Pagkakabig Mao ang Atong Tumong

Ang katuyoan sa tanang pagkat-on ug pagtudlo sa ebanghelyo mao ang pagpalig-on sa atong pagkakabig ug sa pagtabang kanato nga mas mahisama ni Jesukristo. Tungod niini nga rason, kon magtuon kita sa ebanghelyo, wala lamang kita mangita og bag-ong impormasyon; gusto kitang mahimong “bag-o [nang] binuhat” (2 Mga Taga-Corinto 5:17). Nagpasabot kini sa pagsalig diha sa Langitnong Amahan ug ni Jesukristo aron matabangan kita sa pag-usab sa atong mga kasingkasing, sa atong mga pagtan-aw, sa atong mga lihok, ug sa ato gayod nga mga kinaiya.

Apan ang matang sa pagkat-on sa ebanghelyo nga makapalig-on sa atong hugot nga pagtuo ug modangat ngadto sa milagro sa pagkakabig dili tingob nga mahitabo sa usa ka higayon. Molapas pa kini sa lawak-klasehanan ngadto sa kasingkasing sa indibidwal ug sa panimalay. Nagkinahanglan kini og kanunay, inadlaw-adlaw nga mga paningkamot sa pagsabot ug sa pagpuyo sa ebanghelyo. Ang tinuod nga pagkakabig nagkinahanglan sa impluwensiya sa Espiritu Santo.

Ang Espiritu Santo naggiya kanato ngadto sa kamatuoran ug nagsaksi niana nga kamatuoran (tan-awa sa Juan 16:13). Naglamdag Siya sa atong mga hunahuna, nagpaabtik sa atong mga salabotan, ug nagtandog sa atong mga kasingkasing uban sa pagpadayag gikan sa Dios, ang tinubdan sa tanang kamatuoran. Ang Espiritu Santo nagputli sa atong mga kasingkasing. Nagdasig Siya kanato og tinguha sa pagpuyo pinaagi sa kamatuoran, ug naghunghong Siya kanato og mga paagi sa pagbuhat niini. Sa tinuod, “ang Espiritu Santo … magatudlo [kanato] sa tanang butang” (Juan 14:26).

Tungod niini nga mga rason, sa atong mga paningkamot sa pagpuyo, pagkat-on, ug pagtudlo sa ebanghelyo, kita kinahanglan una ug labaw sa tanan magtinguha sa pakig-uban sa Espiritu. Kini nga tumong kinahanglang modumala sa atong mga pagpili ug mogiya sa atong mga hunahuna ug mga lihok. Kinahanglan nga tinguhaon nato ang bisan unsa nga nagdapit sa impluwensiya sa Espiritu ug sa pagsalikway sa bisan unsa nga moabog niana nga impluwensiya palayo—kay nasayod kita nga kon makahimo kita sa pagpakatakos sa presensiya sa Espiritu Santo, makahimo usab kita nga magpakabuhi nga takos diha sa presensiya sa Langitnong Amahan ug sa Iyang Anak, si Jesukristo.