Usa ka Dinasig nga Tubag sa usa ka Interbyu sa Trabaho
Gibrair Padilha Dos Santos
São Paulo, Brazil
Litrato gikan sa Getty Images
Human nga gi-assign ko nga mangulo sa usa ka komite sa self-reliance sa stake, nakaamgo ko nga ako mismo dili igo ang panarbaho. Uban niining pagkaamgo, nagtinguha ko og dugang sa akong propesyunal nga kinabuhi.
Nabati nako nga nabag-o ang akong tinguha sa pagpangita og mas maayong trabaho ug nangayo og tabang sa paghimo og usa ka propesyonal nga résumé. Akong gipadala ang bag-o nakong résumé ngadto sa pipila ka mga patigayon ug sa wala madugay gitawag alang sa mga interbyu.
Sa usa ka interbyu, ang tig-interbyu mitudlo sa usa ka linya sa akong résumé nga naghisgut sa akong buhat isip counselor sa stake presidency ug mihangyo, “Mahimo ba ko nimong sultihan sulod sa lima ka segundo unsay gipasabut niining pagserbisyo sa simbahan?”
Miingon ko nga anaa ko sa posisyon sa pagkalider sa usa ka organisasyon nga responsable sa paggiya ug sa kaayohan sa kapin 2,500 ka mga tawo. Ang tig-interbyu nainteresado ug miingon, “Aduna kay usa ka minuto sa pagdesider kon sa unsang paagi nga mahatagan ko nimo og lima ka segundo nga tubag niining pangutana: Giunsa nimo paggiya kadtong 2,500 ka mga tawo?”
Nakahibalo ko nga mao na kini ang labing importante nga higayon sa interbyu. Nag-ampo ko ug mihangyo sa akong Langitnong Amahan alang sa tabang ug daling nakahinumdom sa mga leksyon nga akong nakat-unan sa grupo sa self-reliance. Nabati nako ang pagsulbong sa kamasaligon.
Human sa usa ka minuto, ang tig-interbyu nangutana, “Giunsa nimo paggiya kadtong 2,500 ka mga tawo?”
“Gitabangan namo sila sa paghimo og mga tumong,” mitubag ko.
Ang tig-interbyu mibarug, milamano nako, ug miingon, “Dawat na ka.”
Hilabihan ka nindot kon sa unsang paagi nga ang Dios miagak sa akong mga kamot ug mitubag sa akong mga pag-ampo. Mapasalamaton kaayo ko sa akong Manluluwas sa pagdasig sa atong mga lider sa pagmugna sa inisyatibo nga self-reliance. Personal ko nga napanalanginan niini, ug nakita nako ang kayano, dinasig nga proseso sa inisyatibo sa self-reliance nga makapanalangin sa uban sa among stake. Kumbisido gyud ko sa abilidad sa mga baruganan sa self-reliance sa paghaw-as sa mga kinabuhi nga sa dihang nahimo akong lider sa kapin sa 15 ka mga empleyado sa bag-o nakong trabaho, nagsugod ko sa pagtudlo nila sa mga baruganan sa self-reliance.
Milambo ko ug mas sarang labaw pa sa akong hunahuna nga akong mahimo. Ang akong sweldo karon igo nang makasustiner kanako ug sa akong pamilya. Kini nga inisyatibo makatabang kanato nga molambo sa matag adlaw pinaagi sa pagtabang kanato sa pagpangita og mas dakong self-reliance.