Ang Pagpamatuod sa Tulo ka Saksi

Angay nga mahibaloan sa tanang kanasoran, kaliwatan, pinulongan, ug katawhan, ngadto kang kinsa kini nga buhat moabot: Nga kami, pinaagi sa grasya sa Dios nga Amahan, ug sa atong Ginoong Jesukristo, nakakita sa mga palid nga naglangkob niini nga talaan, nga mao ang talaan sa katawhan ni Nephi, ug usab sa mga Lamanita, nga ilang kaigsuonan, ug usab sa katawhan ni Jared, kinsa miabot gikan sa tore nga gihisgotan. Ug kami nasayod usab nga gihubad kini pinaagi sa gasa ug gahom sa Dios, kay ang iyang tingog namahayag niini ngari kanamo; mao nga nahibalo kami uban sa kaseguroan nga ang buhat tinuod. Ug kami magpamatuod usab nga kami nakakita sa mga kinulit nga diha sa mga palid; ug kini gipakita ngari kanamo pinaagi sa gahom sa Dios, ug dili sa tawo. Ug kami mamahayag pinaagi sa mga pulong nga maligdong, nga usa ka anghel sa Dios mikunsad gikan sa langit, ug iya kining gidala ug gipahiluna atubangan sa among mga mata, nga kami nakasud-ong ug nakakita sa mga palid, ug sa mga kinulit diha niini; ug kami nahibalo nga pinaagi sa grasya sa Dios nga Amahan, ug sa atong Ginoo nga si Jesukristo, nga kami nakasud-ong ug mopamatuod nga kini nga mga butang tinuod. Ug kahibulongan kini sa among mga mata. Bisan pa niana, ang tingog sa Ginoo nagmando kanamo nga kami mopamatuod niini; mao nga, aron magmasulondon sa mga sugo sa Dios, kami mopamatuod niini nga mga butang. Ug kami nasayod nga kon magmatinud-anon kami kang Kristo, dili kami manubag sa mga sala sa katawhan, ug makaplagan kami nga walay lama sa atubangan sa hukmanan ni Kristo, ug makapuyo sa kahangtoran uban kaniya sa kalangitan. Ug ang pasidungog maadto sa Amahan, ug sa Anak, ug sa Espiritu Santo, nga usa ka Dios. Amen.