Mubo nga Pagpasabot mahitungod sa Basahon ni Mormon

Ang Basahon ni Mormon usa ka sagrado nga talaan sa katawhan sa karaan nga Amerika ug nakulit sa mga palid nga metal. Ang mga tinubdan diin kini nga talaan gitigom naglakip sa mosunod:

Ang mga Palid ni Nephi, nga adunay duha ka matang: ang gagmay nga mga palid ug ang dagko nga mga palid. Ang nahauna kadaghanan pihong gigahin alang sa espirituhanon nga mga butang ug sa pagpangalagad ug sa mga pagtulon-an sa mga propeta, samtang ang naulahi naghisgot kasagaran sa kalibotanon nga kasaysayan sa katawhan nga nahingtungdan (1 Nephi 9:2–4). Hinoon, gikan sa panahon ni Mosiah, ang dagko nga mga palid naglakip usab sa mga butang nga mahinungdanon kaayo sa espirituhanon nga paagi.
Ang mga Palid ni Mormon, nga naglakip sa minubo nga asoy nga gihimo ni Mormon gikan sa dagko nga mga palid ni Nephi, nga adunay daghan nga komentaryo. Kini nga mga palid naglakip usab og usa ka sumpay sa kasaysayan nga gihimo ni Mormon ug sa mga gidugang nga gihimo sa iyang anak nga si Moroni.
Ang mga Palid ni Ether, nga naghulagway sa kasaysayan sa mga Jaredita. Kini nga rekord gipamubo ni Moroni, kinsa misukip og iyang kaugalingon nga mga komentaryo ug gilakip ang talaan ngadto sa kinatibuk-an nga kasaysayan ubos sa ulohan nga “Basahon ni Ether.”
Ang mga Palid nga Tumbaga nga gidala sa katawhan ni Lehi gikan sa Jerusalem niadtong 600 B.C. Naglangkob kini “sa lima ka libro ni Moises, … ug usab sa talaan sa mga Judeo gikan sa sinugdanan, … hangtod sa pagsugod sa paghari ni Sedekias, hari sa Juda; ug usab sa mga panagna sa balaan nga mga propeta” (1 Nephi 5:11–13). Daghan nga kinutlo gikan niini nga mga palid, nga nagkutlo ni Isaias ug sa uban pa nga biblikanhon ug dili biblikanhon nga mga propeta, makita sa Basahon ni Mormon.

Ang Basahon ni Mormon naglangkob sa napulo ug lima ka labing mahinungdanon nga mga bahin o mga dibisyon, nga nailhan, gawas sa usa, isip mga basahon, sa kasagaran nagdala sa ngalan sa tagsulat niini. Ang una nga bahin (ang nag-una nga unom ka libro, nga nagtapos sa Omni) usa ka hubad gikan sa gagmay nga mga palid ni Nephi. Natung-an sa mga basahon ni Omni ug Mosiah mao ang sinukip nga gitawag og Mga Pulong ni Mormon. Kini nga sinukip nagsumpay sa talaan nga gikulit diha sa gagmay nga mga palid ug sa minubo nga asoy nga gihimo ni Mormon sa dagko nga mga palid.

Ang labing taas nga bahin, gikan sa Mosiah hangtod sa kapitulo 7 sa Mormon, usa ka hubad sa minubo nga asoy nga gihimo ni Mormon sa dagko nga mga palid ni Nephi. Ang panapos nga bahin, gikan sa kapitulo 8 sa Mormon ngadto sa kataposan sa mao nga basahon, gikulit sa anak ni Mormon nga si Moroni, kinsa, human makatapos sa talaan sa kinabuhi sa iyang amahan, mihimo og minubo nga asoy sa talaan sa Jaredita (isip ang basahon ni Ether) ug sa wala madugay midugang sa mga bahin nga nailhan nga basahon ni Moroni.

Sa tuig o sa gibanabana nga A.D. 421, si Moroni, ang kataposan sa Nephita nga mga propetang-tigsaysay, miselyo sa sagrado nga talaan ug mitipig niini ngadto sa Ginoo, aron ipagawas sa ulahing mga adlaw, sigon sa gitagna pinaagi sa pulong sa Dios pinaagi sa Iyang karaan nga mga propeta. Sa tuig A.D. 1823, kini nga mao gihapon nga Moroni, nga nianang higayona usa na ka nabanhaw nga binuhat, miduaw ni Propeta Joseph Smith ug sa wala madugay mitugyan ngadto kaniya sa kinulit nga mga palid.

Mahitungod niini nga edisyon: Ang orihinal nga ulohan nga pahina, nga gisundan sa pahina sa mga sulod, gikuha gikan sa mga palid ug kini kabahin sa sagrado nga teksto. Ang mga pasiuna nga dili pinahandag ang pagkasulat, sama sa anaa sa 1 Nephi ug dayon sa gisundan sa Mosiah kapitulo 9, kabahin usab sa sagrado nga teksto. Ang mga pasiuna nga pinahandag ang pagkasulat, sama sa anaa sa mga ulohan sa mga kapitulo, dili orihinal nga mga teksto kondili mga tabang alang sa pagtuon nga gilakip alang sa mas sayon nga pagbasa.

Ang pipila sa ginagmay nga mga sayop sa teksto napadayon sa miaging mga edisyon sa Basahon ni Mormon nga gimantala sa Iningles. Kini nga edisyon naglangkob sa mga pagkorihir nga nakita nga angay aron mahiuyon ang materyal sa wala pa mamantala nga mga manuskrito ug sa nag-unang mga edisyon nga giusab ni Propeta Joseph Smith.