Hagdanan sa Hugot nga Pagtuo
Ang pagkadili mautohon mobabag sa atong abilidad sa pagkakita og mga milagro, apan ang usa ka panghunahuna sa hugot nga pagtuo diha sa Manluluwas mobukas sa mga gahom sa langit.
Sa unsang paagi nga ang mga hagit sa kinabuhi makaapekto sa atong hugot nga pagtuo diha ni Jesukristo? Ug unsa ang epekto sa atong hugot nga pagtuo diha sa kalipay ug kalinaw nga atong masinati niining kinabuhia?
Tuig kadto sa 1977. Mibagting ang telepono, ug ang mensahe nakapasubo kaayo namo. Si Carolyn ug si Doug Tebbs mamalhinay na ngadto sa ilang bag-ong panimalay pagkahuman sa graduate school. Ang korum sa mga elder miabot aron sa pagpangarga ngadto sa van para sa pagbalhin. Si Doug, misiguro nga ang dalan hawan sa dili pa moatras, mitan-aw pa gayod og kausa. Ang wala niya makit-i mao ang iyang anak nga batang babaye, si Jennie, nga mikalit og dagan paingon sa luyo sa sakyanan atol gayod sa sayop nga higayon. Sa kalit kaayo, ang ilang pinangga nga si Jennie namatay.
Unsa ang sunod mahitabo? Ang kalawom ba sa kasakit nga ilang gibati ug ang dili matukib nga pagbati nga namatyan makamugna ba og distansiya tali ni Carolyn ug Doug, o kini makabugkos sa ilang mga kasingkasing ug makapalig-on sa ilang hugot nga pagtuo diha sa plano sa Langitnong Amahan?
Ang ilang gisagubang nga mga kasakit taas ug sakit, apan ang espirituhanong kalig-on miabot nga dili mawad-an og paglaom, apan “[mag]padayon sa [ilang] pamaagi.”1 Kon sa unsang paagiha kining talagsaong magtiayon nahimong mas sama ni Kristo. Mas mapasaligon. Mas maloloy-on. Sila mituo nga, sa Iyang panahon, ang Dios mopahinungod sa ilang mga kasakit alang sa ilang kaayohan.2
Bisan ang kasakit ug ang pagbati nga namatyan dili ug dili hingpit nga mobiya, si Carolyn ug Doug nahupay pinaagi sa kasiguroan nga pinaagi sa pagpabilin nga lig-on diha sa dalan sa pakigsaad, ang ilang minahal nga si Jennie ilaha gihapon hangtod sa kahangtoran.3
Ang ilang ehemplo nakapalig-on sa akong hugot nga pagtuo diha sa plano sa Ginoo. Kita dili makakita sa tanang butang. Siya ang makakita. Ang Ginoo misulti ngadto ni Joseph Smith sa Bilanggoan sa Liberty: “Kining tanan nga mga butang makahatag kanimo og kasinatian, ug alang sa imong kaayohan. Ang Anak sa Tawo mikunsad ubos kanilang tanan. Labaw pa ba ikaw kay kaniya?”4
Samtang atong dawaton ang kabubut-on sa Ginoo, Siya motudlo kanato sa paglakaw uban Kaniya.5 Isip usa ka batan-ong misyonaryo nga nagserbisyo didto sa Tahiti, ako gihangyo sa pagpangalagad ngadto sa usa ka masakiton nga batang masuso. Among gipandong ang among mga kamot diha sa iyang ulo ug mipanalangin kaniya aron mamaayo. Ang Iyang panglawas misugod sa paglambo, apan nasakit pag-usab. Sa ikaduha nga higayon kami mipanalangin kaniya apan mao gihapon ang resulta. Ang ikatulo nga hangyo miabot. Kami nangamuyo sa Ginoo nga ang Iyang kabubut-on maoy matuman. Dili lang gyod dugay human niana, kining gamayng espiritu mibalik ngadto sa iyang langitnong panimalay.
Apan kami nagmalinawon. Kami gusto nga mabuhi ang batang masuso, apan ang Ginoo adunay laing mga plano. Ang pagdawat sa Iyang kabubut-on imbis sa atong kaugalingon mao ang importanteng paagi sa pagkaplag og kalipay bisan unsa pa ang atong mga kahimtang.
Ang yanong hugot nga pagtuo diha ni Jesukristo nga anaa nato samtang kita nagsugod pa sa pagkat-on kabahin Kaniya mahimong magpabilin diha sa atong mga kasingkasing samtang kita nagsagubang sa mga hagit sa kinabuhi. Ang atong hugot nga pagtuo diha Kaniya makagiya kanato latas sa kakomplikado sa kinabuhi. Tinuod gayod, atong masuta nga adunay pagkayano diha sa pikas habig sa mga kakomplikado sa kinabuhi6 samtang kita magpabilin nga “[makanunayon] diha ni Kristo magbaton sa usa ka hingpit nga kahayag sa paglaom.”7
Tipik sa katuyoan sa kinabuhi mao ang paghimo niining potensiyal nga babag nga mamahimong butang nga makatabang kanato nga mopadayon sa unsay akong gitawag og “hagdanan sa hugot nga pagtuo”—usa ka hagdanan tungod kay kini nagsugyot nga ang hugot nga pagtuo wala mag-urong. Kini mahimong molambo o mokunhod sumala sa mga pagpili nga atong himoon.
Samtang kita maningkamot sa pag-ugmad og hugot nga pagtuo sa Manluluwas, kita tingali dili hingpit makasabot sa gugma sa Dios alang kanato, ug kita mahimong mosunod sa Iyang mga balaod tungod sa pagbati og obligasyon. Ang tanlag gani mahimong maoy atong nag-unang tigdasig kay sa gugma. Ang tinuod nga koneksiyon ngadto Kaniya tingali wala pa masinati.
Samtang kita nagtinguha sa pagpalambo sa atong hugot nga pagtuo, kita mahimong maglibog sa unsay gitudlo ni Santiago. Siya mipahinumdom nato nga “ang pagtuo nga dili ubanag mga buhat walay kapuslanan.”8 Kita mahimong masayop kon kita maghunahuna nga ang tanang butang nag-agad ra nato. Ang naghinobra nga pagdepende sa atong kaugalingon makapugong sa atong abilidad sa paggamit sa mga gahom sa langit.
Apan samtang kita mopadayon ngadto sa tinuod nga hugot nga pagtuo diha ni Jesukristo ang atong panghunahuna magsugod sa pagka-usab. Kita makaamgo nga ang pagkamasulundon ug hugot nga pagtuo diha sa Manluluwas makapasarang nato sa pagbaton sa Iyang Espiritu kanunay nga mag-uban nato.9 Ang pagkamasulundon dili na makahasol, apan mahimo na nga usa ka tumong.10 Makaamgo kita nga ang pagkamasulundon ngadto sa mga sugo sa Dios makapahimo kanato nga masaligan Kaniya. Uban niining Iyang pagsalig moabot ang palambo sa kahayag. Kini nga kahayag mogiya sa atong panaw sa kinabuhi ug motugot kanato nga mas klaro nga makita ang dalan nga angay natong subayon.
Apan adunay dugang pa. Samtang ang atong hugot nga pagtuo sa Manluluwas molambo, kita makaobserbar og lahi nga kausaban nga maglakip og usa ka balaanong pagsabot sa atong relasyon sa Dios—usa ka makanunayon nga paglihok palayo gikan sa “Unsa ang akong gusto” ngadto sa “Unsa ang gusto sa Dios?” Sama sa Manluluwas, kita gusto nga mobuhat nga “dili ang akong pagbuot maoy matuman, kondili ang imo.”11 Kita gusto nga mobuhat sa buhat sa Dios ug mahimong instrumento sa Iyang mga kamot.12
Ang atong kauswagan usa ka mahangtoron. Si Presidente Russell M. Nelson nagtudlo nga adunay daghan pa nga gusto sa Langitnong Amahan nga atong mahibaloan.13 Samtang mouswag kita, mas atong masabtan kon unsa ang gitudlo sa Ginoo ni Joseph Smith: “Kay kon ikaw maghupot sa akong mga sugo ikaw makadawat sa iyang kahingpitan, ug mahimaya ngari kanako ingon nga Ako diha sa Amahan; busa, Ako moingon nganha kanimo, ikaw makaangkon og grasya ug dugang pa nga grasya.”14
Kon sa unsang paagi kita mosaka sa hagdan sa hugot nga pagtuo atoa kana nga desisyon. Si Elder Neil L. Andersen mipasabot, “Ang inyong pagtuo molambo dili pinaagi sa sulagma, apan pinaagi sa pagpili.”15 Kita makapili sa paghimo og mga pagpili nga gikinahanglan aron mapalambo ang atong hugot nga pagtuo diha sa Manluluwas.
Ikonsiderar ang epekto sa mga pagpili nga gihimo sa dihang si Laman ug si Lemuel mikanaog sa hagdanan sa hugot nga pagtuo samtang si Nephi misaka og mas taas. Aduna pa bay mas klaro nga representasyon kay sa kalahian tali sa tubag ni Nephi nga “Ako moadto ug mobuhat”16 kon itandi nilang Laman ug Lemuel, nga mao pa lang gyod ang pagkakita og usa ka anghel, mitubag og “Sa unsa nga paagi nga ang Ginoo motugyan?”17
Ang pagkadili mautohon mobabag sa atong abilidad sa pagkakita og mga milagro, apan ang usa ka panghunahuna sa hugot nga pagtuo diha sa Manluluwas mobukas sa mga gahom sa langit.
Bisan kon ang atong hugot nga pagtuo huyang, ang kamot sa Ginoo kanunayng gituyhad.18 Pipila ka tuig na ang milabay gisangonan ko sa pag-organisar pag-usab sa usa ka stake didto sa Nigeria. Sa hapit na kini moabot, adunay kausaban sa petsa. Adunay usa ka tawo diha sa stake nga mihukom nga mobiya sa lungsod nianang unang petsa sa komperensiya sa stake. Dili siya gusto nga morisgo nga matawag isip presidente sa stake.
Samtang anaa siya didto sa layo, naaksidente siya, apan wala siya naunsa. Kini ang hinungdan nga siya naghunahuna kon nganong ang iyang kinabuhi giluwas. Iyang gihunahuna og balik ang desisyon nga iyang gihimo. Siya naghinulsol ug mapaubsanong mitambong sa bag-ong petsa sa komperensiya. Ug oo, siya gitawag nga mahimong bag-o nga presidente sa stake.
Si Elder Neal A. Maxwell nagtudlo: “Pinaagi lamang sa pagpahiangay sa atong mga kabubut-on ngadto sa kabubut-on sa Dios nga ang hingpit nga kalipay makaplagan. Bisan unsa nga butang nga ubos pa moresulta sa gamay nga bahin.”19
Human sa pagbuhat sa “tanan nga mga butang nga ubos sa atong gahom,” nan mao na kini ang panahon nga “magmalinawon … nga makasaksi sa kaluwasan sa Dios.”20 Ako kining nakita samtang nagserbisyo isip tigpangalagad nga brother ngadto sa pamilyang McCormick. Minyo sulod sa 21 ka tuig, si Mary Kay miserbisyo nga matinud-anon diha sa iyang mga calling. Si Ken dili miyembro sa Simbahan ug walay interes nga mamahimong miyembro, apan tungod sa gugma sa iyang asawa, siya mipili sa pagtambong sa simbahan uban niya.
Usa ka Dominggo mibati ko nga mopaambit sa akong pagpamatuod ngadto ni Ken. Ako siyang gihangyo kon mahimo ba nako nang buhaton. Ang iyang tubag yano ug klaro: “Ayaw lang, salamat.”
Naglibog ko. Nabati nako ang pag-aghat ug misulay sa pagsunod niini. Makatintal sa pagdesisyon nga ako nang gibuhat ang akong bahin. Apan human sa pag-ampo ug pamalandong, akong nakita nga bisan og ang akong tumong husto, misalig ko og maayo sa akong kaugalingon ug diyutay ra kaayo sa Ginoo.
Pagkataud-taod mibalik ko apan adunay lahi nga panghunahuna. Ako yanong moadto isip usa ka instrumento sa mga kamot sa Ginoo, nga walay laing tinguha kay sa pagsunod sa Espiritu. Uban sa akong matinud-anong kompanyon, si Gerald Cardon, kami misulod sa panimalay sa McCormick.
Sa wala nadugay, ako naaghat sa pagdapit ni Gerald sa pagkanta sa “Ako Nasayod nga Buhi ang Manunubos Ko.”21 Ang iyang tinan-awan nako daw nangutana, apan misalig sa akong hugot nga pagtuo, siya mihimo niini. Usa ka maanindot nga diwa ang mipuno sa kwarto. Ang pag-aghat miabot nga dapiton si Mary Kay ug si Kristin, ilang anak nga babaye, sa pagpaambit sa ilang mga pagpamatuod. Samtang ilang gibuhat, ang Espiritu nagkakusog. Sa pagkatinuod, human sa pagpamatuod ni Kristin, ang mga luha midagayday sa mga aping ni Ken.22
Ang Dios mipatigbabaw. Ang mga kasingkasing dili lang natandog apan nausab sa kahangtoran. Ang bayente uno ka tuig nga pagkadili matuohon nabanlas sa gahom sa Espiritu Santo. Paglabay sa usa ka semana, nabunyagan si Ken. Usa ka tuig ang milabay, si Ken ug Mary Kay nasilyo sa balay sa Ginoo alang sa karon ug sa tanang kahangtoran.
Nag-uban kami sa pagsinati sa unsay gipasabot sa pagpuli sa among kabubut-on ngadto sa kabubut-on sa Ginoo, ug ang among hugot nga pagtuo diha Kaniya milambo.
Palihog ikonsiderar ang pipila ka mga pangutana pinaagi sa balaan nga mga propeta sa Dios samtang kamo maningkamot sa pagsaka sa hagdanan sa hugot nga pagtuo:
Ako gihuboan ba sa garbo?23
Naghatag ba ako og luna diha sa akong kasingkasing alang sa pulong sa Dios?24
Gitugotan ba nako ang akong mga kasakit nga mahimong ikapahinungod alang sa akong kaayohan?25
Andam ba ako nga ipatuhop ang akong kabubut-on ngadto sa kabubut-on sa Amahan?26
Kon ako mibati sa pag-awit sa awit sa matubsanon nga gugma, mabati ba nako karon?”27
Ako bang gipatigbabaw ang Dios sa akong kinabuhi?28
Kon inyong nabatyagan nga ang inyong kasamtangan nga dalan misukwahi sa inyong hugot nga pagtuo sa Manluluwas, nan palihog pangitaa ang inyong dalan balik ngadto Kaniya ug ngadto sa dalan sa pakigsaad. Ang inyong kahimayaan ug ang inyong kaliwatan nagdepende niini.
Hinaot nga kita motisok sa liso sa hugot nga pagtuo diha sa atong mga kasingkasing. Hinaot nga kita moamuma niining mga liso samtang atong ibugkos ang atong kaugalingon ngadto sa Manluluwas pinaagi sa pagtahod sa mga pakigsaad nga atong gihimo uban Kaniya. Sa ngalan ni Jesukristo, amen.