Misalir ba ang Plano?
Ako mopamatuod nga ang plano sa kalipay mosalir. Kini gimugna sa inyong Langitnong Amahan, kinsa nahigugma kaninyo.
Misalir ba ang plano?
Bag-ohay lang nakig-istorya ko sa batan-ong hamtong nga miserbisyo og misyon pipila ka tuig na ang milabay ug karon nagtrabaho na sa iyang propesyon. Sa pipila ka paagi, ang iyang kinabuhi maayo ra. Apan ang iyang hugot nga pagtuo mikunhod. Nag-anam siya pagkaunlod ngadto sa pagduhaduha mahitungod sa Manluluwas ug sa Iyang Simbahan. Siya mipasabot nga wala niya madawat ang mga panalangin nga iyang gipaabot gikan sa gipahiuli nga ebanghelyo. Siya wala mobati nga ang plano sa kalipay misalir sa iyang kinabuhi.
Ang akong mensahe karon alang niadtong kinsa adunay susama nga mga gibati. Ako mamulong niadtong usahay “mibati sa pag-awit sa awit sa matubsanon nga gugma” apan wala “[mo]bati karon sa mao.”1
Ang atong Langitnong Amahan nag-andam og maanindot nga plano alang sa atong mahangtorong kalipay. Apan kon ang kinabuhi wala mopahinabo sa paagi nga atong gilaoman, daw ingon kini nga ang plano wala mosalir.
Tingali mibati kita sa unsay gibati sa mga disipulo ni Jesus sa dihang anaa sila sa sakayan nga “didto na sa lawod, gikusokuso sa mga balod: kay ang hangin sungsungon man.”2
Dayon, sayo kaayo sa kabuntagon:
“Si Jesus miapas kanila nga naglakaw ibabaw sa tubig.
“Sa pagkakita sa mga tinun-an kaniya nga naglakaw sa tubig, nangahadlok kaayo sila, … ug naninggit.
“Si Jesus miingon kanila, Ayaw kamo kahadlok; Ako kini.
“Unya si Pedro miingon, Ginoo, kon ikaw kana, palakta ako sa tubig nganha kanimo.
“Dali ngari, mitubag si Jesus. Busa mikawas si Pedro sa sakayan, ug milakaw sa tubig ngadto kang Jesus.
“Apan sa pagkamatikod niya sa kusog nga hangin, nahadlok siya; ug misugod pagkaunlod. Busa misinggit siya, … Ginoo, luwasa ako.
“Dihadiha gikuptan siya ni Jesus ug gibira, ug miingon si Jesus kaniya, Pagkagamay sa imong pagtuo, nganong nagduhaduha ka man?”3
Mahimo ba ko nga mopaambit ninyo og tulo ka baroganan nga akong nakat-onan gikan ni Pedro? Ako nag-ampo nga kini nga mga baroganan unta makatabang ni bisan kinsa nga mibati nga ang plano sa kalipay wala mosalir sa ilang mga kinabuhi.
Una, molihok inubanan sa hugot nga pagtuo diha ni Jesukristo.
Nahingangha ko sa hugot nga pagtuo ni Pedro. Sa yanong pagdapit ni Jesus nga “dali ngari,” siya mibiya sa iyang sakayan nga gikusokuso sa hangin. Siya daw nakahibalo nga kon si Jesukristo modapit niya sa pagbuhat og usa ka butang, siya makahimo niini.4 Si Pedro misalig sa Manluluwas labaw pa kaysa iyang pagsalig sa iyang sakayan. Ug kana nga hugot nga pagtuo naghatag niya og gahom nga molihok inubanan sa kaisog atol sa makapaluya, makahahadlok nga sitwasyon.
Ang hugot nga pagtuo ni Pedro nakapahinumdom nako sa usa ka kasinatian nga akong nadungog gikan ni Elder José L. Alonso. Wala madugay human sa kamatayon sa anak nga lalaki ni Elder Alonso, nagbilin og usa ka pamilya nga adunay gagmayng mga anak, si Elder Alonso nakadungog sa mga anak nga nag-istoryahanay.
“Unsa man ang atong buhaton?” sila nangutana.
Ang nuybe anyos nga anak nga babaye mitubag, “si Daddy OK ra. Siya nagsangyaw sa ebanghelyo ni Jesukristo.”
Sama ni Pedro, kining gamay nga batang babaye mitan-aw lapas pa sa iyang mga hagit ug misalig ni Jesukristo ug sa Iyang Pag-ula. Ang hugot nga pagtuo diha sa Manluluwas nagdala og kalinaw ug kalig-on sa pagpadayon.
Kon molingi kamo sa inyong kinabuhi, nagtuo ko nga inyong makita nga migamit kamo sa hugot nga pagtuo sa daghang higayon. Ang pag-apil sa Simbahan usa ka buhat sa hugot nga pagtuo. Ang pakigsulti sa Langitnong Amahan diha sa pag-ampo usa ka buhat sa hugot nga pagtuo. Ang pagbasa sa mga kasulatan usa ka buhat sa hugot nga pagtuo. Ang pagpaminaw sa akong mensahe niining kinatibuk-ang komperensiya usa ka buhat sa hugot nga pagtuo. Si Presidente Russell M. Nelson miingon, “Ayaw paus-osi ang hugot nga pagtuo nga anaa na kaninyo.”5
Ang laing leksiyon nga akong nakat-onan gikan ni Pedro mao kini:
Sa panahon sa kalisod, dangop dayon ngadto ni Jesukristo.
Samtang naglakaw siya paingon sa Manluluwas, si Pedro nahadlok sa hangin ug misugod sa pagkaunlod. Apan sa dihang naamgohan ni Pedro kon unsay nahitabo, wala siya mosulay og haw-as sa tubig nga siya lang o molangoy balik ngadto sa sakayan. Imbis mobuhi sa iyang hugot nga pagtuo ni Kristo, siya kusganong mikupot niini, nga miingon, “Ginoo, luwasa ako.”
“Dihadiha gikuptan siya ni Jesus ug gibira.”6
Kitang tanan nagsagubang og kalisdanan sa kinabuhi nga makapatay-og sa atong hugot nga pagtuo ug maoy hinungdan nga kita mounlod. Kon kini mahitabo, palihog hinumdomi nga ang plano sa Langitnong Amahan bahin sa kalipay adunay laing ngalan—ang plano sa katubsanan. Ang plano dili aron kita hamugaway nga molahutay sa kinabuhi, dili gayod masayop, dili gayod mounlod, nga kanunayng mapahiyomon. Ang Langitnong Amahan nasayod nga kita kinahanglan nga pagatubson. Mao nga Siya miandam sa plano sa katubsanan.7 Mao nga Siya mipadala og Manunubos. Kon kita naglisod—sa bisan unsa nga rason—wala kana magpasabot nga ang plano wala mosalir. Mao kana ang higayon nga kita labing nagkinahanglan sa plano!
Nianang mga higayona, sunda ang ehemplo ni Pedro. Dangop dayon ngadto sa Manluluwas.
“Karon mao ang takna ug adlaw sa inyong kaluwasan. … Ayaw langaya ang adlaw sa inyong paghinulsol.”8
Bisan asa man kita o asa kita gikan, ang paghinulsol mao ang paagi nga makapadayon. Si Presidente Nelson nagtudlo:
“Walay laing mas makapagawasnon, mas makapahamili, o mas importante sa atong kaugalingong paglambo kay sa usa ka kanunay, matag adlaw nga paghatag og gibug-aton sa paghinulsol. …
“Makugihon man kamong misubay sa dalan sa pakigsaad, mitipas o mipalayo gikan sa dalan sa pakigsaad, o dili gani makakita sa dalan gikan sa inyong nahimutangan karon, ako mohangyo kaninyo sa paghinulsol. Sinatia ang makapalig-on nga gahom sa matag-adlaw nga paghinulsol––sa pagbuhat ug mahimong mas maayo matag adlaw.”9
Ang pagduol ngadto kang Kristo nagpasabot og labaw pa kaysa paghunahuna mahitungod Kaniya o pagsulti mahitungod Kaniya o gani paghigugma Kaniya. Nagpasabot kini og pagsunod Kaniya. Nagpasabot kini og pagpakabuhi sa paagi nga Iyang gitudlo nato nga magpakabuhi. Ug alang natong tanan, kana nagpasabot og paghinulsol, sa walay langan.
Usa sa akong mga anak nga babaye nagtrabaho kaniadto sa missionary training center. Misulti siya nako bahin sa usa ka elder nga iyang gitudloan kinsa mitug-an niya nga dili siya sigurado kon ang Basahon ni Mormon tinuod ba. Nagsige siya og ampo alang sa espirituhanong pagsaksi, apan wala siya makadawat og tubag.
Ang akong anak nga babaye nag-ampo aron masayod unsay iyang mahimo aron matabangan kini nga misyonaryo. Ang impresyon nga iyang nadawat mao nga ang mga kasulatan wala lamang gihatag aron kita makabasa niini ug makabaton og pagpamatuod; kini gihatag usab aron tudloan kita sa pagtuman sa mga sugo sa Dios. Ang akong anak nga babaye mipaambit niini nga hunahuna ngadto sa misyonaryo.
Wala madugay, nakita niya pag-usab kini nga misyonaryo, nga mas malipayon tan-awon. Siya misulti niya nga sa kataposan nakadawat siya og pagpamatuod nga ang Basahon ni Mormon tinuod. Siya nasayod nga kini nga pagsaksi miabot tungod kay naghimo siya og mas dakong paningkamot sa pagbuhat sa unsay gitudlo sa Basahon ni Mormon.
Atong sundon ang ehemplo ni Pedro nga modangop ngadto sa Manluluwas atol sa atong mga panahon sa kalisod. Sunda si Jesukristo imbis mosalig sa inyong kaugalingong kaalam ug kalig-on. Bisan kon unsa na kamo kadugay nga misulay sa paghaw-as sa tubig nga wala Siya, dili pa ulahi nga mangayo og tabang Niya. Ang plano mosalir!
Ang ikatulong baroganan nga akong nakat-onan gikan ni Pedro ug sa iyang kasinatian mao kini:
Ipaubos ang inyong kaugalingon sa atubangan sa Ginoo, ug Siya mobayaw ninyo ngadto sa mas maayo nga mga butang.
Si Pedro mipakita og hugot nga pagtuo, diha sa paglakaw sa tubig ug diha sa pagpangayo og tabang sa Manluluwas sa dihang nagkinahanglan siya og tabang. Bisan pa man, nakita sa Manluluwas diha ni Pedro ang potensiyal nga mahimong mas maayo pa. “Pagkagamay sa imong pagtuo,” Siya miingon, “nganong nagduhaduha ka man?”10
Si Pedro mahimong masuko niini nga pagbadlong. Apan siya mapaubsanong midawat niini. Siya mipadayon sa pagtinguha og mas dakong hugot nga pagtuo diha ni Jesukristo. Pinaagi sa daghang dugang pa nga kasinatian nga makapaugmad sa hugot nga pagtuo—pipila niini lisod gayod kaayo—si Pedro sa kataposan nahimong sama ka lig-on sa bato nga lider nga gusto sa Ginoo nga siya mamahimo. Siya nakabuhat og mahinungdanong mga butang diha sa pagserbisyo sa Ginoo.
Unsa nga mahinungdanong mga butang ang gusto sa Ginoo nga ipabuhat kaninyo? Sa Iyang Simbahan ug gingharian, adunay daghang oportunidad sa pagserbisyo ug pagpangalagad ngadto sa uban sama sa gibuhat sa Manluluwas. Siya gusto nga kamo mahimong kabahin sa Iyang mahinungdanong buhat. Ang plano sa kalipay mahimong mas tinuod nganha ninyo kon kamo motabang sa uban sa pagsunod niini.
Sa pag-ugmad sa akong kaugalingong hugot nga pagtuo, kining mga pulong ni Alma makapausab sa kinabuhi: “Bulahan sila kinsa magpaubos sa ilang mga kaugalingon nga wala pugsa sa pagpaubos.”11 Mapaubsanon natong ibutang ang atong kaugalingon diha sa kahimtang diin si Jesukristo mahimong mobayaw nato, mogiya nato, ug mopagawas sa atong mga abilidad.12
Ako mopamatuod nga ang plano sa kalipay mosalir. Kini gimugna sa inyong Langitnong Amahan, kinsa nahigugma kaninyo. Misalir kini tungod kay si Jesukristo mibuntog sa sala ug kamatayon pinaagi sa Iyang Pag-ula. Duol ngadto Kaniya, sunda Siya, ug “diha-diha ang mahinungdanon nga laraw sa katubsanan mapadangat nganha kaninyo.”13 Sa ngalan ni Jesukristo, amen.