Pagtudlo sa Atong Kabataan ug Kabatan-onan sa Pagbarog pinaagi sa Kinaugalingong Paningkamot
Sundon nato ang atong Manluluwas, nga si Jesukristo, ug ang Iyang ebanghelyo pinaagi sa pagkahimong makabarog pinaagi sa kinaugalingong paningkamot sa tibuok natong kinabuhi, ug sa pagtudlo niini sa atong kabataan ug kabatan-onan.
Akong hisgotan ang mahitungod sa pagbarog pinaagi sa kinaugalingong paningkamot ug unsaon nga kini matudlo ngadto sa kabataan ug kabatan-onan. Ang pagbarog pinaagi sa kinaugalingong paningkamot makonsiderar isip usa ka hilisgotan alang sa mga hingkod. Akong nahibaloan nga ang mga hingkod mas mahisubay sa dalan sa pagbarog pinaagi sa kinaugalingong paningkamot kon sila natudloan sa ebanghelyo ni Jesukristo ug nagsunod sa doktrina ug mga baroganan niini sukad sa pagkabata ug pagkabatan-on diha sa panimalay.
Ang labing maayo nga paghulagway mao ang usa ka ehemplo sa tinuod nga kasinatian sa kinabuhi. Si Wilfried Vanie, iyang pito ka igsoon, ug ang iyang inahan mipasakop sa Simbahan sa Abidjan, Ivory Coast, dihang sayis anyos pa siya. Nabunyagan siya sa otso nga edad. Ang iyang papa, ang lunlon nga tigsangkap sa pamilya, namatay dihang si Wilfried onse anyos.
Bisan nasubo tungod sa sitwasyon sa pamilya, si Wilfried mihukom nga mopadayon sa pag-eskwela uban sa pag-awhag sa iyang mama ug sa suporta sa Simbahan. Siya nakagradwar sa secondary school ug nagmisyon og full-time sa Ghana Cape Coast Mission, diin didto nakakat-on siya og Iningles. Human sa iyang misyon, mieskwela siya sa unibersidad ug nakakuha og diploma sa accounting ug finance. Bisan og lisod ang pagpangita og trabaho niini nga kurso, nakatrabaho siya sa turismo ug industriya sa pagpang-abi-abi.
Nagsugod siya isip waiter sa 5-star nga hotel, apan ang iyang tinguha nga molambo nagtulod kaniya sa pagkat-on og dugang hangtod nahimo siyang tig-abiabi gamit ang lain-laing pinulongan didto. Dihang ang bag-o nga hotel giablihan, gipatrabaho siya isip night auditor. Sa wala madugay, nagpaenrol siya sa BYU–Pathway Worldwide ug sa kasamtangan nagtuon og kurso aron makakuha og sertipiko sa pang-abiabi ug pagpangdumala sa turismo. Iyang tinguha nga mamahimo siyang manager sa usa ka kinamaayohang hotel. Si Wilfried makahimo sa pagbuhi sa iyang mahangturon nga kapares ug sa duha ka anak, ug pagtabang usab sa iyang mama ug sa iyang mga igsoon. Siya karon nagserbisyo sa Simbahan isip sakop sa high council sa stake.
Ang pagbarog pinaagi sa kinaugalingong paningkamot nagpasabot sa “abilidad, pasalig, ug paningkamot sa pagsangkap sa espirituwal ug temporal nga mga kinahanglanon sa kinabuhi alang sa kaugalingon ug sa pamilya.”1 Ang tinguha nga makabarog pinaagi sa kinaugalingong paningkamot usa ka bahin sa atong buluhaton subay sa dalan balik sa Langitnong Amahan ug sa Iyang Anak, nga si Jesukristo. Molig-on kini sa atong hugot nga pagtuo kang Jesukristo ug makalipay nga mobugkos kanato ngadto Kaniya pinaagi sa mga pakigsaad ug mga ordinansa sa kaluwasan ug kahimayaan. Ang pagbarog pinaagi sa kinaugalingong paningkamot usa ka doktrina sa ebanghelyo ni Jesukristo, ug dili usa ka programa. Usa kini ka tibuok kinabuhi nga proseso, ug dili usa lang ka hitabo.
Kita mamahimo nga makabarog pinaagi sa kinaugalingong paningkamot sa tibuok natong kinabuhi pinaagi sa pagpalambo sa atong pisikal ug emosyonal nga kahimsog, pagpadayon sa atong edukasyon ug panarbaho, ug pagkaandam sa temporal nga paagi.2 Kini nga tahas matapos ba gayod dinhi sa atong kinabuhi? Dili, tibuok kinabuhi nga proseso kini sa pagkat-on, paglambo, ug pagbuhat. Dili gayod kini matapos, usa kini ka padayon, inadlaw nga proseso.
Unsaon nato nga matudlo ang doktrina ug mga baroganan sa pagbarog pinaagi sa kinaugalingong paningkamot ngadto sa atong kabataan ug kabatan-onan? Usa ka importanteng paagi mao ang regular nga paggamit sa mga baroganan sa programa alang sa Kabataan ug Kabatan-onan. Ang mga ginikanan ug mga anak magkat-on sa ebanghelyo ni Jesukristo, moapil sa mga serbisyo ug mga kalihokan, ug magtinabangay sa upat ka dapit sa personal nga paglambo nga lahi sa matag bata. Dili na kini mao ang sama nga programa nga gitino alang sa tanan.
Ang Giya nga Basahon sa Kabataan nag-ingon; “Dihang si Jesus parehas nimo og edad, Siya nagkat-on ug nagtubo. Ikaw nagkat-on ug nagtubo usab. Ang mga kasulatan nag-ingon: “Si Jesus mitubo sa kaalam ug sa gidak-on, ug sa kahimuot kaniya sa Dios ug sa tawo’ (Lucas 2:52).”3 Kini nga kasulatan nagpasabot bahin sa pagtubo ug pagkat-on sa espirituwal nga aspeto, kahimuot sa tawo; sa pisikal nga aspeto, gidak-on; ug sa intelektuwal nga aspeto, kaalam. Kini nga mga dapit sa kalamboan magamit natong tanan, bisan unsay atong pangidaron. Kanus-a man nato sila tudloan? Sa Deuteronomio 6:6–7 atong mabasa:
“Ug kining mga pulonga, nga gisugo ko niining adlawa, magapaibabaw sa imong kasingkasing:
“Ug igatudlo mo kini sa dakong kakugi sa imong mga anak, ug magasulti ka mahitungod niini sa magalingkod ikaw sa imong balay, ug sa magalakaw ikaw sa dalan, ug sa imong paghigda, ug sa imong pagbangon.”
Kita magatudlo niining mga butanga ngadto sa kabataan pinaagi sa maayo natong ehemplo, pinaagi sa pagtrabaho ug pagserbisyo kanila, pagtuon sa mga kasulatan, ug pagsunod sa mga pagtulon-an ni Jesukristo sigon sa gitudlo sa mga propeta.
Akong gihisgotan nga diha sa programa sa Kabataan ug Kabatan-onan, ang mga bata mopili og managlahi nga mga tumong sa matag usa sa upat ka dapit nga mapalambo. Importante nga sila mohimo og ilang kaugalingon nga mga tumong sa matag dapit. Ang mga ginikanan ug mga lider makatudlo, makatambag, ug makasuporta.
Sama pananglit, ang among apo nga si Miranda nadasig kaayo nga molambo sa espirituwal nga paagi pinaagi sa pag-apil sa inadlaw nga sayo sa buntag nga mga klase sa seminary. Nainteresado siya tungod sa pagpaminaw og positibong mga komentaryo gikan sa ubang mga estudyante sa seminary sa iyang ward. Ang iyang mama dili na mopukaw pa niya para sa klase. Siya ra mismo, mobangon siya ug mokonektar pinaagi sa video conference sa gitakda nga oras sa alas 6:20 sa buntag kay kinahanglan siyang makapalambo og maayong mga kinaiya nga makatabang niya sa paghimo niini. Ang akong kaugalingong mga ginikanan bag-o lang misulti nako nga si Miranda karon makasulti na og daghan kon siya mobisita nila, kay mitubo siya nga may pagsalig sa kaugalingon. Mao kini ang mga leksiyon sa kinabuhi ug kalamboan nga adunay makitang mga resulta.
Mga ginikanan, mga apohan, mga lider, ug mga higala moabag sa pagtubo ug pagpalambo sa mga bata. Ang bug-os nga pagtabang sa mga tigpangalagad nga mga brother ug mga sister, uban sa mga lider sa pagkapari ug mga lider sa organisasyon sa ward, makahatag og suporta. Ang “Ang Pamilya: Usa ka Pamahayag ngadto sa Kalibotan” nag-ingon nga: “Pinaagi sa balaan nga plano, ang mga amahan mao ang mangulo sa ilang mga pamilya diha sa gugma ug sa pagkamatarong ug may kapangakohan sa pagsangkap sa mga kinahanglanon sa kinabuhi ug sa pagpanalipod sa ilang mga pamilya. Ang unang mga kapangakohan sa mga inahan mao ang pag-atiman sa ilang mga anak. Niining sagrado nga mga responsibilidad, ang mga amahan ug mga inahan adunay katungdanan sa pagtabang sa usag usa ingon nga magkauban. … Ang uban nga mga kapamilya kinahanglan nga motabang kon gikinahanglan.”4 Ang kataposan nga linya nagpasabot sa mga apohan, ug uban pa.
Samtang nagserbisyo kami sa West Africa, ang akong asawa, nga si Nuria, nakahimo og talagsaong buhat sa pagpangalagad ug padayon nga konektado sa among pamilya ug mga apo tabok sa kadagatan. Iya kining nahimo pinaagi sa paggamit og teknolohiya. Iyang basahan og mga libro ang mas manghod nga mga apo. Iyang tudloan ang mas magulang nga mga apo nga babaye sa mga hilisgotan sama sa sugilanon bahin sa among pamilya, sa siyensiya, kasaysayan sa Puerto Rico, sa Mga Artikulo sa Hugot nga Pagtuo, ug sa ebanghelyo ni Jesukristo. Ang mga gilay-on sa pagkakaron dili makapugong sa pagkonektar, pagkahisakop, pagpangalagad, ug pagtudlo sa nagtubo nga henerasyon sa among mga pamilya. Ubanan usab nako si Nuria kon makahigayon ko sa pagtudlo sa among bililhong mga apo, sa paghigugma nila, ug sa sobrang pagpangga ug pagpakatawa nila.
Inyong mamatikdan ang dinasig nga mga similaridad tali sa Kabataan ug Kabatan-onan nga programa ug pagkahimong makabarog pinaagi sa kinaugalingong paningkamot. Ang upat ka dapit sa paglambo sa matag usa managsama kaayo. Ang espirituwal nga kalig-on diha sa pagbarog pinaagi sa kinaugalingong paningkamot may kalabotan sa espirituwal diha sa Kabataan ug Kabatan-onan. Ang pisikal ug emosyonal nga kahimsog sa pagbarog pinaagi sa kinaugalingong paningkamot mokonektar sa Kabataan ug Kabatan-onan sa pisikal ug sa sosyal. Ang edukasyon, panarbaho, ug temporal nga pagkaandam diha sa pagbarog pinaagi sa kinaugalingong paningkamot susama kaayo sa intelektuwal sa Kabataan ug Kabatan-onan nga programa.
Sa pagtapos, sundon nato ang atong Manluluwas, si Jesukristo, ug ang Iyang ebanghelyo pinaagi sa pagbarog pinaagi sa kinaugalingong paningkamot sa tibuok natong kinabuhi ug sa pagtudlo niini sa atong kabataan ug kabatan-onan. Kita makahimo og labing maayo niini pinaagi sa
-
pagkahimong maayo nga mga ehemplo sa pagserbisyo sa uban,
-
pagsunod ug pagtudlo sa doktrina ug mga baroganan sa pagbarog pinaagi sa kinaugalingong paningkamot, ug
-
pagsunod sa mga sugo aron matukod ang pagbarog pinaagi sa kinaugalingong paningkamot isip usa ka bahin sa ebanghelyo ni Jesukristo.
Ang Doktrina ug mga Pakigsaad 104:15–16 nag-ingon:
“Mao kini ang akong katuyoan sa paghatag sa akong mga santos, kay ang tanan nga mga butang akò.
“Apan kini kinahanglan pagahimoon sa akong kaugalingon nga pamaagi; ug tan-awa kini ang pamaagi nga Ako, ang Ginoo, nagtakda sa paghatag sa akong mga santos, aron ang mga kabos ipataas, pinaagi niana ang mga adunahan ipaubos.”
Kini mao ang Simbahan ni Jesukristo. Ang Iyang ebanghelyo nanalangin sa mga pamilya dinhi sa yuta ug sa tibuok kahangtoran. Naggiya kini sa atong kinabuhi samtang naningkamot kita nga mamahimong mahangturon nga mga pamilya. Nasayod ko nga kini tinuod. Sa ngalan ni Jesukristo, amen.