3 Nīfai 1–7

Vakai Fakalūkufuá

Naʻe fakasio ʻe he kakai Nīfai naʻe tuí ʻa e ngaahi fakaʻilonga naʻe kikiteʻi ʻe Samuela ko e tangata Leimaná ʻe hoko maí (vakai, Hilamani 14), ka naʻe fakamanamana ʻa e kau taʻetuí ke tāmateʻi kinautolu kapau he ʻikai ʻasi mai e ngaahi fakaʻilongá. Naʻe tautapa ʻa e palōfita ko Nīfaí ki he ʻOtuá, pea naʻe fakahoko ʻa e kikité ʻi he pō ko iá. Naʻe feinga kimui ange ʻa e kau kaihaʻa ʻa Katianetoní ke fakaʻauha ʻa e kau Nīfaí. Ka neongo ia, naʻe “mateuteu [ʻa e Kau Nīfaí] ke fepaki mo kinautolu; … ʻi he māfimafi ʻo e ʻEikí” (3 Nīfai 4:10). Naʻe foki ʻa e kau Nīfaí ki honau ngaahi ʻapí ʻo kamata ke toe langa hake ʻenau moʻuí. Naʻe taki ʻe Sētane ʻa e kakaí ke angatuʻu ki he ʻOtuá ʻo fakafou ʻi he loto-hīkisiá mo e māvahevahé. Naʻe hulu fau e ngaahi nunuʻá ʻo holafa ai ʻa e puleʻangá, pea naʻe māvahevahe ʻa e kakaí ki ha ngaahi haʻa.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha.

3 Nīfai 1

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ki he kau akó ke ongoʻi ha loto-falala ange ʻe fakahoko ʻe he ʻEikí ʻa e meʻa kotoa pē ʻokú Ne folofola ʻakí ʻo fakafou ʻi Heʻene kau palōfitá.

• Teuteu ʻa e tokotaha akó: ʻE lava ke teuteu ʻa e kau akó ke vahevahe ha sīpinga ʻo e founga pe ʻuhinga ʻe lava ai ʻe he tui kia Sīsū Kalaisí ʻo fakamālohia ha taha ʻi he ngaahi taimi taʻepau mo faingataʻá.

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaliʻali ha lisi ʻo ha ngaahi tūkunga te ne ala fakatupu ha ongoʻi taʻepauʻia pe manavahē ʻa e kakaí. ʻE lava ke tokoni ʻeni ki he kau akó ke fakakaukau ki he founga te nau lava ai ʻo maʻu ʻa e tui kia Sīsū Kalaisí ʻi heʻenau tali e ngaahi tūkunga peheé

3 Nīfai 2–5

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke maʻu ʻa e mālohi ʻo e ʻEikí ʻaki ʻenau mateuteu fakalaumālie mo fakatuʻasino.

• Teuteu ʻa e tokotaha akó: Fakaafeʻi e kau akó ke aleaʻi mo ha kau mēmipa ʻo e fāmilí pe kau taki ʻo e Siasí ʻa e ngaahi tāpuaki ʻoku maʻu mei he mateuteu fakatuʻasino pe fakalaumālié.

• Vitioó: “Temporal Preparedness Resources” (3:09)

• Fokotuʻu ki hono akoʻi ʻi he konifelenisi vitioó: ʻI hono fakaafeʻi e kau akó ke lisi e ngaahi teuteu ʻa e kau Nīfaí pea lisi mo e ngaahi meʻa tatau ʻi he onopōní, fakakaukau ke fakaʻaongaʻi ʻa e polokalama palakipoé ke lava ke vahevahe ai ʻenau ngaahi talí.

3 Nīfai 6–7

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino lelei ange ki he kau akó ʻa e nunuʻa ʻo e hīkisiá mo e founga ke ikunaʻi ai ʻa e hīkisiá ʻaki e muimui ki he Fakamoʻuí.

• Teuteu ʻa e tokotaha akó: Fakaafeʻi e kau akó ke nau lotu ʻo kole ki he Tamai Hēvaní ke tokoniʻi kinautolu ke ʻiloʻi e ngaahi ueʻi fakalaumālié ʻi heʻenau ako ʻenau folofolá.

• Lēsoni fakataumuʻá: Koane mōmoa, koane kuo fakapāpā, pea mo ha poulu vai

• Fokotuʻu ki hono akoʻi ʻi he konifelenisi vitioó: ʻI he tūkunga fekauʻaki mo Simí, mahalo te ke fie vahevahe ʻa e kau akó ki ha loki fakataha ʻe ua pe tolu ke aleaʻi e ngaahi fehuʻí. Fakapapauʻi ke tomuʻa ʻoange ha ngaahi fakahinohino mahino, ʻo kau ai ʻa e lahi ʻo e taimi te nau maʻu ki heʻenau fealeaʻakí.

Siviʻi Hono 7 Hoʻo Akó

Taumuʻa ʻo e lēsoní: ʻE lava ke tokoni ʻa e lēsoni ko ʻení ke manatu mo vakaiʻi ʻe he kau ʻakó ʻa e founga kuo tokoniʻi ai kinautolu ʻe heʻenau ngaahi aʻusia ʻi he ʻAlamā 53–3 Nīfai 7 ke nau tupulaki fakalaumālié.

• Teuteu ʻa e tokotaha akó: Fakaafeʻi e kau akó ke toe fakamanatu ʻa e meʻa kuo nau ako ʻi he ngaahi uike kimui ní pea omi mateuteu ki he kalasí ke vahevahe ha founga ʻe taha ʻe lava ke nau fakaʻosi ai ʻa e fakamatala ko ʻení: “Ko e lēsoni ʻe taha mei he ʻAlamā 53–3 Nīfai 7 ʻoku ou pehē ʻoku mahuʻinga ke u manatuʻí ko e … koeʻuhí …”

• Ngaahi ʻĪmisí: Ko e lotu ʻa Nīfai ʻi he funga tauá; Samuela ko e tangata Leimaná ʻi he funga ʻaá

• Meʻa ke fakaʻaliʻalí: Ko ha fakatātā ʻo e siakale ʻo e hīkisiá; ngaahi tā fakatātā ʻa Lehonitai ʻi he moʻungá, kolo kuo ʻaaʻi, mo ha ʻapi ʻi ha fakavaʻe

• Fokotuʻu ki hono akoʻi ʻi he konifelenisi vitioó: Fakakaukau ke vahevahe e kau akó ki ha ngaahi loki fakataha ke fakamatalaʻi ʻa e fatongia ʻo e kau palōfitá. ʻE lava ke fakaʻaongaʻi ʻe he kau akó ʻa e polokalama fetalanoaʻakí ke vahevahe ʻa e meʻa kuo nau fai ke langa honau fakavaʻe fakalaumālié ʻia Sīsū Kalaisí.

Fakamanatu Hono 19 ʻo e Fakataukei Fakatokāteliné

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke fakaʻaongaʻi e ngaahi moʻoni mei he ngaahi potufolofola fakataukei fakatokāteline ʻi he konga hono ua ʻo e Tohi ʻa Molomoná.

• Teuteu ʻa e tokotaha akó: Fakakaukau ke fakaafeʻi e kau akó ke fili ha potufolofola fakataukei fakatokāteline ʻe taha pe ua pea ngāue ke ako maʻuloto ʻa e potufolofolá mo e kupuʻi lea mahuʻinga ʻo e folofolá.

• Laʻipepa tufá: “Ko Hono Maʻu ha Ivi Fakalaumālie ʻo Fakafou ʻi he Fakataukei Fakatokāteliné”; “Fakataukei Fakatokāteline ki he Tohi ʻa Molomoná: ʻAlamā–Molonai”

• Vitiō: “Ko e Mālohi ʻo e Ivi Fakalaumālié” (17:17; mamata mei he taimi 5:11 ki he 5:55)

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaongaʻi ʻa e polokalama palakipoé ke tā ʻa e fakatātā mei he laʻipepa tufa “Ko Hono Maʻu ha Ivi Fakalaumālie ʻo Fakafou ʻi he Fakataukei Fakatokāteliné.” Fakaafeʻi e kau akó ke fili ha potufolofola fakataukei fakatokāteline ʻokú ne poupouʻi ha taha ʻo e ngaahi tafaʻaki ʻe tolu ʻo e maʻu ha ivi fakalaumālié. Poupouʻi e kau akó ke vahevahe ʻa e founga kuo tākiekina ai kinautolu ʻe he potufolofola naʻa nau filí.