Talamuʻakí
Siʻi fānau tangata mo fafine:
Ko ha tohi hiva ʻataʻatā pē ʻeni maʻa moutolu. Te mou lava ʻo hivaʻi kinautolu ʻi ha faʻahinga taimi mo ha feituʻu pē. Te mou lava ʻo hivaʻi ha niʻihi ʻo e ngaahi hiva ko ʻení ke fakahaaʻi hoʻomou fakamālō ki he Tamai Hēvaní, pea mo ha niʻihi ke mou fiefia ai.
ʻI hoʻomou hivá, te mou loto fiefia ai. ʻE ʻoatu ʻe he Laumālie Māʻoniʻoní ha ongoʻi māfana ke tokoniʻi kimoutolu ke mahino ko e ngaahi lea mo e ngaahi pōpoaki ʻi he ngaahi hivá ʻoku moʻoni. Te mou lava heni ʻo ako fekauʻaki mo e ongoongoleleí, pea ʻe tupulekina ai hoʻomou fakamoʻoní ʻi hoʻomou akó. ʻE faingofua ange haʻamou manatuʻi e ngaahi meʻa ne mou akó ʻo kapau te mou hiva fekauʻaki mo ia. ʻE tokoni atu ʻa e ongo ʻo ha foʻi hiva ke mou manatuʻi ai hono ngaahi leá mo fakahū ki homou lotó ʻa e laumālie ʻo e foʻi hivá. ʻE toe tokoni atu foki ʻa e ngaahi fakamatalá ke mou ʻiloʻi ʻa e meʻa ʻoku akoʻi ʻe he ngaahi foʻi hivá. Ko e taimi pē te mou maʻu ai ʻa e ngaahi hivá, ʻe ʻiate kimoutolu maʻu ai pē ia (ʻo hangē hamou ngaahi kaumeʻa mamaé) ʻo tokoni atu ke mou fai ʻa e ngaahi fili ʻoku totonú mo mou fiefia.
Ko e mūsiká ko ha faʻahinga lea ia ʻe lava ʻo mahino ki he taha kotoa pē. ʻOku hivaʻi ʻa e ngaahi hiva tata pē ʻe he fānau ʻi he funga māmaní. ʻE lava foki ʻe he mūsiká ke ne fakafehokotaki ʻa e kuo hilí mo e kahaʻú. He ʻe ʻi ai ha ʻaho te mou lava ai ke toe hivaʻi fakataha ʻa e ngaahi hivá ni mo haʻamou fānau.
ʻOku ʻi ai ha ngaahi hiva ʻi he tohí ni ki he meimei kaveinga kotoa pē ʻo e ongoongoleleí. ʻOku fakamatala ʻa e ngaahi hivá ni ki heʻetau tui fekauʻaki mo e moʻui ʻi langí; fekauʻaki mo e lotú, loto houngaʻiá, pea mo e ʻapasiá; fekauʻaki mo e ngāue ʻa e Fakamoʻuí; fekauʻaki mo e ngaahi tefitoʻi moʻoni ʻo e ongoongoleleí; mahuʻinga ʻo e ʻapí, fāmilí, mo e tukufakaholó; fekauʻaki mo e fakaʻofoʻofa ʻo natulá mo e ngaahi faʻahitaʻú; pea mo e fiemaʻu ʻo ha fiefia mo e ngaahi ʻekitivitií.
Te mou hoko ha ʻaho ko ha kau taki ʻi he Siasí mo e māmaní. Ko e ngaahi meʻa te mou ako mei he ngaahi hiva ko ʻení te ne tokoniʻi kimoutolu ke mou faitotonu mo ngāue ʻi he māʻoniʻoni. Ko e ngaahi ongo lelei ko ia ʻoku ʻomi ʻe he ngaahi hivá te ne ʻoatu ha fiefia mo ha loto lahi pea mo tokoni atu ke mou manatuʻi ko e fānau kimoutolu ʻa e ʻOtuá.