Pagtudlo sumala sa Pamaagi sa Manluluwas
ANG ELEPANTE SA CLASSROOM
Ang mga miting sa teacher council wala lang mag-usab sa paagi nga kita magtudlo; kini mag-usab sa paagi nga kita magkat-on.
Si Miswakhe Sitole nagsagubang og usa ka hagit. Isip presidente sa Sunday School, siya adunay responsibilidad nga hinatag sa Dios aron makatabang sa pagpalambo sa pagkat-on ug pagtudlo sa ebanghelyo diha sa ward.1
Apan ang mga miyembro sa iyang ward sa Johannesburg, South Africa, sa laing kahimtang, dako kaayo ang kalahian sa mga kagikan ug mga gilauman. Ang pipila edukado; ang uban dili. Daghan ang natudloan nga ang responsibilidad sa usa ka estudyante mao ang pagpaminaw, dili ang pagtabi. Ang uban nagsagubang og kalisud sa pagsabut sa kultura nga ang lalaki ug babaye kinahanglan moapil sa pagtudlo diha sa simbahan ug sa panimalay.
“Usab kita adunay mga tawo kinsa nagkalain-lain ang mga pinulongan,” si Brother Sitole miingon. “Apan ang Espiritu gusto nga moaghat sa matag usa.”
Sukad nga gipaila ang mga miting sa teacher council ug ang Pagtudlo sumala sa Pamaagi sa Manluluwas sa miaging tuig ang mga ward ug mga branch sa tibuok Simbahan nagsugod sa pagpahigayon og mga miting sa teacher council aron sa paghisgot, pagkat-on bahin niini, ug pagbuhat kon unsay gipasabut sa pagtudlo sumala sa pamaagi sa Manluluwas.
Diha niana nga nakita ni Brother Sitole kon sa unsang paagi nga ang miting sa teacher council makapanalangin sa iyang ward. Ang mga hagit bahin sa kultural masulbad, magkadaghan ang partisipasyon sa klase, ug ang mga panlantaw sa mga miyembro mahimong usa ka panalangin.
Sama sa kadaghanan sa tibuok kalibutan, nakaamgo si Brother Sitole nga ang Ginoo wala mogamit sa mga miting sa teacher council aron lang sa pag-usab kon giunsa nato sa pagtudlo; Siya migamit niini aron mausab kon sa unsang paagi kita makat-on.
Ang Elephante sa Lahi nga Panglantaw
Usa sa labing makapaikag nga nadiskubrihan ni Brother Sitole mao nga ang mga magtutudlo makapahimo sa mga estudyante sa pag-apil diha sa ilang kaugalingong pagkat-on, ang tanan makabenepisyo gikan sa gipalapdan nga panglantaw nga masangkap sa nagkalainlaing mga anggulo.
Kana nga panabut naangkon ni Brother Sitole atol sa usa ka miting sa teacher council, sa dihang ang usa ka sakop sa ward mipaambit sa usa ka sambingay sa mga buta ug ang elepante, inubanan lang og usa ka lahi nga panglantaw. Ang sambingay nagsulti kon giunsa sa paghulagway sa unom ka mga tawo nga buta ang usa ka elepante (ang paa sama sa usa ka haligi, ang ikog sama sa pisi, ang trumpa sama sa inagas sa tubig ug uban pa) tungod kay ang matag usa naghikap sa laing parte sa lawas.2
“Apan kon pananglit ang elepante nagrepresentar sa pagtudlun-an sa ebanghelyo,” si Brother Sitole miingon. “Nan kinahanglan natong himoon nga ang matag sakop sa klase makapaambit sa ilang ponto, aron dungan natong makab-ot ang komon nga pagsabut kon sa unsang paagi ang ebanghelyo nakapanalangin kanatong tanan.”
Mao nga ang mga magtutudlo sa ward ni Brother Sitole kanunayng mag-alirong sa lamesa atol sa miting sa teacher council—sa pagpahigayon sa panaghisgutan. “Nagpahinumdom kini kanato nga ang tanan adunay patas nga tingog,” miingon siya.
Sumala sa Ilang Panginahanglan
Sa Tokyo, Japan, si Natsuko Soejima nagduhaduha kon maayo ba siyang motudlo. “Sa dihang natawag ko nga magtutudlo sa Sunday School sa youth,” miingon siya, “misulti ko sa bishop nga mahadlok ko. Apan miingon siya nga ang tawag gikan sa Dios, mao nga midawat ko.”
Isip grupo, nagpanagana siya sa klase tungod sa nakita nga mga hagit sa indibidwal. Duha sa kabatan-onan adunay kakulangan sa pangdungog. Ang uban nga mga sakop sa klase nga mibalhin sa Japan gikan sa lain-laing mga nasud Iningles ra ang pinulongan. Gikahadlokan usab niya ang edad tali niya ug sa iyang mga sakop sa klase.
Unya, diha sa usa ka miting sa teacher council, si Sister Soejima nakakaplag og tubag. “Naghisgut kami bahin sa paghigugma sa matag sakop sa klase, makaila sa ilang mga ngalan, pag-ampo alang sa tagsa tagsa kanila, ug pagtudlo—nga giniyahan sa Espiritu—sumala sa ilang mga panginahanglan,” mipasabut siya, “busa kana ang sugdan nako sa pagbuhat.” Gibuhat usab niya ang laing butang nga iyang nakat-unan sa council: “Gigamit nako ang pinulongan nga makadala sa akong gugma.”
Ang resulta? “Ang akong kasingkasing nausab. Nagsugod ko sa pagbati og gugma sa akong mga estudyante. Nagpakabana ko niadtong wala ug nag-ampo usab alang kanila. Sa pagkahuman sa usa ka leksyon, magsugod ko sa pag-andam alang sa mosunod nga semana, aron makaangkon og panahon sa paghunahuna mahitungod sa mga kahigayunan sa pagtudlo. Hilabihan ang akong kalipay.”
Piho nga mga Tubag
Si Brad Wilson, usa ka presidente sa Sunday School sa Minnesota, USA, misiguro nga ang mga magtutudlo sa miting sa teacher council dili mobiya hangtud ilang nahisgutan kon sa unsang paagi nga sila nausab tungod sa unsay ilang nakat-unan.
“Among gisunod ang gihatag nga outline sa Pagtudlo sumala sa Pamaagi sa Manluluwas,” miingon si Brother Wilson. “Among gihisgutan ang mga kasinatian sa mga magtutudlo, dayon maghisgut kami sa usa sa gisugyot nga hilisgutan. Isip usa ka tigpahigayon, mohatag ko og mga pangutana ug i-summarize ang mga hunahuna. Dayon among praktison ang implimentasyon. Magbulag kami ngadto sa ginagmayng grupo ug maghisgut, ‘Unsay lahi nakong buhaton tungod sa among miting karon?’”
Si Ron Goodson, usa ka instruktor sa korum sa mga deacon sa sama nga ward, miingon nga nakadayeg siya sa iyang nakita kon sa unsang paagi si Brother Wilson “nagtudlo” sa council. “Nag-istorya kami kon sa unsang paagi ang Manluluwas nagtudlo,” siya miingon. “Dayon samtang mabati nimo ang Espiritu, maghunahuna ka nga, ‘Mao kini butang nga kinahanglan akong sulayan sa akong klase.’ Ang paghunahuna bahin sa Manluluwas makausab sa inyong pamaagi. Makuhaan na ang ‘kinahanglan gyud kong mag-andam og leksyon,’ ug madugangan ang bahin sa, ‘Unsa man ang gikinahanglan niining mga deacon ug unsaon nako sila sa pagtabang niana?’”
Nahinumduman niya ang pagsulat sa iyang journal, “Mitambong ko sa teacher council meeting karon, ug mao kini ang kinahanglan nakong buhaton.” Sa pagkatinuod, ang iyang journal puno sa ingon ana nga sulat. Karon mangandam na siya daan: “Pagsugod og sayo ug makadawat ka og mga pag-aghat sa tibuok semana.” Mangutana siya sa mga deacon kon unsa nay dagan sa ilang mga kinabuhi: “mas epektibo ko nga makatabang kanila kon mas makaila nako sila.” Ug iyang gidapit ang mga deacon nga motabang sa pagtudlo: “Samtang mitabang sila, nakat-on usab sila.”3
Mipadayon Ko sa Pagkanta
“Sa among council, naghisgut kami kon sa unsang paagi ang musika makadapit sa Espiritu,” miingon si Jocelyn Herrington, usa ka magtutudlo sa Primary sa samang ward sa Minnesota. “Sa kaulahian, nagtudlo ko sa mga Sunbeams. Naghunahuna ko nga, mokanta ko samtang nag-kolor sila, ug maayo kini. Misugod ko sa pagkanta, ug mihunong silang tanan ug naminaw. Busa mipadayon ko sa pagkanta. Nakadala kini sa Espiritu, ug sa dihang nahuman nako, sila nagmatinahuron ug maghulat nga moistorya ko. Ug nag-istorya usab kami bahin niana [diha sa council], sa paghatag sa inyong mga pagpamatuod kon ang kahigayunan moabut. Mao nga ako mihatag sa akong pagpamatuod sa mga pulong nga sila makasabut.”
Si Sister Herrington miingon nga mapasalamaton siya sa mga magtutudlo sa Primary nga nalakip diha sa mga miting sa council. “Naghisgut kami mahitungod sa pagtudlo sa mga hamtong,” miingon siya, “apan si Brother Wilson moingon dayon, ‘Unsa man ang pagtudlo sa kabatan-onan? Unsa man ang pagtudlo sa mga bata? Iya kining ipahinumdom og balik kanamo nga ang tanang han-ay sa edad anaa diha.”
Gikan sa Council ngadto sa laing Council
Si Adam Martin, usa ka presidente sa Sunday School didto sa Calgary, Alberta Canada, nag-ingon nga mapasalamaton siya sa mga gisugyot gikan sa ward council. “Ang presidente sa Relief Society o ang presidente sa elders quorum moingon, ‘Gusto namo nga ang magtutudlo magtutok niini,’ aron amo kining mahisgutan diha sa [miting] sa teacher council,” miingon siya.
Sa dihang unang gisugdan ang mga miting sa teacher council, ang mga magtutudlo wala makahibalo unsay gilauman, mao nga mihatag siya og daghang personal nga mga imbitasyon ug mipaila sa mga materyal sa training nga magamit diha sa teaching.lds.org. “Karon regular na kining gihimo,” miingon siya. “Nakahibalo sila nga mao kini usa ka dapit aron mahisgutan unsay mga panghitabo.”
Usa ka bag-ohay nga miting nagtutok sa pagsunod sa Espiritu. “Naghisgut kami mahitungod sa maayong pagpangandam apan wala mabalaka nga dili matudlo ang tanang butang,” miingon siya. “Usa ka sister miingon nga kanunay niyang gibati nga kinahanglan siyang mag-istorya bahin sa kada item diha sa iyang plano sa leksyon. Inyong makita nga siya nalamdagan sa dihang nag-istorya kami bahin sa pagsunod sa pagdasig samtang kamo naggiya sa panaghisgutan.”
Dungan nga Magkaplag og mga Solusyon
Ang matag sitwasyon sa pagtudlo naglakip sa kaugalingon niining mga opportunidad, mga hagit, ug potensyal nga mga panalangin. Mao kana kon nganong epektibo ang council, tungod kay nagtugot kini sa mga magtutudlo, uban sa tabang gikan sa Espiritu, sa pagpangita ug pagkaplag sa mga tubag sa ilang piho nga mga hagit.
Si Geoffrey Reid, usa ka Presidente sa Stake Sunday School sa Arizona, USA, nag-ingon nga ang mga miting sa teacher coucil labing maayo kon masabtan sa mga magtutudlo ang ilang mga katuyoan ngadto sa council: “Dayon ilang makita nga makatabang sila sa usag usa.”
Ang stake, miingon siya, nagtutok sa pagtabang sa mga magtutudlo sa pag-usab sa paagi sa ilang paghunahuna nga, “Maayo ba akong gihimo” ngadto sa paghunahuna nga, “Giunsa kaha pagdawat ang mensahe?”
Si Marisa Canova, usa ka Primary teacher sa stake, nag-ingon nga agi og tubag sa pag-aghat nga iyang nabati diha sa teacher council, siya nagdasig na karon sa iyang mga sakop sa klase sa Valiant 8 sa pag-ampo alang sa matag-usa. Epektibo kana, apan tingali dili kana mahimo alang sa klase sa mga hamtong. “Ang pag-ampo alang sa kada miyembro sa dakong klase sa Gospel Doctrine tingali lisud kaayo,” miingon siya. “Maayo nalang, nga kadtong mga magtutudlo miingon, ‘Unsaon man kaha nato kana sa pagpahiangay sa atong klase?’ Ug magdungan kita sa pagkaplag og mga solusyon.
“Ang ginindutan nako bahin sa mga miting sa teacher council,” miingon siya, “mao nga makahatag kini kanato og panahon sa pagpamalandong kon unsa nay dagan sa atong gibuhat. Makatabang nga maangkon ang pag-abag ug feedback, gibati nga kamong tanan nagtrabaho padulong sa samang tumong. Ganahan usab ko sa lain-laing mga punto nga daghang mga tawo nga makatampo diha sa miting. Makatabang kini kanako sa pagkonsiderar sa mga butang nga dili gayud nako ikonsiderar sa akong kaugalingon.”
Samtang moapil ug mopakigbahin kita diha sa mga miting sa teacher council, ang among panan-awon sa elepante nga gitawag og “pagtulun-an sa ebanghelyo” nagkatin-aw. Sama ni Brother Sitole sa Africa, daghang mga miyembro sa Simbahan nga nakamatngon nga kon ang atong mga abilidad sa pagtudlo sumala sa pamaagi sa Manluluwas molambo, makausab kini dili lang sa paagi nga kita magtudlo apan sa paagi usab nga kita magkat-on.