“Enero 22–28: ‘Gisangkapan sa Katarong ug uban sa Gahom sa Dios.’” 1 Nephi 11–15,” Dali, Sunod Kanako—Alang sa Panimalay ug sa Simbahan: Basahon ni Mormon 2024 (2024)
“Enero 22–28. 1 Nephi 11–15,” Dali, Sunod Kanako—Alang sa Panimalay ug sa Simbahan: 2024 (2024)
The Love of God [Ang Gugma sa Dios], ni Sabrina Squires
Enero 22–28: “Gisangkapan sa Katarong ug uban sa Gahom sa Dios”
1 Nephi 11–15
Kon ang Dios adunay dakong trabaho nga Iyang ipabuhat sa Iyang propeta, sa kasagaran mohatag Siya niana nga propeta og usa ka dako nga panan-awon. Sila si Moises, Juan, Lehi, ug Joseph Smith tanan nakadawat og mga panan-awon sama niana—mga panan-awon nga mipalugway sa ilang mga hunahuna ug mitabang kanila nga makakita kon unsa gayod ka talagsaon ug hilabihan ka makapadasig sa buhat sa Dios.
Si Nephi usab aduna niining makapausab sa kinabuhi nga mga panan-awon. Siya nakakita sa pagpangalagad sa Manluluwas, sa umaabot nga kaliwatan ni Lehi diha sa gisaad nga yuta, ug sa padulngan sa buhat sa Dios sa ulahing adlaw. Human niini nga panan-awon, si Nephi mas naandam alang sa buhat nga anaa sa umaabot. Ug ang pagbasa mahitungod niining panan-awon makatabang ninyo nga makaandam usab—tungod kay ang Dios usab adunay buhat nga gusto Niya nga inyong buhaton sa Iyang gingharian. Kamo kauban “sa mga santos sa simbahan sa Kordero” nga nakita ni Nephi, “kinsa nagkatibulaag diha sa ibabaw sa tibuok yuta; ug sila gisangkapan sa katarong ug uban sa gahom sa Dios sa dako nga himaya” (1 Nephi 14:14).
Tan-awa usab sa “Si Nephi Nakakita og Panan-awon sa Umaabot nga mga Hitabo” (bidyo), Gospel Library.
Si Nephi Nakakita og Panan-awon sa Umaabot nga mga Hitabo | 1 Nephi 10–15
Si Nephi, usa ka karaang propeta sa Dios gikan sa Jerusalem ug Karaang Amerika, gidala ngadto sa layo nga panan-awon sa umaabot nga mga hitabo, nga susama niadtong sa iyang amahan, nga si Lehi ug giubanan sa anghel sa Ginoo.
Mga Ideya alang sa Pagkat-on diha sa Panimalay ug sa Simbahan
Gipadala sa Dios si Jesukristo isip usa ka pahayag sa Iyang gugma.
Sa dihang si Nephi nangutana sa anghel mahitungod sa kahulogan sa kahoy diha sa panan-awon ni Lehi, ang anghel yano nga miingon, “Kini nagrepresentar sa gugma sa Dios” Hinoon, siya mipakita ni Nephi og sunod-sunod nga mga simbolo ug mga panghitabo gikan sa kinabuhi sa Manluluwas. Pangitaa kini nga mga simbolo ug mga panghitabo samtang kamo mobasa ug mamalandong sa 1 Nephi 11. Unsa ang inyong nakit-an nga makatabang ninyo nga makasabot nganong si Jesukristo mao ang kinadak-an nga pagpahayag sa gugma sa Dios?
Sa unsa nga paagi nga ang Manluluwas nagtabang kaninyo nga mobati sa gugma sa inyong Langitnong Amahan?
Tan-awa usab sa Susan H. Porter, “Ang Gugma sa Dios: Ang Labing Hingpit nga Kalipay sa Kalag,” Liahona, Nob. 2021, 33–35.
Ako mahimong “gisangkapan sa katarong” ug gahom.
Si Nephi wala makaabot sa pagsaksi sa kadaghanan sa unsay iyang nakita diha sa iyang panan-awon. Ngano kaha nga bililhon alang ni Nephi nga masayod niining mga butanga? Ngano nga bililhon alang kaninyo nga masayod niini? Ipangutana kini sa matag higayon nga kamo magbasa mahitungod sa butang nga nakita ni Nephi diha sa iyang panan-awon (tan-awa sa 1 Nephi 12–14). Unsa nga mga panghunahuna ang inyong nadawat mahitungod sa inyong katungdanan diha sa “mahinungdanon ug … kahibulongan nga buhat” sa Ginoo? (1 Nephi 14:7). Unsa ang pipila ka mahinungdanon nga mga butang nga Iyang gibuhat alang kaninyo?
Paghunahuna ilabi na sa saad diha sa 1 Nephi 14:14. Giunsa sa Manluluwas sa pagtuman niini nga saad diha sa inyong kinabuhi? (Alang sa pipila ka ehemplo, tan-awa sa David A. Bednar, “Uban sa Gahom sa Dios sa Dako nga Himaya,” Liahona, Nob. 2021, 28–30, ilabina sa kataposang duha ka seksiyon.)
Unsa ang “gamhanan ug salawayon nga simbahan” nga nakita ni Nephi?
Si Presidente Dallin H. Oaks mipasabot nga ang “gamhanan ug salawayon nga simbahan” nga gihulagway ni Nephi nagrepesentar sa “bisan unsa nga pilosopiya o organisasyon nga supak sa pagtuo sa Dios. Ug ang ‘pagkabihag’ diin maoy gitinguha niini nga ‘simbahan’ nga dad-on ang mga santos dili kaayo pisikal nga pagkapriso kon dili pagkabihag sa sayop nga mga ideya” (“Mobarog isip mga Saksi sa Dios,” Liahona, Mar. 2015, 20). Giunsa sa Manluluwas sa pagtabang kaninyo paglikay––ug sa pag-eskapo––sa pagkabihag sa sayop nga mga ideya?
Ang Dios motubag kanako kon ako mangayo diha sa hugot nga pagtuo.
Mibati ba kamo sukad nga wala makadawat og personal nga pagpadayag—nga ang Dios wala makigsulti kaninyo? Unsa nga tambag ang gihatag ni Nephi sa iyang mga igsoon nga lalaki sa dihang sila mibati niini? (Tan-awa sa 1 Nephi 15:1–11.) Unsaon ninyo sa paggamit sa tambag ni Nephi sa inyong kinabuhi?
Ang hugot nga paggunit sa pulong sa Dios makatabang kanako sa pagbatok sa impluwensiya ni Satanas.
Si Nephi kanunayng adunay mga butang nga dinalian nga gisulti ngadto sa iyang mga igsoong lalaki. Apan siya ingon og labihan ka madasigon mahitungod unsay iyang gisulti ngadto kanila sa 1 Nephi 15:23–25. Unsa ang mensahe ni Nephi, ug ngano kaha nga siya kusganon kaayo nga mibati mahitungod niini?
Si Elder David A. Bednar nagtudlo nga “ang pulong sa Dios” makatudlo ngadto sa mga kasulatan, ngadto sa mga pulong sa buhi nga mga propeta, ug ngadto ni Jesukristo Mismo. Unsa kaha ang buot ipasabot sa “hugot nga manggunit” sa mga kasulatan ug sa mga pulong sa buhi nga mga propeta? Unsa kaha ang buot ipasabot sa “hugot nga manggunit” ngadto ni Jesukristo? Tingali makapangita kamo sa posible nga mga tubag niining mga pangutana diha sa mensahe ni Elder Bednar “Apan Kami Wala Maminaw Kanila” (Liahona, Mayo 2022, 14–16).
Sa unsang paagi ang hugot nga paggunit ngadto sa pulong sa Dios makatabang kaninyo sa pagbatok sa kaaway? Ang pagpuno sa usa ka talaan [table] nga sama niini makatabang og organisar sa inyong mga gihunahuna:
|
… makatabang nako sa pagbuntog sa kangitngit sa pagtintal? (Tan-awa sa 1 Nephi 12:17) |
… makatabang nako sa “dili pagpaminaw” sa kakawang ug garbo sa kalibotan? (1 Nephi 12:18) | |
|
Sa unsa nga paagi ang hugot nga paggunit sa mga kasulatan ug mga pulong sa buhi nga mga propeta … | ||
|
Sa unsang paagi ang hugot nga paggunit ngadto sa Manluluwas … |
Tan-awa usab sa “Puthaw nga Gunitanan,” Mga Himno, nu. 172; Jorge F. Zeballos, “Pagpalambo og Kinabuhi nga Dili Matarog sa Kaaway,” Liahona, Nob. 2022, 50–52.
Ang mga kasulatan sama sa puthaw nga gunitanan nga mogiya kanato ngadto sa kahoy sa kinabuhi.
Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.
Mga Ideya sa Pagtudlo sa mga Anak
Ang Langitnong Amahan mipadala ni Jesukristo tungod kay Siya naghigugma kanako.
-
Aron sa pagtudlo ni Nephi mahitungod sa gugma sa Dios, usa ka anghel mipakita ni Nephi sa mga panghitabo gikan sa kinabuhi sa Manluluwas. Makahimo kamo sa samang butang alang sa inyong mga anak—hatagi sila ug mga hulagway sa mga panghitabo nga nakita ni Nephi diha sa 1 Nephi 11:20, 24, 27, 31, ug 33 (tan-awa sa Libro sa mga Hulagway sa Ebanghelyo, mga nu. 30, 35, 39, 42, 57). Samtang magbasa kamo niining mga bersikulo, tabangi ang inyong mga anak sa pagpangita sa hulagway nga mopares niini. Unsa atong makat-onan mahitungod ni Jesukristo gikan niini nga mga bersikulo?
-
Kantaha ang awit sama sa “Mipadala sa Bugtong Anak” (Songbook sa mga Bata, 20–21) nga makatabang sa inyong mga anak nga mobati sa gugma sa Dios. Human sa inyong pagpanganta, pangutan-a ang inyong mga anak kon unsa ang ilang nakat-onan gikan sa kanta. Unsa pa ang atong makat-onan kabahin sa gugma sa Dios gikan sa 1 Nephi 11:22-23?
Mogamit og art sa pagtabang sa mga bata nga makakat-on. Kon tudloan ninyo ang mga bata og istorya sa kasulatan, tabangi sila sa pag-aninaw niini. Mahimong mogamit ka og mga hulagway, mga video, mga puppet, mga sinina, ug uban pa.
Ang Basahon ni Mormon nagtudlo og bililhon nga mga kamatuoran.
-
Aron matabangan ang inyong mga anak nga mohatag og bili sa “yano ug bililhon” nga mga kamatuoran diha sa Basahon ni Mormon, mahimo kang magdrowing og hulagway ug dapita ang inyong mga anak sa pag-usab o pagtangtang sa mga bahin sa hulagway sa paghimo niini nga malahi tan-awon. Mahimo ninyo kining gamiton sa pagtudlo nga ang mga butang diha sa Biblia nausab ug gikuhaan paglabay sa panahon. Mag-uban sa pagbasa sa 1 Nephi 13:40 ug paghisgot mahitungod kon sa unsang paagi ang Basahon ni Mormon (“kining kataposan nga mga rekord”) makatabang kanato sa pagsabot sa “yano ug bililhon nga mga butang” nga nawala sa Biblia (ang “unang” mga rekord). Unsa nga “yano ug bililhong” mga kamatuoran ang inyong nakat-onan gikan sa Basahon ni Mormon?
-
Ang bidyo “Ang Basahon ni Mormon—Basahon gikan sa Dios” (Gospel Library) makatabang sa inyong mga anak nga makakita kon nganong importante nga magkanaa sa Biblia ug sa Basahon ni Mormon. Ang mga bata mahimong malingaw sa pagdrama-drama sa gihulagway gikan sa bidyo.
2:3Ang Basahon ni Mormon—Basahon gikan sa Dios
Si Elder Tad R. Callister mibasabut sa kaimportante sa Basahon ni Mormon isip kauban sa Biblia sa pagpadayag sa tinuod nga mga doktrina sa Dios ug sa Iyang Simbahan.
Ang Basahon ni Mormon nagpahiuli sa mga kamatuoran sa ebanghelyo nga nawala sa panahon sa Apostasiya.
Ang paggunit og hugot sa pulong sa Dios makatabang kanako sa pagbatok sa tintasyon.
-
Hatagi ang inyong mga anak og usa ka kahigayonan sa pagpakigbahin kon unsa ang ilang mahinumdoman mahitungod sa panan-awon ni Lehi. Mahimong makatabang kini ang paggamit og usa ka hulagway, sama sa usa diha sa latid sa miagi nga semana. Unsay nakapugong sa mga tawo sa pag-abot ngadto sa kahoy? Unsay nakatabang nila sa pag-abot niini? Tingali inyo silang hangyoon sa pagpangita sa gunitanan nga puthaw diha sa hulagway. Mag-uban sa pagbasa sa 1 Nephi 15:23–24 aron masuta kon unsa ang girepresentar sa gunitanan nga puthaw ug sa unsang paagi kini makatabang kanato.
Alang sa dugang nga mga ideya, tan-awa ang isyu karong bulana sa Higala nga magasin.
Panan-awon ni Nephi kang Maria, ni James Johnson