Apan Kami Wala Maminaw Kanila
Ang mga pakigsaad ug mga ordinansa motultol kanato ug motabang kanato aron kanunay nga mahinumdom sa atong koneksyon ngadto ni Ginoong Jesukristo samtang mag-uswag kita subay sa dalan sa pakigsaad.
Ang akong asawa, si Susan, ang among tulo ka anak nga mga lalaki ug ang ilang mga asawa, tanan namong mga apo, ug si Elder Quentin L. Cook, ang akong katapad sa Korum sa Napulog Duha sulod sa hapit 15 ka tuig, ang tanan daling makapamatuod sa kamatuoran nga dili ko maayong mokanta. Apan bisan pa sa akong kakulang sa bokal nga talento, ganahan kaayo ko nga mokanta sa mga himno sa Pagpahiuli. Ang kombinasyon sa dinasig nga mga pulong sa awit ug ang halangdon nga mga huni nakatabang nako sa pagkat-on sa mahinungdanon nga mga baroganan sa ebanghelyo ug nakapadasig sa akong kalag.
Ang usa ka himno nga nakapanalangin sa akong kinabuhi sa talagsaon nga mga pamaagi mao ang “Magpadayon Tang Tanan.” Karong bag-o namalandong ko ug nagkat-on mahitungod sa usa ka piho nga hugpong sa mga pulong diha sa refrain niana nga himno. “Pulong sa daotan dili paminawon apan Dios lamang atong sundon.”1
Dili paminawon.
Samtang akong kantahon ang “Magpadayon Tang Tanan,” kanunay kong maghunahuna sa katawhan diha sa panan-awon ni Lehi nga nagpadayon sa dalan padulong sa kahoy sa kinabuhi kinsa dili basta lang “nanggunit”2 apan “kanunay naggunit sa gunitanan nga puthaw, hangtod nga sila miabot ug natumba ug mikaon sa bunga sa kahoy.”3 Si Lehi mihulagway sa pundok sa mga katawhan didto sa dako ug lapad nga gambalay nga mitulisok sa ilang “tudlo nga mabiay-biayon ngadto [kaniya] ug ingon usab niadto nga mikaon sa bunga.”4 Ang iyang tubag sa mga pagbugalbugal ug mga pag-insulto dalaygon ug halandomon: “Apan kami wala maminaw kanila.”5
Ako nag-ampo nga ang Espiritu Santo manalangin ug molamdag sa matag usa kanato samtang kitang tanan maghunahuna kon unsaon nato nga malig-on aron “dili paminawon” ang mga impluwensiya ug bugalbugalon nga mga tingog sa kalibotan karon nga atong gipuy-an.
Ayaw Paminaw
Ang pulong paminaw nagsugyot sa pagmatikod o paghatag og pagtagad sa usa ka tawo o usa ka butang. Busa, ang mga pulong sa himno “Magpadayon Tang Tanan” nagtambag kanato sa paghimo og positibo nga desisyon sa dili paghatag og pagtagad ngadto sa “pulong sa daotan.” Ug si Lehi ug ang mga tawo nga kauban niya kinsa mikaon sa bunga sa kahoy naghatag og usa ka lig-on nga ehemplo sa pagbaliwala sa mga pagbugalbugal ug pagyubit nga kasagaran nagagikan sa dako ug lapad nga gambalay.
Ang doktrina ni Kristo nga gisulat “pinaagi sa Espiritu sa Dios nga buhi … diha sa [atong mga kasingkasing]”6 nagdugang sa atong kapasidad nga “dili maminaw” sa daghang mga pagsamoksamok, mga pagbiaybiay, ug mga paglipat dinhi sa atong napukan nga kalibotan. Sama pananglit, ang hugot nga pagtuo nga nakatutok diha ni Ginoong Jesukristo mopalig-on kanato pinaagi sa espirituwal nga kalig-on. Ang hugot nga pagtuo diha sa Manunubos usa ka baroganan sa paglihok ug gahom. Samtang kita molihok sumala sa mga kamatuoran sa Iyang ebanghelyo, kita mapanalanginan sa espirituwal nga kapasidad sa pagpadayon latas sa mga hagit sa mortalidad samtang makatutok sa hingpit nga mga kalipay nga gidalit kanato sa Manluluwas. Sa tinuod, “kon kita magtarong walay kahadlokan, sa Dios, kanunay, kitang mapanalipdan.”7
Usa ka Personal nga Koneksyon pinaagi sa mga Pakigsaad
Ang pagsulod ngadto sa sagradong mga pakigsaad ug ang takos nga pagdawat sa mga ordinansa mopakigtambayayong kanato ngadto ug mobugkos kanato ngadto ni Ginoong Jesukristo ug sa Langitnong Amahan.8 Kini nagpasabot lamang nga kita may pagsalig sa Manluluwas isip atong tigtuboy9 ug Tipataliwala10 ug mosalig sa Iyang katakos, kaluoy, ug grasya11 atol sa panaw sa kinabuhi. Samtang kita magmakanunayon sa pagduol ngadto kang Kristo ug makigtambayayong Kaniya, kita makadawat sa makalimpyo, makaayo, ug makalig-on nga mga panalangin sa Iyang walay kataposan ug mahangtorong Pag-ula.12
Ang pagtuman ug paghigugma sa mga pasalig sa pakigsaad momugna og koneksyon ngadto sa Ginoo nga personal kaayo ug gamhanan sa espirituhanong paagi. Samtang atong tahoron ang mga kondisyon sa sagrado nga mga pakigsaad ug mga ordinansa, kita sa hinay-hinay ug sa ginagmay nga paagi mapaduol ngadto Kaniya13 ug makasinati sa pagkamahinungdanon sa Iyang pagkabalaan ug buhing kamatuoran sa atong mga kinabuhi. Busa si Jesus mahimong mas labaw pa kay sa labing importante nga tawo diha sa mga istorya sa kasulatan; ang Iyang ehemplo ug mga pagtulon-an makaimpluwensiya sa atong matag tinguha, hunahuna, ug aksiyon.
Ako sa tinuod walay abilidad sa paghatag og igong paghulagway sa tukma nga kinaiyahan ug gahom sa atong koneksyon pinaagi sa pakigsaad ngadto sa nabanhaw ug buhi nga Anak sa Dios. Apan ako mosaksi nga ang mga koneksyon ngadto Kaniya ug sa Langitnong Amahan tinuod ug mao ang labing taas nga tinubdan sa kasigurohan, kalinaw, hingpit nga kalipay, ug mao ang espirituwal nga kalig-on nga maghatag kanato og katakos aron “[dili] [ma]hadlok, sa kaaway.”14 Isip tighimo og pakigsaad ug tigtuman og pakigsaad nga mga disipulo ni Jesukristo, kita mapanalanginan aron makabaton og kaisog “kay ang Dios kanato nagbantay”15 ug dili magpakabana sa daotan nga mga impluwensiya ug kalibotanon nga pagbugalbugal.
Samtang nagbisita ko sa mga miyembro sa Simbahan sa tibuok kalibotan, ako sa kasagaran mosukna kanila niini nga pangutana: unsa ang nakatabang kaninyo nga “dili paminawon” ang kalibotanong mga impluwensiya, pagbiaybiay, ug pagbugalbugal? Ang ilang mga tubag mao ang labing maayong pagtulon-an.
Ang lig-on nga mga miyembro sa kasagaran mohatag og importansiya sa pagdapit sa gahom sa Espiritu Santo sa ilang mga kinabuhi pinaagi sa makahuloganon nga pagtuon sa kasulatan, hugot nga pag-ampo, og tukma nga pagpangandam sa pag-apil sa ordinansa sa sakramento. Usab kasagaran nga isulti mao ang espirituwal nga suporta sa matinud-anong mga sakop sa pamilya ug sa kasaligan nga mga higala, ang gikinahanglang mga leksiyon nga nakat-onan pinaagi sa pagpangalagad ug pagserbisyo sa gipahiuli nga Simbahan sa Ginoo, ug ang kapasidad sa pag-ila sa labing tinuod nga kahaw-ang sa bisan unsang butang nga anaa o nagagikan sa dako ug lapad nga gambalay.
Akong nabantayan niining mga tubag gikan sa mga miyembro ang usa ka piho nga sundanan nga adunay espesyal nga kahulogan. Una sa tanan, kini nga mga disipulo adunay lig-on nga mga pagpamatuod sa plano sa Langitnong Amahan sa kalipay ug sa tahas ni Jesukristo isip atong Manunubos ug Manluluwas. Ug ikaduha, ang ilang espirituwal nga kahibalo ug kombiksiyon mga indibidwal, personal, ug piho; dili kini subay sa kadaghanan o pangagpas. Naminaw ako niining matinuoron nga mga kalag nga namulong kabahin sa mga pakigsaad nga naghatag og kalig-on sa pagbuntog sa oposisyon ug sa ilang koneksyon ngadto sa buhi nga Ginoo nga nagsuporta kanila latas sa mga panahon nga maayo ug dili maayo. Ngadto niini nga mga indibidwal, si Jesukristo sa tinuod usa ka personal nga Manluluwas.
Ang mga pakigsaad sa ebanghelyo ug mga ordinansa makatabang sa atong mga kinabuhi sama sa usa ka kompas. Ang kompas maoy usa ka gamit sa pagtudlo sa mahinungdanong mga direksiyon sa amihanan, habagatan, subangan, ug kasadpan alang sa mga katuyoan sa paglawig ug pagtultol sa nahimutangan nga lugar. Sa samang paagi, ang atong mga pakigsaad ug mga ordinansa motudlo kanato ngadto ug motabang kanato kanunay sa paghinumdom sa atong koneksyon ngadto ni Ginoong Jesukristo samtang mag-uswag kita subay sa dalan sa pakigsaad.
Ang mahinungdanong direksyon alang kanatong tanan dinhi sa mortalidad mao ang pagduol ngadto ug ang pagkahingpit diha ni Kristo.16 Ang balaang mga pakigsaad ug mga ordinansa makatabang nato sa pagmakanunayon sa atong pokus ngadto sa Manluluwas ug maningkamot, inubanan sa Iyang grasya,17 nga mahimong mas sama Kaniya. Sa dakong kasegurohan, ang dili makita nga “gahom kanimo’g kanako motabang tungod sa kamatuoran.”18
Paggunit og Maayo sa Gunitanan nga Puthaw
Ang atong koneksyon sa pakigsaad ngadto sa Dios ug ni Jesukristo mao ang agianan diin kita makadawat sa kapasidad ug kalig-on aron “dili maminaw.” Ug kini nga higot malig-on samtang kita padayong hugot nga mogunit sa gunitanan nga puthaw. Apan sama sa gipangutana sa mga igsoon ni Nephi, “Unsa ang gipasabot sa gunitanan nga puthaw diin nakita sa atong amahan … ?
Ug si [Nephi] miingon ngadto kanila nga mao kadto ang pulong sa Dios; ug si kinsa kadto nga mopatalinghog sa pulong sa Dios, ug hugot nga mogunit niini, dili gayod sila malaglag; ni ang mga pagtental ug ang nagdilaab nga mga panâ sa kaaway makabuntog kanila ngadto sa pagkabuta, sa pagdala kanila sa kalaglagan.”19
Palihog hinumdomi nga ang abilidad sa pagbatok sa mga tentasyon ug sa nagdilaab nga mga pana sa kaaway gisaad ngadto sa mga indibidwal kinsa “hugot nga mogunit” kay sa basta lang “mogunit” sa pulong sa Dios.
Ang katingalahan, si Apostol Juan mihulagway ni Jesukristo isip ang Pulong.20
“Sa sinugdan mao na ang Pulong, ug ang Pulong uban sa Dios, ug Dios ang Pulong. …
“Ang tanang mga butang nangahimo pinaagi kaniya; ug niadtong mga nangahimo na, walay bisan usa nga nahimo nga dili pinaagi kaniya. …
“Ug ang Pulong nahimong tawo, ug ipon kanamo mipuyo, (ug among nakita ang iyang himaya, ang himaya nga ingon sa pagadawaton sa bugtong Anak gikan sa Amahan,) nga puno sa grasya ug sa kamatuoran.”21
Busa, ang usa sa mga ngalan ni Jesukristo mao “Ang Pulong.”22
Agig dugang, ang ikawalo nga Artikulo sa Hugot nga Pagtuo nag-ingon, “Kami nagtuo sa Biblia nga pulong sa Dios kon kini tukma nga pagkahubad; kami nagtuo usab sa Basahon ni Mormon nga pulong sa Dios.”23
Busa, ang mga pagtulon-an sa Manluluwas, ingon nga narekord diha sa balaang kasulatan, usab mao “ang pulong.”
Mosugyot ko nga ang hugot nga paggunit sa pulong sa Dios nagpasabot sa (1) paghinumdom, pagtahod, ug pagpalig-on sa atong personal nga koneksyon ngadto sa Manluluwas ug sa Iyang Amahan pinaagi sa mga pakigsaad ug mga ordinansa sa gipahiuli nga ebanghelyo, ug (2) mainampoon, matinguhaon, ug makanunayon nga paggamit sa balaang kasulatan ug sa mga pagtulon-an sa buhing mga propeta ug apostoles isip segurado nga mga tinubdan sa gipadayag nga kamatuoran. Ingon nga kita gibugkos ug “hugot nga mogunit” ngadto sa Ginoo ug mausab pinaagi sa pagpuyo sa Iyang doktrina,24 ako mosaad nga isip indibidwal ug sa kinatibuk-an kita mapanalanginan aron “magbarog sa balaan nga mga dapit, ug dili mabalhin.”25 Kon kita magpabilin diha ni Kristo, dayon Siya magauban ug magalakaw uban kanato.26 Sa pagkatinuod, sa “adlaw sa paghukom Santos lipayon, iuswag kamatuoran.”27
Pagpamatuod
Padayon. Hugot nga mogunit. Ayaw paminaw.
Ako mopamatuod nga ang kaligdong ngadto sa mga pakigsaad ug sa mga ordinansa sa gipahiuli nga ebanghelyo sa Manluluwas makahatag kanato og gahom sa pagpadayon diha sa buhat sa Ginoo, aron hugot nga mogunit ngadto Kaniya isip ang Pulong sa Dios, ug aron dili paminawon ang mga pagdani sa kaaway. Dihas katarong, espada gamiton, bisan ang “espadas kamatuoran,”28 diha sa sagrado nga ngalan ni Ginoong Jesukristo, amen.