Ablihi ang Langit pinaagi sa Buhat sa Templo ug Family History
Ni Presidente Russell M. Nelson
Presidente sa Korum sa Napulog Duha ka mga Apostoles
Ug ni Wendy W. Nelson
Gikan sa presentasyon sa RootsTech 2017 Family History Conference didto sa Salt Lake City, Utah, USA, niadtong Pebrero 11, 2017. Sa pagtan-aw sa rekording sa presentasyon sa English, Portuguese, o Spanish, bisitaha ang lds.org/go/1017Nelson
Atol sa ilang 2017 nga presentasyon didto sa RootsTech, si Presidente Russell M. Nelson ug ang iyang asawa, si Wendy, midapit sa mga Santos sa Ulahing mga Adlaw nga ikonsiderar sa mainampuong paagi kon unsang matang sa sakripisyo ang ilang mahimo aron mas daghan ang buhat sa templo ug family history.
Presidente Nelson: Dihang ang akong apohan si A. C. Nelson usa pa ka batan-ong bana ug amahan, 27 anyos lang, ang iyang amahan namatay. Mga Tulo ka bulan ang milabay, ang iyang namatay nga amahan, ang akong apohan sa tuhod, miduaw kaniya. Ang petsa nianang pagduaw mao ang gabii sa Abril 6, 1891. Si Lolo Nelson nalipay kaayo sa pagduaw sa iyang amahan, nga iyang gisulat ang kasinatian diha sa iyang journal alang sa iyang pamilya ug mga higala.
“Diha nako sa higdaanan dihang si Papa misulod sa kwarto,” misulat si Lolo Nelson. “Miabut siya ug milingkod sa kilid sa higdaanan. Miingon siya, ‘Ah, anak, tungod kay mubo ra kaayo ang akong panahon, nadawat nako ang pagtugot nga makaanhi ug makigkita nimo sulod sa pipila ka minutos. Maayo ra ang akong kahimtang, anak, ug daghan kaayo ang akong gimbuhaton sukad ako namatay.’”
Dihang nangutana si Lolo Nelson unsa ang iyang gibuhat, mitubag ang iyang papa nga busy siya sa pagtudlo sa ebanghelyo ni Jesukristo sa kalibutan sa espiritu.
“Dili ka makahunahuna, anak, kon unsa kadaghan ang espiritu nga anaa sa kalibutan sa espiritu kinsa wala pa makadawat sa ebanghelyo,” misulti siya. “Apan daghan ang midawat niini, ug usa ka talagsaong buhat ang natuman. Daghan ang nanghinaut nga ang ilang buhi nga mga higala mobuhat sa mga ordinansa alang kanila diha sa mga templo.”
Misulti si Lolo Nelson sa iyang amahan, “Moadto kami sa templo aron mabugkos nganha kanimo, Papa, sa pinakadaling panahon.”
Mitubag ang akong apohan sa tuhod: “Mao kana, anak, ang usa sa rason nga mianhi ako aron makigkita nimo. Mohimo pa kita og usa ka pamilya ug magkauban hangtod sa kahangturan.”
Dayon nangutana si Lolo Nelson, “Papa, tinuod ba ang ebanghelyo sigun sa gitudlo niining Simbahan?”
Mitudlo ang iyang papa ngadto sa litrato sa Unang Kapangulohan diha sa bongbong sa kwarto.
“Anak, kon unsa ka sigurado nga nakita nimo ang maong litrato, ingon ana usab ka sigurado nga tinuod ang ebanghelyo. Ang ebanghelyo ni Jesukristo adunay gahum sa pagluwas sa matag lalaki ug babaye nga motuman niini, ug walay laing paagi sila makabaton og kaluwasan sa gingharian sa Dios. Anak, pagmatinud-anon kanunay sa ebanghelyo. Pagmapainubsanon, pagmaampuon, pagmatinahuron sa priesthood, pagmatinuoron, pagmatinud-anon sa mga pakigsaad nga imong gihimo sa Dios. Ayaw gayud pagbuhat og bisan unsang butang nga dili makapahimuot sa Dios. Oh, pagka dakong panalangin ang ebanghelyo. Anak, pagbinuotan.”
A. C. Nelson, apohan ni Presidente Russell M. Nelson
Paghulagway pinaagi ni Bjorn Thorkelson; background, cell phone, ug tablet images gikan sa Getty Images
Sister Nelson: Ganahan kaayo ko sa tanan niadtong mga P. “Pagmapainubsanon, pagmaampuon, pagmatinahuron sa priesthood, pagmatinuoron, pagmatinud-anon sa mga pakigsaad nga imong gihimo uban sa Dios. … Pagbinuotan.” Unom ka mga P nga gihatud nganha kanimo sa imong mitaliwan na nga apohan sa tuhod. Mora siya og si Presidente Gordon B. Hinckley (1910–2008) uban sa iyang unom ka P.1
Presidente Nelson: Mao bitaw, dili ba? Bililhon kaayo nako nga ang akong apohan mobilin nianang record alang namo. Among nahibaloan nga ang mga anak sa iyang amahan wala madugay na-sealed ngadto kaniya. Busa ang rason alang sa iyang pagduaw natuman.
Ang Espiritu ni Elijah
Presidente Nelson: Usa ka mahinungdanon kaayong ngalan diha sa kasulatan nga nagpasabut kon nganong ang pamilya importante kaayo. Kana nga ngalan mao ang Elijah. Ang EL-I-JAH sa Hebreohanon literal nga nagpasabut nga “Ang Ginoo mao ang akong Dios.”2 Hunahunaa kini! Nasagul diha sa pangalan ni Elijah mao ang Hebreohanon nga mga termino sa Amahan ug sa Anak.
Sister Nelson: Si Elijah mao ang katapusan nga propeta nga naghupot sa gahum sa Melchizedek Priesthood sa pagbugkos sa wala pa ang panahon ni Jesukristo. Ang misyon ni Elijah mao nga siya motanom sa mga kasingkasing sa mga anak sa mga saad nga gihimo ngadto sa mga amahan, ug ang mga kasingkasing sa mga anak mobati ngadto sa ilang mga amahan, aron sila mabugkos, o mahitabo “ang tibuok kalibutan pagalaglagon sa hingpit sa iyang pag-abut” (Joseph Smith—Kasaysayan 1:39; emphasis gidugang). Bug-at kana nga pagkasulti.
Presidente Nelson: Ganahan ko maghunahuna mahitungod sa espiritu ni Elijah ingon nga “usa ka pagpakita sa Espiritu Santo nga nagsaksi sa balaanong kinaiya sa pamilya.”3 Sumala sa Giya ngadto sa mga Kasulatan, “Ang gahum ni Elijah mao ang gahum sa priesthood sa pagbugkos diin ang mga butang pagabugkuson o pagabadbaron sa yuta mabugkos o mabadbad didto sa langit” (“Elijah”).
Sister Nelson: Busa kon moingon kita nga ang espiritu ni Elijah nagalihok sa mga tawo sa pag-awhag kanila sa pagpangita sa nangamatay nga mga kaliwatan, kita nagpasabut nga ang Espiritu Santo nag-aghat nato sa pagbuhat sa mga butang nga motugot sa mga pamilya nga mabugkos sa kahangturan.
Presidente Nelson: Pagkanindot sa pagpabalik sa kasingkasing sa mga anak ngadto sa ilang mga amahan pinaagi sa pagsulti sa mga importante nga mga istorya sa family history sa paagi nga sayon ug memorable. Tingali ang pagtinil og mga dokumento sa family history, mga istorya, mga litrato ug mga butang nga handumanan nga kanunay natong makita makapalig-on sa atong mga pagpamatuod (tan-awa sa Mosiah 1:5). Kon ato kining ibutang diha sa mga bungbong, sa atong mga lamisa, atong mga computer, atong iPad, ug bisan sa atong mga cell phone, siguro maaghat kita sa paghimo og mas maayo nga mga pagpili ug mas maduol ngadto sa Ginoo ug sa atong mga pamilya.
Kon kutob ra ta diha, hinoon, dili pa gayud igo ang atong nahimo. Isip mga miyembro sa Simbahan, ang atong kainteresado sa buhat sa family history madasig pinaagi sa instruksyon gikan sa Ginoo nga ang atong mga katigulangan dili mahingpit kon wala kita ug kita dili mahingpit kon wala sila (tan-awa sa D&P 128:15). Kana nagpasabut nga kita kinahanglan masumpay pinaagi sa sagrado nga mga ordinansa sa pagbugkos diha sa templo. Kita kinahanglan mahimong lig-on nga mga sumpay gikan sa atong mga katigulangan ngadto sa atong kaliwatan. Kon ang atong mga koleksyon sa mga istorya ug mga litrato mao na ang katapusan sa atong buhat—kon kita nakaila sa atong mga katigulangan ug nahibalo sa mga maanindut nga mga butang bahin nila, apan ato silang gipasagdan nga matanggong sa pikas bahin nga wala ang ilang mga ordinansa—kana nga pagpasagad dili makatabang sa atong mga katigulangan nga nagpabiling binilanggo ang espiritu.
Sister Nelson: Ang pagpreserbar sa karaang mga istorya importante, apan dili gayud kini angayng mokuha sa panahon sa atong pagkompleto sa buhat sa ordinansa sa atong mga katigulangan. Gikinahanglang mogahin kita og oras alang sa gikinahanglang impormasyon sa pagbuhat sa ordinansa sa atong mga katigulangan.
Presidente Nelson: Ug kana nagpasabut nga mosakripisyo sa panahon nga kasagaran atong gigahin sa lain-laing mga kalihokan. Gikinahanglan natong mogahin og dugang panahon sa templo ug sa pagbuhat sa pagsiksik sa family history, nga naglakip sa indexing.
Sister Nelson: Ang sakripisyo nagdala og panalangin sa langit.4 Napanalanginan ko sa pagkaplag sa daghang katigulangan kinsa akong nabati nga andam na sa paghimo og pakigsaad uban sa Dios ug sa pagdawat sa ilang mahinungdanon nga mga ordinansa. Sa paglabay sa panahon, nakaamgo ko nga kon nagtrabaho ko sa usa ka makaluyang proyekto ug nahutdan na ko og panahon, kadasig, ug ideya, kon akong sakripisyohan ang panahon sa pagpangita sa gikinahanglang impormasyon sa pagbuhat sa ordinansa sa pipila ka mga katigulangan o pinaagi sa pag-adto sa templo aron mahimong proxy alang kanila, ang mga langit maablihan ug ang kadasig ug mga ideya nagsugod sa pagdagayday. Sa bisan unsang paagi aduna ra gyud koy igong panahon nga maapas ang akong deadline. Imposible kaayo, apan mao gayud kini mahitabo sa matag panahon. Ang buhat sa templo ug family history naghatag kanako og hingpit nga kalipay nga wala dinhi sa kalibutan.
Family History ug Misyonaryo nga Buhat
Presidente Nelson: Kon akoy misyonaryo karong panahona, ang akong duha ka suod nga higala sa ward o branch diin ako nagserbisyo mao ang ward mission leader ug ang consultant sa ward temple ug family history.
Ang katawhan adunay kinaiyanhong tinguha nga mahibalo sa mga butang mahitungod sa ilang katigulangan. Nga mahimo nga usa ka natural nga oportunidad alang sa atong mga misyonaryo. Samtang nagkat-on ang mga misyonaryo sa paghigugma sa mga tawo nga ilang gitudluan, sila mangutana mahitungod sa ilang pamilya sa natural kaayo nga paagi. “Buhi pa ba ang inyong mga ginikanan? Buhi pa ba ang inyong mga apohan? Nakaila ba kamo sa inyong upat ka nga mga apohan?” Ang panag-istoryahanay sayon ra kon kadtong maagni sa pakig-istoryahanay sa mga misyonaryo dapiton sa paghisgut mahitungod sa mga tawo nga ilang gimahal.
Nianang puntuha mahimo nang natural alang sa mga misyonaryo, lakip na sa mga miyembro nga misyonaryo, ang pagpangutana, “Aduna pa ba kay nailhan sa imong mga apohan sa tuhod? Kahibalo ba ka sa ilang ngalan?” Kalagmitan ang mga investigator wala makaila sa ngalan sa ilang walo ka apohan sa tuhod.
Unya ang mga misyonaryo makahimo niini nga sugyot: “Aduna koy higala sa among simbahan nga makatabang. Kon among makaplagan ang mga ngalan sa pipila o bisan ang tanan ninyong mga apohan sa tuhod, angay lang ba kining gahinan sa inyong mga oras aron masuta kon kinsa ang inyong mga apohan sa tuhod?” Siyempre, kana nga higala sa simbahan, mao ang consutant sa ward temple ug family history.
Sister Nelson: Naghunahuna ko nga makahupay alang sa mga misyonaryo nga masayud nga wala gayud sila mag-inusara kon sila mangita ug magtudlo niadtong kinsa andam modawat sa kamatuoran sa gipahiuli nga ebanghelyo ni Jesukristo. Si Presidente George Q. Cannon (1827–1901), kinsa miserbisyo isip usa ka magtatambag sa upat ka Presidente sa Simbahan, mitudlo nga niining mga ulahing adlaw, kadtong mga nagpamiyembro sa Simbahan nagpamiyembro tungod kay ang ilang mga katigulangan kanunay nga nag-ampo nga usa sa ilang kaliwatan sa pagpamiyembro sa Simbahan aron sila, ang mga katigulangan, mahimong makadawat sa mahinungdanong mga ordinansa pinaagi sa proxy.5
Kahimayaan: Usa ka Kalihokan sa Pamilya
Presidente Nelson: Ang kahimayaan usa ka kalihokan sa pamilya. Pinaagi lamang sa makaluwas nga mga ordinansa sa ebanghelyo ni Jesukristo nga ang mga pamilya mahimaya. Maningkamot kita nga sa katapusan kita mahimong malipayon isip usa ka pamilya—na-endowed, nabugkos, ug naandam alang sa kinabuhing dayon diha sa presensya sa Dios.
Sister Nelson: Sa matag klase sa Simbahan nga atong tambongan, sa matag higayon kita mag-alagad, sa matag pakigsaad nga atong gihimo uban sa Dios, sa matag ordinansa sa priesthood nga atong madawat, tanan nga atong buhaton diha sa Simbahan modala nato paingon sa balaang templo, sa balay sa Ginoo. Adunay dako kaayo nga gahum nga maanaa alang sa magtiayon ug sa ilang mga anak pinaagi sa ordinansa sa pagbugkos kon sila motuman sa ilang mga pakigsaad.
Presidente Nelson: Sa kada adlaw nagpili kita kon asa kita gustong mopuyo sa kahangturan pinaagi sa atong paghunahuna, pagbati, pagsulti, ug pagbuhat. Ang atong Langitnong Amahan namahayag nga ang Iyang buhat ug ang Iyang himaya, mao ang pagpahinabo sa pagka-imortal ug sa kinabuhi nga dayon sa Iyang mga anak (tan-awa sa Moises 1:39). Apan Siya gusto nga mopili kita nga makabalik ngadto Kaniya. Siya dili mopugos nato sa bisan unsa nga paagi. Ang tukma nga pagtuman sa atong mga pakigsaad nagpakita Kaniya kon unsa kadako ang atong tinguha nga makabalik sa pagpuyo uban Kaniya. Ang matag adlaw nagdala kanato nga mas mapaduol o mas mahilayo sa mahimayaong posibilidad sa kinabuhing dayon. Matag usa nato kinahanglang motuman sa atong mga pakigsaad, maghinulsol sa kada adlaw, maningkamot nga mahimong mas sama sa Manluluwas. Mao ra gayud na ang paagi nga ang pamilya magkauban sa kahangturan.
Sister Nelson: Kini ang akong pagpamatuod nga bisan unsa kaanindut sa inyong kinabuhi karon, o bisan pa sa ka walay kadasig ug kasubo niini, ang imong pag-apil sa buhat sa templo ug family history makapahimo niining mas maayo. Unsa ang gikinahanglan sa inyong kinabuhi karon? Dugang nga gugma? Dugang nga kalipay? Dugang nga self-mastery? Dugang nga kalinaw? Dugang nga mas makahuluganon nga mga gutlo? Dugang nga pagbati nga kamo nakahimo og kalainan? Dugang nga kalingawan? Dugang mga tubag sa inyong mga mahinuklugong mga pangutana? Dugang nga kinakasing-kasing nga relasyon sa uban? Dugang nga pagsabut sa unsay inyong nabasahan diha sa mga kasulatan? Dugang nga abilidad sa paghigugma ug pagpasaylo? Dugang nga abilidad sa pag-ampo uban sa gahum? Dugang nga inspirasyon ug mamugnaon nga mga ideya sa imong trabaho ug sa ubang mga proyekto? Dugang nga panahon sa mga butang nga mas mahinungdanon?
Naghangyo ko kaninyo sa paghimo og sakripisyo sa panahon ngadto sa Ginoo pinaagi sa pagdugang og oras sa buhat sa templo ug family history, ug tan-awa unsay mahitabo. Kini ang akong pagpamatuod nga kon kita mopakita sa Ginoo nga seryoso kita mahitungod sa pagtabang sa atong mga katigulangan, maablihan ang mga langit ug kita makadawat sa tanan natong panginahanglan.
President Nelson: Mahimo kitang madasig sa tibuok adlaw sa mga kasinatian sa uban mahitungod sa templo ug family history. Apan kinahanglan gayud nga mobuhat kita aron masinati sa kaugalingon ang hingpit nga kalipay. Gusto nakong ihatag ang hagit sa matag usa kanato aron ang maanindut nga pagbati niini nga buhat magpadayun ug gani molambo. Dapiton ko kamo nga ikonsiderar sa mainampoong paagi unsa nga matang sa halad—labing siguro usa ka halad sa panahon—ang inyong mahimo aron mas daghan ang mabuhat sa family history ug sa templo niining tuiga.
Miapil kita sa buhat sa Makagagahom nga Dios. Siya buhi. Si Jesus mao ang Kristo. Kini Iyang Simbahan. Kita ang Iyang mga anak sa pakigsaad. Siya makasalig nato.