí ʻo pehē:

ʻI heʻene hoko ko e konga ʻe taha ʻo e palani [ʻa e ʻOtuá] ki he fakafokí” (ʻAlamā 41:2), ʻe hanga ʻe he Toetuʻú ʻo fakafoki “ʻa e ngaahi meʻa kotoa pē … ki honau anga totonu mo haohaoá” (ʻAlamā 40:23). ʻOku kau heni ʻa e fakahaohaoaʻi ʻetau ngaahi tōnounoú mo e ngaahi mele fakatuʻasinó kau ai hono fāʻeleʻí pe ʻi he lotomamahi pe mahamahakí. (Dallin H. Oaks, “Maʻa he Fakatomalá,” Liahona, Mē 2019, 94)

ʻE teuteuʻi fēfē nai au ʻe he fakatomalá ke fakafoki au ki he leleí?

Naʻe pehē ʻe Palesiteni Tāleni H. ʻOakesi ʻo e Kau Palesitenisī ʻUluakí:

ʻOku hanga nai ʻe he fakafoki ko ʻení ʻo fakahaohaoaʻi ʻetau ngaahi holi taʻe-mapuleʻí pe maʻunimaá? He ʻikai ke lava ia. ʻOku tau ʻilo mei he fakahā fakaonopōní ʻe fakamāuʻi kitautolu mei heʻetau ngaahi holí pea pehē foki ki heʻetau ngaahi ngāué (vakai, ʻAlamā 41:5; Tokāteline mo e Ngaahi Fuakava 137:9) pea naʻa mo ʻetau ngaahi fakakaukaú te nau fakahalaʻiaʻi kitautolu (vakai, ʻAlamā 12:14). Kuo pau ke ʻoua naʻa tau “toloi ʻa e ʻaho ʻo [ʻetau] fakatomalá” ke aʻu ki he maté, he naʻe akoʻi ʻe ʻAlamā (ʻAlamā 34:33), koeʻuhí ko e laumālie tatau pē ko ia ʻokú ne puleʻi hotau sinó ʻi he moʻui ní—ʻo tatau ai pē pe ko e ʻEikí pe ko e tēvoló—te ne “maʻu ha mālohi ke puleʻi [hotau] sinó ʻi he maama taʻengata ko iá” (ʻAlamā 34:34). ʻOku maʻu ʻe hotau Fakamoʻuí ha mālohi pea tuʻu mateuteu ke fakamaʻa kitautolu mei he koví. Ko e taimi ʻeni ke fekumi ai ki Heʻene tokoní ke tau fakatomala mei heʻetau angahalá pe ngaahi holi koví pea ko e ngaahi fakakaukaú ke maʻa mo mateuteu ke tuʻu ʻi he ʻao ʻo e ʻOtuá ʻi he Fakamaau Fakaʻosí. (Dallin H. Oaks, “Maʻa he Fakatomalá,” Liahona, May 2019, 94)

Fēfē kapau ʻoku ou tauhi e ngaahi fekaú ka ʻoku ʻikai ke u ongoʻi fiefia au?

Naʻe pehē ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku ou ʻilo, neongo ʻa e fiefia lahi ʻoku maʻu he palani fakalangi ʻa e ʻOtuá, ka ʻe lava he taimi ʻe niʻihi ke ongo taukakapa mo taumamaʻo ia mei hotau ngaahi tūkunga lolotongá. ʻE ongo ia ʻo hangē ka ʻikai maaʻusia ʻi hotau tuʻunga ko e kau ākonga fāifeingá. ʻE ngali fakalata ange ʻa e tuʻunga ʻahiʻahi mo fakatuta lolotongá, mei he anga ʻetau vakai pukupukú. Ka ʻe lava ke ongo taumamaʻo mo taʻemaaʻusia e pale ia ki hono fakasītuʻaʻi e ngaahi ʻahiʻahi ko iá. Ka ʻoku hanga ʻe ha mahino moʻoni e palani ʻa e Tamaí, ʻo fakahaaʻi mai ʻe lava ke tau maʻu he taimí ni ʻa e pale ʻo e moʻui angamāʻoniʻoní. ʻOku ʻikai teitei hoko ʻa e faiangahalá ia, hangē ko e angaʻulí, ko ha konga ʻo e talí. (Quentin L. Cook, “Tuha mo Taau mo Pilisitolo: Moʻui Taau mo e Temipalé—ʻi he Faingamālié mo e Faingatāmakí,” Liahona, Nōvema 2015, 40)

Ngaahi ʻEkitivitī Fakalahi ki he Akó

Fakalaulauloto ki he ngaahi holi lolotongá

ʻI hono lau ʻe he kau akó ʻa e ʻAlamā 41:5, ʻe lava ke nau ʻiloʻi ʻa e mahuʻinga ʻo ʻenau ngaahi holí ki hono maʻu ha founga fakafoki leleí. Kapau ʻoku fiemaʻu ke mahino ange ki he kau akó ʻa e ngaahi holí, te nau lava ʻo fekumi ʻi he folofolá ki ha ngaahi veesi kehe fekauʻaki mo e ngaahi holí (hangē ko ʻení, ʻAlamā 29:5; Tokāteline mo e Ngaahi Fuakava 11:8, 14, 17; pe Tokāteline mo e Ngaahi Fuakava 137:9). Hili iá, te ke lava ʻo fakaafeʻi kinautolu ke fakakaukau ki heʻenau ngaahi holi lolotongá mo e founga ʻe lava ke nau fakafenāpasi ai ki he finangalo ʻo e ʻOtuá.

Ko hono ʻiloʻi ʻo e ngaahi tui hala fekauʻaki mo hono fakafoki mai ʻo e ongoongoleleí hili ʻa e moʻui ko ʻení

Naʻe akoʻi ʻe ʻAlamā ʻa Kolianitoni naʻe fakaʻuhingaʻi hala ʻe ha niʻihi ʻa e ngaahi folofola kau ki hono fakafoki mai ʻo e ongoongoleleí (vakai, ʻAlamā 41:1). ʻI he ʻAlamā 41:10, naʻá ne ʻiloʻi ai ha tui hala ʻe taha—ʻa ia ʻe lava ke fakafoki ha taha mei he angahalá ki he fiefiá. Hili e ako ʻa e kau akó fekauʻaki mo e natula ʻo e ʻOtuá, fakakaukau ke vahevahe e ngaahi sīpinga ko ʻení mo fakaafeʻi e kau akó ke fakaʻaongaʻi ʻa e meʻa kuo nau akó ke fakatonutonu ʻaki ʻa e maʻu halá pe akonaki halá:

• “ʻOku ou ʻilo ʻoku ʻikai tonu ʻa e meʻa ʻoku ou faí, ka te u lava maʻu pē ʻo fakatomala pea ʻe lelei leva ʻa e meʻa kotoa.”

• “ʻOku ʻofa ʻa e ʻOtuá ʻi Heʻene fānaú kotoa, ko ia ai he ʻikai te Ne tuku hatau taha ki heli.”

Lēsoni fakataumuʻá: Boomerang (Meʻa sika)

Fakaʻaliʻali ki he kau akó ha meʻa sika pe tā hano fakatātā ʻi he palakipoé. Fehuʻi ki he kau akó pe ko e hā ʻoku fai ʻe ha meʻa sika ʻi he taimi ʻoku tonu ai hono tolongí. (ʻOku foki ia ki he feituʻu naʻe li mei aí.)

Fakaafeʻi e kau akó ke fakamatalaʻi ʻa e founga ʻoku tatau ai ha meʻa sika mo e tokāteline ʻo e fakafokí ʻa ia ʻoku fakamatalaʻi ʻi he ʻAlamā 41:12–15.