Paggamit sa Dali, Sunod Kanako—Alang sa Panimalay ug sa Simbahan

Alang Kang Kinsa Kini nga Kapanguhaan?

Kini nga kapanguhaan alang ni bisan kinsa nga gustong makakat-on gikan sa Basahon ni Mormon—sa indibidwal nga paagi, isip usa ka pamilya, ug diha sa mga klase sa Simbahan. Kon wala ka makatuon sa mga kasulatan sa regular nga paagi kaniadto, kini nga kapanguhaan makatabang kanimo sa pagsugod. Kon ikaw aduna nay maayo nga nabatasan na nga pagtuon sa ebanghelyo, kini nga kapanguhaan makatabang kanimo nga makabaton og mas makahuluganong mga kasinatian.

Mga Indibidwal ug Mga Pamilya Diha sa Panimalay

Ang labing nindot nga dapit sa pagkat-on sa ebanghelyo mao ang panimalay. Ang imong mga magtutudlo sa simbahan makasuporta kanimo, ug makakuha ka og pagdasig gikan sa ubang mga miyembro sa ward. Apan aron espirituhanong makasugakod, ikaw ug ang imong pamilya nagkinahalan og inadlaw-adlaw nga pagpabaskog gikan sa “maayo nga pulong sa Dios” (Moroni 6:4; tan-awa usab sa Russell M. Nelson, “Pasiuna nga Pakigpulong,” Liahona, Nob. 2018, 6–8).

Gamita kini nga kapanguhaan sa bisan unsang paagi nga makatabang kanimo. Ang mga latid naghatag og gibug-aton sa pipila ka mahangtoron nga mga kamatuoran nga makita diha sa Basahon ni Mormon ug nagsugyot og mga ideya ug mga kalihokan aron sa pagtabang kanimo sa pagtuon sa mga kasulatan sa indibidwal nga paagi, uban sa imong pamilya, o uban sa mga higala. Samtang magtuon ka, sunda ang giya sa Espiritu aron makakaplag og mahangtoron nga mga kamatuoran nga makahuloganon kanimo. Pangitaa ang mga mensahe sa Dios alang kanimo, ug sunda ang mga pag-aghat nga imong madawat.

Mga Magtutudlo ug mga Tigkat-on diha sa Simbahan

Kon ikaw nagtudlo og usa ka klase sa Primary, klase sa Sunday School sa kabatan-onan o hamtong, klase sa korum sa Aaronic nga Pagkapari, o sa Young Woman, giawhag ka sa paggamit sa mga latid niini nga kapanguhaan samtang mangandam ka nga motudlo. Ang Dali, Sunod Kanako—Alang sa Panimalay ug sa Simbahan mao ang kurikulum alang sa imong klase sa Dominggo. Ang mga ideya sa pagkat-on niini nga kapanguhaan gidesinyo alang sa pagkat-on sa panimalay ug sa simbahan. Samtang mangandam ka sa pagtudlo, sugdi pinaagi sa pag-angkon og kaugalingon nimong mga kasinatian diha sa mga kasulatan. Ang imong labing importante nga pagpangandam mahitabo samtang magsiksik ka sa mga kasulatan ug magtinguha sa inspirasyon sa Espiritu Santo. Pangitaa ang mahangtoron nga mga kamatuoran nga makatabang kanimo nga mahimong mas mahisama sa Langitnong Amahan ug ni Jesukristo. Ang Dali, Sunod Kanako makatabang kanimo sa pag-ila sa pipila niini nga mga kamatuoran ug makasabot sa konteksto sa mga kasulatan.

Hinumdomi nga ang pagkat-on sa ebanghelyo, sa labing maayo nga paagi niini, nakasentro sa panimalay ug gisuportahan sa Simbahan. Sa laing pagkasulti, ang imong nag-unang responsibilidad mao ang pagsuporta sa mga tawo nga imong gitudloan diha sa ilang mga paningkamot nga makakat-on ug mosunod sa ebanghelyo diha sa panimalay. Hatagi sila og mga oportunidad sa pagpakigbahin sa ilang mga kasinatian, mga hunahuna, ug mga pangutana mahitungod sa mga tudling sa kasulatan. Dapita sila sa pagpakigbahin sa mahangtoron nga mga kamatuoran nga ilang nakit-an. Mas importante kini kay sa paghisgot og piho nga gidaghanon sa materyal.

Primary

Ang imong pagpangandam sa pagtudlo sa Primary magsugod samtang ikaw personal nga magtuon sa Basahon ni Mormon ug uban sa imong pamilya. Samtang buhaton nimo, mahimong bukas alang sa espirituhanon nga mga impresyon ug mga panabot gikan sa Espiritu Santo mahitungod sa mga bata diha sa imong klase sa Primary. Pagmainampoon, ug ang Espiritu makadasig kanimo og mga ideya sa pagtabang kanila nga makakat-on sa ebanghelyo ni Jesukristo.

Samtang mangandam ka sa pagtudlo, mahimong makaangkon ka og dugang nga inspirasyon pinaagi sa pagsuhid sa mga ideya sa pagtudlo niini nga kapanguhaan. Ang matag latid sa Dali, Sunod Kanako—Alang sa Panimalay ug sa Simbahan adunay usa ka seksiyon nga giulohan og “Mga Ideya sa Pagtudlo sa mga Anak.” Hunahunaa kini nga mga ideya isip mga sugyot nga mogiya kanimo ngadto sa mga ideya nga makaaghat og inspirasyon. Nakaila ka sa mga bata diha sa imong klase sa Primary—ug mas mailhan pa nimo sila samtang ikaw makig-interaksiyon kanila diha sa klase. Ang Dios nakaila usab kanila, ug Siya modasig kanimo sa labing maayo nga mga paagi sa pagtudlo ug pagpanalangin kanila.

Posible nga ang mga bata diha sa imong klase nakahimo na sa pipila ka kalihokan diha sa Dali, Sunod Kanako uban sa ilang mga pamilya. OK ra kana. Ang pagbalik-balik maayo. Ikonsiderar ang pagdapit sa mga bata sa pagpakigbahin sa usag usa sa unsay ilang nakat-onan sa panimalay—hinuon kinahanglan usab kang magplano og mga paagi alang sa mga bata nga mosalmot bisan kon sila wala magkat-on sa panimalay. Ang mga bata mas epektibong makakat-on sa mga kamatuoran sa ebanghelyo kon kini nga mga kamatuoran ibalik-balik sa pagtudlo pinaagi sa lainlaing kalihokan. Kon imong makita nga ang usa ka kalihokan sa pagkat-on epektibo alang sa mga bata, ikonsiderar ang pagbalik-balik niini, ilabi na kon nagtudlo ka sa mas gagmay nga mga bata. Mahimo usab nimong rebyohon ang usa ka kalihokan gikan sa miaging leksiyon.

Sa mga bulan nga adunay lima ka Dominggo, ang mga magtutudlo sa Primary giawhag sa pagpuli sa gieskedyul nga latid sa Dali, Sunod Kanako sa ikalima nga Dominggo sa usa o dugang pa nga mga kalihokan sa pagkat-on diha sa “Apendiks B: Alang sa Primary—Pag-andam sa mga Bata nga Maanaa sa Dalan sa Pakigsaad sa Dios sa Tibuok Kinabuhi.”

Mga Klase sa Sunday School sa Kabatan-onan ug sa mga Hamtong

Usa sa nag-unang rason nganong magtapok kita diha sa mga klase sa Sunday School mao ang pagsuporta ug pag-awhag sa usag usa samtang maningkamot kita sa pagsunod ni Jesukristo. Usa ka yano nga paagi sa pagbuhat niini mao ang pagpangutana og sama sa “Unsa ang gitudlo sa Espiritu Santo kanimo niining semanaha samtang nagtuon ka sa Basahon ni Mormon uban sa Dali, Sunod Kanako?” Ang mga tubag niini nga pangutana mahimong mosangpot ngadto sa makahuloganon nga mga panaghisgotan nga mopalambo sa hugot nga pagtuo diha ni Jesukristo ug sa Iyang ebanghelyo.

Dayon mahimo kang modapit og panaghisgotan base sa mga sugyot sa pagtuon diha sa Dali, Sunod Kanako. Sama pananglit, usa ka ideya sa pagtuon mahimong mosugyot sa pagsiksik sa Alma 36 ug sa paghimo og usa ka lista sa mga pulong nga nagtudlo mahitungod sa papel sa Manluluwas sa paghinulsol. Mahimo nimong hangyoon ang mga sakop sa klase sa pagpakigbahin ug paghisgot mahitungod sa mga pulong nga ilang makit-an. O mahimo kang mogahin og panahon nga magdungan sa paghimo og lista isip usa ka klase.

Mga Klase sa Korum sa Aaronic nga Pagkapari ug sa Young Women

Kon ang mga klase sa mga korum sa Aaronic nga Pagkapari ug sa Young Women magtagbo sa Dominggo, ang ilang katuyoan medyo lahi sa usa ka klase sa Sunday School. Agig dugang sa pagtabang sa usag usa sa pagkat-on sa ebanghelyo ni Jesukristo, kini nga mga grupo magtagbo usab aron sa pagtinambagay mahitungod sa pagtuman sa buhat sa kaluwasan ug kahimayaan (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 1.2). Buhaton nila kini ubos sa direksiyon sa mga kapangulohan sa klase ug korum.

Alang niini nga rason, ang matag miting sa korum o klase kinahanglang magsugod sa usa ka sakop sa kapangulohan sa korum o klase nga mangulo og panaghisgotan mahitungod sa mga paningkamot, sama pananglit, sa pagsunod sa ebanghelyo, pagpangalagad ngadto sa mga tawo nga nanginahanglan, pagpakigbahin sa ebanghelyo, o pag-apil sa buhat sa templo ug sa family history.

Human niini nga panahon sa pagtinambagay sa usag usa, usa ka magtutudlo ang mangulo sa klase o korum sa magkaubang pagkat-on sa ebanghelyo. Ang hamtong nga mga lider o mga sakop sa klase o korum mahimong sangonan nga motudlo. Ang kapangulohan sa klase o korum, nga nakigtambag sa hamtong nga mga lider, maoy mohimo niini nga mga assignment.

Ang mga tawo nga gisangonan nga motudlo kinahanglang mangandam pinaagi sa paggamit sa mga sugyot sa pagkat-on diha sa sinemana nga latid sa Dali, Sunod Kanako. Sa matag latid, kini nga icon nagpasabot og kalihokan nga espesyal nga may kalabotan sa kabatan-onan. Apan, bisan asa sa mga sugyot diha sa latid ang mahimong gamiton isip usa ka kalihokan sa pagkat-on alang sa kabatan-onan.

Alang sa usa ka sampol sa butang nga tukionon [agenda] alang sa mga miting sa korum ug klase, tan-awa sa apendiks D.