Matag Usa Kanato Adunay usa ka Istorya

Ni Elder Gerrit W. Gong

Sa Korum sa Napulog Duha ka Apostoles

Palihog dali na pangitaa ang inyong pamilya, ang tanan ninyong henerasyon, ug dad-a sila pauli sa panimalay.

Mga higala, mga kaigsoonan, matag usa kanato adunay usa ka istorya. Samtang kita modiskobre sa atong istorya, kita makonektar, kita mahisakop, kita mamahimo.

Ako si Gerrit Walter Gong. Ang Gerrit usa ka Dutch name, Walter (ang ngalan sa akong amahan) usa ka Amerikanong ngalan, ug ang Gong siyempre usa ka Chinese nga ngalan.

Gibana-bana sa mga eksperto nga 70–110 ka bilyon ka tawo ang nakapuyo sa yuta. Tingali usa lang kabuok ang ginganlan og Gerrit Walter Gong.

Matag usa kanato adunay usa ka istorya. Ganahan ko “sa higayon nga akong bation ang mabugnawng kahanginan.”¹ Akong sundog sundugon ang linaktan sa mga penguin sa Antartika. Ako manghatag sa mga nailo [orphan] didto sa Guatemala, sa kabataan diha sa kadalanan sa Cambodia, sa Masai nga kababayen-an sa African Mara sa ila mismong kinaunhan nga litrato sa ilang kaugalingon.

Ako maghulat diha sa ospital samtang ang matag usa sa among mga anak gipakatawo—sa higayon nga patabangon ko sa doktor.

Ako nagasalig sa Dios. Ako nagtuo nga “[kita] naingon, nga unta [kita] makabaton og hingpit nga kalipay ,”² nga adunay mga higayon ug mga panahon sa tanang butang ubos sa langit.³

Kahibalo ba kamo sa inyong istorya? Unsa ang kahulogan sa inyong ngalan? Ang populasyon sa kalibotan mitubo gikan sa 1.1 ka bilyon ka tawo niadtong 1820 hangtod dul-an sa 7.8 ka bilyon niadtong 2020.⁴ Sa tuig 1820 ingon og nahitabo ang dakong kausaban sa kasaysayan. Daghan ang natawo human sa 1820 nga aduna pay buhi nga handomanan ug mga rekord aron sa pag-ila sa pipila ka henerasyon sa pamilya. Makahunahuna ba kamo og usa ka espesyal, matam-is nga handomanan sa usa ka apohan o sa ubang sakop sa pamilya?

Bisan unsa pa ang sumada sa gidaghanon sa mga indibidwal nga nakapuyo sa yuta, kini may kinutoban, maihap, usa ka tawo sa usa ka higayon. Ikaw ug ako, matag usa kanato importante.

Ug palihog hunahunaa kini: nakaila man kita kanila o wala, kita ang matag usa kanato gipakatawo sa usa ka inahan ug amahan. Ug ang matag usa sa inahan ug amahan gipakatawo sa usa ka inahan ug amahan.⁵ Pinaagi sa paghimugso o pagkasinagop sa kaliwatan, kita sa kataposan makonektar diha sa pamilya sa Dios ug sa tawhanong pamilya.

Natawo niadtong 837 AD, ang akong ika-30 nga apohan nga lalaki, ang Unang Dragon nga Gong, misugod sa among pamilya sa balangay didto sa habagatang China. Sa unang higayon nga akong gibisita ang balangay sa Gong, ang mga tawo miingon, “Wenhan huilaile” (“Si Gerrit mibalik na”).

Sa habig sa akong inahan, ang among buhi nga family tree naglakip og liboan ka ngalan sa pamilya, aduna pay daghang diskobrehon.⁶ Matag usa kanamo adunay dugang pang pamilya nga ikonektar. Kon nagtuo kamo nga ang inyong iyaan sa tuhod [great-aunt] nakakompleto na sa tanang genealogy sa inyong pamilya, palihog pangitaa ang inyong mga ig-agaw ug mga kaig-agawan sa mga i-agaw. Ikonektar ang imong buhi nga handomanan sa mga ngalan sa pamilya gamit ang 10 ka bilyon nga mapangita nga mga ngalan sa FamilySearch karon nga anaa sa online nga koleksiyon ug ang 1.3 ka bilyon nga mga indibidwal diha sa Family Tree niini.⁷

Buhi nga kahoy nga adunay mga gamot ug mga sanga

Hangyoa ang mga higala o pamilya sa pagdrowing og usa ka buhi nga kahoy. Sama sa gitudlo ni Presidente Russell M. Nelson, ang buhi nga mga kahoy adunay mga gamot ug mga sanga.⁸ Maanaa man kamo sa una o sa ikanapulo nga nailhan nga henerasyon, ikonektar ang kagahapon alang sa ugma. Ikonektar ang mga gamot ug mga sanga sa inyong buhi nga family tree.⁹

Ang pangutana, “Asa man kamo naggikan?” nangutana sa inyong kaliwat, lugar nga natawhan, nasod nga natawhan o yutang natawhan. Sa tibuok kalibotan, 25 porsiyento kanato ang nagsubay sa atong yutang natawhan ngadto sa China, 23 porsiyento ngadto sa India, 17 porsiyento ngadto sa ubang Asia Pacific, 18 porsiyento ngadto sa Europe, 10 porsiyento ngadto sa Africa, 7 porsiyento ngadto sa Amerika.¹⁰

Ang pangutana nga, “Asa man kamo naggikan?” nagdapit usab kanato sa pagdiskobre sa atong balaang pagkatawo.

Matag usa kanato adunay usa ka istorya.

Ang usa ka pamilya nga akong kaila mikonektar sa lima ka henerasyon sa pamilya sa dihang sila mibisita sa ilang karaan nga panimalay didto sa Winnipeg, Canada. Didto ang apohan nga lalaki misulti sa iyang mga apo nga lalaki kabahin sa panahon nga ang duha ka misyonaryo (nga iyang gitawag sila og mga anghel gikan sa langit) midala sa gipahiuli nga ebanghelyo ni Jesukristo, nga miusab sa ilang pamilya sa kahangtoran.

Ang usa ka inahan nga akong nailhan midapit sa iyang mga anak ug sa ilang mga ig-agaw sa pagpangutana sa ilang apohang babaye sa tuhod kabahin sa iyang mga kasinatian sa pagkabata. Ang mga panimpalad sa apohan sa tuhod nga babaye ug ang mga leksiyon sa kinabuhi usa na karon ka gibahandi nga basahon sa pamilya nga naghiusa sa mga henerasyon.

Ang usa ka batan-ong lalaki nga akong nailhan nagpundok og usa ka “journal sa Papa.” Mga tuig na ang milabay, usa ka sakyanan midasmag ug mipatay sa iyang amahan. Karon, aron mailhan ang iyang amahan, kining maisogon nga batan-ong lalaki mipreserbar sa mga handomanan sa pagkabata ug mga istorya gikan sa pamilya ug mga higala.

Kon pangutan-on kon diin naggikan ang kahulogan sa kinabuhi, kasagaran sa mga tawo mobutang sa pamilya nga maoy una.¹¹ Kini naglakip sa pamilya nga nabuhi ug mitaliwan na. Siyempre, kon kita mamatay, kita anaa gihapon. Kita padayon nga mabuhi didto sa pikas habig sa tabil.

Dakong buhi, ang atong mga katigulangan angayan lang nga hinumdoman.¹² Kita mohinumdom sa atong kabilin pinaagi sa pagsulti sa mga kasaysayan, mga rekord sa clan ug mga istorya sa pamilya, mga lubong o mga lugar nga handomanan, mga kasaulogan nga gilitratohan, mga pagkaon, o mga butang nga makapahinumdom kanato sa atong mga minahal.

Hunahunaa kon asa kamo nagpuyo—dili ba kini maanindot kon giunsa sa inyong nasod ug komunidad sa paghinumdom ug pagpasidungog sa mga katigulangan, pamilya, uban pa kinsa miserbisyo ug misakripisyo? Pananglitan, atol sa ani sa tinglarag nga handomanan didto sa South Moulton, Devonshire, England, si Sister Gong ug ako ganahan mangita og gamay nga simbahan ug komunidad diin ang mga henerasyon sa among mga katigulangang Bawden mipuyo. Kami mitahod sa among mga katigulangan pinaagi sa paghimong possible sa mga panalangin sa langit pinaagi sa buhat sa templo ug family history¹³ ug pinaagi sa pagtinabangay nga masumpay¹⁴ ang kutay sa among henerasyon.¹⁵

Niining panahon karon nga “kaugalingon lang ang gihunahuna,” makabenepisyo ang katilingban kon ang mga henerasyon mokonektar diha sa makahuluganong mga paagi. Kita nagkinahanglan nga makaila sa atong kagikan aron matabangan kita nga mouswag—matuod nga mga relasyon, makahuluganon nga serbisyo, kinabuhi nga mas makahuluganon kay sa lumalabay nga makita sa media.

Ang pagkonektar ngadto sa atong mga katigulangan makausab sa atong mga kinabuhi sa makasurprisa nga mga paagi. Gikan sa ilang mga pagsulay ug mga kalamposan, kita makabaton og hugot nga pagtuo ug kalig-on.¹⁶ Gikan sa ilang gugma ug mga sakripisyo, kita makat-on sa pagpasaylo ug mopadayon sa paglambo. Ang atong mga anak mahimong lig-on. Kita makabaton og panalipod ug gahom. Ang koneksiyon uban sa mga katigulangan mopalambo sa kasuod sa pamilya, kamapasalamaton, mga milagro. Ang maong koneksiyon magdala og tabang gikan sa pikas habig sa tabil.

Sama nga ang kalipay moabot diha sa mga pamilya, ingon usab ang kasub-anan. Walay indibidwal nga hingpit, ni ang bisan kinsang pamilya. Kon kadtong kinsa kinahanglang mohigugma, moamuma, ug mopanalipod kanato mapakyas sa pagbuhat sa ingon, kita mobati nga biniyaan, maulawan, masakitan. Ang pamilya mahimong haw-ang nga bayanan. Apan, sa tabang sa langit, kita makasabot sa atong pamilya ug makig-uli sa usag usa.¹⁷

Usahay ang dili matarog nga pasalig ngadto sa makanunayon nga relasyon sa pamilya makatabang kanato nga matuman ang lisod nga mga butang. Sa ubang kahimtang, ang komunidad mahimong pamilya. Usa ka dalaygon nga batan-ong babaye kansang gubot nga pamilya kanunayng mobalhin nakakaplag og usa ka Simbahan nga adunay mga tawo nga mapinanggaon nga daw pamilya bisan asa siya aron amumahon ug gipabati nga siya nahisakop. Ang kaliwat ug ang sumbanan sa pamilya makaimpluwensiya apan dili motino kanato.

Ang Dios gusto nga ang atong mga pamilya magmalipayon ug mohangtod sa kahangtoran. Ang hangtod sa kahangtoran taas kaayo kon atong himoon ang usag usa nga dili malipayon. Ang kalipay mubo ra kaayo kon ang gipangga nga mga relasyon mohunong niining kinabuhia. Pinaagi sa sagrado nga mga pakigsaad, si Jesukristo mitanyag sa Iyang gugma, gahom, ug grasya nga makausab kanato¹⁸ ug moayo sa atong mga relasyon. Ang walay paghinakog nga serbisyo sa templo alang sa atong pamilya ug sa uban makapahimo sa Pag-ula sa Manluluwas nga matinuod alang kanila ug kanato. Gibalaan, kita makabalik sa panimalay ngadto sa presensya sa Dios isip mga pamilya nga mahangtouron nga nahiusa.¹⁹

Matag usa sa atong mga istorya mao ang usa ka panaw nga nagpadayon gihapon, samtang kita modiskobre, momugna, ug mamahimong aduna sa posibilidad nga molapas sa imahinasyon.

Miingon si Propeta Joseph Smith: “Kini maingon ngadto sa uban og usa ka dili kasagaran nga doktrina nga kita naghisgot—ang gahom nga nagsulat o nagbugkos dinhi sa yuta ug nagbugkos didto sa langit.”²⁰ Ang pagkakatilingbanon nga atong gimugna dinhi mabuhi uban sa mahangtourong himaya.²¹ Tinuod gayod nga, “kita kon wala [ang mga sakop sa pamilya] dili mahimo nga hingpit; ni sila kon wala kita,” mao kana, diha sa “tibuok ug walay kulang ug hingpit nga pagkahiusa.”²²

Unsa man ang atong buhaton karon?

Una, hunahunaa ang imong imahe nga mibanda og balik-balik taliwala sa duha ka salamin sa kahangtoran. Sa usa ka direksiyon handurawa ang imong kaugalingon isip anak nga babaye, apo, apo sa tuhod, sa pikas nga direksiyon, mopahiyom sa imong kaugalingon isip iyaan, inahan, apohan. Pagkadali nga molabay sa panahon! Sa matag panahon ug karakter, batyagi kon si kinsa ang uban kaninyo. Pundoka ang ilang mga litrato ug mga istorya, himoang tinuod ang ilang mga handomanan. Irekord ang ilang mga ngalan ug mga kasinatian, importanteng mga petsa. Sila ang inyong pamilya—ang pamilya nga inyong naangkon ug ang pamilya nga inyong gusto.

Samtang kamo mopahigayon sa mga ordinansa sa templo alang sa mga sakop sa pamilya ang espiritu ni Elijah, “usa ka pagpadayag sa Espiritu Santo nga naghatag og pagsaksi sa balaan nga kinaiyahan sa pamilya,”²³ mobugkos sa mga kasingkasing sa inyong mga amahan, mga inahan, ug mga anak nga magkahiusa diha sa gugma.²⁴

Ikaduha, itugot nga ang pagsuhid diha sa family history mahimong tinuyo ug dili pinugos. Tawagi ang inyong lola. Tutoki og maayo ang mga mata nianang bag-ong natawo nga bata. Paggahin og panahon—diskobriha ang kahangtoran—sa matag hugna sa inyong panaw. Pagkat-on ug dawata inubanan sa pasalamat ug sa kamatinuouron ang inyong kabilin sa pamilya. Magsaulog ug ikahimuot ang maanindot ug, kon gikinahanglan, mapaubsanong mobuhat sa tanang butang nga dili ipasa ang mga negatibong butang. Tugoti nga ang maayong mga butang magsudgod diha kaninyo.

Ikatulo, bisitaha ang FamilySearch.org. I-download ang anaa nga mga mobile app. Libre kini ug makalingaw. Modiskobre, mokonektar, mahisakop. Tan-awa kon sa unsa ang inyong relasyon ngadto sa mga tawo diha sa usa ka chat room; pagkasayon ug kamagantihon niini nga makadugang og mga ngalan ngadto sa inyong buhi nga family tree, sa pagpangita ug pagpanalangin sa inyong mga katigulangan ug mga kaliwatan.

Ikaupat, motabang sa paghiusa sa mga pamilya nga magmahangtouron. Hinumdomi ang gidaghanon sa anaa sa langit. Aduna pay daghan sa pikas habig sa tabil kay sa dinhi nga habig. Samtang nagkadaghan ang mga templo nga nagkaduol kanato, palihog tanyagi kadtong mga nagpaabot alang sa mga oportunidad sa ordinansa sa templo aron madawat kini.

Ang saad atol sa Pasko sa Pagkabanhaw ug sa kanunay mao nga, diha ug sa pinaagi ni Jesukristo, kita mahimong mao ang labing maanindot nga istorya, ug ang atong mga pamilya mahimong magmalipayon hangtod sa kahangtoran. Sa tanang henerasyon, si Jesukristo mialim sa mga kabos, mitubos sa mga binihag, gihatagan og kagawasan sa mga dinaogdaog.²⁵ Ang pakigsaad nga mahisakop sa Dios ug sa usag usa²⁶ naglakip sa pagkasayod nga ang atong espiritu ug lawas mahiusa pag-usab diha sa pagkabanhaw ug ang atong labing bililhon nga mga relasyon mahimong magpadayon lapas pa sa kamatayon uban sa hingpit nga kalipay.²⁷

Matag usa kanato adunay usa ka istorya. Dali na diskobreha ang inyong istorya. Dali na pangitaa ang inyong tingog, ang inyong awit, ang inyong panag-uyon diha Kaniya. Kini mao gayod ang katuyoan diin ang Dios milalang sa kalangitan ug sa yuta ug nakita nga maayo gayod ang tanan.²⁸

Dayega ang plano sa kalipay sa Dios, ang Pag-ula ni Jesukristo, sa nagpadayon nga pagpahiuli sa Iyang ebanghelyo ug sa Simbahan. Palihog dali na pangitaa ang inyong pamilya, ang tanan ninyong henerasyon, ug dad-a sila pauli sa panimalay. Sa sagrado ug balaan nga ngalan ni Jesukristo, amen.