Alema 47–48

Amalekia ma Leoneti

Pe ua e faalogo ea i se tasi o fai mai, “E lē afaina le nao le tasi,” “Ua na o sina mea itiiti lava,” po o le “E lē o se mea e leaga tele”? Pe a tatou filifili e gauai atu i faaosoosoga a Satani e oo lava i sina mea itiiti, ua tatou tuuina atu ia te ia le mana e pulea ai i tatou. I le Alema 47, tatou te aoao ai e uiga i se alii e igoa ia Leoneti o lē sa gauai teisi atu i lona fili ma maua ai o ia lava i ni tulaga lamatia ma matautia. O lenei lesona e mafai ona fesoasoani ai ia te oe e tetee atu ai i taumafaiga a Satani ia maua le mana e pulea ai oe.

Fesoasoani i tagata aoga ia toaaga i le faagasologa o le aoaoina. A o e aoao atu, vaavaai mo auala e fesoasoani ai i tagata aoga ia toaaga i le faagasologa o le aoaoina. Mo se faataitaiga, fai atu ni fesili tatala faatupu manatu ia e uunaia ai tali magafagafa, ma fatu ni gaoioiga ia e uunaia ai le auai mai, e pei o le tusiata po o le tusitusi.

Sauniuniga a le tagata aoga: Valaaulia tagata aoga e faitau le 2 Nifae 28:7–8, 21–22 ma mafaufau i faataitaiga o le auala e faaaoga ai e Satani nei togafiti i o tatou aso.

Gaoioiga e Mafai Ona Aoao Ai

O maunu

A o le’i faasoaina atu le faamalamalamaga lenei, mafaufau e faaali atu se ata o se ofe fagota ma se maunu ma fai atu i tagata aoga e faasoa mai mea ua latou iloa e uiga i le faamoemoega o se maunu fagota.

O se maunu o se ituaiga o mailei e faaaoga e maua ai i’a. O le mailei e tosina atu ai le vaai a le i’a ma e mafai ona faatosina ai le i’a e taumafai e ū. O le taimi lava e mau ai le i’a, ona mafai loa lea ona pueina.

Sa faasoa mai e Peresitene M. Russell Ballard o le Korama a Aposetolo e Toasefululua ni mea e tutusa ai maunu fagota ma faaosoosoga a Satani. Atonu e te manao e matamata i le “E, o le Togafiti Poto a le Ua Leaga” mai le faailo taimi 0:43 i le 2:30, o loo maua i le ChurchofJesusChrist.org, e aoao ai e uiga i faatusatusaga na ia faia.

• O a nisi o maunu e faaaoga e Satani e faatosina ai i tatou ia agasala?

  Atonu e faailoa mai e tagata aoga auala e taumafai ai Satani e fai ana faaosoosoga e foliga mai e matagofie, e pei o le tuuina mai o le fiafia po o le lauiloa lē tumau po o le faia ia tatou lagona e le o i ai se tulaga lamatia i le agasala.

• Aisea o le a e manao ai e tetee atu i nei maunu?

• O le a se mea e mafai ona faafaigata ai le tetee atu i faaosoosoga?

Atonu e te manatua na saili Amalekia ma se vaega o sa Nifaē na tetee e faatoilalo le saolotoga o sa Nifaē ma faaumatia le ekalesia a le Atua (tagai Alema 46:10). Ina ua uma ona taofia e Moronae ma isi sa Nifaē, sa sola Amalekia i sa Lamanā ma taumafai e faaoso i latou ia feita e faasaga ia sa Nifaē (tagai Alema 46:29–33; 47:1).

O le asō o le a e aoao ai e uiga i isi taumafaiga a Amalekia ina ia maua le malosiaga. O le tele o ana togafiti e talitutusa ma togafiti o loo faaaoga e Satani e faasagatau mai ai ia i tatou i aso nei. A o e suesue, vaavaai mo upumoni ia e mafai ona fesoasoani ia te oe e aloese ai mai maunu o loo faaaoga e Satani i ana taumafaiga e faaleaga ai oe.

Ua saili Amalekia e avea ma tupu o sa Lamanā

Atonu e fesoasoani le faasino atu o tagata aoga i laasaga mo le faatatauina o tusitusiga paia na latou aoaoina i le lesona o le “Alema 43, 48–50”. E mafai e tagata aoga ona faataitai le faaaogaina o nei laasaga a o latou suesue i lenei tala.

Faitau le Alema 47:1–8, ma vaavaai po o a mea na fuafua e Amalekia a o ia feaula’i ai faatasi ma sa Lamanā.

• O le a le mea na faia e Amalekia ina ia maua ai le aafiaga ma le pule i totonu o sa Lamanā?

• E faapefea ona tutusa sini a Amalekia ma sini a Satani? (tagai 2 Nifae 26:22).

• E faapefea ona ese sini a le Tama Faalelagi mai sini a Satani mo oe? (tagai Mose 1:39). Aisea e taua ai ona manatua lenei mea?

O le vaega o sa Lamanā o ē na mumusu e tau faasaga ia sa Nifaē sa taitaiina e se tagata e igoa ia Leoneti.

Faitau le Alema 47:9–12, ma vaavaai mo mea na manao Amalekia e fai e Leoneti.

Mafaufau e tusi le ata lenei i luga o le laupapa e fesoasoani ai i tagata aoga e vaai faalemafaufau ai i le tulaga o loo faamatalaina i nei fuaiupu.

A uma ona faitau le fuaiupu 11, e mafai ona e fesili, “Aisea atonu na lē atamai ai le sau i lalo i le auvae o le mauga e feiloai ma Amalekia?” Ona mafai lea e tagata aoga ona faitau le fuaiupu 12 ma vaavaai mo mea na ese le auala na faia ai e Amalekia i le taimi lona fa sa ia taumafai ai e faatosina Leoneti e feiloai ma ia.

Ina ia faapupula auala eseese a Amalekia, e mafai ona e faaopoopo atu ‘aū i le siata o loo i luga o le laupapa e atagia ai Amalekia ua toeitiiti oo atu i le tumutumu o le mauga, faapea foi ma lana talosaga ia sau teisi i lalo ia Leoneti.

• O a nisi o mafuaaga atonu na mafaufau ai Leoneti e talia le valaaulia mulimuli a Amalekia i le fuaiupu 12?

• O le a se mea atonu e te ta’u atu ia Lehonti pe ana e i ai i lana autau ma ia fesili atu ia te oe mo se fautuaga pe e feiloa’i atu ia Amalekia? Aisea?

Faitau le Alema 47:13–19, ma vaavaai pe na faapefea ona tali atu Leoneti i taumafaiga faaopoopo mai ia Amalekia ma le mea na tupu o se taunuuga.

• O a ni auala na tutusa ai togafiti a Amalekia i togafiti e faaaoga e Satani e faaumatia ai i tatou? (Afai e manaomia, tagai i le 2 Nifae 28:7–8, 21–22.)

I le tali atu i le fesili na muamua atu, atonu e ta’u mai e tagata aoga e faapea o Satani e lē fiugofie, taufaasesē, faitogafiti, ma e sauā. E pei o Amalekia, atonu e saili Satani e faatauanau i tatou ia faasolosolo mālie ona faamaualalo o tatou tulaga faatonuina ma tuu i tatou lava i tulaga e lamatiagofie ai i tatou i ana osofaiga. Mafaufau e valaaulia tagata aoga e faailoga le fasifuaitau “sau i lalo” i soo se mea o loo faaalia mai ai i le Alema 47:10–13. O le a se upumoni ua e aoaoina mai i lenei tala e uiga i le matautia o le gaua’i atu i faaosoosoga a Satani, e ui lava ina itiiti?

O lau taua faasaga ia Satani

O se upumoni e tasi e mafai ona tatou aoao mai i lenei tala e faapea, afai tatou te gaua’i atu i faaosoosoga a Satani e ui lava ina itiiti, ua tatou tuuina atu ia te ia se malosiaga sili atu e taitai sesē ai i tatou.

Mafaufau pe na faapefea ona e vaaia lenei upumoni o faaalia i lou olaga po o olaga o isi. O le gaoioiga lenei e mafai ona fesoasoani ia te oe e faailoa ai nisi o auala e ono taumafai Satani e tuu oe ia lamatiagofie ai i ana faaosoosoga ma auala e mafai ona fesoasoani ai le Faaola e puipuia oe mai nā faaosoosoga.

Mafaufau e fai faatasi o se vasega le gaoioiga lenei i luga o le laupapa. I se isi itu, e mafai ona e faaali atu faatonuga mo le gaoioiga ma tuu tagata aoga i ni vaega toalaiti e galulue faatasi ai. Ona mafai lea e vaega taitasi ona faasoa mai a latou ata i le vasega.

Ina ia saunia tagata aoga mo lenei gaoioiga, e mafai ona e faaaogaina faamatalaga faavitiō mai ia Sister Elaine S. Dalton ma Peresitene Henry B. Eyring i le vaega o “Manatu ma Talaaga o Faamatalaga“.

• Laasaga 1: Tusi se ata o se talavou o loo tu i le tumutumu o se mauga. I le pito i lalo o le mauga, lisi ai faaosoosoga po o togafiti e faaaoga e Satani e taumafai ai e “alu ifo i lalo” teisi ina ia mafai ona ia maua le pule i luga o i tatou. Ia mautinoa e tuu se avanoa i le va o le talavou ma faaosoosoga o loo e lisiina ina ia i ai se avanoa mo le laasaga 2.

• Laasaga 2: I le tumutumu o le mauga, lisi ai nisi o punaoa po o aoaoga ua tuuina mai e le Alii ia i tatou ia e mafai ona puipuia ai i tatou mai faaosoosoga a Satani. (Mo ni nai faataitaiga, mafaufau e suesue ni nai fuaiupu nei: 1 Nifae 15:24; Helamana 5:12; Mataupu Faavae ma Feagaiga 10:5; 11:12–13; 20:22; 87:8.)

Fai se fuafuaga

Mafaufau pe faapefea ona faatatau upumoni sa e suesueina i le asō i lou olaga. Mafaufau e tusifaamaumau au tali i fesili nei:

Faaali atu fesili nei ma tuu atu se taimi i tagata aoga e tusifaamaumau ai a latou tali i a latou api talaaga mo suesuega.

• O anafea na e teena ai faaosoosoga a Satani e ala i le faaaogaina o meafaigaluega ua tuuina mai e le Alii mo oe?

• O le a faapefea ona e taumafai e saili lelei atili le fesoasoani a le Atua e tetee atu ai i faaosoosoga a Satani?

Valaaulia ni volenitia e faasoa mai a latou tali i le fesili muamua. Ia ta’u atu e faapea e lē tatau ona latou faasoa maia soo se mea e patino tele pe paia foi.

Uunaia tagata aoga e tetee atu i faaosoosoga a Satani e ala i le faatinoina o manatu ma uunaiga sa latou lisiina i a latou api talaaga. Molimau atu i le mana o le Faaola e fesoasoani ia i latou.

Manatu ma Talaaga o Faamatalaga

O a ni faataitaiga o faaosoosoga e faaaoga e Satani e taumafai ai e maua le malosiaga [e pule ai] ia i tatou?

Matamata i le “O Se Toe Foi i le Amio Lelei” mai le faailo taimi 4:28 i le 6:30 e vaai ai i faataitaiga na faasoa mai e Sister Elaine S. Dalton, o lē sa avea muamua ma Peresitene Aoao o Tamaitai Talavou.

Matamata i le “Laasaga 3: Faalagolago i le Atua – Tala a Sarona e Uiga i le Toe Faaleleia o Olaga mai le Tagofia o Mea ua Fai ma Vaisu o Crystal Meth” (5:29) e vaai ai i se faataitaiga o se tasi na pa’ū atu i mailei a Satani.

Matamata i le “Saili Keriso i Mafaufauga Uma” mai le faailo taimi 8:18 i le 9:42 e vaai ai i se faataitaiga na faamatalaina e Elder Ulisses Soares o le Korama a Aposetolo e Toasefululua.

O le a se mea e mafai ona ou manatua pe a ou lagonaina se manao e fai agasala “laiti”?

Na aoao mai Elder Ulisses Soares o le Korama a Aposetolo e Toasefululua:

A’u uo pele, pe a tatou tetee atu i nai faaosoosoga laiti, ia e tele ona oo mai e aunoa ma se faamoemoeina i o tatou olaga, ua faaauupegaina lelei i tatou e aloese ai mai i solitulafono matuiā. (Ulisses Soares, “Saili atu ia Keriso i Mafaufauga Uma,” Ensign po o le Liahona, Nov. 2020, 84)

O le a le fesoasoani ua tuuina mai e le Alii e tetee atu ai i faaosoosoga?

Sa aoao mai Peresitene Henry B. Eyring o le Au Peresitene Sili:

Faatasi ai ma le fesoasoani a le Agaga Paia, e mafai ona tatou leoleoina i tatou lava. E mafai ona tatou tatalo ia iloa ma teena uluai mafaufauga o le agasala. E mafai ona tatou tatalo ina ia iloa se lapataiga e aua le tautala i upu e faatiga pe faaosooso ai foi se isi tagata. Ma tatou te mafaia, pe a tatau ai, ona tatou tatalo mo le lotomaulalo ma le faatuatua e salamo ai.

O le a i ai moni lava nisi e faalogo mai i lo’u leo ma o le a i ai i o latou mafaufau le manatu lenei: “Ae e matuā tetelē nauā ia faaosoosoga mo a’u. Ua ou teena foi i le mea e gata ai lo’u mafai. Ia te a’u, ua faigata tele tulafono. Ua maualuga tele le tulaga faatonuina.”

E lē sa’o lena tulaga. O le Faaola o lo tatou Fautua lea i le Tama. Ua silafia e Ia o tatou vaivaiga. Ua silafia e Ia le ala e fesoasoani ai ia i latou o ē ua tofotofoina. (Henry B. Eyring, “E Faapei o se Tamaitiiti,” Ensign po o le Liahona, Me 2006, 17)

Gaoioiga Faaopoopo e Aoao Ai

O le mana o le toatasi

A o suesue e tagata aoga le Alema 47–48, e mafai ona faamanuiaina i latou mai le faatusatusaina ma le faaeseeseina o Amalekia ma Kapeteni Moronae ia iloa ai le mana e mafai e se tagata e toatasi ona maua mo le lelei po o le leaga. Valaaulia i latou e faasoa mai pe na faapefea e alii taitoatasi nei ona tosinaina isi na siomia o ia. Valaaulia i latou e faasoa mai ni auala na tosinaina ai e le Faaola, o se tagata e toatasi, le lalolagi mo le lelei. E mafai foi ona latou faasoa mai ni faataitaiga o tagata latou te iloa o e na faaalia e faapea e mafai e se tagata e toatasi ona tosinaina le toatele mo le lelei. Valaaulia i latou e mafaufau pe mafai faapefea ona latou mulimuli i nei faataitaiga o le faia o mea lelei i o latou lava olaga. Atonu e te mafaufau e faaaoga le tala “Inu!” (Rand Packer, New Era, Iulai 2004, 26–27).

Alema 48:7–20. Auala e luluina ai mana o seoli

E mafai e tagata aoga ona suesue le Alema 48:7–20 ma vaavaai mo auala e faapei ai Moronae o Iesu Keriso. Mo se faataitaiga, sa ia fausia nofoaga vaivai o lona nuu (tagai Alema 48:7–9), e pei lava ona tapu’e e Keriso o tatou vaivaiga a o tatou o atu ia te Ia i le faatuatua (Eteru 12:27). Valaaulia i latou e faitau le Alema 48:17 ma mafaufau pe aisea na moni ai lenei mea ia Moronae ma pe aisea na moni ai i le Faaola. Fai atu i tagata aoga e mafaufau i tagata latou te iloa e mafai ona tuu i ai o latou igoa i le Alema 48:17 e sui ai “Moronae.” Valaaulia i latou e filifili se auala se tasi e mafai ona latou mulimuli ai i le faataitaiga a Iesu Keriso ma maua ai le mana lava lea e tasi na maua e Moronae.