Lima ka Leksyon sa Young Adults gikan sa Batan-ong mga Apostoles
Unsay atong makat-unan gikan sa mga kasinatian sa unang mga Apostoles sa Pagpahiuli?
Nanag-edad sila og mga 23 ngadto sa 35, apan nakatabang sila sa pag-usab sa kalibutan. Ang unang mga Apostoles sa gipahiuling Simbahan mga batan-on. Ang uban mibati og kakulang. Ang uban nakahimo’g mga sayop. Apan tanan sila nakahimo og kalainan. Aniay lima ka leksyon nga atong makat-unan gikan sa ilang mga kasinatian.
1. Dili Kinahanglang Mobati ka nga Igo na ang Imong Pagkamaayo aron Igo na ang Imong Pagkamaayo
Mga paghulagway pinaagi ni Elizabeth Thayer
Mibati og kakulang si Heber C. Kimball dihang nadawat niya ang tawag nga masakop sa Korum sa Napulog Duha ka mga Apostoles niadtong Pebrero 1835. Wala pa kaabut og tulo ka tuig ang pagkamiyembro niya sa Simbahan ug 33 anyos pa siya.
“Layo ra kini sa akong gilauman,” miingon si Heber sa wala madugay.1 Apan andam siya nga midawat sa calling, ug sa pagpanalangin sa iyang ordinasyon gisultihan siya “nga daghang minilyon” ang “makabig gumikan sa iyang instrumentalidad.”2
Isip usa ka Apostol nagserbisyo siya og duha ka malampuson kaayong mga misyon sa England. Nakakabig siya og hut-ong sa mga indibidwal kansang mga kaliwat mikabat na sa gidaghanon nga milyon karon. Para ni Heber, ang pagpadayon bisan gibati niya nga gamay ra ang iyang ikahatag mipanalangin kaniya ug ngadto sa daghan pang uban.
2. Mailhan Kita pinaagi sa mga Desisyon, Dili sa mga Kahimtang
Si Thomas B. Marsh milayas sa balay sa New Hampshire sa edad nga 14. Nakatrabaho siya nga tig-ugmad sa umahan sa Vermont, waiter sa Albany, New York, sa usa ka hotel sa New York City; dayon isip sulugoon sa Long Island. Dili permanente ang iyang mga kahimtang hangtud iyang nakaila ug naminyoan si Elizabeth Godkin.
Siya ug si Elizabeth sa kadugayan gigiyahan sa Espiritu ngadto sa western New York. Didto, nakadungog sila mahitungod sa Basahon ni Mormon. Nakita ni Thomas ang kopya sa unang 16 ka pahina dihang miadto sila sa printahanan, ug gitugutan siya sa tig-imprinta nga makabasa sa na-proofread na nga panid. Mituo nga ang basahon gikan sa Dios, mipili si Thomas nga magpamiyembro sa Simbahan. Nabunyagan siya niadtong Septyembre 3, 1830.3
Nagsangyaw si Thomas sa ebanghelyo sa lain-laing mga dapit. Giantus niya ang kalisud dihang ang mga Santos gipalayas gikan sa Jackson County, Missouri, pagka-Nobyembre 1833. Orihinal siya nga miyembro sa Missouri high council dihang giorganisar kini niadtong Hulyo 1834. Human sa iyang calling isip Apostol sa edad nga 34, miserbisyo siya isip Presidente sa Korum sa Napulog Duha. Bisan og naningkamot siya sa pagpanalipud ni Joseph Smith batok sa mga supakero kaniadto, si Thomas mismo sa kadugayan nawad-an og pagsalig. Pagka-1838 gipili niya ang pagbiya sa Simbahan.4
Gikan kang Thomas Marsh atong makat-unan nga ang dili sigurado nga mga kahimtang dili angayang mopugong kanato sa mga panalangin sa ebanghelyo—o sa pagpanalangin sa kinabuhi sa uban.
3. Pagmatngon: Walay Tawo nga Maayo na Kaayo aron Dili Mahagsa
Si Lyman Johnson ang pinakabata sa mga gitawag—23 anyos ug upat ka bulan ang edad niadtong higayuna. Giorden siya nga high priest mga pipila ka adlaw lang human nag-edad siya og 20 niadtong 1831 ug nakaserbisyo na og daghang misyon sa Simbahan. Samtang didto sa usa niini nga mga misyon, nagsangyaw siya og usa ka sermon gihinumduman kini isip “usa ka pinakaimpluwensyal nga pagpamatuod kabahin sa misyon ni Joseph Smith, ug sa talagsaong buhat sa katapusang mga adlaw.”5
Subo lang, ang serbisyo ni Lyman isip Apostol wala nagdugay. Atol sa ekonomikanhong kagubot sa Kirtland, Ohio, niadtong 1837, mikontra siya ni Joseph Smith. Gi-excommunicate si Lyman niadtong 1838.
Bisan unsa pa niya kamaayong mosangyaw, bisan unsa pa nga office ang iyang nahuptan sa Simbahan, si Lyman nawala gihapon. Miingon si Brigham Young nga sa wala madugay gidawat ni Lyman nga nanghinaot siya nga motuo gihapon siya sa ebanghelyo: “Puno ako sa kalipay ug kamaya. … Malipayon ko sa adlaw ug sa gabii. … Apan karon kangitngit, kasakit, kasubo, kaalaot sa hilabihan.”6
4. Ang Kamasulundon Dili Mogarantiya og Kinabuhing Walay Pagsulay, apan Mahinungdanon Kini
Human ma-orden si Parley P. Pratt nga usa ka Apostol, si Oliver Cowdery, usa sa gipili nga motabang og pili sa mga Apostoles, mihatag og piho nga sugo kang Parley, nag-ingon nga siya “may susamang kalisdanan nga masugatan sa pagtuman niini nga pangalagad, nga nasugatan sa karaang mga Apostoles.” Miingon siya nga si Parley mag-antus sa “lig-ong mga selda ug ngitngit nga bilanggoan,” apan ang maong mga kahimtang dili makapaluya kaniya, tungod kay ang mga pagsulay maghimo niya nga “madawat ang himaya” nga giandam sa Ginoo kaniya.7
Nagsubay niana nga sumbanan ang kinabuhi ni Parley. Dunay mga panahon nga nag-antus siya sa labihang kakabus. Nakasinati siya og mga pamugal-bugal dihang nagsangyaw siya sa ebanghelyo. Gipriso siya niadtong 1838 ug 1839 sa mga pasangil resulta sa mga kalisdanan nga gisagubang sa mga miyembro sa Simbahan sa Missouri. Apan nasinati usab ni Parley ang mga panalangin nga gisaad ni Oliver. Wala madugay human nga gibuhian siya sa pagkapriso, misulat siya, “Maayo kaayo kami, ug napalanginan og daghan sa Ginoo, human sa among mga kalisdanan.”8
5. Ang Edad Dili maoy Importante Sama Kaimportante sa Pagtuo
Si Orson Pratt, igsoon ni Parley, ikaduha gikan sa kamanghuran nga mga Apostoles. Gi-orden sa edad nga 23, pipila lamang ka semana ang iyang pagkamagulang ni Lyman Johnson. Ang serbisyo nga nahatag ni Orson sa Simbahan naghatag og maayo kaayong ehemplo kon sa unsang paagi ang mga young adult mamahimong pwersa alang sa maayong mga butang.
Nabunyagan si Orson niadtong Septyembre 19, 1830—sa ika 19 niyang adlaw nga natawhan. Wala madugay, nakadawat si Joseph Smith og pagpadayag para kaniya nga nag-ingon nga si Orson anak sa Dios, nga bulahan siya tungod kay mituo siya, ug ang iyang responsibilidad mao ang pagsangyaw sa ebanghelyo (tan-awa sa D&P 34:3–6). Sa tukmang paagi, nakaserbisyo si Orson og daghang misyon, lakip sa usa nga nagkauban sila ni Lyman Johnson niadtong 1832 diin nakabunyag sila og hapit 100 ka tawo ug miorden og daghang mga elder.
Dihang gitawag si Orson nga mahimong Apostol, wala siya sa Kirtland. Niadtong Abril 23, 1835, sa siyudad sa Columbus, nakat-unan niya nga ang iyang presensya gikinahanglan sa usa ka miting sa Kirtland inig ka 26 sa Abril.
Wala masayud unsay katuyoan sa miting, miadto dayon siya. Walay kasayuran nga gitawag siya nga usa ka Apostol, misulod siya samtang ang kongregasyon “nag-ampo, ug nanghinaot nga moabut siya.”9 Gibati ang suporta gikan sa mga Santos, gidawat ni Orson ang tawag.
Isip Apostol, nag-andam siya og pamphlet nga gisulatan sa pinakaunang inimprinta nga istorya mahitungod sa Unang Panan-awon ni Joseph Smith. Isip pioneer niadtong 1847, nagtipig siya og detalyadong rekord bahin sa panaw padulong sa kasadpan. Misulat usab siya og daghang pamphlet sa misyonaryo ug lig-on siyang tigpanalipud sa Basahon ni Mormon.
Lahi na Karon … O Lahi ba Gyud?
Sa daghang paagi, ang mga young adult karon lahi kay sa niadtong 1835. Ug sa gihapon kini nga mga leksyon makatabang sa mga young adult karon sa ilang mga paningkamot nga makab-ot ang ilang potensyal. Aniay summary:
-
Kon mibati ka og kakulang, bisan pa man, padayon lang.
-
Dunay hagit ang tanan. Ang imoha imong mabuntog.
-
Mas malipayon ka kon magpabilin kang aktibo sa Simbahan.
-
Magpabiling committed. Magmasulundon ug magmatinud-anon. Moabut ra ang mga panalangin.
-
Duna kay importanting butang nga ikahatag. Misalig ang Ginoo kanimo.