Enero 1–7: Lain nga Tugon ni Jesukristo

Pasiuna nga mga Pahina sa Basahon ni Mormon

Sa dili pa kamo mosugod sa 1 Nephi kapitulo 1, inyong mabantayan nga ang Basahon ni Mormon dili ordinaryo nga basahon. Ang pasiuna nga mga pahina niini naghulagway og usa ka nangagi na nga istorya nga dili sama sa uban—lakip sa mga pagbisita sa mga anghel, usa ka karaan nga rekord nga gilubong sa gatosan na ka tuig diha sa daplin sa bungtod, ug ang usa ka batan-ong lalaki nga naghubad sa rekord pinaagi sa gahom sa Dios. Ang Basahon ni Mormon dili lamang usa ka kasaysayan sa karaan nga mga sibilisasyon sa Amerika. Kini nagtinguha sa pagkombinser sa tanan “nga si Jesus mao ang Kristo” (ulohan nga pahina sa Basahon ni Mormon), ug ang Dios Mismo ang mimando kon sa unsang paagi kini gisulat, gitagana, ug nahimo nga anaa ngari kanato. Niining tuiga, samtang kamo magbasa sa Basahon ni Mormon, mag-ampo mahitungod niini, ug mogamit sa mga pagtulon-an niini, kamo magdapit sa gahom sa Manluluwas nganha sa inyong kinabuhi. Ug mahimong mabati ninyo nga madasig sa pagsulti, sama sa gibuhat sa Tulo ka Saksi diha sa ilang pagpamatuod, “Kini kahibulongan sa [akong] mga mata.”

Mga Ideya alang sa Pagkat-on diha sa Panimalay ug sa Simbahan

Ulohan nga pahina sa Basahon ni Mormon

Ang pagtuon sa Basahon ni Mormon makapalig-on sa akong pagtuo kang Jesukristo.

Ang ulohan nga pahina sa Basahon ni Mormon naghatag og labaw pa kay sa ulohan lamang. Tali sa ubang mga butang, naglista kini sa pipila ka katuyoan niining sagrado nga rekord. Pangitaa kini nga mga katuyoan diha sa ulohan nga pahina. Ang mga pangutana sama niini makatabang kaninyo samtang kamo mamalandong: Kon nganong kita adunay Basahon ni Mormon? Sa unsang paagi ang Basahon ni Mormon lahi gikan sa uban nga mga basahon?

Karon lagmit mahimong usa ka maayong panahon sa paghimo og personal o plano sa pamilya aron magbasa sa Basahon ni Mormon niining tuiga. Kanus-a ug asa ninyo kini basahon? Unsaon ninyo sa pagdapit ang Espiritu ngadto sa inyong pagtuon? Aduna pa bay butang nga piho ninyong pangitaon samtang kamo magtuon? Pananglitan, mahimo kamong mangita sa mga tudling nga nagtuman sa mga katuyoan nga inyong makit-an diha sa ulohan nga pahina. Kamo mahimong magtipig og lista sa mga bersikulo nga makapalig-on sa inyong hugot nga pagtuo ni Jesukristo.

Tan-awa usab sa 2 Nephi 25:26; Mosiah 3:5–8; Alma 5:48; 7:10–13; Helaman 5:12; 3 Nephi 9:13–18; 11:6–14; Moroni 10:32–33.

Usa ka propetikanhong saad. Si Presidente Russell M. Nelson miingon, “Mosaad ako kaninyo nga kon mamalandong kamo unsay inyong gitun-an [sa Basahon ni Mormon], ang mga bintana sa langit mobukas, ug makadawat kamo sa mga tubag sa inyong mga pangutana ug direksyon sa inyong kinabuhi” (“Ang Basahon ni Mormon: Unsa Kaha ang Imong Kinabuhi Kon Wala Kini?,” Liahona, Nob. 2017, 62).

Pasiuna ngadto sa Basahon ni Mormon; ”Ang Pagpamatuod sa Tulo ka mga Saksi”; “Ang Pagpamatuod sa Walo ka mga Saksi”

Ako mahimo nga mosaksi sa Basahon ni Mormon.

Ang Espiritu Santo makapamatuod nganha kaninyo nga ang Basahon ni Mormon tinuod, bisan og kamo wala makakita sa bulawan nga mga palid sama sa nakita sa Tulo ka Saksi ug sa Walo ka Saksi. Samtang inyong basahon ang ilang mga pulong, hunahunaa kon sa unsang paagi ang ilang mga pagpamatuod nakapalig-on sa inyong pagpamatuod.

Unsa ang nakapadasig kaninyo mahitungod sa paagi nga kining mga saksi mipakigbahin sa ilang mga pagpamatuod sa Basahon ni Mormon? Pamalandongi kon unsaon ninyo sa pagpakigbahin ang inyong pagpamatuod sa Basahon ni Mormon—ilabi na sa saksi niini kang Jesukristo. Pananglitan, hunahunaa nga kamo nakig-istorya sa usa ka higala nga wala pa gayod sukad makadungog mahitungod sa Basahon ni Mormon. Unsa man ang inyong isulti kaniya mahitungod niini? Unsaon ninyo sa pagsulay og dasig ang inyong higala sa pagbasa niini? Ikonsiderar ang pagrebyo sa Pasiuna sa Basahon ni Mormon. Mahimong makakita kamo og mga detalye didto nga mahimong mapuslanon nga ipakigbahin sa inyong higala.

• Unsa ang Basahon ni Mormon?

  This video sums up the Book of Mormon in 60 seconds. It answers the questions, “What is the Book of Mormon?” “When did it take place?” “Who is in it?” and “Why is it another book of scripture and testament of Jesus Christ?”

Ikonsiderar ang paghimo og lista sa mga butang nga inyong ipakigbahin uban sa usa ka higala mahitungod sa Basahon ni Mormon. Sulayi sa pagpakigbahin ang Basahon ni Mormon gamit ang Basahon ni Mormon nga app.

Tan-awa usab sa Ronald A. Rasband, “Karong Adlawa,” Liahona, Nob. 2022, 25–28; Gospel Library; “Ang Anghel nga Gikan sa Kalangitan,” Mga Himno, nu. 11.

Ang Tulo ka mga Saksi mipamatuod bahin sa Basahon ni Mormon.

“Ang Pagpamatuod ni Propeta Joseph Smith”

Ang pagtungha sa Basahon ni Mormon usa ka milagro.

Kon usa ka tawo mangutana kaninyo kon diin gikan ang Basahon ni Mormon, unsay inyong isulti? Unsaon ninyo paghulagway sa kalambigitan sa Dios diha sa paghatag kanato sa Basahon ni Mormon? Samtang kamo mobasa sa pagpamatuod ni Joseph Smith, hatagi og pagtagad kon giunsa niya kini sa paghulagway. Base sa unsay inyong nabasa, unsa kaha ang gibati sa Dios mahitungod sa kaimportante sa Basahon ni Mormon?

Tan-awa usab sa Ulisses Soares, “Ang Pagtungha sa Basahon ni Mormon,” Liahona, Mayo 2020, 32–35; Mga Santos, vol. 1, Ang Sumbanan sa Kamatuoran, 21–30.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Ideya sa Pagtudlo sa mga Anak

Ulohan nga pahina sa Basahon ni Mormon

Ang pagbasa sa Basahon ni Mormon makatabang kanako nga makabaton og hugot nga pagtuo ni Jesukristo.

• Tugoti ang inyong mga anak nga motan-aw ug mogunit og usa ka kopya sa Basahon ni Mormon. Tabangi sila nga motumong sa subtitle, Laing Tugon ni Jesukristo. Mahimo usab ninyo silang matabangan sa pagpangita, sa ulohan nga pahina, sa hugpong sa mga pulong nga si Jesus mao ang Kristo, ang Dios sa Kahangtoran, nagpaila sa iyang kaugalingon ngadto sa tanan nga mga nasod.” Tabangi sila nga makasabot nga kini nagpasabot nga ang Basahon ni Mormon nagtudlo kanato mahitungod ni Jesukristo. Sultihi sila kadiyot kon sa unsang paagi ang Basahon ni Mormon nakapalig-on sa inyong hugot nga pagtuo diha ni Jesukristo. Mahimo usab ninyo silang pangutan-on mahitungod sa ilang paborito nga mga istorya sa Basahon ni Mormon. Ang pagkanta sa “Mga Istorya sa Basahon ni Mormon” (Songbook sa mga Bata, 62) mahimong makapahinumdom nila sa pipila niining mga istorya.

Pasiuna sa Basahon ni Mormon

Ang Basahon ni Mormon mao ang sukaranan sa atong tinuohan.

• Ang pahina sa kalihokan niining semanaha ug ang imahe sa ubos makatabang sa inyong mga anak nga makasabot niining mga pulong ni Joseph Smith diha sa pasiuna sa Basahon ni Mormon: “Ang Basahon ni Mormon [mao] ang sukaranan sa atong tinuohan.” Tingali makalingaw usab ang paghimo o pagdrowing og usa ka arko nga adunay bato sa pamag-ang sa ibabaw. Unsa kahay mahitabo kon tangtangon ang sukaranang bato? Unsay mahitabo kon kita wala makabaton sa Basahon ni Mormon? Mahimong mag-uban kamo sa pagbasa sa kataposan nga parapo sa pasiuna aron sa pagsuta kon unsa pa ang atong makat-onan kon kita modawat sa kamatuoran sa Basahon ni Mormon. Sa unsa nga paagi nga atong mahimo ang Basahon ni Mormon nga sukaranang bato sa atong hugot nga pagtuo kang Jesukristo?

Ang Basahon ni Mormon mao ang sukaranan sa atong tinuohan.

“Ang Pagpamatuod sa Tulo ka mga Saksi”; “Ang Pagpamatuod sa Walo ka mga Saksi”

Ako mahimo nga mosaksi sa Basahon ni Mormon.

• Aron matabangan ang inyong mga anak nga makasabot kon unsa ang kahulogan nga mahimong usa ka saksi, mahimo ninyo nga ihulagway ang butang nga inyong nakita nga wala nila nakita. Dayon tugoti silang mobuhat sa ingon alang kaninyo. Kini mahimong mosangpot ngadto sa usa ka panag-istoryahanay sa 11 ka tawo nga nakakita sa bulawan nga mga palid diin ang Basahon ni Mormon nahubad. Samtang kamo mag-uban sa pagbasa sa mga pagpamatuod, makahisgot kamo kon nganong kining mga saksi gusto nga masayod ang uban nga mga tawo mahitungod sa ilang mga pagpamatuod. Ngano nga gusto natong mosulti mahitungod sa Basahon ni Mormon?

“Ang Pagpamatuod ni Propeta Joseph Smith”

Ang Basahon ni Mormon gihatag kanato pinaagi sa gahom sa Dios.

• Aron matabangan ang inyong mga anak nga makat-on kon giunsa sa Dios sa paghatag kanato sa Basahon ni Mormon, mahimo ninyong basahon ang mga tipik sa “Ang Pagpamatuod ni Propeta Joseph Smith” ngadto nila. Mahimo usab ninyong gamiton ang “Kapitulo 1: Giunsa Nato Pagkuha ang Basahon ni Mormon” (diha sa Mga Sugilanon sa Basahon ni Mormon, 2–4). Tingali malingaw ang inyong mga anak nga idrama-drama ang istorya sa pipila ka higayon.

Alang sa dugang nga mga ideya, tan-awa ang isyu karong bulana sa Higala nga magasin.

Moroni Delivers the Golden Plates [Moroni Naghatag sa Bulawan nga mga Palid], ni Gary L. Kapp