Paghigugma, Pagpaambit, Pagdapit
Samtang kita naghigugma, nagpaambit, ug nagdapit, kita mahimong kabahin nianang mahinungdanon ug mahimayaon nga buhat nga moandam sa kalibotan alang sa pagbalik sa Mesiyas niini.
Handurawa ninyo uban kanako, sa daklit, nga nagbarog sa ibabaw sa bungtod sa Galilea, nagsaksi sa kaanindot ug himaya sa nabanhaw nga Manululuwas nga nagduaw sa Iyang mga disipulo. Makadasig kaayo ang paghunahuna nga makadungog sa personal mismo niini nga mga pulong, nga Iyang gipakigbahin ngadto kanila, sa Iyang ligdong nga mando nga, “busa panglakaw kamo ug himoa ninyong mga tinun-an ang tanang kanasoran, sa pagpamautismo kanila sa ngalan sa Amahan, ug sa Anak, ug sa Espiritu Santo.”1 Segurado gayod kini nga mga pulong makahatag og gahom, makadasig, ug makatandog sa matag usa kanato, ingon nga kini nakatandog sa Iyang Apostoles. Sa tinuod, sila mihalad sa tibuok nilang kinabuhi ngadto sa pagbuhat lamang niini.
Ang makapaikag, dili lamang ang Apostoles maoy naminaw sa mga pulong ni Jesus sa kinasingkasing. Ang mga miyembro sa unang Simbahan, gikan sa labing bag-o ngadto sa labing hanas, misanong sa dako nga mando sa Manluluwas, mipakigbahin sa maayong balita sa ebanghelyo ngadto niadtong ilang nahimamat ug nakaila. Ang determinasyon sa pagpaambit sa ilang pagpamatuod ni Jesukristo nakatabang sa Iyang bag-ong giestablisar nga Simbahan aron molambo og maayo.2
Kita usab, isip mga disipulo ni Jesukristo, gidapit sa pagpatalinghog sa Iyang mando karon, sama nga kita anaa didto sa bungtod sa Galilea dihang una niya kining gipahayag. Kini nga mando nagsugod niadtong 1830, dihang si Joseph Smith mi-set apart sa iyang igsoon nga si Samuel isip usa ka nauna nga misyonaryo sa Simbahan ni Jesukristo.3 Sukad niadtong panahona, sobra sa 1.5 ka milyong mga misyonaryo ang nagbiyahe sa tibuok kalibotan nga nagtudlo sa tanang kanasoran ug nagbunyag niadtong kinsa mihangop sa maayong balita sa gipahiuli nga ebanghelyo.
Kini mao ang atong doktrina. Ang atong ganahan nga tinguha.
Gikan sa atong gagmayng mga bata ngadto sa labing tigulang sa atong palibot, kita mahinamong nagpaabot sa panahon dihang kita makapatalinghog sa tawag sa Manluluwas ug mopakigbahin sa ebanghelyo ngadto sa mga nasod sa kalibotan. Ako nakasiguro nga kamong batan-ong mga lalaki ug batan-ong mga babaye mibati sa susama nga makapagahom nga hagit gikan sa atong propeta kagahapon samtang siya midapit kaninyo sa pagpangandam alang sa full-time nga misyonaryo nga serbisyo sama sa gibuhat sa Manluluwas uban sa Iyang mga Apostoles.
Sama sa mga magdadagan nga anaa sa sinugdanang mga linya, naghulat kita nga mahinamon sa opisyal nga pagdapit, kompleto nga maglakip sa pirma sa propeta, magsinyas nga magsugod na ang lumba! Kini nga tinguha dalaygon ug makadasig; hinuon, ikonsiderar nato kini nga pangutana: nganong dili man kitang tanan magsugod karon?
Tingali mangutana kamo, “Unsaon man nako pagkamisyonaryo kon walay name badge?” O kita mosulti sa atong mga kaugalingon, “Ang full-time nga mga misyonaryo gi-set apart aron mohimo niini nga buhat. Gusto kong motabang apan tingali unya na kon ang kinabuhi mokalma na og gamay.”
Mga kaigsoonan, mas yano pa kini kay sa niana! Salamat na lang, ang dakong mando sa Manluluwas matuman pinaagi sa yano, sayon sabton nga mga baroganan nga gitudlo sa matag usa kanato gikan pa sa pagkabata: paghigugma, pagpaambit, ug pagdapit.
Paghigugma
Ang una natong mahimo mao ang paghigugma sama sa paghigugma ni Kristo.
Ang atong mga kasingkasing nabug-atan sa tawhanong mga pag-antos ug dili maayong mga pagbati nga atong makita sa tibuok kalibotan atol niining mga panahon sa kagubot. Hinoon, kita mahimo usab nga madasig sa abunda nga kalooy ug pagkamakatawhanon nga gipakita sa mga tawo bisan asa pinaagi sa ilang mga paningkamot sa pagtabang ngadto sa nagkalisod—niadtong gipapahawa sa ilang mga panimalay, nabulag sa ilang mga pamilya, o nakasinati og laing mga matang sa kaguol ug kasagmuyo.
Bag-ohay lang, ang mga tinubdan sa balita nagtaho sa paagi nga ang usa ka grupo sa mga inahan didto sa Poland, tungod sa kabalaka sa nanglayas nga desperado nga mga pamilya, nagbilin og kompleto sa sangkap nga mga stroller nga maayong pagkalinya didto sa usa ka estasyonan sa tren, andam ug naghulat sa bakwit nga mga inahan ug mga anak kinsa nagkinahanglan niini didto niana nga tabokanan sa utlanan samtang sila mokanaog sa tren. Segurado gayod, ang atong Langitnong Amahan nagpahiyom ngadto sa mga buhat sa walay pagsapayan sa kaugalingon nga maloloy-ong pagtabang nga sama niini, kay samtang mopas-an kita sa mga alantoson sa usag-usa, kita “[nagtuman sa] sugo ni Kristo.”4
Sa matag higayon nga atong gipakita ang Kristohanon nga gugma ngadto sa atong mga silingan, atong gisangyaw ang ebanghelyo—bisan kon wala kitay bisan usa ka pulong nga gisulti.
Ang gugma alang sa uban mao ang klaro nga pagpadayag sa ikaduhang dako nga sugo sa paghigugma sa atong silingan;5 kini nagpakita sa makapalimpyo nga proseso sa impluwensiya sa Esipiritu Santo sulod sa atong mga kalag. Pinaagi sa pagpakita sa gugma ni Kristo ngadto sa uban, atong madasig kadtong kinsa nakakita sa atong maayong mga buhat aron “daygon nila ang [atong] Amahan nga atua sa langit.”6
Kita mobuhat niini nga dili maghunahuna og balos.
Ang atong gilaoman, tataw lang, mao nga ilang dawaton ang atong gugma ug ang atong mensahe, bisan tuod ang ilang reaksiyon dili nato makontrol.
Kon unsa ang atong buhaton ug kon si kinsa kita maoy sigurado nga makontrolar gayod.
Pinaagi sa Kristohanong gugma alang sa uban, atong isangyaw ang mahimayaon, makausab sa kinabuhi nga mga elemento sa ebanghelyo ni Jesukristo, ug kita makasalmot sa makahuloganong paagi sa pagtuman sa Iyang dako nga mando.
Pagpaambit
Ang ikaduhang butang nga atong mahimo mao ang pagpaambit.
Atol sa unang mga bulan sa COVID-19 nga pandemya, si Brother Wisan gikan sa Thailand mibati og pag-aghat sa pagpaambit sa iyang mga pagbati ug mga impresyon kabahin sa iyang nakat-onan sa iyang pagtuon sa Basahon ni Mormon pinaagi sa iyang social media nga account. Diha sa usa ka piho niya nga personal nga mga post, iyang gipakigbahin ang usa ka istorya sa duha ka misyonaryo sa Basahon ni Mormon, si Amulek ug si Alma.
Ang iyang igsoon, si Winai, bisan tuod nga lig-on kaayo sa iyang relihiyoso nga mga tinuohan, natandog sa iyang post ug mitubag, wala damha nga mihangyo, “Mahimo bang makakuha ako niana nga basahon sa Thai nga pinulongan?”
Si Wisan maalamon nga mipahigayon sa pagpadala og usa ka kopya sa Basahon ni Mormon pinaagi sa duha ka sister nga mga misyonaryo, kinsa misugod sa pagtudlo sa iyang igsoong lalaki.
Si Wisan miapil sa virtual nga mga leksiyon, diin iyang gipaambit ang iyang mga pagbati mahitungod sa Basahon ni Mormon. Si Winai nakat-on sa pag-ampo ug pagtuon inubanan sa kadasig sa matinguhaong pagsiksik sa kamatuoran, aron dawaton ug hangopon ang kamatuoran. Mga bulan lamang ang milabay, si Winai nabunyagan!
Si Wisan sa kadugayan miingon, “Kita adunay responsibilidad nga mahimong instrumento sa mga kamot sa Dios, ug kita kinahanglang andam kanunay alang sa Iyang paghimo sa Iyang buhat sumala sa Iyang paagi pinaagi kanato.” Ang ilang milagro sa pamilya nahitabo tungod kay si Wisan yanong mipakigbahin sa ebanghelyo sa normal ug natural nga paagi.
Kitang tanan adunay mga butang nga gipakigbahin sa uban. Kita nagbuhat niini sa kasagaran. Kita manabi kon unsa ang mga salida ug pagkaon nga atong ganahan, makapakatawa nga mga butang nga atong nakita, mga dapit nga atong gibisita, art nga atong gidayeg, mga kinutlo nga nakapadasig kanato.
Unsaon kaha nato aron yano nga makadugang ngadto sa lista sa mga butang nga ato nang napakigbahin kon unsa ang atong ganahan mahitungod sa ebanghelyo ni Jesukristo?
Si Elder Dieter F. Uchtdorf mipasabot: “Kon dunay mangutana bahin sa inyong hinapos sa semana, ayaw pagduhaduha sa paghisgot bahin sa inyong kasinatian sa simbahan. Paghisgot bahin sa gagmayng mga bata nga mibarog sa atubangan sa kongregasyon ug mikanta nga madasigon kon giunsa nila pagpaningkamot nga mahimong sama ni Jesus. Paghisgot bahin sa grupo sa mga batan-on kinsa migahin og panahon sa pagtabang sa mga tigulang sa balay pahulayanan aron sa paghan-ay og personal nga mga kasaysayan.”7
Ang pagpaambit dili mahitungod sa “pagbaligya” sa ebanghelyo. Dili kamo kinahanglang magsulat og sermon o mokorihir sa sayop nga mga panabot sa usa ka tawo.
Kon kabahin na sa misyonaryo nga buhat, ang Dios wala magkinahanglan ninyo nga mahimong Iyang pulis; Siya, hinuon, naghangyo nga kamo mahimong Iyang mga tigpaambit.
Pinaagi sa pagpaambit sa atong positibo nga mga kasinatian sa ebanghelyo ngadto sa uban, kita makasalmot sa pagpatuman sa dakong mando sa Manluluwas.
Pagdapit
Ang ikatulong butang nga atong mahimo mao ang pagdapit.
Si Sister Mayra usa ka bag-o nga kinabig gikan sa Ecuador. Ang iyang hingpit nga kalipay diha sa ebanghelyo kalit nga miusbaw human dayon sa iyang bunyag samtang siya midapit sa iyang mga higala ug mga minahal libot kaniya pinaagi sa mga account sa social media. Daghang mga sakop sa pamilya ug mga higala kinsa nakakita sa iyang mga post mitubag pinaagi sa mga pangutana. Si Mayra mikonekta kanila, kasagaran midapit kanila ngadto sa iyang panimalay aron dungan nga makighimamat sa mga misyonaryo.
Ang mga ginikanan ni Mayra, iyang mga igsoon, iyang iyaan, duha ka ig-agaw, ug pipila sa iyang mga higala nabunyagan tungod kay maisogon siya nga midapit kanila sa “pagduol ug pagtan-aw”, “pagduol ug pagtabang”, ug “pagduol ug pagpasakop.” Pinaagi sa iyang normal ug natural nga mga pagdapit, lapas sa 20 ka tawo ang midawat sa iyang imbitasyon nga mahimong binunyagan nga mga miyembro sa Simbahan ni Jesukristo. Kini nahitabo tungod kay si Sister Mayra yanong midapit sa uban aron makasinati sa hingpit nga kalipay nga iyang gibati isip usa ka miyembro sa Simbahan.
Adunay daghan kaayong mga pagdapit nga mahimo natong ipaabot sa uban. Kita makadapit sa uban sa “pagduol ug pagtan-aw” sa usa ka tulumanon sa sakramento, usa ka kalihokan sa ward, usa ka online nga video nga nagpasabot sa ebanghelyo ni Jesukristo. Ang “pagduol ug pagtan-aw” mahimong mao ang usa ka imbitasyon sa pagbasa sa Basahon ni Mormon o pagbisita sa usa ka bag-o nga templo atol sa open house niini sa dili pa kini ipahinungod. Usahay, ang pagdapit mao ang usa ka butang nga atong ipaabot ngadto sa kahiladman—usa ka pagdapit sa atong kaugalingon, maghatag kanato og kaigmat ug panglantaw sa mga oportunidad nga naglibot kanato aron lihokon.
Sa atong digital nga panahon, ang mga miyembro sagad mopakigbahin og mga mensahe pinaagi sa social media. Adunay mga gatosan, kon dili mga liboan, nga mga makadasig nga mga butang nga tingali inyong makita nga takos nga ipaambit. Kini nga sulod nagtanyag og mga imbitasyon sa “pagduol ug pagtan-aw,” “pagduol ug pagtabang,” ug “pagduol ug pagpasakop.”
Samtang kita modapit sa uban aron makakat-on og dugang mahitungod sa ebanghelyo ni Jesukristo, kita makasalmot sa tawag sa Maluluwas aron moapil diha sa buhat sa Iyang mando.
Panapos
Minahal nga mga kaigsoonan, namulong kami karong adlawa og tulo ka yano nga mga butang—sayon nga mga butang—nga mahimo ni bisan kinsa. Mga butang nga inyong mahimo! Tingali naghimo na kamo niini—bisan tuod wala kamo hingpit nga nakaamgo nga kamo naghimo na niini!
Dapiton ko kamo sa pagkonsiderar og mga paagi nga kamo makahigugma, makapaambit, ug makadapit. Samtang inyo kining buhaton, mobati kamo og sukod sa kalipay kay nasayod nga nagpatalinghog kamo sa mga pulong sa atong minahal nga Manluluwas.
Unsa ang akong giawhag kaninyo nga buhaton dili usa ka bag-ong programa. Nakadungog na kamo niini nga mga baroganan sa una. Dili kini mao ang “sunod nga dakong butang” nga gihangyo sa Simbahan nga inyong buhaton. Kining tulo ka butang mga sumpay lamang kon si kinsa na kita isip mga disipulo ni Jesukristo.
Walay name badge o sulat nga gikinahanglan.
Walay pormal nga pagtawag nga gikinahanglan.
Samtang kining tulo ka butang mahimong natural nga bahin sa atong pagkatawo ug sa atong pagpakabuhi, mahimo kining awtomatik, dili pinugos nga pagpadayag sa bug-os nga gugma.
Sama niadtong mga disipulo ni Kristo kinsa nagpundok aron makakat-on gikan Kaniya didto sa Galilea 2,000 na ka tuig ang milabay, kita usab makahangop sa sugo sa Manluluwas ug moadto sa tibuok kalibotan aron magsangyaw sa ebanghelyo.
Samtang kita naghigugma, nagpaambit, ug nagdapit, kita mahimong kabahin nianang mahinungdanon ug mahimayaon nga buhat nga moandam sa kalibotan alang sa pagbalik sa Mesiyas niini.
Nga kita unta mopatalinghog sa tawag sa Manluluwas ug maningkamot nga moapil sa Iyang dako nga mando mao ang akong pag-ampo sa ngalan ni Jesukristo, amen.