Pagpangita og Tabang human sa Kamatayon ni Nancy
Ang tagsulat nagpuyo sa Georgia, USA.
Unsay kinahanglan nakong buhaton aron moepekto ang makaayo nga gahum ni Jesukristo sa akong kinabuhi?
Mga paghulagway pinaagi ni Iker Ayestaran
Niadtong 2016, ang akong asawa nga si Nancy namatay human sa 11 ka tuig nga pag-antus sa kanser sa totoy. Ang labihang kasubo nga akong gibati sa unang mga bulan human sa iyang pagkamatay lisud ihulagway sa tawo nga wala makasinati og ingon niini nga pagkawala. Kasub-anan, kasakit, kapait, kahapdos—walay usa niining mga pulonga ang makahatag og hustisya. Dili kadto maagwanta.
Ang Makaayo nga Gahum sa Manluluwas
Dugay na kong nakasabut nga si Jesukristo “nakasinati sa tanan nga mga butang” (D&P 88:6) aron Siya “[makahatag og kahupayan o tabang] sa iyang mga katawhan sumala sa iyang mga kahuyang” (Alma 7:12). Nagpasabut kini nga ang gahum sa Pag-ula sa Manluluwas milapas pa sa paghatag og Pagkabanhaw ug katubsanan gikan sa mga sala. Pinaagi niini nga gahum, Siya usab makaayo kanato sa mga panahon sa atong pag-antus ug panginahanglan. Sa akong kasub-anan, diha-diha dayon—daw sa kabalaka—naningkamot kong makat-on unsay angay nakong buhaton aron moepekto kini nga aspeto sa gahum sa Manluluwas sa akong kinabuhi. Sulod sa mga semana akong gisiksik ang mga kasulatan ug mga pakigpulong sa mga General Authorities sa Simbahan. Tinuoray kong mituo nga, tungod sa Iya mismong kasakit ug sakripisyo, nahibalo ang Manluluwas sa kasakit nga akong gisinati. Apan sa unsang paagi ang pagkahibalo Niya niana makatabang kanako? Tungod kay giantus Niya kini para kanako, unsay kinahanglan nakong buhaton aron madawat ang tabang nga nasayran Niya pinaagi sa Iyang pag-antus kon unsaon sa paghatag?
Human sa daghang pagsiksik, pagtuon, pag-ampo, ug pagsimba sa templo nagsugod ko sa pagkasabut. Una sa tanan, nagsugod nga klaro nakong nakita nga ang Ginoo naa na diay nagtabang, naghupay, ug nagsuporta sa akong pamilya, ilabi na sa mga semana nga nagsingabut ang kamatayon ni Nancy. Dunay kahibulongang espiritwal nga mga kasinatian nga karon akong naamguhan nga mga panalangin gikan sa makaayo ug makapalig-ong gahum nga pwede natong madawat tungod sa Pag-ula sa Manluluwas. Ug ang pagkahibalo nga ang Manluluwas nag-atiman na diay kanamo sa tinagsa kaayo nga paagi, labihan ka makahupay. Sama ni Shadrach, Meshach, Abed-nego sa karaan, Siya among kauban sa “hudno nga nagdilaab sa kalayo” (Daniel 3:17) sa among kasakit.
Salig sa Ginoo
Nakat-unan sab nako nga dunay ubang butang nga gikinahanglan gikan kanamo aron madawat ang kahupayan ug pagkaayo gikan sa Ginoo. Ang pinakaimportante, kinahanglan nga mosalig kami Kaniya. Butang kana nga lisud buhaton. Nganong mosalig pa man ko sa Dios kon sa unang dapit pwede ra diay Niyang pugngan ang pagkamatay ni Nancy? Agig tubag niini nga pangutana, padayon kong namalandong sa butang nga gisulti sa Ginoo kang Propeta Joseph Smith:
“Kamo dili makakita uban sa inyong kinaiyanhon nga mga mata, alang karon nga panahon, sa paagi sa inyong Dios mahitungod niadto nga mga butang nga moabut sa umaabut, ug ang himaya nga mosunod human sa daghan nga kalisdanan” (D&P 58:3).
Napanalanginan kita og daghang timailhan diin ang matang ug tayming sa kamatayon ni Nancy nahitabo sumala sa kabubut-on sa Ginoo. Akong nasabtan nga ang mahigugmaon ug nahibalo sa tanan nga Amahan mitugot nga mag-antus kita niining mga butanga tungod, kay sa hingpit Niya nga plano alang sa kahimayaan sa among pamilya, kini nga kasakit gikinahanglan. Sa pagkasayud niana, akong nasabtan nga ang akong bahin sa Iyang plano dili lang ang paglahutay niini apan aron “molahutay pag-ayo” (D&P 121:8). Aron akong mapahinungod kini nga kalisdanan Kaniya, dili lang kay matabangan ako apan mabalaan usab. Nasinati na nako kini sa daghang paagi.
Natambagan na nako ang among mga anak nga buhaton nila unsay akong nakat-unan mismo niini nga proseso:
-
Tuguti nga ang kahapdos sa malisud mga kasinatian nga modala kanimo ngadto sa mas maayong pagkadisipulo.
-
Ibu-bu ang imong kasingkasing sa pag-ampo.
-
Kon mobati ka og kasuko sa Dios nganong gitugot ang trahedya nga mahitabo, hangyoa Siya nga pulihan kana nga kasuko og pagtuo ug pagtuman.
-
Ipakigsaad nga higugmaon nimo Siya ug magmatinud-anon hangtud sa katapusan.
-
Tun-i og maayo ang mga pulong sa Dios—gikan sa mga kasulatan ug mga pakigpulong ug mga sinulat sa modernong mga propeta ug dinasig nga mga magtutudlo.
-
Moadto sa templo nga gutom nga matudloan sa mga butang sa kahangturan.
-
Pangita og mga tawo nga nakasinati og personal nga mga trahedya nga naghulga sa ilang pagtuo, ug lig-ona sila pinaagi sa imong pagpamatuod niini nga mga doktrina.
Usa ka Apostolikanhon nga Saksi
Mga usa ka bulan human sa kamatayon ni Nancy, dunay usa ka gabii nga ang kasubo makahugno gayud. Tibuok adlaw kong mibati og tumang kasakit ug kasubo. Nahinumduman nako si Elder Jeffrey R. Holland sa Korum sa Napulog Duha ka mga Apostoles nga nagtudlo nga “ang dalan sa kaluwasan kanunay mogiya … agi sa Getsemani.”1 Bisan dili ikatandi ang akong pag-antus sa Manluluwas, nianang gabhiona gilibutan ang akong kaugalingon sa “kalisud ug pait nga mga higayon.”2
Human kini masinati sulod sa panahon ug pag-ampo alang sa tabang, dunay misulod sa akong hunahuna nga usa ka butang nga akong nabasa ug gi-bookmark sa akong computer mga tuig nang milabay. Akong gipangita ang dokumento ug gi-scroll down aron makit-an kini. Interbyu kadto kauban ni Elder Richard G. Scott sa Korum sa Napulog Duha ka mga Apostoles (1928–2015) diin gipangutana siya mahitungod sa pagkamatay sa iyang asawa nga si Jeanene niadtong 1995 tungod sa kanser. Mitubag si Elder Scott, “Una sa tanan, … wala siya mawala kanako. Anaa ra siya sa pikas bahin sa tabil. Na-sealed kami nianang balaan nga ordinansa sa templo, ug magkauban kami sa hangtud.”3
Paghulagway sa Atlanta Georgia Temple
Nianang gabhiona nabati nako ang kusog nga impluwensya niadtong mga pulong nga wala pa nako sukad mabati. Sama kadto sa usa ka parola nga gipasiga sa mangitngit nga kagabhion. Wala pa ko kabasa og butang nga may ingon ka lawom nga epekto ngari kanako. Ang kangit-ngit ug ang kahapdos nahanaw. Sama kadto kang Alma dihang siya “wala na mahinumdom sa [iyang] mga kasakit” (Alma 36:19). Kini nga apostolikanhong saksi midulot kanako hangtud sa akong kahiladman. Natingala ko nga ang konsepto nga akong nasabtan sukad sa pagkabata sa kalit daw nahimong makahuluganon kaayo. Padayon ang akong katingala sa unsang paagi nahibaloan ni Elder Scott ang butang nga ingon niini. Ug nianang higayuna, akong naamguhan nga nasayud usab ako niini. Kon magmatinud-anon ko, maangkon nako ang tanang paglaum nga naangkon ni Elder Scott. Samtang piho nga dunay kasub-anan ug pagbangutan sukad niadto, wala na gyud ko mobati sa tumang kasakit ug kasubo nga akong nasinati nianang gabhiona.
Gahum kini nga gipadangat ngari kanato sa Manluluwas aron itabang atol sa atong mga pagsulay. Nasayud ko nga ang kaguol sa among pamilya dili hingpit nga mawala, apan gilamoy kini sa gitawag og “pangpalig-on” ug “pangpahingpit” nga mga panalangin sa Pag-ula sa Manluluwas.4 Nagkaduol kami sa Manluluwas, mibati sa iyang kasiguroan, ug nakapadayon pinaagi sa pihong pundasyon gumikan sa among mga pakigsaad.