Pagkakabig Mao Ang Atong Tumong

Ni Mark L. Pace

Kinatibuk-ang Presidente sa Sunday School

Walay ikapuli sa panahon nga inyong igahin diha sa mga kasulatan, nga maminaw sa Espiritu Santo nga mamulong direkta kaninyo.

Sulod lang sa tulo ka tuig karon, nag-uban kita sa panaw isip mga miyembro sa Simbahan sa Ginoo. Oktubre 2018 kadto sa dihang ang Unang Kapangulohan ug ang Korum sa Napulog Duha ka Apostoles midapit kanato sa pagkat-on bahin ni Jesukristo pinaagi sa pagtuon sa mga kasulatan sa usa ka bag-o ug makadasig nga paagi, pinaagi sa Dali, Sunod Kanako nga kapanguhaan isip atong giya.

Sa bisan unsa nga panaw, maayo nga mohunong og panagsa aron masusi ang atong paglambo ug sa pagseguro nga padayon gihapon kitang nag-uswag padulong sa atong tumong.

Pagkakabig Mao Ang Atong Tumong

Ikonsiderar kining tulokibon nga pamahayag gikan sa pasiuna sa Dali, Sunod Kanako:

“Ang katuyoan sa tanang pagkat-on ug pagtudlo sa ebanghelyo mao ang paglig-on sa atong pagkakabig ngadto sa Langitnong Amahan ug ni Jesukristo. …

“… Ang matang sa pagkat-on sa ebanghelyo nga makapalig-on sa atong hugot nga pagtuo ug makagiya ngadto sa milagro nga pagkakabig dili mahitabo diha-diha dayon. Kini molugway lapas sa usa ka klasehanan ngadto sa atong mga kasingkasing ug mga panimalay. Nagkinahanglan kini og kanunay, inadlaw-adlaw nga mga paningkamot sa pagsabot ug pagpuyo sa ebanghelyo. Ang pagkat-on sa ebanghelyo nga naggiya ngadto sa tinuod nga pagkakabig nagkinahanglan sa impluwensya sa Espiritu Santo.”¹

Mao kana ang milagro nga atong gitinguha—nga ang usa ka tawo adunay kasinatian diha sa mga kasulatan² ug kana nga kasinatian gipanalanginan sa impluwensiya sa Espiritu Santo. Ang ingon niana nga mga kasinatian bililhong mga elemento sa pundasyon sa atong pagkakabig ngadto sa Manluluwas. Ug sama sa bag-o lang gipahinumdom ni Presidente Russell M. Nelson kanato, ang espirituwal nga mga pundasyon kinahanglan padayon nga palig-onon.³ Ang malungtaron nga pagkakabig usa ka tibuok kinabuhi nga proseso.⁴ Pagkakabig mao ang atong tumong.

Aron mas labing epektibo, ang inyong mga kasinatian sa kasulatan kinahanglan nga inyong kaugalingon.⁵ Ang pagbasa o pagpaminaw mahitungod sa mga kasinatian sa uban ug mga panglantaw makatabang, apan dili makadala sa susama nga makakabig nga gahom. Walay ikapuli sa panahon nga inyong gigahin diha sa mga kasulatan, nga maminaw sa Espiritu Santo nga mamulong direkta kaninyo.

Unsa ang Gitudlo sa Espiritu Santo Kanako?

Matag semana kon mag-abli ko sa akong Dali, Sunod Kanako nga manwal, akong isulat kini nga pangutana sa ibabaw sa pahina: “Unsa ang gitudlo sa Espiritu Santo kanako niining semanaha samtang nagbasa ko sa mga kapitulo?”

Samtang magtuon ko sa mga kasulatan, balik-balik nakong pamalandongan kana nga pangutana. Ug sa walay pagkapakyas, ang espirituwal nga mga impresyon moabot, ug mohimo ko og mga mubong sulat bahin niini sa akong manwal.

Karon, unsaon nako sa pagkahibalo nga ang Espiritu Santo nagtudlo kanako? Ah, kasagaran mahitabo kini sa ginagmay ug yanong mga paagi. Usahay ang usa ka tudling sa kasulatan ingon og naa dayon sa pahina nga akong makita. Sa ubang mga panahon, mobati ko nga ang akong hunahuna malamdagan og mas halapad nga panabot sa baroganan sa ebanghelyo. Bation usab nako ang impluwensiya sa Espiritu Santo kon ang akong asawa, si Anne Marie, ug ako maghisgot mahitungod sa unsay among gibasa. Ang iyang panglantaw kanunay nga magdapit sa Espiritu.

Ang Propeta ug ang Pagsaylo [Passover]

Karong tuiga nagtuon kita sa Daang Tugon—sagrado nga kasulatan nga mipuno og kahayag sa among kasingkasing. Samtang nagbasa sa Daang Tugon, ingon og naggahin ko og panahon gamit ang kasaligan nga mga giya: Adan, Eva, Enoch, Noe, Abraham, ug daghan pang uban.

Niining semanaha, samtang nagtuon sa Exodo mga kapitulo 7–13, atong nakat-onan sa unsang paagi ang Ginoo mipalingkawas sa mga anak ni Israel gikan sa mga siglo sa pagkabinihag sa Ehipto. Nabasa nato ang mahitungod sa lima ka pagsakit—siyam ka impresibong mga pagpakita sa gahom sa Dios—nga nasaksihan sa Paraon nga wala mopahumok sa iyang kasingkasing.

Dayon ang Ginoo misulti sa Iyang propeta, nga si Moises mahitungod sa ikanapulo nga pagsakit—ug unsaon nga ang matag pamilya sa Israel makaandam alang niini. Isip kabahin sa ritwal nga gitawag nila og Pagsaylo, ang mga Israelita mosakripisyo og laki nga karnero, usa nga walay lama. Dayon ilang markahan ang haligi sa mga pultahan sa ilang mga balay og dugo sa karnero. Ang Ginoo misaad nga ang tanang balay nga gimarkahan og dugo panalipdan gikan sa makalilisang nga pagsakit nga hapit na moabot.

Ang mga kasulatan nag-ingon, “Ug ang mga anak ni Israel … nanagbuhat sa … gisugo sa Ginoo kang Moises” (Exodo 12:28). Adunay butang nga puno sa gahom nianang yano nga pamahayag sa pagkamasulundon.

Tungod kay ang mga anak ni Israel misunod sa tambag ni Moises ug milihok uban sa hugot nga pagtuo, naluwas sila gikan sa pagsakit ug, sa maong panahon nakalingkawas gikan sa ilang pagkabinihag.

Busa unsa man ang gitudlo sa Espiritu Santo kanako dinhi niini nga mga kapitulo?

Aniay pipila ka pagtulon-an nga misulod sa akong hunahuna:

Ang Ginoo molihok pinaagi sa Iyang propeta aron sa pagpanalipod ug pagluwas sa Iyang katawhan.
Ang hugot nga pagtuo ug kamapaubsanon sa pagsunod sa propeta nag-una sa milagro sa pagpanalipod ug sa pagkaluwas.
Ang dugo nga anaa sa haligi sa mga pultahan usa ka panggawas nga timailhan sa anaa sa sulod nga hugot nga pagtuo diha kang Jesukristo, ang Kordero sa Dios.

Ang Propeta ug ang mga Saad sa Ginoo

Nakadayeg ko sa pagkahisama tali sa paagi sa pagpanalangin sa Ginoo sa Iyang katawhan sa Daang Tugon nga asoy ug sa paagi usab sa Iyang pagpanalangin sa Iyang katawhan karon.

Dihang ang buhing propeta sa Ginoo, si Presidente Nelson, mipaila ngari kanato sa Dali, Sunod Kanako isip mga himan sa pagtuon sa mga kasulatan, siya midapit sa pag-usab sa atong mga panimalay ngadto sa pagka-santuwaryo sa hugot nga pagtuo ug mga sentro sa pagkat-on sa ebanghelyo.

Dayon misaad siya og upat ka piho nga panalangin:

ang inyong mga adlaw nga Igpapahulay mamahimo nga kahimut-an,
ang inyong mga anak magmahinamon sa pagkat-on ug pagsunod sa mga pagtulon-an sa Manluluwas,
ang impluwensiya sa kaaway sa inyong kinabuhi ug sa inyong panimalay mokunhod, ug
kini nga mga kausaban sa inyong pamilya mahinuklogon ug magpadayon.⁶

Karon, wala kitay mga sinulat sa journal gikan niadtong mga nakasinati sa Pagsaylo uban ni Moises sa Ehipto. Hinoon, aduna kitay daghan nga pagpamatuod gikan sa mga Santos kinsa, uban sa kaparehas nga hugot nga pagtuo, nagsunod sa tambag ni Presidente Nelson karon ug nagdawat sa gisaad nga mga panalangin.

Ania ang pipila niana nga mga pagpamatuod:

Usa ka inahan sa batan-ong pamilya miingon: “Maghisgot kami kang Kristo ug magmaya diha kang Kristo sa among panimalay. Alang nako mao kana ang talagsaon nga panalangin—nga ang akong mga anak magtubo uban niining mga paghisgot sa ebanghelyo sulod sa panimalay nga magdala kanila paduol sa Manluluwas.”⁷

Usa ka senior nga igsoong lalaki mingalan sa iyang pagtuon sa mga kasulatan gamit ang Dali, Sunod Kanako nga “usa ka agianan nga puno sa balaanong kahayag nga nagtabang kanamo nga makakita sa doktrina sa ebanghelyo nga gikinahanglan alang sa among espirituhanong kaayohan.”⁸

Usa ka batan-ong asawa mihulagway sa mga panalangin sa iyang kaminyoon: “Nakahimo ko sa pag-ila sa kasingkasing sa akong bana sa mas halawom nga paagi ug nakahimo ko sa pag-abli og dako sa akong kasingkasing ngadto kaniya samtang dungan kaming nagtuon.”⁹

Usa ka inahan sa dakong pamilya nakamatikod kon sa unsang paagi nausab ang iyang paningkamot nga matudloan ang iyang pamilya. Miingon siya: “Sa paghinumdom, sama kini nga nagpatukar ko og piano nga nagsul-ob og gwantis nga pang-snow. Nagsunod-sunod lang ko, apan ang musika dili kaayo maayo. Karon nga wala nay gwantis, ug samtang ang akong musika dili gihapon perpekto, akong madungog ang kalainan. Ang Dali, Sunod Kanako naghatag nako og panan-awon, katakos, pokus, ug katuyoan.”¹⁰

Usa ka batan-ong bana miingon: “Ang labing importante nakong prayoridad sa panimalay nagkahimo nga mas klaro sukad ang Dali, Sunod Kanako gihimo nakong regular nga bahin sa matag buntag. Ang pagtuon nagpahunahuna kanako og daghan mahitungod sa mga butang nga labing mahinungdanon kanako, sama sa templo, sa akong relasyon sa akong asawa, ug sa akong calling. Mapasalamaton ko nga ang akong panimalay usa ka santuwaryo diin ang Dios mao ang mag-una.”¹¹

Usa ka igsoong babaye mipaambit: “Ang akong inadlaw nga kasinatian sa Dali, Sunod Kanako talagsa ra kaayong mabantayan, apan sa kadugayan akong nakita ang akong pagkausab pinaagi sa padayon, nakapokus nga pagtuon sa mga kasulatan. Kana nga matang sa pagtuon naghimo kanakong mapaubsanon, natudloan ko, ug nausab ko sa hinay-hinay.”¹²

Usa ka nauli na nga misyonaryo mireport: “Ang Dali, Sunod Kanako nga programa naghimo nako nga mapadayon ang susamang pagtuon sa kasulatan nga akong gihimo sa misyon, ug ang naandan nga paghimo og cheklist sa pagtuon sa kasulatan nausab ngadto sa tinuoray nga mga sesyon sa pagpalambo aron makaila sa Dios.”¹³

Usa ka igsoong lalaki miingon: “Akong gibati nga mas anaa ang Espiritu Santo sa akong kinabuhi ug mibati sa mapanagnaong giya sa Dios sa paghimo og mga desisyon. Duna koy mas halawom nga pagkighinabi bahin sa katahom sa yanong doktrina ni Kristo ug sa Iyang Pag-ula.”¹⁴

Usa ka siyete anyos nga bata mipaambit: “Hapit na ang akong bunyag, ug ang Dali-Sunod Kanako naghimo nakong andam. Ang akong pamilya ug ako maghisgot mahitungod sa bunyag, ug wala ko mobati og kahadlok mahitungod sa pagpabunyag karon. Ang Dali, Sunod Kanako nagtabang sa Espiritu Santo nga mosulod sa akong kasingkasing, ug akong bation ang kainit kon magbasa ko sa mga kasulatan.”¹⁵

Ug dayon ang kataposan, gikan sa inahan nga may daghang anak: “Samtang magtuon kami sa pulong sa Dios, Iyang gitabangan ang among pamilya gikan sa usa ka kabalaka ngadto sa gahom; gikan sa pagsulay ug hagit ngadto sa pagkahaw-as; gikan sa panagbingkil ug pagpanaway ngadto sa gugma ug kalinaw; ug gikan sa impluwensiya sa kaaway ngadto sa impluwensiya sa Dios.”¹⁶

Kini ug daghan pang uban nga matinud-anong mga sumusunod ni Kristo sa simbolikanhong paagi mipahimutang sa dugo sa Kordero sa Dios sa entrada sa ilang mga panimalay. Ilang gipakita ang anaa sa sulod kanila nga pasalig sa pagsunod sa Manluluwas. Ang ilang hugot nga pagtuo nag-una sa milagro. Kana ang milagro sa usa ka tawo nga adunay kasinatian diha sa mga kasulatan ug kana nga kasinatian gipanalanginan sa impluwensiya sa Espiritu Santo.

Kon magtuon kita sa mga kasulatan, walay espirituhanong kagutom sa yuta. Sama sa giingon ni Nephi, “Si kinsa kadto nga mopatalinghog sa pulong sa Dios, ug hugot nga mogunit niini, dili gayod sila malaglag; ni ang mga pagtintal ug ang nagdilaab nga mga pana sa kaaway makabuntog kanila ngadto sa pagkabuta, sa pagdala kanila sa kalaglagan” (1 Nephi 15:24).

Sa karaang kapanahonan, samtang ang mga anak ni Israel misunod sa sugo sa Ginoo nga gihatag pinaagi ni propeta Moises, sila gipanalanginan og kasegurohan ug kagawasan. Karon, samtang kita mosunod sa sugo sa Ginoo nga gihatag pinaagi sa atong buhi nga propeta, nga si Presidente Nelson, parehas kitang mapanalanginan og pagkakabig sa atong mga kasingkasing ug panalipod sa atong mga panimalay.

Mopamatuod ko nga si Jesukristo buhi. Kini Iya nga Simbahan, gipahiuli sa kalibotan pinaagi ni Propeta Joseph Smith. Si Presidente Russell M. Nelson mao ang propeta sa Ginoo karon. Ako nahigugma ug nagpaluyo kaniya. Sa ngalan ni Jesukristo, amen.