3 Nīfai 20–26

Vakai Fakalūkufuá

Lolotonga ʻa e ngāue fakafaifekau ʻa e Fakamoʻuí ʻi he lotolotonga ʻo e kau Nīfaí, naʻá Ne folofola ʻe manatua ʻe he Tamai Hēvaní ʻEne fuakava ke tānaki fakataha ʻa ʻIsileli kuo fakamoveteveteʻí, pea naʻá Ne fakahā ha ngaahi fakaʻilonga ke tokoni ke tau ʻiloʻi ʻa e taimi kuo kamata ai ʻa e tānaki fakataha ʻi he ngaahi ʻaho kimui ní. Naʻá Ne fakamamafaʻi ʻa e mahuʻinga ʻo hono tauhi mo ako ʻa e folofolá pea mo e ngaahi lea ʻa e kau palōfitá. Naʻá Ne fakaʻaongaʻi ʻa e ngaahi lea ʻa Malakaí ke akoʻi ʻa e kau Nīfaí fekauʻaki mo e fono ʻo e vahehongofulú pea mo e ngaahi tāpuaki ʻo hono moʻui ʻaki ʻa e fekau ko ʻení. Naʻá Ne folofola ʻaki foki ha pōpoaki naʻá Ne ʻuluaki vahevahe mo Malakai naʻe kau ai ʻa e foki mai ʻa ʻIlaisiaá mo hono fatongia mahuʻinga ʻi he ngāue fakatemipalé mo e hisitōlia fakafāmilí.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha.

3 Nīfai 20–22

Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke nau kau ʻi hono tānaki fakataha ʻo ʻIsilelí.

• Teuteu ʻa e tokotaha akó: Fakaafeʻi ʻa e kau akó ke fakakaukau lolotonga ʻenau lau folofola fakaʻahó ki ha ngaahi founga kuo tokoniʻi ai kinautolu ʻe he Tohi ʻa Molomoná ke nau ofi ange kia Sīsū Kalaisi.

• Ngaahi Meʻá: Ko ha ʻū vaʻakau pe fanga kiʻi vaʻakau heu nifo; ko ha vaʻakau matolu mo ha foʻi faʻo pe ko ha konga ukamea kehe

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaliʻali ʻa e ʻekitivitī fakatauhoá pea ʻoange ha taimi ki he kau akó ke lau ʻa e ngaahi veesí. Hili iá peá ke fakaafeʻi ʻa e kau akó ke nau taufetongi ʻi hono fakaʻaongaʻi ʻa e konga ki he fakatātaá ke fakatauhoa ʻa e seti veesi takitaha ki hono fakamatalá. Pe fakaafeʻi ʻa e kau akó ke hiki ʻa e ngaahi tali totonú ʻo fakaʻaongaʻi ʻa e polokalama fetalanoaʻakí.

3 Nīfai 23

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ki he kau akó ke ako fakamātoato ange ʻa e ngaahi folofola ʻa e ʻEiki.

• Teuteu ʻa e tokotaha akó: Fakaafeʻi ʻa e kau akó ke fakaʻaongaʻi ha taimi ke ako ʻa e folofolá kimuʻa he lēsoni ko ʻení, ʻo tokanga makehe ki he meʻa ʻoku nau fai ʻokú ne ʻai ʻenau akó ke mahuʻingamālie angé. Poupouʻi ke nau vakaiʻi ʻa e mahuʻinga mo e tuʻunga lelei ʻo ʻenau akó pea mo e ola ʻokú ne fakahoko pe ʻikai fakahoko ʻi heʻenau moʻuí.

• Ngaahi Meʻá: Ngaahi meʻa kehekehe ke fūfuuʻi ʻi he lokí

• Fakatātā: Ko ha fakatātā ʻo e kole ʻe he Fakamoʻuí kia Nīfai ʻa e ngaahi lekōtí

• Fokotuʻu ki hono akoʻi ʻi he konifelenisi vitioó: Ke kamata ʻa e lēsoní, fakakaukau ke fakaʻaliʻali ha lisi nounou ʻo e ngaahi meʻa ʻe fiemaʻu ke fekumi ki ai ʻa e kau akó ʻi honau lokí pe falé. ʻE lava ke kau heni ha telefoni, tohi, fakatātā, ipu, pilo, sū, pe ko ha ngaahi meʻa kehe pē te nau lava ʻo maʻu. ʻOange ki he kau akó ha taimi pau (hangē ko ʻení, miniti ʻe taha), pea kole ange ke nau kumi ki he lahi taha ʻa e ʻū meʻa te nau lavá. ʻEke leva ʻa e ngaahi fehuʻi ʻoku hiki atu ʻi he kamataʻanga ʻo e lēsoní, ʻo kamata ʻaki ʻa e “ʻOku ʻuhinga ki he hā ke fekumí?”

3 Nīfai 24

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ki he kau akó ke nau ongoʻi ha loto-holi ke totongi vahehongofulú.

• Teuteu ʻa e tokotaha akó: Fakaafeʻi ʻa e kau akó ke lau ʻa e 3 Nīfai 24:8–10 pea fakakaukau ki he ngaahi aʻusia kuo nau maʻu pe kuo maʻu ʻe ha niʻihi kehe ʻi he fono ʻa e ʻEikí ki he vahehongofulú.

• Naunau maʻá e kau akó: Ngaahi tatau ʻo e konga “Lēsoni Fika 1—Ngaahi Tāpuaki Mahuʻinga kae ʻIkai Fakatokangaʻí” ʻi he David A. Bednar, “Ko e Ngaahi Matapā ʻo e Langí,” Ensign pe Liahona, Nōvema 2013, 17–18

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaliʻali ʻa e ngaahi tūkunga ʻoku hiki atu ʻi he kamataʻanga ʻo e lēsoní lolotonga hoʻo fehuʻi pe ko e fē ʻa e ngaahi tūkunga ʻoku ongoʻi ʻe he kau akó ʻoku mahuʻinga taha kiate kinautolú pea mo hono ʻuhingá. Fakaafeʻi leva ʻa e kau akó ke fakaʻaongaʻi ʻa e fetalanoaʻakí ke vahevahe ha ngaahi fehuʻi pe ngaahi meʻa ʻoku nau hohaʻa ki ai fekauʻaki mo e vahehongofulú.

3 Nīfai 25

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ki he kau akó ke nau kau atu ki he hisitōlia fakafāmilí mo e ngāue fakatemipalé.

• Teuteu ʻa e tokotaha akó: Fakaafeʻi ʻa e kau akó ke teuteu ke vahevahe fekauʻaki mo ha tokotaha kuo nau ako ki ai ʻi heʻenau hisitōlia fakafāmilí, ʻa ia ʻoku kei moʻui pe kuo pekia. Mahalo ʻe ʻaonga ki he kau akó ke talanoa mo ha mātuʻa pe kui pe fakaʻaongaʻi ʻa e polokalama FamilySearch.

• Laʻipepa Tufa: Saati tohi hohoko toʻu tangata fā

• Vitiō: “The Promised Blessings of Family History 2” (4:04)

• Fokotuʻu ki hono akoʻi ʻi he konifelenisi vitioó: Fakakaukau ke fakaʻaliʻali ʻa e saati tohi hohoko toʻu tangata faá ke hiki tatau ʻe he kau akó kae ʻoua ʻe tufa. Hili hono maʻu ʻe he kau akó ha faingamālie ke vahevahe fekauʻaki mo ha taha ʻi heʻenau hisitōlia fakafāmilí, fakakaukau ke fakaafeʻi ha tokotaha ako ke hū ki loto ki he FamilySearch.org, vahevahe ʻene screen, pea fakaʻaliʻali ha toʻu tangata ʻe fā.

Toe Vakaiʻi Hono 21 ʻo e Fakataukei Fakatokāteliné

Taumuʻa ʻo e lēsoní: ʻE ʻoatu ʻe he lēsoni ko ʻení ha faingamālie ke fakaloloto ai ʻa e mahino ʻa e kau akó mo fakamatalaʻi ʻa e ngaahi moʻoni fekauʻaki mo ha potufolofola fakataukei fakatokāteline ʻe taha pe lahi ange mei he Tohi ʻa Molomoná.

• Teuteu ʻa e tokotaha akó: Fakaafeʻi ʻa e kau akó ke omi mateuteu ke vahevahe ha lisi ʻo e meʻa ʻoku nau fai ke mahino lelei ange ai ʻa e folofolá ʻi heʻenau akó.

• Fokotuʻu ki hono akoʻi ʻi he konifelenisi vitioó: Fakakaukau ke ke fetuʻutaki ki ha niʻihi ʻo e kau akó kimuʻa he kalasí pea kole ange ke nau teuteu ke vahevahe ha talēniti pe talanoa fekauʻaki mo ha feituʻu ʻoku nau maʻu ai ha mahino lahi. Kole ange ke nau fakamatalaʻi ʻa e founga ne nau maʻu ai ʻa e mahino mo e meʻa ʻoku nau malavá. Fehuʻi pe ko e hā te nau lava ʻo fai ke hokohoko atu ai ʻenau fakalakalaka ʻi he ngaahi tafaʻaki ko iá. Kamata ʻa e kalasí ʻaki hano fakaafeʻi ke nau vahevahe.